1 ”أَذْ إِمْسَارْ، مَاڒَا ثسْڒِيذْ مْلِيحْ إِ ثْمِيجَّا ن سِيذِي، أَربِّي نّشْ، أَذْ ثحْضِيذْ مَارَّا ثِيوصَّا نّسْ، ثِينِّي ذ أَشْ تُّومُورغْ أَسّْ-أَ حِيمَا أَذْ ثنْثْ ثڭّذْ، خنِّي أَذْ شكْ إِسُّوعْڒَا سِيذِي، أَربِّي نّشْ، خْ مَارَّا ڒڭْنُوسْ ن ثمُّورْثْ. ◘ 2 مَارَّا لْبَارَاكَاثْ-أَ أَذْ خَاكْ د-أَسنْثْ، أَذْ أَشْ د-أَوْضنْثْ، مَاڒَا ثسْڒِيذْ إِ ثْمِيجَّا ن سِيذِي، أَربِّي نّشْ.

3 أَذْ ثتّْوَابَارْكذْ ذِي ثنْذِينْثْ ؤُ أَذْ ثتّْوَابَارْكذْ ذڭْ إِيَّارْ. 4 أَذْ ثتّْوَابَاركْ ڒْْغِيدْجثْ ن ؤُعذِّيسْ نّشْ ذ ڒْْغِيدْجثْ ن ثمُّورْثْ نّشْ ذ ڒْْغِيدْجثْ ن ڒبْهَايمْ نّشْ ذ ثْوَارُورَا ن ثْفُونَاسِينْ نّشْ ذ إِمژْيَاننْ إِعِيزّنْ ن وُودْجِي نّشْ. 5 أَذْ ثتّْوَابَاركْ ثْسُودْجثْ نّشْ ذ ثبْقشْثْ نّشْ. 6 أَذْ ثتّْوَابَارْكذْ غَارْ وَاذَافْ نّشْ، أَذْ ثتّْوَابَارْكذْ ذڭْ وُوفُّوغْ نّشْ.“

7 ”سِيذِي أَذْ إِسلّمْ ڒْْعذْيَانْ نّشْ، إِنِّي خَاكْ غَا إِكَّارنْ ذ إِبَارْحَاضْ زَّاثْ إِ وُوذمْ نّشْ. أَذْ خَاكْ د-فّْغنْ ذڭْ وبْرِيذْ ذ إِجّْ ؤُشَا أَذْ أَروْڒنْ زَّاثْ إِ وُوذمْ نّشْ خْ سبْعَا ن إِبْرِيذنْ. 8 سِيذِي أَذْ أَشْ يُومُورْ س لْبَارَاكَا ذِي ثسْرَافِينْ نّشْ ؤُ خْ مَارَّا مِينْ إِڭَّا ؤُفُوسْ نّشْ. نتَّا أَذْ شكْ إِبَاركْ ذِي ثمُّورْثْ نِّي إِ ذ أَشْ غَا إِوْشْ سِيذِي، أَربِّي نّشْ. 9 سِيذِي أَذْ شكْ يَارّْ أَذْ ثكَّارذْ أَمْ يِيجّْ ن ڒْْڭنْسْ إِقدّْسنْ إِ يِيخفْ نّسْ أَمْ مَامّشْ إِ ذ أَشْ إِجِّيدْجْ، خْمِي غَا ثحْضِيذْ ثِيوصَّا ن سِيذِي، أَربِّي نّشْ، ؤُشَا أَذْ ثُويُورذْ ذڭْ إِبْرِيذنْ نّسْ. 10 مَارَّا ڒڭْنُوسْ ن ثمُّورْثْ أَذْ ژَترنْ بلِّي إِسمْ ن سِيذِي إِتّْوَاذنَّا خَاكْ ؤُشَا أَذْ زَّايكْ ڭّْوذنْ. 11 سِيذِي أَذْ أَشْ إِوْشْ ڒْْخَارْ س ؤُفيّضْ ذِي ڒْْغِيدْجثْ ن ؤُعذِّيسْ نّشْ ؤُ ذِي ڒْْغِيدْجثْ ن ڒبْهَايمْ نّشْ ؤُ ذِي ڒْْغِيدْجثْ ن ثمُّورْثْ نّشْ، ذِي ثمُّورْثْ نِّي إِجِّيدْجْ سِيذِي إِ ڒجْذُوذْ نّشْ أَذْ أَشْ ت-إِ-د-إِوْشْ. ◘ 12 سِيذِي أَذْ أَشْ يَارْزمْ ثَاوَّارْثْ ن وخَّامْ نّسْ ن ثْخُوبَايْ إِصڒْحنْ، إِجنْوَانْ، حِيمَا أَذْ إِوْشْ أَنْژَارْ إِ ثمُّورْثْ نّشْ ذِي ڒْْوقْثْ نّسْ ؤُ حِيمَا أَذْ إِبَاركْ مَارَّا ڒْْخذْمثْ ن ؤُفُوسْ نّشْ. أَذْ ثَارْضْڒذْ إِ وَاطَّاسْ ن ڒڭْنُوسْ، مَاشَا شكْ وَارْ خَاسنْ ثَارطّْڒذْ. 13 سِيذِي أَذْ شكْ يَارّْ ذ أَزدْجِيفْ، وَارْ إِدْجِي ذ ؤُنوَّارْ، ؤُشَا شكْ وَاهَا أَذْ ثِيڒِيذْ سنّجْ، وَارْ ثتِّيڒِيذْ سْوَادَّايْ، مَاڒَا ثسْڒِيذْ إِ ثْوصَّا ن سِيذِي، أَربِّي نّشْ، ونِّي إِ ذ أَشْ تُّومُورغْ أَسّْ-أَ حِيمَا أَذْ ثنْثْ ثحْضِيذْ ؤُشَا أَذْ زَّايْسنْثْ ثڭّذْ. 14 وَارْ تّْحيِّيذْ شَا غَارْ يفُوسْ ؤُڒَا غَارْ ؤُزڒْمَاضْ خْ مَارَّا أَوَاڒنْ نِّي ذ أَشْ ؤُمُورغْ أَسّْ-أَ أَڒَامِي غَا ثضْفَارذْ إِربِّيثنْ نّغْنِي، أَذْ خَاسنْ ثْسخَّارذْ. 15 مَاشَا أَذْ إِمْسَارْ، مَاڒَا وَارْ ثسْڒِيذْ إِ وَاوَاڒْ ن سِيذِي، أَربِّي نّشْ، حِيمَا أَذْ ثحْضِيذْ مَارَّا ڒُْومُورَاثْ ذ ثْوصَّا نّسْ إِ خْ ذ أَشْ تُّومُورغْ أَسّْ-أَ، حِيمَا أَذْ زَّايْسنْثْ ثڭّذْ، خنِّي مَارَّا نّْعَاڒِي-يَا أَذْ خَاكْ د-هْوَانْثْ ؤُ أَذْ شكْ ڒقْفنْثْ:◘

16 أَذْ ثِيڒِيذْ ذ أَمنْعُوڒْ ذِي ثنْذِينْثْ ؤُ أَذْ ثِيڒِيذْ ذ أَمنْعُوڒْ ذڭْ إِيَّارْ. 17 ثَاسُودْجثْ نّشْ ذ ثبْقشْثْ نّشْ أَذْ إِڒِينْثْ تّْوَانعْڒنْثْ. 18 ذ ثَامنْعُوڒْثْ إِ غَا ثِيڒِي ڒْْغِيدْجثْ ن ؤُعذِّيسْ نّشْ ذ ڒْْغِيدْجثْ ن ثمُّورْثْ نّشْ ؤُ ثْوَارُورَا ن ثْفُونَاسِينْ نّشْ ذ إِمژْيَاننْ إِعِيزّنْ ن وُودْجِي نّشْ. 19 أَذْ ثِيڒِيذْ ذ أَمنْعُوڒْ غَارْ وَاذَافْ نّشْ ؤُ أَذْ ثِيڒِيذْ ذ أَمنْعُوڒْ ذڭْ ؤُفُّوغْ نّشْ.“

20 ”أَذْ أَشْ د-إِسّكّْ سِيذِي نّعْڒثْ ذ ؤُخَارْوضْ ذ ؤُهذِّي غَارْ مَارَّا مَانِي إِسّْوِيژّذْ ؤُفُوسْ نّشْ، أَڒْ غَا ثتّْوَامْحِيذْ ؤُ أَذْ ثفْنِيذْ ذغْيَا زَّاثْ إِ وُوذمْ إِنُو ذِي سِّيبّثْ ن ڒخْذَايمْ نّشْ ثِيعفَّانِينْ، مِينْزِي ثجِّيذْ أَيِي. 21 سِيذِي أَذْ ذَايكْ إِسّڒْصقْ طَّاعُونْ أَڒْ شكْ غَا إِقْضَا زِي ثمُّورْثْ نِّي غَارْ غَا ثَاذْفذْ حِيمَا أَذْ ت ثكْسِيذْ ذ ڒْْوَارْثْ. 22 سِيذِي أَذْ شكْ إِوّثْ س بُو-ذدْجِيسْ، س ثْمسِّي ن أَرْوَاحْ ذ ؤُڭيّحْ، س ڒحْمُو ذ ڒَْاژَاغْ، س إِمنْذِي إِتّْوَاسّْشمْضنْ زڭْ ؤُسمِّيضْ ؤُڒَا ذ جّْرِيحشْثْ ن وفْسُو. إِنَا أَذْ شكْ ضْفَارنْ أَڒْ غَا ثْهلّْكذْ. ◘ 23 أَجنَّا نِّي إِدْجَانْ ثِيوَا إِ ؤُزدْجِيفْ نّشْ أَذْ يِيڒِي ذ نّْحَاسْ ؤُ ثَامُّورْثْ نِّي إِدْجَانْ سَاذُو نّشْ ذ ؤُزَّاڒْ. ◘ 24 أَذْ يَارّْ سِيذِي، أَربِّي نّشْ، أَنْژَارْ ن ثمُّورْثْ نّشْ ذ إِجّْ ن ؤُسيْنُو ن ڒعْجَاجْ ذ إِبْقُوقنْ ن ڒعْجَاجْ. مَانْ أَيَا أَذْ خَاكْ د-إِهْوَا أَڒْ غَا ثتّْوَاثحِّيذْ. 25 سِيذِي أَذْ شكْ يَارّْ ثتّْوَاغڒْبذْ زَّاثْ إِ وُوذمْ ن ڒْْعذْيَانْ نّشْ. ذڭْ إِجّْ ن وبْرِيذْ أَذْ د-ثفّْغذْ ضِيدّْ إِ ڒعْذُو نّشْ ؤُشَا أَذْ ثَاروْڒذْ زَّاثْ إِ وُوذمْ نّسْ خْ سبْعَا ن إِبْرِيذنْ ؤُشَا أَذْ ثِيڒِيذْ ذ إِشْثْ ن ڒْْقشْعثْ ن ؤُنخْڒِيعْ إِ مَارَّا ثِيڭلْذِيوِينْ ن دُّونشْثْ. 26 ڒْْخشْبثْ نّشْ أَذْ ثِيڒِي ذ مَاشَّا إِ إِجْضَاضْ ن ؤُجنَّا ؤُ إِ مَارَّا ڒْْمَاڒْ خْ ثمُّورْثْ ؤُشَا ؤُڒَا ذ إِجّْ وَارْ إِزمَّارْ أَذْ ثنْ إِسِّيڭّْوذْ. 27 سِيذِي أَذْ شكْ إِوّثْ س ثْحبَّا ن مِيصْرَا، س إِعبُّوزنْ، س جْذَامْ، س وَاجِّيضْ أَڒْ غَا ثَافْ وَارْ ثْزمَّارذْ أَذْ ثڭّنْفِيذْ. ◘ 28 سِيذِي أَذْ شكْ إِوّثْ س ثُوبُّوهڒْيَا، س ثُودَّارْغتْشْ ؤُ س أَرْجفْ ن وُوڒْ.“

29 ”ذڭْ وزْينْ ن ؤُزِيڒْ أَذْ ثْحَاذِيذْ أَمْ ؤُحَاذِي ن ؤُذَارْغَاڒْ ذِي ثَادْجسْثْ. إِبْرِيذنْ نّشْ وَارْ تِّيڒِينْ صڒْحنْ، وَاهْ، أَذْ ثِيڒِيذْ ثتّْوَاحْصَارذْ ؤُ ثتّْوَاكشّْضذْ مَارَّا ؤُسَّانْ ن ثُوذَارْثْ نّشْ ؤُشَا وَارْ إِتِّيڒِي وِي شكْ غَا إِسّنْجْمنْ. 30 أَذْ ثْخضْبذْ إِشْثْ ن ثمْغَارْثْ ؤُشَا إِجّْ ن ورْيَازْ نّغْنِي أَذْ ت إِسّْنُوقّبْ، أَذْ ثبْنِيذْ ثَادَّارْثْ إِ يِيخفْ نّشْ ؤُشَا وَارْ ذَايسْ ثْزدّْغذْ، أَذْ ثڭِّيذْ إِجّْ ن ؤُمَارْجعْ ن ؤُضِيڒْ أَذْ ذَايسْ ثژُّوذْ ثِيزَايَارِينْ مَاشَا وَارْ زَّايْسنْثْ ثسْثنْفِيعذْ. 31 أَفُونَاسْ نّشْ أَذْ إِتّْوَاغَارْصْ زَّاثْ إِ ثِيطَّاوِينْ نّشْ ؤُشَا وَارْ زَّايسْ ثتّتّذْ، أَغْيُوڒْ نّشْ أَذْ ث ؤُشَارنْ زَّاثْ إِ وُوذمْ نّشْ ؤُشَا وَارْ ذ أَشْ د-إِتّْعِيقِّيبْ. ؤُدْجِي نّشْ أَذْ ث وْشنْ إِ ڒْْعذْيَانْ نّشْ ؤُشَا وَارْ غَاركْ إِتِّيڒِي وِي غَا إِسّنْجْمنْ. 32 أَذْ مّوْشنْ إِحنْجِيرنْ نّشْ ذ ثْحنْجِيرِينْ نّشْ إِ يِيجّْ ن ڒْْڭنْسْ نّغْنِي. ثِيطَّاوِينْ نّشْ أَذْ ثْوَاڒَانْثْ ؤُشَا أَذْ ذَايْسنْ ثمّژْرذْ أَسّْ إِكْمڒْ ؤُشَا وَارْ إِتِّيڒِي جّهْذْ ذڭْ ؤُفُوسْ نّشْ. 33 ڒْْغِيدْجثْ ن ثمُّورْثْ نّشْ ذ مَارَّا ڒْْخذْمثْ نّشْ أَذْ ث إِشّْ إِجّْ ن ڒْْڭنْسْ إِ وَارْ ثسِّينذْ ؤُشَا أَذْ ثِيڒِيذْ ثحْصَارذْ ؤُ أَذْ ثْڒبْزذْ وَاهَا مَارَّا ؤُسَّانْ ن ثُوذَارْثْ نّشْ. 34 أَذْ ثْذوْڒذْ ذ أَبُوهَاڒِي زِي سِّيبّثْ ن مِينْ غَا ثْژَارذْ س ثِيطَّاوِينْ نّشْ.“

35 ”سِيذِي أَذْ شكْ إِوّثْ س ثْحبَّا ثِيعفَّانِينْ غَارْ إِفَادّنْ ؤُ غَارْ إِضَارنْ إِ زِي وَارْ ثْزمَّارذْ أَذْ زَّايْسنْ ثڭّنْفِيذْ، زِي ثْڒقَّا ن ؤُضَارْ نّشْ أَڒْ أَشقُّوفْ ن ؤُزدْجِيفْ نّشْ. 36 سِيذِي أَذْ شكْ يَارّْ جْمِيعْ أَكْ-ذ ؤُجدْجِيذْ نّشْ، ونِّي شكْ غَا ثڭّذْ خْ يِيخفْ نّشْ، أَذْ ثْرَاحذْ غَارْ إِجّْ ن ڒْْڭنْسْ نِّي وَارْ ثسِّينذْ شَا، ؤُڒَا ذ ڒجْذُوذْ نّشْ، ؤُشَا ذِينْ إِ غَا ثْسخَّارذْ إِ إِربِّيثنْ نّغْنِي ن ؤُكشُّوضْ ذ وژْرُو. 37 أَذْ ثِيڒِيذْ ذ إِشْثْ ن ڒْْقشْعثْ ن ؤُنخْڒِيعْ ذ إِجّْ ن ؤُمذْيَا ذ إِشْثْ ن سِّيبّثْ إِ ؤُسْثهْزِي إِقسْحنْ جَارْ مَارَّا ڒڭْنُوسْ مَانِي شكْ غَا إِنْذهْ سِيذِي. 38 أَذْ ثسُّوفّْغذْ أَطَّاسْ ن زَّارِيعثْ غَارْ ييَّارْ ؤُشَا أَذْ ثْڒقْضذْ ذْرُوسْ، مِينْزِي ثَامُورْغِي أَذْ ت ثحْڒُووْ. ◘ 39 أَذْ ثڭِّيذْ إِمَارْجَاعنْ ن ؤُضِيڒْ أَذْ ذَايْسنْ ثژُّوذْ ثِيزَايَارِينْ ؤُشَا أَذْ ثنْثْ ثْعَارّْصذْ، مَاشَا وَارْ ثْسسّذْ بِينُو ؤُشَا وَارْ ثْڒقّْضذْ وَالُو، مِينْزِي أَذْ ثنْثْ إِشّْ ؤُكشَّا. 40 أَذْ غَاركْ إِڒِينْ إِزمُّورنْ ذِي مَارَّا ثَامُّورْثْ نّشْ، مَاشَا وَارْ ثْذهّْنذْ إِخفْ نّشْ س زّشْثْ، مِينْزِي أَذْ إِوْضَا زِّيثُونْ زڭْ ؤُزمُّورْ نّشْ قْبڒْ ڒْْوقْثْ. 41 أَذْ د-ثجّذْ إِحنْجِيرنْ ذ ثْحنْجِيرِينْ، مَاشَا وَارْ تِّيڒِينْ شَا نّشْ، مِينْزِي أَذْ رُوحنْ ذِي ثْمحْبَاسْثْ. 42 مَارَّا ثِيشجِّيرَا ذ ڒْْغِيدْجثْ ن ثمُّورْثْ نّشْ أَذْ ثنْثْ ثطّفْ ثْمُورْغِي ذ ثَاسْغَارْثْ نّسْ. 43 أَبَارَّانِي نِّي إِدْجَانْ ذِي ڒْْوسْطْ نّشْ، أَذْ خَاكْ إِسُّوعْڒَا إِخفْ نّسْ، سنّجْ ؤُ سنّجْ عَاذْ، ؤُشَا شكْ أَذْ ثتّْوَاسّهْوِيذْ غَارْ ثمُّورْثْ، سْوَادَّايْ غَارْ وَادَّايْ. 44 نتَّا أَذْ أَشْ يَارْضڒْ، مَاشَا شكْ وَارْ ذ أَسْ ثَارطّْڒذْ. نتَّا أَذْ يِيڒِي ذ أَزدْجِيفْ، شكْ أَذْ ثِيڒِيذْ ذ أَنوَّارْ. 45 ؤُشَا أَذْ خَاكْ د-هْوَانْثْ مَارَّا نّْعَاڒِي-يَا، أَذْ شكْ ضْفَارنْثْ، أَذْ شكْ ڒقْفنْثْ أَڒْ غَا ثتّْوَامْحِيذْ، ؤُمِي وَارْ ثسْڒِيذْ إِ ثْمِيجَّا ن سِيذِي، أَربِّي نّشْ، حِيمَا أَذْ ثحْضِيذْ ڒُْومُورَاثْ نّسْ ذ ثِيوصَّا نّسْ، إِنِّي ذ أَشْ يُومُورْ نتَّا. 46 أَذْ إِڒِينْثْ ذ إِشْثْ ن ڒعْڒَامثْ ذ إِجّْ ن ؤُسِيڭّْوِيذْ يوْعَارنْ إِ شكْ ؤُ إِ زَّارِيعثْ نّشْ إِ ڒبْذَا. 47 مِينْزِي وَارْ ثْسخَّارذْ إِ سِيذِي، أَربِّي نّشْ س ڒفْرَاحثْ ذ ثْشُونِي ن وُوڒْ زِي سِّيبّثْ ن ؤُفيّضْ ن مَارَّا مِينْ ذِينْ إِدْجَانْ، 48 أَذْ ثْسخَّارذْ إِ ڒْْعذْيَانْ، إِنِّي إِ خَاكْ غَا إِسّكّْ سِيذِي، س ڒَْاژْ ذ ؤُفَاذِي، س ثُوعَّارْينْثْ ذ ڒخْصصْ ن مَارَّا ثِيمسْڒَايِينْ، ؤُشَا نتَّا أَذْ إِڭّْ أَزَايْڒُو ن وُوزَّاڒْ خْ يِيرِي نّشْ، أَڒْ شكْ غَا إِمْحَا. 49 سِيذِي أَذْ خَاكْ د-إِسّْڭعّذْ إِجّْ ن ڒْْڭنْسْ إِڭّْوجْ، زڭْ ؤُنڭَّارُو ن ثمُّورْثْ، أَمْ يِيجّْ ن ؤُڭِيذرْ إِطَّاونْ، إِجّْ ن ڒْْڭنْسْ إِ ؤُمِي وَارْ ثْزمَّارذْ أَذْ ثْفهْمذْ إِڒسْ نّسْ، ◼ 50 إِجّْ ن ڒْْڭنْسْ غَارسْ ؤُذمْ إِقْضعْ، وَارْ إِتّْوقَّارْ أَوسَّارْ، وَارْ يَارحّمْ خْ ؤُحنْجِيرْ. 51 أَذْ يشّْ ڒْْغِيدْجثْ ن ڒبْهَايمْ نّشْ ذ ڒْْغِيدْجثْ ن ثمُّورْثْ نّشْ، أَڒْ غَا ثتّْوَامْحِيذْ، مِينْزِي وَارْ ذ أَشْ إِتّجِّي إِرْذنْ، نِيغْ بِينُو ن جْذِيذْ، نِيغْ زّشْثْ ن طّْرِي، نِيغْ ثْوَارُورَا ن ثْفُونَاسِينْ نّشْ نِيغْ إِمژْيَاننْ إِعِيزّنْ ن وُودْجِي نّشْ، أَڒْ شكْ إِ غَا يَاردّدْجْ. 52 أَذْ شكْ إِحْصَارْ جَارْ مَارَّا ثوُّورَا نّشْ، أَڒْ غَا وْضَانْ ڒحْيُوضْ يُوعْڒَانْ إِمثْننْ، إِنِّي خْ ثُوغَا ثتّشْڒذْ ذِي مَارَّا ثَامُّورْثْ نّشْ. أَذْ شكْ إِحْصَارْ جَارْ مَارَّا ثوُّورَا نّشْ ذِي مَارَّا ثَامُّورْثْ نِّي ذ أَشْ إِوْشَا سِيذِي، أَربِّي نّشْ. 53 خْمِي ذ أَكْ-د غَا إِنّْضنْ ؤُ ذِي ڒحْصَارثْ إِ زِي شكْ غَا إِحْصَارنْ ڒْْعذْيَانْ نّشْ، أَذْ ثشّذْ ڒْْغِيدْجثْ ن ؤُعذِّيسْ نّشْ ذ ويْسُومْ ن إِحنْجِيرنْ نّشْ ذ ثْحنْجِيرِينْ نّشْ نِّي ذ أَشْ غَا إِوْشْ سِيذِي، أَربِّي نّشْ. ◘ 54 أَرْيَازْ نِّي إِ يَارضْبنْ ؤُ ونِّي إِضبْعنْ أَطَّاسْ أَذْ ثِيڒِي ثَامُوغْڒِي نّسْ ذ ثَاعفَّانْثْ غَارْ ؤُمَاسْ ؤُ غَارْ ثمْغَارْثْ ن وُوڒْ نّسْ ؤُ غَارْ مِينْ ذ أَسْ إِقِّيمنْ زڭْ إِحنْجِيرنْ نّسْ، 55 مَاحنْذْ وَارْ إِتِّيشْ ؤُڒَا إِ يِيجّْ زَّايْسنْ شَا ن ويْسُومْ ن إِحنْجِيرنْ نّسْ، إِنِّي إِ غَا يشّْ ؤُمِي وَارْ ذ أَسْ إِقِّيمْ شَا زِي مَارَّا مَانْ أَيَا ذِي ڒحْصَارثْ ؤُ ذِي ضِّيقَا إِ زِي خَاكْ غَا إِبزّزْ ڒعْذُو نّشْ ذِي مَارَّا ثِيوُّورَا نّشْ. 56 ثَامْغَارْثْ إِ يَارضْبنْ ؤُ ثنِّي إِضبْعنْ أَطَّاسْ،عمَّارْصْ وَارْ ثڭِّي ثْڒقَّا ن ؤُضَارْ نّسْ خْ ثمُّورْثْ ذِي سِّيبّثْ ن وَارْضَابْ ؤُ ن وضْبعْ نّسْ، أَذْ ثِيڒِي ثْمُوغْڒِي نّسْ ذ ثَاعفَّانْثْ غَارْ ورْيَازْ ن وُوڒْ نّسْ ؤُ غَارْ مِّيسْ ذ يدْجِيسْ، 57 ذِي سِّيبّثْ ن لُّوفَانْ نِّي د-إِفّْغنْ جَارْ إِضَارنْ نّسْ ؤُ ذِي سِّيبّثْ ن إِحنْجِيرنْ نِّي ثُورُووْ، مِينْزِي أَذْ ثنْ ثشّْ س ثْنُوفّْرَا ذِي سِّيبّثْ ن ڒخْصصْ ن مَارَّا ذِي ڒحْصَارثْ ؤُ ذِي ضِّيقَا إِ خَاكْ غَا إِبزّزْ ڒعْذُو نّشْ ذِي مَارَّا ثِيوُّورَا نّشْ.“

58 ”مَاڒَا وَارْ ثحْضِيذْ مَارَّا أَوَاڒنْ ن شَّارِيعَا-يَا نِّي يُورَانْ ذڭْ وذْلِيسْ-أَ إِتّْوَانّْضنْ مَاحنْذْ أَذْ ثڭّْوذذْ إِسمْ-أَ إِعُودْجَانْ، إِسَّاڭّْوَاذنْ، سِيذِي، أَربِّي نّشْ، 59 خنِّي أَذْ يَارّْ سِيذِي جّْرَايحْ نّشْ ذ جّْرَايحْ جَارْ زَّارِيعثْ نّشْ ذ إِجّْ ن أَرْجفْ أَڒْ طَّارْفْ. أَذْ إِڒِينْثْ ذ جّْرَايحْ مْغَارنْثْ، أَذْ ذُومنْثْ، ؤُشَا أَذْ إِڒِينْ ڒهْڒَاشَاثْ إِعفّْننْ إِ غَا إِقِّيمنْ غَارْ زَّاثْ. 60 نتَّا أَذْ غَاركْ د-يَارّْ مَارَّا ڒهْڒَاشَاثْ ن مِيصْرَا إِ زِي ثُوغَا ثڭّْوْذذْ ؤُشَا أَذْ ذَايكْ ڒصْقنْثْ. 61 أَمنِّي أَذْ غَاركْ د-يَارّْ سِيذِي مَارَّا ڒهْڒَاشَاثْ ذ مَارَّا جّْرَايحْ نِّي وَارْ يُورِينْ ذڭْ وذْلِيسْ إِتّْوَانْضنْ ن شَّارِيعَا-يَا، أَڒْ غَا ثتّْوَامْحِيذْ. 62 أَذْ ثقِّيمذْ أَكْ-ذ إِجّْ ن وُورُو ن يرْيَازنْ ذڭْ ومْشَانْ إِ ذِي غَا ثِيڒِيمْ أَمْ يِيثْرَانْ ن ؤُجنَّا ذڭْ وَاطَّاسْ، ؤُمِي وَارْ ثسْڒِيذْ إِ ثْمِيجَّا ن سِيذِي، أَربِّي نّشْ. 63 أَمْ مَامّشْ زَّايْومْ إِفَارْحْ سِيذِي حِيمَا أَذْ ذَايْومْ إِڭّْ ثْشُونِي ؤُ أَذْ أَومْ إِتّْمَارْنِي، أَمُّو زَّايْومْ إِ غَا إِفَارْحْ سِيذِي مَاحنْذْ أَذْ كنِّيوْ إِهلّكْ ؤُ مَاحنْذْ أَذْ كنِّيوْ إِثحَّا ؤُشَا كنِّيوْ أَذْ ثتّْوَاقڒْعمْ زِي ثمُّورْثْ نِّي غَارْ غَا ثَاذْفذْ حِيمَا أَذْ ت ثكْسِيذْ ذ ڒْْوَارْثْ. ◘ 64 سِيذِي أَذْ أَشْ إِبزّعْ خْ مَارَّا ڒڭْنُوسْ، زڭْ ؤُجمَّاضْ ن دُّونشْثْ أَڒْ ؤُجمَّاضْ نّغْنِي ن دُّونشْثْ ؤُشَا ذِينْ أَذْ ثْسخَّارذْ إِ إِربِّيثنْ نّغْنِي ن ؤُكشُّوضْ ذ وژْرُو نِّي وَارْ ثسِّينذْ شكْ نِيغْ ڒجْذُوذْ نّشْ. ◘ 65 وَارْ ثتِّيفذْ ڒْْهُوذْنثْ جَارْ ڒڭْنُوسْ-أَ ؤُشَا ثَاڒقَّا ن ؤُضَارْ نّشْ وَارْ ثتِّيفْ أَريَّاحْ، مِينْزِي سِيذِي أَذْ أَشْ إِوْشْ ذِينْ ؤُڒْ يَارجْفنْ ذ ثْمُوغْڒِي ثْخسِّي ذ إِجّْ ن ڒعْمَارْ إِسْڒَاونْ. 66 ثُوذَارْثْ نّشْ أَذْ أَشْ ثِيڒِي أَمْ ثُويڒْ زَّاثْ نّشْ، أَذْ ثِيڒِيذْ ثڭّْوذذْ دْجِيڒثْ ذ وَاسّْ ؤُشَا وَارْ إِتِّيڒِي وضْمَانْ خْ ثُوذَارْثْ نّشْ. 67 غَارْ صّْبحْ أَذْ ثِينِيذْ: ’أَ، إِڒِي أَذْ ثِيڒِي ذ دْجِيڒثْ!‘ ؤُ ذِي دْجِيڒثْ أَذْ ثِينِيذْ: ’أَ، إِڒِي أَذْ يِيڒِي ذْ ضّْبحْ!‘ زِي سِّيبّثْ ن ثِيڭّْوُوذِي ذڭْ وُوڒْ نّشْ إِ ذ أَشْ إِسِّيڭّْوِيذنْ ؤُ زِي سِّيبّثْ ن مِينْ غَا ثْوَاڒِينْثْ ثِيطَّاوِينْ نّشْ. 68 سِيذِي أَذْ شكْ يَارّْ غَارْ مِيصْرَا ذڭْ إِغُورُّوبَا خْ وبْرِيذْ مِينْ خفْ ذ أَشْ نِّيغْ: ’وَارْ ث ثْژَارّذْعمَّارْصْ!‘، ؤُشَا ذِينْ أَذْ ثزّنْزمْ إِخفْ نْومْ إِ ڒْْعذْيَانْ نّشْ ذ إِسمْغَانْ ذ ثِييَّا، مَاشَا وَارْ إِتِّيڒِي وِي كنِّيوْ إِ غَا إِسْغنْ.“

69 إِنَا ذ أَوَاڒنْ ن ڒْْعَاهْذْ نِّي يُومُورْ سِيذِي إِ مُوسَا حِيمَا أَذْ ث إِڭّْ أَكْ-ذ أَيْثْ ن إِسْرَائِيل ذِي ثمُّورْثْ ن مُوآبَ، سنّجْ إِ ڒْْعَاهْذْ إِ كِيذْسنْ إِڭَّا غَارْ حُورِيبْ.