1 Timotius
Paulus susura masososa na
fee nonoon Timotius
1
Soda-moleꞌ
1-2 Timotius, ana susuek on!
Au, Paulus, au alosaꞌ haraꞌ soda-moleꞌ ia neuꞌ o. Manetualain soꞌu na au dadi uuꞌ Yesus Kristus lahenda nadedenun. Ita tamahena neuꞌ Ramatua Yesus, Manatulu-manafali nana huu Manetualain ita Manasoi-manatefa na.
Timotius! O sama leoꞌ au ana boki ka, nana huu au riꞌ atudu enoꞌ, fo o mamahere neuꞌ Kristus. Au hule-haradoi neuꞌ Manetualain ita Aman, ma Yesus Kristus ita Ramatuan, fo riꞌ Ara sue-lai ma ratudu dale malole nara neuꞌ o, ma bati fee o masoda no tetu-temaꞌ, mole-dame, ma tesatei-tamadaleꞌ.
Besa-besa mo lahenda fo fee nanori-nafadaꞌ ta matetuꞌ fa
3 Fai maneuꞌ ara ita dua sama-sama nai kota Efesus. Tepoꞌ fo au nau leo propinsi Makedonia uu, au atutuluꞌ o, fo leo nai Efesus. Fai ria, hapu lahenda ruma tao ramakoa lahenda kamahereꞌ ara reniꞌ nanori pepekoꞌ. De, au hule o muu masaꞌai si, fo ara bosoꞌ ranori raroo leoꞌ na.
4 Ara tutuꞌu-kakari ledo-fai nara, ma reu rasisipo bafaꞌ nara ro tutui faiuluꞌ pepekoꞌ. Sira boe rasesefi bafaꞌ laꞌeneuꞌ leo ra tititi-nonosi nara boe. Hihii-nanau rupa leo naꞌ ara, tao fee lahenda rahuu-ralena losaꞌ ara ta rasoda no namahereꞌ neuꞌ Manetualain.
5 Au fee nanori-nafadaꞌ neuꞌ o, ela leoꞌ bea na manori lahenda kamahereꞌ ara ela rasoda no nasue-nalai aoꞌ a. Ara rasoda leo naꞌ maneniko dale nara malole a, duduꞌa-aafi nara roos a, ma ramahere no dale katematua.
6 Mesen ruma heo dooꞌ a reu so, ma tuꞌu-kari heni nanori-nafadaꞌ ria. Sira boe tutuꞌu ledo-fai, fo reu rasisipo bafaꞌ ma dedea ratotofaꞌ.
7 Ara ratudu ao nara rae, sira nana mesen fo ranori baꞌi Musa hohoro-lalane nara. Ara tao ao nara sama leoꞌ mesen bauinaꞌ, tehuu ara ta bululuꞌ, hata fo ara ranorin.
8 Ita basa bululuꞌ tae, baꞌi Musa hohoro-lalanen katemaꞌ nana malole a! Sadi ita talalaꞌo asa tuka Manetualain hihii-nanaun.
9 Manetualain ta fee hohoro-lalaneꞌ sira neuꞌ lahenda fo rasoda no roo-tetuꞌ. Tehuu Ana fee neuꞌ lahenda madedea lakaꞌ, fo ta nau ramanene pareta, masoda nara dooꞌ a reme Manetualain mai, rahiiꞌ tao tadaluꞌ, ta tao mataꞌ neuꞌ Manetualain, manadadae hata malalao-malalafuꞌ a, manakanisaꞌ, manamaisa ina-ama bokiꞌ,
10 manahohoke, touꞌ sao touꞌ, mana homu lahenda fo seꞌo ela feen dadi ata, mapuputaꞌ, manasakasii pepekoꞌ, ma sudi bea fo tao basa hihii-nanauꞌ nalenalakaꞌ neuꞌ nanori matetuꞌ a.
11 Nanori matetuꞌ a riꞌ, neme Tutui Malole fo Manetualain fee neuꞌ au. Manetualain marela-masaꞌa. Naraa na, lahenda soꞌu radedema Ni.
Hule makasi neuꞌ Manetualain, nana huu dale malole Na
12 Au hule makasi dodouꞌ neuꞌ ita Ramatuan Yesus Kristus, nana huu here na au dadi uuꞌ Ria lahenda kamaheren, ma fee au mapii-baraꞌaiꞌ, losa au bisa alalaꞌo Ria nonoi-tataon.
13-14 Sekonaa te fai maneuꞌ ara, au ahiiꞌ dedea amumulu Yesus, ma tao doidoso lahenda fo tuka Ria eno masoda Na. Au ahiiꞌ ese-rumu ma tao alulutu si. Au tadalu leo naꞌ, nana huu tepoꞌ ria au ta bululuꞌ hata fo au taon, ma beita amahere neuꞌ ita Ramatuan Yesus Kristus. Tehuu Ana ta nafarene heni au ma natudu susue-lalain neuꞌ au. Lena-lenaꞌ bali, Ana natudu naroo dale malole Na neuꞌ au! Ana fee au babati-papalaꞌ mananoꞌu-manadaiꞌ, ela amahere tebe-tebe neuꞌ Ana, ma bisa sue-lai lahenda ra, sama leoꞌ Ana sue-lai au.
15 Dedeaꞌ ia tebe, de ita tamahere matetuꞌ rae, “Yesus Kristus onda nai dae-bafoꞌ ia, ela soi-tefa lahenda masala-masikoꞌ ara.” Neme basa lahenda mana tao salaꞌ ara, au riꞌ tadalu lena.
16 Leo mae au tadaluꞌ leoꞌ na, tehuu Manetualain naetuꞌ fo ta huku au fa. Ana nau pake au dadi natutuduꞌ ela atudu Yesus Kristus dale nanenete na neuꞌ lahenda fo tadaluꞌ naan seli sama leoꞌ au ia. No ria na lahenda fekeꞌ fo tao sala-sikoꞌ a, sira boe bisa ramahere neuꞌ Ana, ela ara hapu soda-moleꞌ manabasa taꞌa.
17 Io-oa Manetualain!
Noi Ria riꞌ, Manetualain;
ta hapu fekeꞌ!
Ria nana Maneꞌ fo homu pareta manabasa taꞌa.
Ana nasoda naroo.
Ana ta mate fa.
Lahenda ta bisa rita Ni.
Lahenda fee hada-hormata ma io-oa neuꞌ Ana,
losaꞌ do-doo na neu!
Amin.
18 Timotius au ana dale malole ka! Nonoi lakaꞌ ia au feen neuꞌ o, de musti malalaꞌo ana naraa no maulu na Manetualain mana nesimata nara rafada a. Maneniko o tuka basa dedea-nafadaꞌ sira no malole, o dadi sama leoꞌ soldadu esa bisa natati nalelaꞌ soaꞌ basa tadaluꞌ ara.
19 Mamahere maroo neuꞌ Kristus. Manea o dale ma ela malalao-malalafuꞌ a losa do-doo na neu. Lahenda ruma ta nau ramanene neuꞌ dale ana boboko nara soꞌ, losaꞌ tao nalulutuꞌ sira namahere nara, sama leoꞌ ofaꞌ nalulutuꞌ nana huu hara nai teteꞌ lain.
20 Himeneus no Aleksander, leo naꞌ! De au heo heni si reme lahenda kamahereꞌ ara mai, sama leoꞌ fee heni si leo nitu ra malaka na reu. Au tao leo naꞌ, nana ela dadi nanoriꞌ esa, fo ara bosoꞌ ramumulu Manetualain bali.