9
سبْعِينْ ن سِيمَانَاثْ
1 ذڭْ ؤُسڭّْوَاسْ أَمزْوَارُو ن ذَارِييُوسْ، مِّيسْ ن أَحَاشْوِيرُوسْ، ونِّي زڭْ أَيْثْ ن مَاذَايْ، ونِّي إِذوْڒنْ ذ أَجدْجِيذْ خْ ثْڭلْذِيثْ ن إِكَالْذَانِييّنْ،
2 ذڭْ ؤُسڭّْوَاسْ أَمزْوَارُو ن ثْڭلْذَا نّسْ إِبَانْ-أَيِي-د، إِ نشّْ ذَانِييَالْ، زڭْ إِذْلِيسنْ، بلِّي ڒْْقدّْ ن إِسڭّْوُوسَا إِ خْ ثُوغَا إِسِّيوڒْ وَاوَاڒْ ن سِيذِي إِ ؤُنَابِي إِرْمِييَا إِ ؤُكمّڒْ ن ڒْْوقْثْ ن ڒْْخِيرْبَاثْ ن ؤُرْشَالِيمْ، ثُوغَا-ث سبْعِينْ ن إِسڭّْوُوسَا.
3 نشّْ أَرِّيغْ أَغمْبُوبْ إِنُو غَارْ سِيذِي أَربِّي، حِيمَا أَذْ خَاسْ أَرْزُوغْ س ثْژَادْجِيثْ ذ ؤُزَاوڭْ، س ؤُژُومِّي ذڭْ ثْخَانْشثْ ن وشْضَانْ ذ يِيغّضْ.
4 نشّْ ژُّودْجغْ إِ سِيذِي، أَربِّي إِنُو، ؤُ نعْمغْ خْ دّْنُوبْ نّغْ، نِّيغْ
”أَ سِيذِي إِنُو، شكْ ذ أَربِّي أَمقّْرَانْ ذ إِسِّيڭّْوِيذنْ، ونِّي إِحطَّانْ ڒْْعَاهْذْ نّسْ ذ ثْمخْسِيوْثْ نّسْ إِشوَّارنْ إِ يِينِّي ث إِتّخْسنْ ؤُ إِ يِينِّي إِحطَّانْ ثِيوصَّا نّسْ.
5 نشِّينْ نخْضَا ؤُ نڭَّا ڒْْمُوعْصِييّثْ ذ ڒْْغَارْ ؤُ نْغوّغْ أَمْ نفّغْ زِي ثِيوصَّا ذ لْفَارَايِيضْ نّشْ.
6 وَارْ نسْڒِي إِ إِمْسخَّارنْ نّشْ، إِنَابِييّنْ، إِنِّي ثُوغَا إِسَّاوَاڒنْ ذڭْ يِيسمْ نّشْ إِ إِجدْجِيذنْ نّغْ ذ ڒْْحُوكَّامْ نّغْ ذ ڒجْذُوذْ نّغْ ؤُڒَا إِ مَارَّا ڒْڭنْسْ ن ثمُّورْثْ.
7 شكْ، أَ سِيذِي إِنُو، غَاركْ ثَاسڭْذَا، مَاشَا نشِّينْ غَارْنغْ ڒحْيَا ذڭْ ؤُغمْبُوبْ، أَمْ مَامّشْ ثدْجَا أَسّْ-أَ، غَارْ إِرْيَازنْ ن يَاهُوذَا ذ إِمزْذَاغْ ن ؤُرْشَالِيمْ ذ مَارَّا إِسْرَائِيل، غَارْ يِينِّي يُوذْسنْ ذ يِينِّي إِڭّْوجنْ ذِي مَارَّا ثِيمُّورَا مَانِي خَاسنْ ثُوژّْڒذْ شكْ ذِي سِّيبّثْ ن ڒغْذَارْ نْسنْ إِ زِي شكْ غْضَارنْ.
8 أَ سِيذِي، ذَايْنغْ ڒحْيَا ذڭْ ؤُغمْبُوبْ نّغْ، أَقَا-ث ذڭْ إِجدْجِيذنْ نّغْ ذِي ڒْْحُوكَّامْ نّغْ ذڭْ إِبَابَاثنْ نّغْ مَاغَارْ نشِّينْ نخْضَا أَكِيذكْ.
9 غَارْ سِيذِي إِنُو، أَربِّي نّغْ، أَرّحْمثْ ذ وغْفَارْ، وَاخَّا نشِّينْ نْغوّغْ خَاسْ.
10 وَارْ نسْڒِي إِ ثْمِيجَّا ن سِيذِي، أَربِّي نّغْ، مَاحنْذْ أَذْ نُويُورْ ذِي لْقَاوَانِينْ نّسْ نِّي إِ ذ أَنغْ إِوْشَا س ؤُفُوسْ ن إِمْسخَّارنْ نّسْ، إِنَابِييّنْ.
11 مَارَّا إِسْرَائِيل ثُوغَا إِتّْعدَّا خْ شَّارِيعَا نّشْ ؤُ إِتّفّغْ زڭْ وبْرِيذْ مَاحنْذْ وَارْ إِتّسْڒِي إِ ثْمِيجَّا نّشْ. ؤُ أَمُّو إِ خَانغْ ثتّْوَازدْجعْ نّعْڒثْ إِ إِتّْوَاضمْننْ س ثْجَادْجِيثْ إِ إِتّْوَارِينْ ذِي شَّارِيعَا ن مُوسَا، أَمْسخَّارْ ن أَربِّي، مِينْزِي نشِّينْ نخْضَا أَكِيذسْ.
12 نتَّا إِڭَّا أَوَاڒنْ نّسْ تّْبدَّانْ، أَوَاڒنْ نِّي إِسِّيوڒْ أَكِيذْنغْ ؤُ أَكْ-ذ ڒْْقُوضَاثْ نّغْ نِّي ثُوغَا إِ خَانغْ إِحكّْمنْ، أَمْ ذَايْنغْ إِڭَّا إِجّْ ن ڒْْغَارْ ذ أَمقّْرَانْ إِ وَارْ إِمْسَارنْعمَّارْصْ سَاذُو ؤُجنَّا، أَمْ مَامّشْ إِ إِتّْوَاڭّْ إِ ؤُرْشَالِيمْ.
13 أَمْ مَامّشْ ثُورَا ذِي شَّارِيعَا ن مُوسَا، أَمُّو يُوسَا-د خَانغْ مَارَّا ڒْْغَارْ نِّي. ؤُ نشِّينْ خنِّي وَارْ نْزَاوڭْ شَا زَّاثْ إِ وُوذمْ ن سِيذِي، أَربِّي نّغْ، مَاحنْذْ أَذْ نْحيّذْ خْ ڒْْمُوعْصِييّثْ نّغْ ؤُ مَاحنْذْ أَذْ نَارْزُو أَذْ نفْهمْ ثِيذتّْ نّشْ.
14 سِيذِي إِحْضَا ڒْْغَارْ ؤُشَا إِسَّارْسْ إِ-ث-إِ-د خَانغْ، مَاغَارْ سِيذِي، أَربِّي نّغْ ذ أَمْسڭّذْ ذِي مَارَّا ڒفْعَايڒْ نّسْ نِّي إِڭَّا ؤُمِي وَارْ نسْڒِي غَارْ ثْمِيجَّا نّسْ.
15 ؤُ ڒخُّو، أَ سِيذِي، أَربِّي نّغْ، ونِّي إِسُّوفّْغنْ ڒْْڭنْسْ نّشْ زِي ثمُّورْثْ ن مِيصْرَا س يِيجّْ ن ؤُفُوسْ إِجهْذنْ ؤُ ونِّي إِڭِّينْ إِ يِيخفْ نّسْ إِجّْ ن يِيسمْ، أَمْ مَامّشْ إِدْجَا أَڒْ أَسّْ-أَ. نشِّينْ نخْضَا ؤُ نڭَّا ڒْْغَارْ.
16 أَ سِيذِي إِنُو، زِي سِّيبّثْ ن ثْسڭْذَا نّشْ، سْحيّذْ أَغْضَابْ نّشْ ذ وسْعَارْ نّشْ خْ ثنْذِينْثْ نّشْ ؤُرْشَالِيمْ، خْ وذْرَارْ نّشْ إِقدّْسنْ. مَاغَارْ زِي سِّيبّثْ ن دّْنُوبْ نّغْ ذ ڒْْمُوعْصِييّثْ ن ڒجْذُوذْ نّغْ ثذْوڒْ ؤُرْشَالِيمْ ذ ڒْْڭنْسْ نّشْ ذ ڒْْعَارْ إِ مَارَّا إِنِّي ذ أَنغْ د-إِنّْضنْ.
17 ؤُ ڒخُّو، أَ أَربِّي نّغْ، سڒْ غَارْ ثْژَادْجِيثْ ن ؤُمْسخَّارْ نّشْ ؤُ غَارْ ؤُزَاوڭْ نّسْ، أجّْ ؤُذمْ نّشْ أَذْ يڭّْ ثَافَاوْثْ ذِي طّْوعْ نّشْ، أَ سِيذِي إِنُو، خْ زَّاوشْثْ نّشْ إِقدّْسنْ، ثنِّي إِذوْڒنْ ذ ڒْْخَارْبثْ.
18 أوْشْ أَمزُّوغْ نّشْ، أَ أَربِّي، سڒْ. أَرْزمْ ثِيطَّاوِينْ نّشْ ؤُ خْزَارْ ڒْْخِيرْبَاثْ ذ ثنْذِينْثْ نِّي إِتّْوَاڒَاغَانْ س يِيسمْ نّشْ، مِينْزِي نشِّينْ وَارْ نوْضِي زَّاثْ إِ وُوذمْ نّشْ مَاحنْذْ أَذْ نْزَاوڭْ خْ ؤُسْذَاهدْجِي ن ثْسڭْذَا نّغْ، مَاشَا خْ ؤُسْذَاهدْجِي ن أَرَّاحْمثْ نّشْ ثَامقّْرَانْثْ.
19 أَ سِيذِي إِنُو، سڒْ! أَ سِيذِي إِنُو، غْفَارْ! أَ سِيذِي إِنُو، حْضَا ؤُشَا أڭّْ، وَارْ ثْعطَّاڒْ شَا، ذِي طّْوعْ ن يِيخفْ نّشْ، أَ أَربِّي إِنُو، مَاغَارْ ثَانْذِينْثْ نّشْ ذ ڒْْڭنْسْ نّشْ تّْوَاڒَاغَانْ س يِيسمْ نّشْ.“
20 أَمْ ثُوغَا سَّاوَاڒغْ عَاذْ ؤُ تّْژَادْجِيغْ ؤُ نعّْمغْ س دّْنُوبْ إِنُو ذ دّْنُوبْ ن ڒْْڭنْسْ إِنُو إِسْرَائِيل ؤُ تّْزدْجْعغْ أَزَاوڭْ إِنُو زَّاثْ إِ وُوذمْ ن سِيذِي، أَربِّي إِنُو، ذِي طّْوعْ ن وذْرَارْ إِقدّْسنْ ن أَربِّي إِنُو،
21 أَمْ ثُوغَا سَّاوَاڒغْ عَاذْ أَمُّو، تّْژَادْجِيغْ، يُوسَا-د ورْيَازْ جِيبْرِيلْ نِّي ژْرِيغْ ذڭْ ؤُمزْوَارُو ذِي ڒوْحِييْ، إِضْوَا-د زڭْ ؤُجنَّا غَارِي. إِحَاذَا أَيِي غَارْ ڒْْوقْثْ ن ثوْهِيبْثْ ن ثْمذِّيثْ.
22 نتَّا إِسّفْهمْ ؤُ إِسِّيوڒْ أَكِيذِي، إِنَّا:
”ذَانِييَالْ، نشّْ فّْغغْ-د غَارْ ڒْْوقْثْ-أَ مَاحنْذْ أَذْ شكْ سَّارْڭْبغْ خْ ڒْْمعْنَا.
23 غَارْ ؤُمزْوَارُو ن ؤُزَاوڭْ نّشْ إِفّغْ-د يِيجّْ ن وَاوَاڒْ ؤُ نشّْ ؤُسِيغْ-د حِيمَا أَذْ أَشْ ث نِّيغْ، مَاغَارْ شكْ ذ إِجّْ ن ورْيَازْ إِعِيزّنْ أَطَّاسْ. فْهمْ أَوَاڒْ-أَ ؤُ أَرْزُو ڒفْهَامثْ ذِي ڒوْحِييْ-أَ.
24 تّْوَاڭّنْثْ سبْعِينْ ن سِّيمَانَاثْ خْ ڒْْڭنْسْ نّشْ ؤُ خْ ثنْذِينْثْ نّشْ إِقدّْسنْ، حِيمَا أَذْ إِتّْوَاسّْبدّْ ؤُعدُّو ؤُ أَذْ إِتّْوَاشمّعْ دّنْبْ ؤُ أَذْ ثتّْوَاصْڒحْ إِ ڒْْمُوعْصِييّثْ ؤُ حِيمَا أَذْ ثتّْوَاوِي ثْسڭْذَا ؤُ حِيمَا أَذْ إِتّْوَاكمّڒْ ڒوْحِييْ ذ ؤُنَابِيمْ ؤُ حِيمَا أَذْ إِتّْوَاذْهنْ مِينْ إِدْجَانْ إِقدّْسنْ قَاعْ.
25 سّنْ ؤُ فْهمْ، أَقَا زڭْ وَامِي د-إِفّغْ وَاوَاڒْ حِيمَا أَذْعذْڒنْ ؤُ أَذْ بْنَانْ ؤُرْشَالِيمْ أَڒْ أَمذْهُونْ، مِينْ إِخْسْ أَذْ يِينِي لْمَاسِيحْ، ڒْْحَاكمْ، أَقَا سبْعَا ن سِّيمَانَاثْ، ؤُ ثْنَاينْ ؤُ-ستِّينْ ن سِيمَانَاثْ أَذْ ثقِّيمْ ثنْذِينْثْ ثثْوَاعذڒْ ؤُ أَذْ ثتّْوَابْنَا ؤُرْشَالِيمْ عَاوذْ أَكْ-ذ وَازَّايْ ذ وُورغْ إِقُّورنْ، عَاذْ ذِي ڒحْصَارثْ ن ڒوْقَاثْ يوْعَارنْ.
26 أَوَارْنِي ثْنَاينْ ؤُ-ستِّينْ ن سِّيمَانَاثْ نِّي أَذْ إِتّْوَاكّسْ ؤُمذْهُونْ ؤُ وَارْ غَارسْ إِتِّيڒِي وَالُو. ؤُ ثَانْذِينْثْ ذ زَّاوشْثْ إِقدّْسنْ أَذْ تّْوَاردّْدْجنْثْ س يِيجّْ نْ ڒْڭنْسْ ن إِجّْ نْ ڒْحَاكمْ ونِّي إِ د غَا يَاسنْ ؤُ ثَانڭَّارُوثْ نّسْ أَذْ ثِيڒِي ذِي سّحْڒثْ ؤُشَا أَذْ ذِينْ يِيڒِي ؤُمنْغِي أَڒْ أَنڭَّارْ، أَردّدْجْ نِّي أَقَا يُورَا أَذْ يِيڒِي.
27 نتَّا أَذْ إِسّذْقڒْ ڒْْعَاهْذْ إِ وَاطَّاسْ إِ يِيجّْ ن ڒْْمِيجَاڒْ نْ إِشْثْ ن سِّيمَانَا ؤُ ذڭْ وزْينْ ن سِّيمَانَا أَذْ إِسّْبدّْ ثَاغَارْصْثْ ذ ثوْهِيبْثْ ن ڒْْغِيدْجثْ ؤُ خْ وَافْرِيوْ ن نّْعَاوَاثْ أَذْ د-يَاسْ إِجّْ ن ؤُمْثحَّايْ أَڒْ غَا إِتّْوَافَارّغْ ڒحْكَامْ إِ يُورِينْ خْ ونِّي إِتّْوَاثحَّانْ.