1 ”ؤُشَا شكْ، أَ مِّيسْ ن بْنَاذمْ، كْسِي إِجّْ ن ڒْْمُوسْ إِقْضعْ، كْسِي إِجّْ ڒْْمُوسْ ن ؤُحفَّافْ ؤُشَا سكّْ إِ-ث خْ ؤُزدْجِيفْ نّشْ ؤُ خْ ثْمَارْثْ نّشْ. خنِّي أَذْ ثكْسِيذْ إِجّْ ن ڒْْمِيزَانْ ؤُشَا أَشُوَّافْ أَذْ ثنْ ثبْضِيذْ. ◘ 2 إِشْثْ ن تُّوڒُوثْ أَذْ ت ثسّْشمْضذْ ذِي ڒْْوسْطْ ن ثنْذِينْثْ أَوَارْنِي ڒَْامِي إِ غَا كمّْڒنْ وُوسَّانْ ن ڒحْصَارثْ ؤُشَا أَذْ ثكْسِيذْ إِشْثْ ن تُّوڒُوثْ نّغْنِي، أَذْ ثوْثذْ س سِّيفْ نّشْ ذڭْ ونّضْ نّسْ ؤُشَا إِشْثْ ن تُّوڒُوثْ نّغْنِي أَذْ ت ثْزُوزَّارذْ ذڭْ ؤُسمِّيضْ ؤُ نشّْ أَذْ جبْذغْ سِّيفْ أَوَارْنِي أَسْ. ◘ 3 سّنِّي أَذْ ثكْسِيذْ شْوَايْثْ ن إِژطَّانْ ؤُشَا أَذْ ثنْ ثْشدّذْ ذڭْ إِبحْرُورنْ ن ؤُپَارْثسُّو نّشْ. 4 أَذْ زَّايسْ ثكْسِيذْ عَاذْ شْوَايْثْ ن إِژطَّانْ ؤُشَا أَذْ ثنْ ثنْضَارذْ ذِي ڒْوسْثْ ن ثْمسِّي ؤُشَا أَذْ ثنْ ثسّْشمْضذْ س ثْمسِّي. سّنِّي أَذْ ثفّغْ ثْمسِّي خْ مَارَّا ثَادَّارْثْ ن إِسْرَائِيل.“

5 ”أَمُّو إِ إِقَّارْ سِيذِي إِنُو، سِيذِي: ثَا ذ ؤُرْشَالِيمْ إِ ژُّوغْ ذِي ڒْْوسْطْ ن ڒڭْنُوسْ، أَكْ-ذ ثمُّورَا إِ ذ أَسْ د-إِنّْضنْ. 6 مَاشَا نتَّاثْ ثْغوّغْ خْ لْفَارَايِيضْ إِنُو مَاهُو ڒڭْنُوسْ، ؤُڒَا خْ ثْوصَّا إِنُو مَاهُو ثِيمُّورَا إِ ذ أَسْ د-إِنّْضنْ، مِينْزِي نِيثْنِي نْضَارنْ لْفَارَايِيضْ إِنُو ؤُ ثِيوصَّا إِنُو وَارْ ثنْثْ ضْفَارنْ.“ 7 ”س ؤُيَا، أَمُّو إِ إِقَّارْ سِيذِي إِنُو، سِيذِي: ’مِينْزِي كنِّيوْ ثڭِّيمْ مَاهُو ڒڭْنُوسْ إِ ذ أَومْ د-إِنّْضنْ، وَارْ ثُويُورمْ ذِي ثْوصَّا إِنُو ؤُ وَارْ ثڭِّيمْ لْفَارَايِيضْ إِنُو، عَاذْ وَارْ ثڭِّيمْ عْلَاحْسَابْ لْفَارَايِيضْ نْ ڒڭْنُوسْ إِ ذ أَومْ د-إِنّْضنْ‘، ◘ 8 س ؤُيَا، أَمُّو إِ إِقَّارْ سِيذِي إِنُو، سِيذِي: ’خْزَارْ، ؤُڒَا ذ نشّْ أَذْ خَامْ قڒْبغْ ؤُ أَذْ ڭّغْ ڒحْكَامَاثْ ذِي ڒْْوسْطْ نّمْ زَّاثْ إِ ثِيطَّاوِينْ ن ڒڭْنُوسْ. 9 أَذْ زَّايمْ ڭّغْ أَمْ مَامّشْعمَّارْصْ وَارْ ڭِّيغْ ؤُ وَارْ تّڭّغْعمَّارْصْ عَاذْ زِي سَّا ذ ثْسَاونْثْ، زِي سِّيبّثْ ن مَارَّا جّْعَايفْ نّمْ. 10 س ؤُيَا إِبَابَاثنْ أَذْ شّنْ أَرَّاوْ ذِي ڒْْوسْطْ نّمْ ؤُشَا أَرَّاوْ أَذْ شّنْ إِبَابَاثنْ نْسنْ. نشّْ أَذْ أَمْ ڭّغْ ڒحْكَامَاثْ ؤُ مَارَّا مِينْ زَّايمْ إِقِّيمنْ أَذْ ث زُوزَّارغْ غَارْ مَارَّا ثِيغمُّورَا ن ؤُسمِّيضْ.‘ “ ◘

11 ”س ؤُيَا، س ثِيذتّْ أَمْ دَّارغْ نشّْ، أَمُّو إِ إِقَّارْ سِيذِي إِنُو، سِيذِي: س ثِيذتّْ، ؤُڒَا ذ نشّْ أَذْ قضْعغْ، وَارْ زِّيدْجِيزغْ، وَارْ أَرحّْمغْ، ؤُمِي ثسّْخمْجذْ زَّاوشْثْ إِنُو إِقدّْسنْ س مَارَّا نّْعَاوَاثْ نّمْ ن لْ-أَصْنَامْ ؤُ س مَارَّا جّْعَايفْ نّمْ! ◘ 12 إِشْثْ ن تُّوڒُوثْ ن إِمزْذَاغْ نّمْ أَذْ ثمّثْ س طَّاعُونْ ؤُ س ڒَْاژْ ذِي ڒْْوسْطْ نّمْ، ؤُشَا إِشْثْ ن تُّوڒُوثْ نّغْنِي أَذْ ثوْضَا س سِّيفْ ذڭْ ونّضْ نّمْ، ؤُ عَاذْ إِشْثْ ن تُّوڒُوثْ أَذْ ت زُوزَّارغْ غَارْ مَارَّا ثِيغمُّورَا ن ؤُسمِّيضْ ؤُ أَوَارْنِي أَسنْ أَذْ د-جبْذغْ سِّيفْ. ◘ 13 أَغْضَابْ إِنُو أَذْ إِجِّيونْ أَڒْ ؤُنڭَّارْ ؤُشَا أَذْ خَاسنْ سَّارْسغْ أَسْعَارْ إِنُو. أَمُّو إِ غَا سّْفوّْجغْ إِخفْ إِنُو ؤُ نِيثْنِي أَذْ سّْننْ، أَقَا نشّْ، سِيذِي، سِّيوْڒغْ ذِي ثُوسْمِي إِنُو إِقدّْسنْ، خْمِي غَا كمّْڒغْ أَسْعَارْ إِنُو خَاسنْ. 14 أَذْ شمْ أَرّغْ ذ ڒْْخِيرْبثْ ذ إِشْثْ ن ڒْْقشْعثْ ن ؤُسْثهْزِي جَارْ ڒڭْنُوسْ إِ ذ أَمْ د-إِنّْضنْ، زَّاثْ إِ ثِيطَّاوِينْ ن كُوڒْ إِجّْ نِّي إِ غَا إِعْذُونْ. 15 أَذْ ثذْوڒْ ؤُرْشَالِيمْ إِ ؤُسْثهْزِي ذ ڒْْحڭْرَا، إِ ؤُمذْيَا ن ؤُسقْسحْ ذ ؤُسِيڭّْوذْ إِ ڒڭْنُوسْ إِ ذ أَسْ د-إِنّْضنْ، خْمِي ذ أَسْ إِ غَا قْضغْ ڒحْكَامَاثْ س وغْضَابْ ؤُ س وسْعَارْ ؤُ س ثِييِيتَّا إِحْمَانْ. نشّْ، سِيذِي، أَقَا سِّيوْڒغْ! ◘ 16 خْمِي ثنْ غَا وْثغْ س فْڒِيثْشَاثْ ن ڒَْاژْ نِّي د غَا يَاوْينْ أَردّدْجْ، ثِينِّي غَا وْثغْ حِيمَا أَذْ كنِّيوْ سّْهلّْكغْ، خنِّي أَذْ خَاومْ أَرْنِيغْ ڒَْاژْ ؤُ أَذْ أَرْژغْ ڒعْوتْشْ ن وغْرُومْ نْومْ. ◘ 17 أَذْ خَاومْ سكّغْ ڒَْاژْ ذ ڒوْحُوشْ إِوْعَارنْ نِّي إِ غَا إِكّْسنْ ثَارْوَا نّمْ. طَّاعُونْ ذ ؤُسِيزّڒْ ن إِذَامّنْ أَذْ كّنْ خَامْ ؤُ نشّْ أَذْ خَامْ سّكّغْ سِّيفْ. نشّْ، سِيذِي، أَقَا سِّيوْڒغْ!“ ◘