24
ؤُرْشَالِيمْ ذ إِشْثْ ن مَارْمِيثَا ذَايسْ دّْرَا
1 يُوسَا-د غَارِي وَاوَاڒْ ن سِيذِي ذڭْ ؤُسڭّْوَاسْ وِيسّْ ثسْعَا، ذڭْ ؤُيُورْ وِيسّْعشْرَا، ذڭْ وَاسّْ وِيسّْعشْرَا ن ؤُيُورْ، إِنَّا:
2 ”أَ مِّيسْ ن بْنَاذمْ، أَرِي إِ يِيخفْ نّشْ إِسمْ ن أَسّْ-أَ، إِسمْ ن أَسّْ ن يِيضَا. ذڭْ وَاسّْ-أَ نِّيثْ أَذْ إِحْصَارْ ؤُجدْجِيذْ ن بَابِيلْ ؤُرْشَالِيمْ.
3 سِيوڒْ إِجّْ ن ؤُمذْيَا إِ ثَادَّارْثْ إِغوّْغنْ نِّي، إِنِي أَسنْ: ’أَمُّو إِ إِقَّارْ سِيذِي إِنُو، سِيذِي:
أڭّْ إِجْث ن ثيْذُورْثْ،
أڭّْ إِ-ت ؤُشَا كبّْ ذَايسْ أَمَانْ.
4 أڭّْ ذَايسْ ثِيفتُّوثِينْ ن ويْسُومْ،
مَارَّا ثِيفتُّوثِينْ إِشْنَانْ،
ثَامصَّاضْثْ ذ ثغْرُوضْثْ،
عمَّارْ إِ-ت س يغْسَانْ ذ لمْلِيحْ قَاعْ.
5 كْسِي لمْلِيحْ ن وُودْجِي
ؤُشَا أَرّْ ؤُڒَا ذ أَكشُّوضْ سَاذُو نْسنْ.
أجّْ أَذْ سهْذنْ مَارَّا مْلِيحْ
أَڒَامِي عَاذْ إِغْسَانْ نّسْ أَذْ ذَايسْ تّْوَاننَّانْ.‘ “
6 ”س ؤُيَا، أَمُّو إِ إِقَّارْ سِيذِي إِنُو، سِيذِي:
’ؤُشْثْ خْ ثنْذِينْثْ ن إِذَامّنْ!
ثَايْذُورْثْ إِ زِي ڒخْمجْ نّسْ عَاذْ ذَايسْ،
ثنِّي زِي وَارْ يكِّيسْ ڒخْمجْ نّسْ!
كّسْ زَّايسْ ثَافتُّوثْ
أَوَارْنِي إِ ثْفتُّوثْ نّغْنِي
بْڒَا أَذْ خَاسْ ثڭِّيذْ ثَاقدُّوحْثْ.
7 مِينْزِي إِذَامّنْ نّسْ أَقَا ذِي ڒْوسْثْ نّسْ،
ثسِّيزڒْ إِ-ثنْ خْ إِشْثْ ن ثصْضَارْثْ ثَاقشَّارْثْ.
وَارْ ثنْ ثسِّيزِّيڒْ خْ ثمُّورْثْ
مَاحنْذْ أَذْ ثنْ ثذِّيڒْ س ؤُشَاڒْ.
8 حِيمَا أَذْ إِتّْوَاسّكَّارْ وسْعَارْ،
حِيمَا أَذْ يِيڒِي ونْقَامْ،
ڭِّيغْ إِذَامّنْ إِ ثسِّيزّڒْ نتَّاثْ
خْ ثصْضَارْثْ ثَاقشَّارْثْ،
حِيمَا وَارْ دَّاڒنْ إِذَامّنْ نّسْ.‘ “
9 ”س ؤُيَا، أَمُّو إِ إِقَّارْ سِيذِي إِنُو، سِيذِي:
’ؤُشْثْ خْ ثنْذِينْثْ ن إِذَامّنْ!
نشّْ س يِيخفْ إِنُو أَذْ ڭّغْ أَقلِّيجْ ن ؤُكشُّوضْ
إِ ؤُشعَّاڒْ ن ثْمسِّي إِمْغَارْ!
10 أَرْنِي أَكشُّوضْ، أجّْ ثِيمسِّي أَذْ ثَارغْ أَطَّاسْ،
شنّفْ أَيْسُومْ مْلِيحْ
ؤُشَا أجّْ أَخدْجضْ ن ڒبْژَارْ
أَذْ إِتّخْتّخْ مْلِيحْ
ؤُشَا أجّْ إِغْسَانْ أَذْ شمْضنْ.
11 أَرّْ خنِّي ثَايْذُورْثْ إِخْوَانْ عَاوذْ
خْ ڒفْحمْ نّسْ إِتّحْذُوذُوقنْ،
حِيمَا أَذْ إِحْمَا أَذْ إِشْمضْ
دّْرَا نّسْ ن نّْحَاسْ
ؤُشَا أَذْ ثفْسِي زَّايسْ ثخْمُوجِي إِ ذَايسْ إِدْجَانْ
ؤُ خنِّي أَذْ إِتّْوَاقْضِي ڒخْمجْ.
12 مَارَّا أَمَارّثْ أَقَا-ث ذِي بَاطڒْ.
ڒخْمجْ نّسْ إِفيّْضنْ وَارْ د-إِفِّيغْ زَّايسْ.
أَرّْ ڒخْمجْ نِّي ذِي ثْمسِّي!
13 ذِي ثخْمُوجِي نّمْ ثدْجِي ڒفْضِيحثْ نّمْ،
مِينْزِي نشّْ ثُوغَا خْسغْ أَذْ شمْ سِّيزذْڭغْ
ؤُشَا خنِّي وَارْ ثتّْوَاسِّيزْذِيڭذْ.
خْ ؤُيَا وَارْ ثتّْوَاسِّيزْذِيڭذْ
زِي ڒخْمجْ نّمْ
أَڒْ خَامْ إِ غَا سِّيوْضغْ أَسْعَارْ إِنُو.
14 نشّْ، سِيذِي، سِّيوْڒغْ.
أَذْ إِفّغْ ؤُ نشّْ أَذْ ث ڭّغْ.
وَارْ سمْحغْ ذڭْ إِمرْوُوسَا
ؤُ وَارْ زِّيدْجْزغْ ؤُ وَارْ نْذِيمغْ.
أَذْ خَامْ حكْمنْ
إِبْرِيذنْ نّمْ ذ ثْمڭَّا نّمْ!‘،
أَمُّو إِ إِقَّارْ سِيذِي إِنُو، سِيذِي.“
ڒْموْثْ ن ثمْغَارْثْ ن حِيزْقِييَال
15 يُوسَا-د غَارِي وَاوَاڒْ ن سِيذِي، إِنَّا:
16 ”أَ مِّيسْ ن بْنَاذمْ، خْزَارْ، س إِشْثْ ن ثشْثِي نشّْ أَذْ كسّغْ مژْرِي نّشْ زَّاثْ إِ ثِيطَّاوِينْ نّشْ. وَارْ تّتّْرُو، وَارْ تّجِّي أَذْ ؤُزّْڒنْ إِمطَّاونْ نّشْ.
17 سْغُويّْ ذڭْ ؤُهدّنْ، وَارْ شطّنْ خْ ؤُمتِّينْ. قّنْ أَرژّثْ نّشْ خَاكْ ؤُشَا أڭّْ ثِيسِيڒَا نّشْ ذڭْ إِضَارنْ نّشْ، ؤُ وَارْ تّْڒحِّيفْ أَشْڒَاغمْ غَارْ ؤُينْشِيشْ نِيغْ أَذْ ثشّذْ أَغْرُومْ نِّي د غَا يَاوْينْ إِوْذَانْ إِ وشْضَانْ.“
18 غَارْ ثُوفُّوثْ سِّيوْڒغْ إِ ڒْڭنْسْ ؤُ غَارْ ثْمذِّيثْ ثمُّوثْ ثْمطُّوثْ إِنُو ؤُ ذِي ثْوشَّا ڭِّيغْ أَمْ مَامّشْ إِ ذ أَيِي إِتّْوَاوصَّا.
19 إِنَّا أَيِي ڒْْڭنْسْ: ”مَا وَارْ ثخْسذْ أَذْ أَنغْ ثسّشْنذْ مِينْ عْنَانْثْ ثْمسْڒَايِينْ-أَ، مَايمِّي إِ ثڭّذْ أَمُّو؟“
20 نشّْ نِّيغْ أَسنْ: ”يُوسَا-د غَارِي وَاوَاڒْ ن سِيذِي، إِنَّا:
21 ’إِنِي إِ ثَادَّارْثْ ن إِسْرَائِيل: أَمُّو إِ إِقَّارْ سِيذِي إِنُو، سِيذِي! خْزَارْ، نشّْ أَذْ سّْعِيدْجْثغْ زَّاوشْثْ إِنُو إِقدّْسنْ ثنِّي ذ أَعُودْجِي ن جّهْذْ نْومْ ذ ؤُمژْرِي ن ثِيطَّاوِينْ نْومْ ذ ڒهْزُوطْ إِ ڒعْمَارْ نْومْ، ؤُڒَا ذ إِحنْجِيرنْ نْومْ ذ ثْحنْجِيرِينْ نْومْ نِّي ثجِّيمْ ذِينْ أَذْ وْضَانْ س سِّيفْ.
22 خنِّي أَذْ ثڭّمْ أَمْ مَامّشْ ڭِّيغْ نشّْ. وَارْ ثتّْڒحِّيفمْ أَشْڒَاغمْ غَارْ ؤُينْشِيشْ ؤُشَا أَغْرُومْ إِ د-يِيوْينْ إِرْيَازنْ، وَارْ ث ثتّتّمْ.
23 أَرژَّاثْ نْومْ أَذْ إِڒِينْثْ خْ إِزدْجِيفنْ نْومْ ؤُ سَانْذَالِييَاثْ نْومْ ذڭْ إِضَارنْ نْومْ. وَارْ ثْشطّْنمْ ؤُ وَارْ ثتّْرُومْ. أَذْ ثثحَّامْ ذِي ڒْْمُوعْصِييّثْ نْومْ ؤُشَا أَذْ ثْوحْوحمْ إِجّنْ خْ ونّغْنِي.
24 أَمُّو إِ غَا يِيڒِي حِيزْقِييَالْ ذ ڒعْڒَامثْ ن ڒعْجبْ إِ كنِّيوْ. أَذْ ثڭّمْ نِيشَانْ أَمْ مَامّشْ إِڭَّا نتَّا. خْمِي د غَا يَاسْ دّڭَّا، أَذْ ثسّْنمْ، بلِّي نشّْ سِيذِي، ذ سِيذِي.‘ “
25 ”ؤُشَا شكْ، أَ مِّيسْ ن بْنَاذمْ، مَا وَارْ إِتِّيڒِي أَقَا ذڭْ وَاسّْ إِ زَّايْسنْ إِ غَا كسّغْ لْبُورْجْ نْسنْ، ڒفْرَاحثْ خْ ثلْوِيزْثْ نْسنْ، ؤُڒَا ذ مژْرِي ن ثِيطَّاوِينْ نْسنْ ذ إِحنْجِيرنْ ذ ثْحنْجِيرِينْ نْسنْ نِّي يَاربُّونْ نِيثْنِي ذڭْ وُوڒْ،
26 أَقَا ذڭْ وَاسّْ نِّي سِيمَانْثْ نّسْ أَذْ غَاركْ د-يَاسْ إِجّنْ ونِّي يَاروْڒنْ مَاحنْذْ أَذْ يڭّْ ثْنَاينْ ن إِمزُّوغنْ نّشْ أَذْ سْڒنْ ؤُيَا.
27 ذڭْ وَاسّْ نِّي أَذْ يَارْزمْ ؤُقمُّومْ نّشْ أَكْ-ذ ؤُقمُّومْ ن ونِّي يَاروْڒنْ ؤُشَا أَذْ ثسِّيوْڒذْ، وَارْ ثتِّيڒِيذْ عَاذْ ذ أَيْنَاوْ. شكْ أَذْ أَسنْ ثِيڒِيذْ ذ ڒعْڒَامثْ نْ ڒعْجبْ ؤُشَا نِيثْنِي أَذْ سّْننْ بلِّي نشّْ ذ سِيذِي.“