23
1 ڒْْحُوكْمْ إِسَّاڭّْوَاذنْ خْ صُورْ.
” ’رُومْ، أَ إِغَارُّوبَا ن ثَارْشِيشْ، مَاغَارْ ثهْذمْ ثنْذِينْثْ ن صُورْ ؤُمِي وَارْ ثقِّيمْ ثَادَّارْثْ ؤُڒَا ذ ڒْْمُويِّي.‘ وَاهْ، أَمُّو إِ ذ أَسنْ إِتّْوَاسَّارْڭبْ زِي ثمُّورْثْ ن أَيْثْ ن كِيتِّيمْ.
2 ’سُوسْممْ، أَ كنِّيوْ إِمزْذَاغْ ن ثڭْزِيرْثْ! إِسبَّابنْ ن صِيذُونْ إِنِّي إِژكّْوَانْ ڒبْحَارْ س إِغَارُّوبَا نْسنْ، أَقَا شُّورنْ شمْ س سّڒْعثْ!‘
3 زَّارِيعثْ ن سِيخُورْ، صَّابثْ ن إِغْزَارْ ن نِيلْ، ثذْوڒْ ذ ڒْْمُونثْ نّسْ. أَمُّو إِ ثذْوڒْ ثنْذِينْثْ ن صُورْ ذ ڒْْمَارْسِي ن ڒڭْنُوسْ.“
4 ” ’سضْحَا، أَ شمْ صِيذُونْ!‘ مَاغَارْ ڒبْحَارْ إِقَّارْ، لْبُورْجْ ن ڒبْحَارْ إِقَّارْ: ’وَارْ ذَايِي ثُوغِي ڒوْجعْ ن ثَارُوثْ ؤُ نشّْ وَارْ ؤُرِيوغْ. نشّْ وَارْ سّْغِيمِيغْ إِحُوذْرِييّنْ ؤُ وَارْ أَربِّيغْ ثِيعْزُورَايْ.‘
5 خْمِي غَا يَاوضْ ڒخْبَارْ غَارْ مِيصْرَا، خنِّي أَذْ نزْبَارنْ نِيثْنِي س ڒحْرِيقْ خْمِي غَا سْڒنْ إِ ڒخْبَارْ خْ صُورْ.“
6 ” ’ژْوَامْ غَارْ ثَارْشِيشْ، سْغُويّمْ، كنِّيوْ إِمزْذَاغْ ن ثڭْزِيرْثْ!‘
7 مَا وَا ذ أَشْثَابْ نْومْ، أَ ثَانْذِينْثْ إِنڭّْزنْ س ڒفْرَاحثْ، ثنِّي زِي لْ-أَصلْ نّسْ إِدْجَانْ زڭْ وُوسَّانْ ن وشْحَاڒْ ؤُيَا؟ إِصُورَافْ نّسْ أَذْ ت أَرْبُونْ غَارْ ڒَْاڭّْوَاجْ حِيمَا أَذْ ذِينْ ثقِّيمْ أَمْ ثْبَارَّانشْثْ.
8 وِي إِخَارّْصنْ مَانْ أَيَا ذِي ڒْبَاڒْ نّسْ ضِيدّْ إِ صُورْ، ثَانْذِينْثْ نِّي إِبطَّانْ تِّيجَانْ، أَقَا زعْمَا إِسبَّابنْ نّسْ ذ ڒْْحُوكَّامْ، إِتِّيجَارِييّنْ نّسْ ذ إِمْشنّْعنْ ن ثمُّورْثْ؟
9 سِيذِي ن ڒْْعسْكَارَاثْ أَقَا غَارسْ ذِي ڒْْبَاڒْ نّسْ حِيمَا أَذْ إِسّْعِيدْجثْ نّْفَاخثْ ن مَارَّا مِينْ إِدْجَانْ ذ ثَالْوِيزْثْ، حِيمَا أَذْ يَارْژْ ڒْْعزّْ ن مَارَّا إِمْشنّْعنْ ن ثمُّورْثْ.“
10 ” ’سسْفِييْ ثَامُّورْثْ نّمْ أَمْ يغْزَارْ ن نِيلْ، أَ شمْ يدْجِيسْ ن ثَارْشِيشْ! وَارْ شمْ ثْمنّعْ ؤُڒَا ذ إِشْثْ ن ڒْْحَاجّثْ عَاذْ!‘
11 نتَّا إِسّْوِيژّضْ أَفُوسْ نّسْ خْ ڒبْحَارْ، نتَّا إِسّنْهزّْ ثِيڭلْذِيوِينْ. سِيذِي يُومُورْ ضِيدّْ إِ كنْعَانْ مَاحنْذْ أَذْ أَردّْدْجنْ لْبُورْجَاثْ نّسْ.
12 نتَّا إِنَّا: ’عمَّارْصْ عَاذْ أَذْ ثِيڒِيذْ ثْفَارْحذْ، ثتّْوَاسّْعِيدْجْثذْ، أَ ثَاعْزَارشْثْ، يدْجِيسْ ن صِيذُونْ! رُوحْ غَارْ أَيْثْ ن كِيتِّيمْ، كَّارْ، ژْوَا. ؤُڒَا ذِينِّي وَارْ ثطِّيفذْ ڒهْنَا.‘
13 خْزَارْ، ثَامُّورْثْ ن إِكَالْذَانِييّنْ، ڒْڭنْسْ-أَ إِ ثُوغَا وَارْ إِدْجِينْ، أَقَا إِنيّشْ أَشُّورْ ذ ثَامُّورْثْ إِ ڒوْحُوشْ ن ڒخْڒَا - مَاغَارْ نِيثْنِي سّْڭعّْذنْ لْبُورْجَاثْ نْسنْ إِ وهْجَامْ، سّْعَارَّانْ ڒقْصُورْ نّسْ - أَقَا ڒْْڭنْسْ-أَ يَارَّا إِ-ت ذ ڒْْخِيرْبثْ.
14 رُومْ، كنِّيوْ إِغَارُّوبَا ن ثَارْشِيشْ، مَاغَارْ لْبُورْجْ نْومْ إِتّْوَاهْذمْ.“
15 ”ذڭْ وَاسّْ نِّي أَذْ إِمْسَارْ، أَقَا صُورْ أَذْ ثتّْوَاتُّو ڒْْقدّْ ن سبْعِينْ ن إِسڭّْوُوسَا، أَمْ ڒْْقدّْ ن وُوسَّانْ ن إِجّْ ن ؤُجدْجِيذْ. غَارْ ؤُنڭَّارْ ن سبْعِينْ ن إِسڭّْوُوسَا نِّي أَذْ إِمْسَارْ إِ صُورْ أَمْ مَامّشْ ذ أَسْ قَّارنْ ذڭْ إِزْڒِي ن ثمْغَارْثْ ن فَارْقْ-شّْغڒْ:
16 ’كْسِي ڒْْڭَامْبْرِي، ؤُيُورْ ؤُشَا نّضْ ذِي ثنْذِينْثْ، أَ شمْ، ثَامْغَارْثْ ن فَارْقْ-شّْغڒْ إِتّْوَاتُّونْ! إِرَارْ إِجّْ ن دْجْغَا مْلِيحْ ؤُشَاغنّجْ أَطَّاسْ، مَاحنْذْ أَذْ خَامْعقْڒنْ!‘
17 أَوَارْنِي سبْعِينْ ن إِسڭّْوُوسَا سِيذِي أَذْ يَارْزفْ صُورْ عَاوذْ ؤُشَا نتَّاثْ أَذْ د-ثذْوڒْ غَارْ ڒْْمُونثْ نّسْ ن فَارْقْ-شّْغڒْ ؤُشَا أَذْ ثسّفْسذْ إِخفْ نّسْ س مَارَّا ثِيڭلْذَاوِينْ ن دُّونشْثْ نِّي إِدْجَانْ خْ وُوذمْ ن ثمُّورْثْ.
18 مَاشَا ثَاسبَّابْثْ نّسْ ذ ڒْْمُونثْ نّسْ ن فَارْقْ-شّْغڒْ أَذْ إِڒِينْثْ قدّْسنْثْ إِ سِيذِي. وَارْ ثتّْوَاخمّڒْ ذڭْ إِخَّامنْ ن ثْخُوبَايْ ؤُ وَارْ ثتّْوَاخزّنْ، مَاغَارْ سّڒْعثْ نّسْ أَذْ ثِيڒِي إِ يِينِّي إِزدّْغنْ زَّاثْ إِ وُوذمْ ن سِيذِي، حِيمَا أَذْ شّنْ أَڒْ إِ غَا جِّيوْننْ ؤُشَا حِيمَا أَذْ يَارْضنْ أَرُّوضْ إِشُووَّارنْ.“