2
يَاسُوع لْمَاسِيحْ، أَرَّايْسْ نّغْ يَارحّْمنْ ن إِكهَّاننْ
1 س ؤُينِّي إِتّْخصَّا أَنغْ أَذْ نوْشْ ثَايْنِيثْ كْثَارْ إِ مِينْ نسْڒَا، حِيمَا وَارْ نتّفّغْ زڭْ وبْرِيذْ.
2 مِينْزِي، مَاڒَا أَوَاڒْ إِ إِنَّانْ لْمَالَاكَاثْ ثُوغَا ثْبدّْ ؤُ مَارَّا وِي ث إِسْڒِينْ، مَاشَا إِعْذُو خَاسْ، أَقَا إِتّْوَاخدْجصْ س ڒْْحقّْ،
3 مَامّشْ إِ غَا نڭّْ أَذْ نَارْوڒْ نشِّينْ، مَاڒَا نسّحْقَارَا ثِيمسْڒَايِينْ إِ إِدْجَانْ ذ ثُوذَارْثْ إِ نشِّينْ، ثِيمسْڒَايِينْ إِ خفْ ثُوغَا إِسَّاوَاڒْ سِيذِيثْنغْ غَارْ ؤُمزْوَارُو، ؤُشَا خنِّي تّْوَاضمْننْثْ أَنغْ زڭْ يِينِّي جَارَانغْ إِ ثُوغَا ثنْثْ زَّايسْ إِسْڒِينْ،
4 ؤُمِي أَربِّي إِشْهذْ أَكِيذْسنْ س ڒعْڒَامَاثْ ذ لْمُوعْجِيزَاثْ ذ ڒعْجَايبْ إِفَارْزنْ ؤُ س ثْموْشِي ن أَرُّوحْ إِقدّْسنْ، ثِينِّي إِمّوْشنْ أَمْ مَامّشْ إِخْسْ نتَّا.
5 مِينْزِي وَارْ إِسَّارْسْ شَا زّْمَانْ إِ د غَا يَاسنْ خْ ثنِّي نسِّيوڒْ، سَاذُو ڒُْومُورْ ن لْمَالَاكَاثْ،
6 مَاشَا أَمْ مَامّشْ شهّْذنْثْ ؤُ قَّارنْثْ ثِيرَا إِقدّْسنْ:
”مِينْ إِعْنَا بْنَاذمْ،
أَقَا شكْ إِ ذَايسْ إِتّْخَارَّاصنْ،
ؤُ مِينْ إِعْنَا مِّيسْ ن بْنَاذمْ،
أَقَا شكْ إِ ذَايسْ إِتّْهِيلَّانْ؟
7 شكْ ثڭِّيذْ ث شْوَايْثْ سَاذُو لْمَالَاكَاثْ،
ثڭِّيذْ أَسْ أَعُودْجِي ذ شَّانْ خْ ؤُخدْجِيفْ نّسْ،
ثوْشِيذْ أَسْ صُّولْطَا خْ ڒخْذَايمْ ن إِفَاسّنْ نّشْ.
8 أَقَا مَارَّا ثِيمسْڒَايِينْ ثڭِّيذْ ثنْثْ
سَاذُو إِضَارنْ نّسْ.“
ؤُمِي إِڭَّا مَارَّا ثِيمسْڒَايِينْ سَاذُو نتَّا، أَقَا وَارْ إِجِّي وَالُو وَارْ ث إِڭِّي سَاذُو نتَّا. مَاشَا ڒخُّو وَارْ نْژَارْ عَاذْ مَارَّا إِتّْوَاڭّْ سَاذُو نتَّا،
9 مَاشَا نتّْوَاڒَا بلِّي نتَّا، أَقَا-ث ذ يَاسُوع، ثُوغَا إِتّْوَاڭّْ شْوَايْثْ سَاذُو لْمَالَاكَاثْ ذِي سِّيبّثْ ن ؤُودّبْ ن ڒْْموْثْ نّسْ، نتّْوَاڒَا إِ-ث س تَّاجْ ن ؤُعُودْجِي ذ شَّانْ خْ ؤُزدْجِيفْ نّسْ، مَاغَارْ أَربِّي إِقَّاسْ ڒْْموْثْ إِ مَارَّا إِوْذَانْ عْلَاحْسَابْ أَرْضَا نّسْ.
10 مِينْزِي ثُوغَا إِتّْڒِيقْ أَسْ إِ نتَّا س ونِّي ؤُ إِ ونِّي دْجَانْثْ مَارَّا ثْمسْڒَايِينْ - نتَّا ذ ونِّي إِ د-إِتَّاوْينْ أَطَّاسْ ن إِحنْجِيرنْ غَارْ ؤُعُودْجِي - مَاحنْذْ أَذْ إِكمّڒْ ؤُزدْجِيفْ ن ثُوذَارْثْ نْسنْ س ؤُودّبْ نّسْ.
11 مِينْزِي ذ ونِّي إِسّْقدّْسنْ ذ يِينِّي إِتّْوَاقدّْسنْ، نِيثْنِي مَارَّا ذ إِجّنْ. س ؤُينِّي نتَّا وَارْ إِسضْحِي شَا أَذْ أَسنْ إِڒَاغَا أَوْمَاثنْ نّسْ،
12 ؤُمِي إِنَّا:
”أَذْ بَارّْحغْ إِ وَاوْمَاثنْ إِنُو س يِيسمْ نّشْ،
ذِي ڒْْوسْطْ ن ثْمسْمُونْثْ أَذْ شكْ صبّْحغْ.“
13 ؤُشَا عَاوذْ:
”نشّْ أَذْ ذَايسْ تِّيقّغْ!“
ؤُشَا عَاوذْ:
”أَقَا ذَا، نشّْ ذ ثَارْوَا إِ ذ أَيِي إِوْشَا أَربِّي.“
14 مِينْزِي ثَارْوَا شَارْشنْ ذڭْ ويْسُومْ ذ إِذَامّنْ، ؤُڒَا ذ نتَّا إِشَارْشْ أَمُّو كِيفْكِيفْ ذِي مَانْ أَيَا، حِيمَا أَذْ إِبطّڒْ س ڒْْموْثْ نّسْ ونِّي غَارْ ثدْجَا صُّولْطَا خْ ڒْْموْثْ، أَقَا نتَّا ذ شِّيطَانْ،
15 ؤُشَا خنِّي أَذْ إِفكّْ إِنِّي إِسّعْدُّونْ قَاعْ ثُوذَارْثْ نْسنْ أَمْ إِسمْغَانْ زِي ثِيڭّْوُوذِي ن ڒْْموْثْ.
16 مِينْزِي ڒْْموْثْ وَارْ غَارسْ ثدْجِي صُّولْطَا خْ لْمَالَاكَاثْ، مَاشَا ڒْْموْثْ غَارسْ صُّولْطَا خْ زَّارِيعثْ ن إِبْرَاهِيمْ.
17 س ؤُينِّي ثُوغَا إِتّْخصَّا أَسْ أَذْ إِذْوڒْ أَمْ وَاوْمَاثنْ نّسْ زِي مَارَّا إِغزْذِيسنْ، حِيمَا أَذْ إِذْوڒْ ذ أَرَّايْسْ ن إِكهَّاننْ أَرْحِيمْ ذ أَمْثِيقِّي ذِي مِينْ إِدْجَانْ إِ أَربِّي، ؤُشَا أَذْ يِيڒِي بْڒَا ڒْْعِيبْ زِي جِّيهثْ ن دّْنُوبْ ن ڒْْڭنْسْ.
18 مِينْزِي مِينْ ذِي ثُوغَا نتَّا سِيمَانْثْ نّسْ إِودّبْ ؤُ إِتّْوَاجَارّبْ، أَقَا إِزمَّارْ أَذْ إِعَاونْ إِنِّي إِتّْوَاجَارّْبنْ.