41
ثَارْجِيثْ ن فِيرْعُونْ
1 أَوَارْنِي ڒَْامِي عْذُونْ ثْنَاينْ ن إِسڭّْوُوسَا يُورْجَا فِيرْعُونْ أَقَا نتَّا زعْمَا إِبدّْ خْ يغْزَارْ ن نِيلْ.
2 خْزَارْ، ڭعّْذنْثْ-إِ-د سبْعَا ن ثْفُونَاسِينْ زڭْ إِغْزَارْ، صبْحنْثْ إِ ڒْْخزْرَاثْ ؤُعمَّارنْثْ س ويْسُومْ، هدَّانْثْ جَارْ وحْثِيشْ ن ؤُغَانِيمْ.
3 ؤُ خْزَارْ، سبْعَا ن ثْفُونَاسِينْ نّغْنِي ڭعّْذنْثْ-إِ-د أَوَارْنِي أَسنْثْ زڭْ إِغْزَارْ. نِيثنْثِي وَارْ حْڒِينْثْ إِ ڒْخزْرَاثْ، أَقَا كُّوشّْضنْثْ ؤُشَا بدّنْثْ زَّاثْ إِ ثْفُونَاسِينْ نّغْنِي غَارْ ثْمَا ن إِغْزَارْ.
4 ثِيفُونَاسِينْ إِ وَارْ إِحْڒِينْ إِ ڒْخژْرَاثْ، ثِينِّي إِكُوشّْضنْ، صَارْضنْثْ سبْعَا ن ثْفُونَاسِينْ إِصبْحنْ إِ ڒْْخزْرَاثْ، ثِينِّي إِصحّنْ. ؤُشَا إِفَاقْ-د فِيرْعُونْ.
5 إِطّصْ عَاوذْ ؤُشَا يُورْجَا ثْوَاڒَا نّغْنِي، ؤُ خْزَارْ، زڭْ إِشْثْ ن ثْسطَّا ڭعّْذنْثْ سبْعَا ن ثِيذْرِينْ شُّورنْثْ، شْنَانْثْ.
6 ؤُ خْزَارْ،غمْينْثْ-إِ-د سبْعَا ن ثِيذْرِينْ قُّوسْبَارنْ أَوَارْنِي أَسنْثْ، إِسّْشمْضْ إِ-ثنْثْ ؤُسمِّيضْ أَشَارْقِي.
7 سبْعَا ن ثِيذْرِينْ قُّوسْبَارنْثْ صَارْضنْثْ سبْعَا ن ثِيذْرِينْ إِيْمَانْ ذ إِشُّورنْ. ؤُشَا إِفَاقْ-د فِيرْعُونْ، ؤُ خْزَارْ، أَقَا ذ إِشْثْ ن ثرْجِيثْ.
8 غَارْ صّْبحْ إِبَانْ-د بلِّي بُوحْبڒْ نّسْ إِنّهْوڒْ ؤُشَا إِسّكّْ مَاحنْذْ أَذْ د-ڒَْاغَانْ إِ مَارَّا ثَارْوَا ن ثْسحَّارْثْ ن مِيصْرَا ؤُ إِ مَارَّا إِمِيغِيسنْ. إِعَاوْذْ أَسنْ فِيرْعُونْ ثَارْجِيثْ نّسْ، مَاشَا وَارْ ذِينْ ثُوغِي حذْ إِزمَّارْ أَذْ ت إِفسَّارْ إِ فِيرْعُونْ.
9 إِسِّيوڒْ ؤُمقّْرَانْ ن إِوَارَّاذنْ أَكْ-ذ فِيرْعُونْ، إِنَّا: ”ذڭْ وَاسّْ-أَ أَذْ تّْوَاسْعقْڒغْ خْ دّْنُوبْ إِنُو.
10 ؤُمِي إِفُّوڭمْ فِيرْعُونْ خْ إِمْسخَّارنْ نّسْ، إِڭَّا أَيِي ذِي ڒحْبسْ ذِي ثَادَّارْثْ ن ڒْْقبْطَانْ ن إِعسَّاسنْ ن أَرِّيمثْ، أَمْ نشّْ أَمْ ؤُمقّْرَانْ ن إِخبَّازنْ.
11 نشّْ ذ نتَّا نُورْجَا إِشْثْ ن ثَارْجِيثْ ذِي دْجِيرثْ ذ إِشْثْ. كُوڒْ إِجّْ زَّايْنغْ يُورْجَا ثَارْجِيثْ نّسْ س ڒْْمعْنَا نّسْ.
12 ثُوغَا ذِينْ أَكِيذْنغْ إِجّْ ن ؤُبْڒِيغْ ذ أَعِيبْرَانِي. ثُوغَا-ث ذ أَمْسخَّارْ ن ڒْْقبْطَانْ ن إِعسَّاسنْ ن أَرِّيمثْ. نْحَاجَا أَسْ ثِيرْجَا نّغْ ؤُشَا إِفسَّارْ أَنغْ ثنْثْ. إِ كُوڒْ إِجّْ زَّايْنغْ إِفسَّارْ أَسْ ثَارْجِيثْ نّسْ.
13 أَمْ مَامّشْ ثنْثْ إِفسَّارْ، أَمنِّي إِ إِمْسَارْ. أَقَا فِيرْعُونْ يَارَّا أَيِي نشّْ غَارْ ڒْْخذْمثْ إِنُو ؤُ ونّغْنِي يُويڒْ إِ-ث.“
14 إِسّكّْ فِيرْعُونْ حِيمَا أَذْ د-ڒَْاغَانْ خْ يُوسُوفْ ؤُشَا سُّوفّْغنْ ث-إِ-د ذغْيَا زڭْ وحْفُورْ ن إِمحْبَاسْ. إِحفّْ أَشُوَّافْ، إِبدّڒْ أَرُّوضْ ؤُشَا أَمُّو إِ يُوذفْ غَارْ فِيرْعُونْ.
15 إِنَّا فِيرْعُونْ إِ يُوسُوفْ: ”نشّْ ؤُرْجِيغْ إِشْثْ ن ثَارْجِيثْ، وَارْ إِدْجِي وِي ت غَا إِفسَّارنْ. مَاشَا أَقَا سْڒِيغْ خَاكْ بلِّي شكْ، خْمِي إِ غَا ثسْڒِيذْ إِ ثَارْجِيثْ، ثْزمَّارذْ أَذْ ت ثْفسَّارذْ.“
16 يَارَّا-د يُوسُوفْ خْ فِيرْعُونْ، إِنَّا: ”وَارْ إِدْجِي شَا زَّايِي، مَاشَا أَربِّي أَذْ د-يَارّْ خْ مَامّشْ غَا إِذْوڒْ ؤُمدُّورْ ن فِيرْعُونْ.“
17 إِنَّا فِيرْعُونْ إِ يُوسُوفْ: ”ذِي ثَارْجِيثْ إِنُو ژْرِيغْ إِخفْ إِنُو بدّغْ خْ ثْمَا ن إِغْزَارْ.
18 أَقَا ڭعّْذنْثْ-إِ-د سبْعَا ن ثْفُونَاسِينْ زڭْ إِغْزَارْ، صحّنْثْ ؤُ صبْحنْثْ إِ ڒْْخزْرَاثْ، هدَّانْثْ جَارْ وحْثِيشْ ن ؤُغَانِيمْ.
19 أَوَارْنِي أَسنْثْ سبْعَا ن ثْفُونَاسِينْ نّغْنِي ڭعّْذنْثْ-إِ-د. ثُوغَا كُّوشّْضنْثْ ؤُ وَارْ حْڒِينْثْ ذڭْ وُوذمْ، ؤُژْغنْثْ. أَمُّو وَارْ حْڒِينْثْ،عمَّارْصْ وَارْ ثنْثْ ژْرِيغْ ذِي ثمُّورْثْ ن مِيصْرَا أَمْ ثكْمڒْ.
20 ثِيفُونَاسِينْ يُوژْغنْ، وَارْ إِحْڒِينْ، سَارْضنْثْ سبْعَا ن ثْينْذُوزِينْ ثِيمزْوُورَا إِصحّنْ.
21 ؤُمِي ؤُذْفنْثْ ثِينَا ذڭْ ؤُعذِّيسْ نْسنْثْ، عَاذْ وَارْ إِسِّينْ حذْ، بلِّي أَقَا ؤُذْفنْثْ ذڭْ ؤُعذِّيسْ نْسنْثْ، أَقَا قِّيمنْثْ وَارْ حْڒِينْثْ إِ ڒْْخزْرَاثْ أَمْ قْبڒْ. خنِّي فَاقغْ.
22 عَاوذْ ژْرِيغْ ذِي ثَارْجِيثْ إِنُو، خْزَارْ، زڭْ إِشْثْ ن ثْسطَّا فّْغنْثْ-إِ-د سبْعَا ن ثِيذْرِينْ شُّورنْثْ ؤُ شْنَانْثْ.
23 خْزَارْ، ژْرِيغْ، ڭعّْذنْثْ-إِ-د سبْعَا ن ثِيذْرِينْ قُّوسْبَارنْثْ، ؤُژْغنْثْ، إِسّْشمْضْ إِ-ثنْثْ ؤُسمِّيضْ أَشَارْقِي.
24 ؤُ سبْعَا ن ثِيذْرِينْ يُوژْغنْ، صَارْضنْثْ سبْعَا ن ثِيذْرِينْ نِّي إِشْنَانْ. نِّيغْ ثَارْجِيثْ إِ ثَارْوَا ن ثْسحَّارْثْ، مَاشَا وَارْ ذِينْ ثُوغِي حذْ إِ إِزمَّارنْ أَذْ إِفسَّارْ ثَارْجِيثْ-أَ.“
25 خنِّي إِنَّا يُوسُوفْ إِ فِيرْعُونْ: ”ثَارْجِيثْ ن فِيرْعُونْ ذ إِشْثْ. أَربِّي إِبيّنْ إِ فِيرْعُونْ مِينْ إِ غَا يڭّْ نتَّا.
26 سبْعَا ن ثْفُونَاسِينْ شْنَانْثْ أَقَا أَثنْثْ ذ سبْعَا ن إِسڭّْوُوسَا. ؤُشَا ثِيذْرِينْ شْنَانْثْ أَقَا ذ سبْعَا ن إِسڭّْوُوسَا. ذ ثَارْجِيثْ ذ إِشْثْ.
27 سبْعَا ن ثْفُونَاسِينْ ؤُژْغنْثْ وَارْ إِحْڒِينْ ثِينِّي د-يُوڒْينْ أَوَارْنِي أَسنْثْ، أَقَا ذ سبْعَا ن إِسڭّْوُوسَا، ؤُ سبْعَا ن ثِيذْرِينْ قُّوسْبَارنْثْ، ثِينِّي إِسّْشمْضْ ؤُسمِّيضْ أَشَارْقِي، أَقَا أَثنْثْ ذ سبْعَا ن إِسڭّْوُوسَا إِ ذِي غَا يِيڒِي ڒَْاژْ.
28 ذ وَا ذ أَوَاڒْ إِ نِّيغْ إِ فِيرْعُونْ. مِينْ غَا يڭّْ أَربِّي، أَقَا إِسّْشنْ إِ-ث إِ فِيرْعُونْ.
29 خْزَارْ، ذِي سبْعَا ن إِسڭّْوُوسَا إِ د-إِڭُّورنْ أَذْ ثِيڒِي ثْيَاوَانْثْ ثَامقّْرَانْثْ خْ مَارَّا ثَامُّورْثْ ن مِيصْرَا.
30 أَوَارْنِي أَسنْ أَذْ د-أَسنْ سبْعَا ن إِسڭّْوُوسَا ن ڒَْاژْ. ذِي مَارَّا ثَامُّورْثْ ن مِيصْرَا أَذْ تُّونْ مَارَّا ثْيَاوَانْثْ ؤُشَا ڒَْاژْ أَذْ إِثحَّا ثَامُّورْثْ.
31 ؤُشَا ثْيَاوَانْثْ وَارْ ثتِّيڒِي ثتّْوَاسّنْ عَاذْ زِي سِّيبّثْ ن ڒَْاژْ إِ ت-إِ-د-إِضْفَارنْ، مَاغَارْ ڒْْحَاڒْ أَذْ يِيڒِي إِقْسحْ أَطَّاسْ.
32 عْلَاحْسَابْ طّْبِيعثْ ن ثْنَاينْ ن وُوذْمَاونْ ن ثَارْجِيثْ ن فِيرْعُونْ، أَقَا ثْنَاينْ ن ثْسقَّارْ، أَقَا مَانْ أَيَا س مِينْزِي يُورَا ت أَربِّي نِيشَانْ ؤُ أَربِّي أَقَا أَذْ ت يڭّْ ذغْيَا.
33 أجّْ فِيرْعُونْ ڒخُّو أَذْ يَارْزُو خْ إِجّْ ن ورْيَازْ س ڒفْهَامثْ ذ ثِيغِيثْ، مَاحنْذْ أَذْ ث إِڭّْ خْ ثمُّورْثْ ن مِيصْرَا.
34 أجّْ فِيرْعُونْ أَذْ إِڭّْ أَمُّو: أجّْ إِ-ث أَذْ إِڭّْ إِوقَّافنْ خْ ثمُّورْثْ، مَاحنْذْ أَذْ كْسِينْ ڒخْمُوسْ ن ڒْْغِيدْجثْ ن ثمُّورْثْ ن مِيصْرَا ذِي سبْعَا ن إِسڭّْوُوسَا ن ثْيَاوَانْثْ.
35 أجّْ إِ-ثنْ أَذْ سّْمُوننْ مَارَّا ڒعْوتْشْ ذڭْ إِسڭّْوُوسَا إِصبْحنْ إِ د غَا يَاسنْ ؤُشَا أَذْ خمّْڒنْ ڒْْحبّْ ن يِيرْذنْ سَاذُو ؤُفُوسْ ن فِيرْعُونْ، مَاحنْذْ أَذْ ث خمّْڒنْ ذ مَاشَّا ذِي ثْندَّامْ.
36 أَذْ يِيڒِي ذ ڒخْزنْ ن مَاشَّا إِ ثمُّورْثْ إِ سبْعَا ن إِسڭّْوُوسَا ن ڒَْاژْ نِّي د غَا إِوْضَانْ خْ ثمُّورْثْ ن مِيصْرَا، حِيمَا ثَامُّورْثْ وَارْ ثتّْمتِّي شَا س ڒَْاژْ.“
37 أَوَاڒنْ-أَ بَاننْ-د ذ لمْلِيحْ إِ فِيرْعُونْ ذ مَارَّا إِمْسخَّارنْ نّسْ.
يُوسُوفْ إِذْوڒْ ذ ڒْْحَاكمْ خْ ثمُّورْثْ ن مِيصْرَا
38 خنِّي إِنَّا فِيرْعُونْ إِ إِمْسخَّارنْ نّسْ: ”مَا إِزمَّارْ أَذْ إِتّْوَافْ شَا ن ورْيَازْ أَمْ وَا إِ ذِي إِزدّغْ أَرُّوحْ ن أَربِّي؟“
39 ؤُشَا إِنَّا فِيرْعُونْ إِ يُوسُوفْ: ”ؤُمِي أَربِّي إِمّڒْ أَشْ-د مَارَّا أَيَا، خْ ؤُيَا وَارْ ذِينْ يدْجِي ونِّي غَارْ ثدْجَا ڒفْهَامثْ ذ ثِيغِيثْ أَمْ شكْ.
40 شكْ أَذْ ثِيڒِيذْ خْ ثَادَّارْثْ إِنُو ؤُ إِ وَاوَاڒْ نّشْ أَذْ إِطَاعْ ڒْْڭنْسْ إِنُو مَارَّا. مْغِيرْ خْ ڒْْعَارْشْ وَاهَا أَذْ إِڒِيغْ نشّْ ذ أَمقّْرَانْ خَاكْ.“
41 يَارْنِي إِنَّا فِيرْعُونْ إِ يُوسُوفْ: ”خْزَارْ، ڭِّيغْ شكْ خْ مَارَّا ثَامُّورْثْ ن مِيصْرَا.“
42 ؤُشَا إِكّسْ فِيرْعُونْ ثَاخَاذنْثْ نّسْ زڭْ ؤُفُوسْ نّسْ، إِڭَّا إِ-ت ذڭْ ؤُفُوسْ ن يُوسُوفْ ؤُشَا إِسّْيَارْضْ أَسْ أَرُّوضْ ن ڒقْطنْ أَزْذَاذْ ؤُشَا إِڭَّا أَسْ ثَاسدّشْثْ ن وُورغْ ذڭْ يِيرِي نّسْ.
43 إِسّنْيَا إِ-ث ذِي ثْكَارُّوثْ وِيسّْ ثْنَاينْ إِ ثُوغَا غَارسْ ؤُشَا ڒَْاغَانْ أَمْ ڭُّورنْ زَّاثسْ: ”قوْسْ!“ أَمُّو إِ ث إِڭَّا خْ مَارَّا ثَامُّورْثْ ن مِيصْرَا.
44 إِنَّا فِيرْعُونْ إِ يُوسُوفْ: ”نشّْ ذ فِيرْعُونْ، بْڒَا شكْ ؤُڒَا ذ إِجّْ أَذْ إِڭعّذْ أَفُوسْ نّسْ نِيغْ أَضَارْ نّسْ ذِي مَارَّا ثَامُّورْثْ ن مِيصْرَا.“
45 إِڒَاغَا فِيرْعُونْ إِ يُوسُوفْ س يِيسمْ ن صَافْنَاثْ-فَاعْنِيحْ ؤُشَا إِوْشَا أَسْ أَسْنَاثْ ذ ثَامْغَارْثْ، ثنِّي ذ يدْجِيسْ ن فُوثِي-فَارَاعْ، أَكهَّانْ ن ؤُنْ. ؤُشَا إِجُوڒْ يُوسُوفْ ذِي ثمُّورْثْ ن مِيصْرَا.
46 ثُوغَا يُوسُوفْ ذ مِّيسْ ن ثْڒَاثِينْ ن إِسڭّْوُوسَا ڒَْامِي إِبدّْ نتَّا زَّاثْ إِ فِيرْعُونْ، أَجدْجِيذْ ن مِيصْرَا، ؤُشَا إِفّغْ يُوسُوفْ زَّاثْ إِ فِيرْعُونْ ؤُشَا إِجُوڒْ خْ مَارَّا ثَامُّورْثْ ن مِيصْرَا.
47 ؤُشَا ثسّغْمِي-د ثمُّورْثْ ذِي سبْعَا ن إِسڭّْوُوسَا س ثْيَاوَانْثْ.
48 إِسّْمُونْ مَارَّا مَاشَّا ن سبْعَا ن إِسڭّْوُوسَا ن ثْيَاوَانْثْ، إِنِّي ثُوغَا ذِي ثمُّورْثْ ن مِيصْرَا، ؤُشَا إِخمّڒْ مَاشَّا ذِي ثْندَّامْ. مَاشَّا ن إِيَّارنْ إِ ذ أَسْ د-إِنّْضنْ إِ كُوڒْ ثَانْذِينْثْ، إِخمّڒْ إِ-ت ذَايسْ ذَاخڒْ ذِي ثنْذِينْثْ.
49 يُوسُوفْ إِخمّڒْ ڒْْحبّْ ن إِرْذنْ أَطَّاسْ، أَنشْثْ ن إِجْذِي ن ڒبْحَارْ، أَڒَامِي وَارْ إِزمَّارْ أَذْ إِتّْوَاحْسبْ، مِينْزِي ثُوغَا-ث بْڒَا ڒحْسَابْ.
50 قْبڒْ إِ د-يُوسَا ؤُسڭّْوَاسْ أَمزْوَارُو ن ڒَْاژْ، مَّارنْينْ-د غَارْ يُوسُوفْ ثْنَاينْ ن إِحنْجِيرنْ، إِنِّي ذ أَسْ د-ثُورُووْ أَسْنَاثْ، يدْجِيسْ ن فُوثِي-فَارَاعْ، أَكهَّانْ ن ؤُنْ.
51 إِسمَّا يُوسُوفْ أَمنْزُو مَانَاسَّا، مِينْزِي إِنَّا: ”أَربِّي أَقَا إِسّتُّو أَيِي مَارَّا ثَامَارَا إِنُو ذ مَارَّا ثَادَّارْثْ ن بَابَا.“
52 وِيسّْ ثْنَاينْ إِسمَّا إِ-ث إِفْرَايِيمْ، مِينْزِي إِنَّا: ”أَربِّي إِڭَّا أَيِي س ڒْْغِيدْجثْ ذِي ثمُّورْثْ ن ڒحْصَارثْ إِنُو.“
53 خنِّي كمّْڒنْ سبْعَا ن إِسڭّْوُوسَا ن ؤُفيّضْ ن ڒْْغِيدْجثْ نِّي إِكِّينْ خْ ثمُّورْثْ ن مِيصْرَا،
54 ؤُشَا بْذَانْ أَذْ د-أَسنْ سبْعَا ن إِسڭّْوُوسَا ن ڒَْاژْ، أَمْ مَامّشْ خَاسْ إِسِّيوڒْ يُوسُوفْ. ثُوغَا ڒَْاژْ ذِي مَارَّا ثِيمُّورَا، مَاشَا ذِي مَارَّا ثَامُّورْثْ ن مِيصْرَا ثُوغَا ذَايسْ عَاذْ أَغْرُومْ.
55 أَڒَامِي ثُوغَا ڒَْاژْ ذِي مَارَّا ثَامُّورْثْ ن مِيصْرَا، إِسْغُويْ ڒْْڭنْسْ غَارْ فِيرْعُونْ خْ وغْرُومْ. ؤُشَا إِنَّا فِيرْعُونْ إِ مَارَّا إِمِيصْرِييّنْ: ”رُوحمْ غَارْ يُوسُوفْ، ڭّمْ مِينْ ذ أَومْ غَا يِينِي!“
56 ثُوغَا ڒَْاژْ إِزدْجعْ خْ مَارَّا ثَامُّورْثْ ؤُشَا يَارْزمْ يُوسُوفْ خْ مَارَّا مِينْ ثُوغَا إِخمّڒْ، ؤُشَا إِزّنْزْ إِ-ث إِ إِمِيصْرِييّنْ، مِينْزِي ثُوغَا ڒَْاژْ إِذْوڒْ إِمْغَارْ أَطَّاسْ ذِي ثمُّورْثْ ن مِيصْرَا.
57 زِي مَارَّا ثِيمُّورَا ؤُسِينْ-د إِوْذَانْ غَارْ مِيصْرَا غَارْ يُوسُوفْ حِيمَا أَذْ سْغنْ، مِينْزِي ذِي مَارَّا ثِيمُّورَا ثُوغَا ڒَْاژْ إِمْغَارْ أَطَّاسْ.