24
ڒْعَاهْذْ ن أَربِّي أَكْ-ذ ڒْْڭنْسْ
1 ؤُشَا إِنَّا نتَّا إِ مُوسَا:
”ڭعّذْ غَارْ سِيذِي، شكْ ذ هَارُونْ ذ نَاذَابْ ذ أَبِيهُو، ذ سبْعِينْ ن إِمْغَارنْ ن إِسْرَائِيل، ؤُشَا بنْذْقمْ زِي ڒَْاڭّْوَاجْ.
2 مُوسَا وحّْذسْ أَذْ د-إِقَارّبْ غَارْ سِيذِي، مَاشَا وَارْ إِعدّڒْ أَذْ قَارّْبنْ نِيثْنِي. ؤُڒَا ذ ڒْْڭنْسْ وَارْ كِيذسْ إِتّْڭِيعِّيذْ شَا.“
3 مُوسَا إِعْقبْ-د ؤُشَا إِخبَّارْ ڒْْڭنْسْ خْ مَارَّا أَوَاڒنْ ن سِيذِي ؤُ خْ مَارَّا لْفَارَايِيضْ. مَارَّا ڒْْڭنْسْ يَارَّا-د س يِيجّْ ن وَاوَاڒْ، نَّانْ: ”مَارَّا أَوَاڒنْ إِ إِنَّا سِيذِي أَذْ زَّايْسنْ نڭّْ.“
4 مُوسَا يُورَا مَارَّا أَوَاڒنْ ن سِيذِي. غَارْ صّْبحْ زِيشْ إِكَّارْ ؤُشَا إِبْنَا إِجّْ ن ؤُعَالْطَارْ غَارْ إِضَارنْ ن وذْرَارْ ؤُشَا إِڭَّا ثنْعَاشْ ن إِمَايْضُوثنْ ن وژْرُو، عْلَاحْسَابْ ڒْْقدّْ ن ثنْعَاشْ ن ثْقبَّاڒْ ن إِسْرَائِيل.
5 إِسّكّْ إِحُوذْرِييّنْ زڭْ أَيْثْ ن إِسْرَائِيل، إِنِّي إِسّْبخَّارنْ ثِيغَارْصِي ن وشْمَاضْ ؤُ قدّْمنْ ثِيغَارْصِي ن ڒهْنَا زڭْ إِفُونَاسنْ إِمژْيَاننْ إِ سِيذِي.
6 إِكْسِي مُوسَا أَزْينْ ن إِذَامّنْ، إِڭَّا إِ-ث ذِي طّْبَاصِي ؤُشَا أَزْينْ نّغْنِي ن إِذَامّنْ إِزدْجعْ إِ-ثنْ خْ ؤُعَالْطَارْ.
7 إِكْسِي أَذْلِيسْ إِتّْوَانّْضنْ ن ڒْْعَاهْذْ، إِغْرَا إِ-ث خْ إِمزُّوغنْ ن ڒْْڭنْسْ ؤُشَا نِيثْنِي نَّانْ: ”مَارَّا مِينْ ذ أَنغْ إِنَّا سِيذِي، أَذْ ث نڭّْ، أَذْ ث نْطَاعْ.“
8 إِكْسِي مُوسَا إِذَامّنْ، إِرُوشّْ إِ-ثنْ خْ ڒْْڭنْسْ، إِنَّا: ”خْزَارْ، إِنَا ذ إِذَامّنْ ن ڒْْعَاهْذْ نِّي إِڭَّا سِيذِي أَكِيذْومْ خْ مَارَّا أَوَاڒنْ-أَ.“
9 إِڭعّذْ مُوسَا أَكْ-ذ هَارُونْ ذ نَاذَابْ ذ أَبِيهُو ذ سبْعِينْ ن إِمْغَارنْ ن إِسْرَائِيل.
10 ژْرِينْ أَربِّي ن إِسْرَائِيل. ثُوغَا سَاذُو إِضَارنْ نّسْ أَمْ ثِيسِي ن زّلِّيجْ إِ إِتّْوَاڭّنْ ن صَافِّيرْ أَزِيزَا، إِصْفَا أَمْ ؤُجنَّا سِيمَانْثْ نّسْ.
11 وَارْ إِسّْوِيژّضْ أَفُوسْ نّسْ خْ إِمْشنّْعنْ ن أَيْثْ ن إِسْرَائِيل ؤُشَا نِيثْنِي خْزَارنْ غَارْ أَربِّي، شِّينْ، سْوِينْ.
12 إِنَّا سِيذِي إِ مُوسَا: ”ڭعّذْ-د غَارِي غَارْ وذْرَارْ ؤُشَا قِّيمْ ذِينْ ؤُشَا نشّْ أَذْ أَشْ وْشغْ ثِيڒْوِيحِينْ ن وژْرُو، شَّارِيعَا ذ ڒُْومَارَاثْ ثِينِّي ؤُرِيغْ خْ ثڒْوِيحِينْ، حِيمَا أَذْ أَسنْ ثنْثْ ثسّْڒمْذذْ.“
13 إِكَّارْ مُوسَا أَكْ-ذ يَاشُووَا، أَمْسخَّارْ نّسْ، ؤُشَا إِڭعّذْ مُوسَا غَارْ وذْرَارْ ن أَربِّي.
14 إِنَّا إِ إِمْغَارنْ: ”رَاجَامْ أَنغْ ذَانِيثَا أَڒْ د غَارْومْ إِ غَا نذْوڒْ. خْزَارْ، هَارُونْ ذ حُورْ أَكِيذْومْ. مَاڒَا ذِينْ حذْ غَارسْ دّْعَاوِي، إِتّْخصَّا أَسْ أَذْ غَارْسنْ إِرَاحْ.“
15 خنِّي إِڭعّذْ مُوسَا غَارْ وذْرَارْ، ؤُشَا إِجّْ ن ؤُسيْنُو إِذْڒَا أَذْرَارْ.
16 أَعُودْجِي ن سِيذِي ثُوغَا إِزدّغْ ذڭْ وذْرَارْ ن سِينَا ؤُ أَسيْنُو إِذْڒَا إِ-ث ستَّا ن وُوسَّانْ ؤُشَا ذڭْ وَاسّْ وِيسّْ سبْعَا إِڒَاغَا-د نتَّا خْ مُوسَا زِي ڒْْوسْطْ ن ؤُسيْنُو.
17 أَسْشَانْ ن ؤُعُودْجِي ن سِيذِي ثُوغَا-ث ذِي ثِيطَّاوِينْ ن أَيْثْ ن إِسْرَائِيل أَمْ ثْمسِّي إِتّتّنْ خْ ثْقِيشَّاثْ ن وذْرَارْ.
18 يُوذفْ مُوسَا غَارْ ڒْْوسْطْ ن ؤُسيْنُو ؤُشَا إِڭعّذْ أَذْرَارْ. ثُوغَا مُوسَا إِقِّيمْ أَربْعِينْ ن وُوسَّانْ ذ أَربْعِينْ ن دْجْيَاڒِي ذڭْ وذْرَارْ.