12
إِفْرَايِيمْ ذ ؤُسْڒِيفْ نّسْ يَاعْقُوبْ
1 ”إِفْرَايِيمْ إِتّنّضْ أَيِي س ؤُخَارِّيقْ ؤُ ثَادَّارْثْ ن إِسْرَائِيل س ڒْْغشّْ، مَاشَا يَاهُوذَا إِتّثْلِيعْ عَاذْ أَكْ-ذ أَربِّي ؤُ أَكْ-ذ ؤُمْقدَّاسْ أَمقّْرَانْ ذ أَمْثِيقِّي.
2 إِفْرَايِيمْ ذ إِجّْ ن ؤُمكْسَاوْ يُويُورْ أَوَارْنِي إِ ؤُسمِّيضْ. أَسّْ مَارَّا يَارنِّي إِخَارِّيقنْ ذ ؤُردّدْجْ. نِيثْنِي ڭِّينْ إِجّْ ن ڒْْعَاهْذْ أَكْ-ذ أَشُّورْ ؤُشَا تَّاوْينْ زّشْثْ غَارْ مِيصْرَا.“
3 ”سِيذِي غَارسْ إِجّْ ن ؤُمْشُوبّشْ أَكْ-ذ يَاهُوذَا ؤُ نتَّا أَذْ إِڭّْ س يَاعْقُوبْ عْلَاحْسَابْ إِبْرِيذنْ نّسْ، أَذْ ث إِخدْجصْ أَمْ مَامّشْ ثِيمڭَّا نّسْ.
4 ذڭْ ؤُعذِّيسْ ن يمَّاسْ إِطّفْ ؤُمَاسْ غَارْ ؤُنِيرْزْ ؤُ ڒَْامِي ثُوغَا ذ أَرْيَازْ إِجْهذْ إِمّْعَاڒَا أَكْ-ذ أَربِّي.
5 نتَّا ثُوغَا إِمّْنغْ أَكْ-ذ لْمَالَاكْ ؤُشَا إِغْڒبْ. إِرُو، إِحشّمْ إِ-ث. يُوفَا إِ-ث ذِي بَايْثْ-إِلْ ؤُ ذِينِّي إِسِّيوڒْ نتَّا أَكِيذْنغْ،
6 وَاهْ، سِيذِي، أَربِّي ن ڒْْعسْكَارَاثْ، سِيذِي ذ إِسمْ نّسْ إِ ڒِْيذَارثْ.
7 ذْوڒْ غَارْ أَربِّي نّشْ، حْضَا ثَامخْسِيوْثْ إِشوَّارنْ ذ ڒْْحقّْ، ؤُ سِيثِيمْ ڒبْذَا إِ أَربِّي نّشْ.“
8 ”كنْعَانْ غَارسْ إِجّْ ن ڒْْمِيزَانْ إِغشّْ ذڭْ ؤُفُوسْ نّسْ، إِتّعْجِيبْ أَسْ أَذْ إِبعّجْ.
9 مَاشَا إِفْرَايِيمْ إِقَّارْ: ’نشّْ ذوْڒغْ ذ بُو-وَاڭْڒَا، يَارْوغْ إِشْثْ ن ڒكْسِيبثْ ذ ثَامقّْرَانْثْ إِ يِيخفْ إِنُو. ذِي مَارَّا ڒْْخذْمثْ إِنُو وَارْ ذَايِي تِّيفنْ شَا ڒْْمُوعْصِييّثْ نِّي إِدْجَانْ ذ دّنْبْ.‘ “
10 ”نشّْ ذ سِيذِي، أَربِّي نّشْ، زڭْ وَامِي ثفّْغمْ كنِّيوْ زِي ثمُّورْثْ ن مِيصْرَا. نشّْ أَذْ شكْ جّغْ أَذْ ثْزذْغذْ ذڭْ إِقِيضَانْ أَمْ ذڭْ وُوسَّانْ ن ثْمسْمُونْثْ ذِي ڒخْڒَا.
11 نشّْ أَذْ سِّيوْڒغْ غَارْ إِنَابِييّنْ ؤُ نشّْ أَذْ أَرْنِيغْ ڒوْحِييْ أَطَّاسْ ؤُ س ؤُفُوسْ ن إِنَابِييّنْ أَذْ سِّيوْڒغْ س ڒمْثُوڒْ.“
12 ”مَاڒَا ثُوغَا جِيلْعَاذْ ذ ڒْْمُوعْصِييّثْ، خنِّي ذوْڒنْ نِيثْنِي خْوَانْ قَاعْ ذِي جِيلْعَاذْ. أَقَا قدّْمنْ ذِينْ إِفُونَاسنْ. ؤُڒَا ذ إِعَالْطَارنْ نْسنْ ذوْڒنْ ذ إِعُورِّيشنْ ن إِژْرَا ذِي ڒخْضُوضْ ن إِيَّارنْ.
13 يَاعْقُوبْ يَارْوڒْ غَارْ جّْوَايهْ ن أَرَامْ ؤُ إِسْرَائِيل ثُوغَا إِتّْسخَّارْ خْ يِيشْثْ ن ثمْغَارْثْ، ؤُ نتَّا يَارْوسْ ثَاحِيمَارْثْ ذِي طّْوعْ ن يِيشْثْ ن ثمْغَارْثْ،
14 مَاشَا س يِيجّْ ن ؤُنَابِي إِسّْڭعّذْ سِيذِي إِسْرَائِيل زِي مِيصْرَا ؤُ س يِيجّْ ن ؤُنَابِي يَارْوسْ إِ-ث.
15 إِفْرَايِيمْ ثُوغَا إِسْعَارْ إِ-ث أَطَّاسْ. س ؤُيَا أَذْ يجّْ سِيذِي إِذَامّنْ نّسْ أَذْ خَاسْ د-أَسنْ ؤُ سِيذِي نّسْ أَذْ أَسْ إِخدْجصْ ڒْْحڭْرَا نّسْ.“