1 إِسْڒَا يِيثْرُونْ، أَكهَّانْ ن مِيذْيَانْ، أَضڭّْوَاڒْ ن مُوسَا، مَارَّا مِينْ إِڭَّا أَربِّي أَكْ-ذ مُوسَا ؤُ أَكْ-ذ ڒْْڭنْسْ نّسْ إِسْرَائِيل، أَقَا إِسُّوفّغْ-د سِيذِي إِسْرَائِيل زِي مِيصْرَا. ◘ 2 إِطّفْ يِيثْرُونْ، أَضڭّْوَاڒْ ن مُوسَا، صَافُّورَا، ثَامْغَارْثْ ن مُوسَا، أَوَارْنِي ڒَْامِي ذ أَسْ إِوْشَا ثِيرْزِيفِينْ نّسْ ن ثسْڒِيثْ، 3 ؤُڒَا ذ ثْنَاينْ ن إِحنْجِيرنْ نّسْ، إِجّنْ قَّارنْ أَسْ جَارْشُومْ، مِينْزِي ثُوغَا إِنَّا: ”ثُوغَا أَيِي ذ أَبَارَّانِي ذِي ثمُّورْثْ ذ ثَابَارَّانشْثْ!“، ◘ 4 ؤُ ونّغْنِي قَّارنْ أَسْ أَلِيعَازِيرْ، مِينْزِي ثُوغَا إِنَّا: ”أَربِّي ن بَابَا إِعَاونْ أَيِي ؤُشَا إِفكّْ أَيِي زِي سِّيفْ ن فِيرْعُونْ.“ 5 يِيثْرُونْ أَضڭّْوَاڒْ ن مُوسَا، أَكْ-ذ إِحنْجِيرنْ نّسْ ذ ثْمطُّوثْ نّسْ، إِوْضنْ غَارْ مُوسَا ذِي ڒخْڒَا، غَارْ مَانِي إِوْثَا إِقِيضَانْ، غَارْ وذْرَارْ ن أَربِّي. 6 ؤُشَا نتَّا إِجَّا أَذْ إِنِينْ إِ مُوسَا: ”نشّْ، أَضڭّْوَاڒْ نّشْ يِيثْرُونْ، ؤُسِيغْ-د غَاركْ س ثمْغَارْثْ نّشْ ذ ثْنَاينْ ن إِحنْجِيرنْ نّسْ أَكِيذسْ.“ 7 خنِّي إِفّغْ مُوسَا أَذْ إِڒْقَا أَضڭّْوَاڒْ نّسْ، إِبنْذقْ ؤُشَا إِسُّوذمْ إِ-ث. إِجّنْ إِسّقْسَا ونّغْنِي خْ ؤُمدُّورْ نّسْ ؤُشَا ؤُذْفنْ غَارْ ؤُقِيضُونْ. 8 مُوسَا إِحَاجَا إِ ؤُضڭّْوَاڒْ نّسْ مَارَّا مِينْ إِڭَّا سِيذِي أَكْ-ذ فِيرْعُونْ ؤُ أَكْ-ذ إِمِيصْرِييّنْ ذِي طّْوعْ ن إِسْرَائِيل ؤُ خْ مَارَّا ثَامَارَا نِّي خَاسنْ إِكِّينْ ذڭْ وبْرِيذْ ذ مَامّشْ ثنْ إِفكّْ سِيذِي. 9 إِفَارْحْ يِيثْرُونْ زِي مَارَّا ڒْْخِيرْ نِّي إِڭَّا سِيذِي إِ إِسْرَائِيل، ؤُمِي ث إِفكّْ زڭْ ؤُفُوسْ ن إِمِيصْرِييّنْ. 10 إِنَّا يِيثْرُونْ: ”أَذْ إِتّْوَابَاركْ سِيذِي ذ ونِّي كنِّيوْ إِفكّنْ زڭْ ؤُفُوسْ ن إِمِيصْرِييّنْ ؤُ زڭْ ؤُفُوسْ ن فِيرْعُونْ، ذ ونِّي إِفكّنْ ڒْْڭنْسْ زڭْ ؤُفُوسْ ن إِمِيصْرِييّنْ! 11 ڒخُّو سّْنغْ بلِّي سِيذِي إِمْغَارْ أَطَّاسْ خْ مَارَّا إِربِّيثنْ، أَقَا ذِي ثْمسْڒَاشْثْ نِّي ذسَّارنْ خَاسنْ.“ ◘ 12 خنِّي إِكْسِي يِيثْرُونْ، أَضڭّْوَاڒْ ن مُوسَا، ثَاغَارْصْثْ ن وشْمَاضْ ذ ثِيغَارْصَا إِ أَربِّي ؤُشَا يُوسَا-د هَارُونْ جْمِيعْ أَكْ-ذ مَارَّا إِمْغَارنْ ن أَيْثْ ن إِسْرَائِيل، مَاحنْذْ أَذْ يشّْ أَغْرُومْ جْمِيعْ أَكْ-ذ ؤُضڭّْوَاڒْ ن مُوسَا زَّاثْ إِ وُوذمْ ن أَربِّي.

13 ثِيوشَّا نّسْ ثُوغَا مُوسَا إِتّْغِيمَا خْ ڒْْكُورْسِي، مَاحنْذْ أَذْ إِحْكمْ ڒْْڭنْسْ. ثُوغَا ڒْْڭنْسْ إِبدّْ زَّاثْ إِ مُوسَا زِي صّْبحْ زِيشْ أَڒْ دْجِيڒثْ. 14 إِژْرَا ؤُضڭّْوَاڒْ ن مُوسَا مَارَّا مِينْ ثُوغَا إِتّڭّْ مُوسَا إِ ڒْْڭنْسْ، إِنَّا: ”مَانَاوَايَا إِ ثڭِّيذْ شكْ إِ ڒْْڭنْسْ؟ مَايمِّي ثتّْغِيمِيذْ شكْ وحّْذكْ ؤُ مَارَّا ڒْْڭنْسْ إِبدّْ زَّاثكْ زِي ضّْبحْ زِيشْ أَڒْ دْجِيڒثْ؟“ 15 يَارَّا-د مُوسَا خْ ؤُضڭّْوَاڒْ نّسْ: ”مِينْزِي ڒْْڭنْسْ إِتَّاسْ-د غَارِي حِيمَا أَذْ إِتَّارْ شّْوَارْ ن أَربِّي. 16 خْ مِينِّي غَارْسنْ ثتِّيڒِي شَا ن ثْمسْڒَاشْثْ، تَّاسنْ-د غَارِي س مَانْ أَيَا ؤُشَا نشّْ أَذْ شَارّْعغْ جَارْ إِجّْ ذ ونّغْنِي، سّشَانغْ أَسنْ ثِيوصَّا ذ إِزرْفَانْ ن أَربِّي.“ 17 ڒخْذنِّي إِنَّا أَسْ ؤُضڭّْوَاڒْ ن مُوسَا: ”مِينْ ثڭِّيذْ وَارْ إِدْجِي شَا مْلِيحْ. 18 أَمُّو إِ غَا ثَاحْڒذْ أَطَّاسْ، شكْ ذ ڒْْڭنْسْ-أَ إِ كِيكْ إِدْجَانْ، مِينْزِي مَانْ أَيَا إِذْقڒْ خَاكْ أَطَّاسْ، وَارْ ذ أَسْ ثْزمَّارذْ أَذْ ث ثڭّذْ وحّْذكْ. 19 سڒْ ڒخُّو إِ وَاوَاڒْ إِنُو، نشّْ أَذْ شكْ نصْحغْ ؤُشَا أَربِّي أَذْ كِيكْ يِيڒِي. إِڒِي شكْ ذ أَوصَّايْ خْ ڒْْڭنْسْ زَّاثْ إِ أَربِّي ؤُشَا قدّمْ دّْعَاوِي زَّاثْ إِ أَربِّي. 20 سْشنْ أَسنْ ثِيوصَّا ذ إِزرْفَانْ ؤُشَا سْشنْ أَسنْ أَبْرِيذْ إِ ثنْ إِتّْخصَّانْ أَذْ ؤُيُورنْ ؤُ ڒْْخذْمثْ إِ ذ أَسنْ إِتّْخصَّانْ أَذْ ت ڭّنْ. 21 عَاوذْ خْزَارْ شكْ، أَذْ ثَارْزُوذْ جَارْ مَارَّا ڒْْڭنْسْ خْ إِرْيَازنْ إِزعَّامنْ، إِنِّي إِتّڭّْوذنْ أَربِّي، إِرْيَازنْ إِصْذِيقنْ، إِنِّي إِشَارّْهنْ ثَارزُّوثْ خْ أَرْبحْ. أڭّْ إِ-ثنْ ذ إِمقّْرَاننْ خْ وَاڒفْ، ذ إِمقّْرَاننْ خْ مْيَا، ذ إِمقّْرَاننْ خْ خمْسِينْ ذ إِمقّْرَاننْ خْعشْرَا. 22 أجّْ إِ-ثنْ أَذْ شَارّْعنْ جَارْ ڒْْڭنْسْ ڒبْذَا. أجّْ إِ-ثنْ أَذْ قدّْمنْ مَارَّا دّْعَاوِي إِوْعَارنْ زَّاثكْ، مَاشَا مَارَّا دّْعَاوِي ثِيمژْيَانِينْ أَذْ خَاسنْثْ شَارّْعنْ س يِيخفْ نْسنْ. أڭّْ إِ-ث ثفْسُوسْ خْ يِيخفْ نّشْ ؤُشَا أجّْ إِ-ثنْ أَذْ ت أَرْبُونْ أَكِيذكْ. 23 مَاڒَا ثڭِّيذْ أَيَا، ؤُ أَربِّي إِ شكْ يُومُورنْ، ثْزمَّارذْ أَذْ ثقِّيمذْ ثْبدّذْ ؤُشَا مَارَّا ڒْْڭنْسْ أَيَا أَذْ يَاوضْ عَاوذْ ذِي ڒهْنَا غَارْ ومْشَانْ إِ ذ أَسنْ إِتّْوَاڭّْ.“

24 إِسْڒَا مُوسَا غَارْ وَاوَاڒْ ن ؤُضڭّْوَاڒْ نّسْ، إِڭَّا مَارَّا مِينْ ذ أَسْ إِنَّا. ◘ 25 إِخْضَارْ مُوسَا إِرْيَازنْ إِزعَّامنْ زِي مَارَّا إِسْرَائِيل ؤُشَا إِڭَّا إِ-ثنْ ذ إِزدْجِيفنْ خْ ڒْْڭنْسْ: إِمقّْرَاننْ خْ وَاڒفْ، إِمقّْرَاننْ خْ مْيَا، إِمقّْرَاننْ خْ خمْسِينْ ذ إِمقّْرَاننْ خْعشْرَا. 26 ؤُشَا نِيثْنِي ثُوغَا تّْشَارّْعنْ ڒْْڭنْسْ ڒبْذَا ؤُشَا دّْعَاوِي إِوْعَارنْ قذْمنْ ثنْثْ غَارْ مُوسَا، مَاشَا مَارَّا دّْعَاوِي ثِيمژْيَانِينْ شَارّْعنْ ثنْثْ س يِيخفْ نْسنْ. 27 إِقبّضْ مُوسَا أَضڭّْوَاڒْ نّسْ ؤُشَا إِعْقبْ نتَّا غَارْ ثمُّورْثْ نّسْ.