42
أَمْسخَّارْ ن سِيذِي ذ أَمْسخَّارْ نّسْ أَذَارْغَاڒْ، إِسْرَائِيل
1 ”خْزَارْ، أَمْسخَّارْ إِنُو ونِّي تّْعَاوَانغْ، ذ ونِّي فَارْزغْ، ذ ونِّي د-يُوسِينْ خْ ڒْْخَاضَارْ إِنُو. نشّْ سَّارْسغْ خَاسْ أَرُّوحْ إِنُو. نتَّا أَذْ إِسُّوفّغْ ڒحْكَامْ غَارْ ڒڭْنُوسْ.
2 وَارْ إِسْغُويُّو ؤُ وَارْ إِسّْڭِيعِّيذْ ثْمِيجَّا نّسْ ؤُ وَارْ إِتَّارِّي ثْمِيجَّا نّسْ أَذْ أَسْ سْڒنْ ذِي بَارَّا.
3 أَغَانِيمْ إِنْضفْسنْ وَارْ ث إِتَّارژِّي شَا ؤُ ثَافْثِيتْشْ ن ثِيفّسْثْ إِتّْذُوخُّوننْ وَارْ ث إِسّخْسِييْ شَا، وَاهْ، س ثِيذتّْ أَذْ إِسُّوفّغْ ثَاسڭْذَا.
4 نتَّا وَارْ إِتِّيحڒْ ؤُ وَارْ إِتّْوَارژِّي أَڒْ د-إِسّْبدّْ ثَاسڭْذَا خْ ثمُّورْثْ ؤُ غَارْ شَّارِيعَا نّسْ أَذْ رَاجَانْثْ ثِيڭْزِيرِينْ.“
5 ”أَمُّو إِ إِقَّارْ أَربِّي، سِيذِي، ونِّي إِڭِّينْ ؤُ إِبزّْعنْ إِجنْوَانْ، ونِّي إِڭِّينْ ثَامُّورْثْ ذ مِينْ خَاسْ إِغمّْينْ، ونِّي إِتِّيشنْ ثْوَارِّيثْ ن نّفْسْ إِ ڒْڭنْسْ إِ ذَايسْ إِزدّْغنْ، ؤُ بُوحْبڒْ إِ يِينِّي إِڭُّورنْ خْ ثمُّورْثْ:
6 ’نشّْ، سِيذِي، ڒَْاغِيغْ أَشْ ذِي ثْسڭْذَا ؤُشَا أَذْ شكْ منْعغْ زڭْ ؤُفُوسْ، أَذْ شكْ حْضِيغْ ؤُشَا أَذْ شكْ أَرّغْ ذ ڒْْعَاهْذْ إِ ڒْڭنْسْ ذ ثْفَاوْثْ إِ ڒڭْنُوسْ،
7 حِيمَا أَذْ ثَارْزْمذْ ثِيطَّاوِينْ إِذَاغَاڒنْ، أَذْ ثسُّوفّْغذْ إِمحْبَاسْ زِي ڒحْبسْ ؤُ يِينِّي إِقِّيمنْ ذِي ثَادْجسْثْ زِي ثَادَّارْثْ ن ثْعسَّاسْثْ.
8 نشّْ ذ سِيذِي، وَا ذ إِسمْ إِنُو، ؤُشَا وَارْ تِّيشغْ شَّانْ إِنُو إِ ونّغْنِي ؤُ أَسمْغَارْ إِنُو وَارْ ث تِّيشغْ إِ ڒخْيَاڒَاثْ إِنقْشنْ.
9 خْزَارْ، ثِيمسْڒَايِينْ ثِيمزْوُورَا إِوْضنْثْ ؤُشَا ثِيمسْڒَايِينْ ن جْذِيذْ أَذْ ثنْثْ بَارّْحغْ. قْبڒْ مَّا أَذْ فّْغنْثْ، أَذْ أَومْ ثنْثْ سّشْنغْ.‘ “
10 ”غنّْجمْ إِزْڒِي ن جْذِيذْ إِ سِيذِي، أَسمْغَارْ نّسْ زڭْ إِنڭُّورَا ن ثمُّورْثْ، كنِّيوْ إِنِّي إِندّْهنْ ڒبْحَارْ، ذ مَارَّا مِينْ ذَايسْ: كنِّينْثْ أَ ثِيڭْزِيرِينْ ذ إِمزْذَاغْ نْسنْثْ.
11 أَذْ إِسّْڭعّذْ ڒخْڒَا ثْمِيجَّا نّسْ ؤُشَا ؤُڒَا ذ ثْندَّامْ نّسْ، جْمِيعْ أَكْ-ذ ڒذْشُورْ نِّي ذِي إِزدّغْ قِيذَارْ. أجّْ إِنِّي إِزدّْغنْ ذِي ڒجْرُوفْ أَذْ سْڒِيوْڒونْ، أجّْ إِ-ثنْ أَذْ سْغُوينْ س ڒفْرَاحثْ خْ ثْقِيشِّيثِينْ ن إِذُورَارْ،
12 أجّْ إِ-ثنْ أَذْ سّْعُودْجنْ سِيذِي، أَذْ بَارّْحنْ شَّانْ نّسْ خْ مَارَّا ثِيڭْزِيرِينْ.
13 سِيذِي أَذْ د-إِفّغْ أَمْ بُو-ثغْرُوضْطْ، أَذْ إِسّكَّارْ مژْرِي ذڭْ ؤُمنْغِي أَمْ ورْيَازْ إِمحْضنْ، نتَّا أَذْ إِسْڒِيوْڒوْ، أَذْ إِسْغُويْ إِ ؤُمنْغِي، أَذْ إِحْصَارْ قَاعْ ڒْْعذْيَانْ نّسْ.“
14 ”نشّْ ثُوغَا سّغْذغْ زڭْ وشْحَاڒْ ؤُيَا، ثُوغَا سْقَارغْ، تّبَّاثغْ إِخفْ إِنُو. أَذْ سْغُويغْ أَمْ يِيشْثنْ إِتَّارُونْ، أَذْ ثنْ أَردّْدْجغْ ؤُ أَذْ ثنْ صَارْضغْ جْمِيعْ.
15 إِذُورَارْ ذ ثوْرِيرِينْ أَذْ ثنْ أَرّغْ ذ أَمسُّوشِي ؤُ أَذْ جّغْ أَغمُّويْ أَزِيزَا نْسنْ مَارَّا أَذْ يَاژغْ، إِغزْرَانْ أَذْ ثنْ ڭّغْ ذ ثِيڭْزِيرِينْ، ؤُشَا أَذْ سِّيژْغغْ إِيڒْمَامنْ.
16 إِذَارْغَاڒنْ أَذْ ثنْ نذْهغْ خْ إِجّْ ن وبْرِيذْ وَارْ ث سِّيننْ، أَذْ ثنْ جّغْ أَذْ ؤُيُورنْ خْ ثْبْرِيذِينْ وَارْ ثنْثْ أَرْڭْبنْ. طّْرَامْ زَّاثْ إِ ثِيطَّاوِينْ نْسنْ أَذْ ث ڭّغْ ذ ثْفَاوْثْ، مِينْ إِفَارْغنْ، أَذْ ث سڭّْذغْ. ثِينَا ذ ثِيمسْڒَايِينْ إِ غَا ڭّغْ ذِي طّْوعْ نْسنْ ؤُ وَارْ ذَايْسنْ سمْحغْ.
17 إِنِّي إِتّْشَاڒَانْ خْ ڒخْيَاڒَاثْ إِنقْشنْ، إِنِّي إِقَّارنْ إِ ڒخْيَاڒَاثْ إِفسْينْ: ’كنِّيوْ ذ إِربِّيثنْ نّغْ!‘، أَقَا نِيثْنِي أَذْ ذوْڒنْ غَارْ ضفَّارْ، أَذْ سضْحَانْ أَطَّاسْ.“
18 ”سْڒمْ، كنِّيوْ إِذُوهْشَارْ! إِذَارْغَاڒنْ، خْزَارمْ ؤُ وَاڒَامْ.
19 مَانْ ونْ إِدْجَانْ ذ أَذَارْغَاڒْ أَمْ ؤُمْسخَّارْ إِنُو، ذ أَذهْشُورْ أَمْ ؤُرقَّاسْ إِنُو؟ مَانْ ونْ إِدْجَانْ ذ أَذَارْغَاڒْ أَمْ ؤُمْثِيقِّي ؤُ ذ أَذَارْغَاڒْ أَمْ ؤُمْسخَّارْ ن سِيذِي؟
20 أَطَّاسْ إِ ثتّْوَاڒِيذْ، مَاشَا وَارْ ثُوشِيذْ وَالُو، إِوَا نتَّا يَارْزمْ إِمزُّوغنْ، مَاشَا وَارْ إِتّسْڒِي شَا.
21 ثُوغَا يَارْضَا سِيذِي ذِي طّْوعْ ن ثْسڭْذَا نّسْ مَاحنْذْ أَذْ إِسّمْغَارْ ذ إِسّْعُودْجْ شَّارِيعَا.
22 مَاشَا ڒخُّو نِيثْنِي ذ إِجّْ ن ڒْْڭنْسْ أَشَارنْ ت، كشّْضنْ ت. مَارَّا تّْوَاشدّنْ ذڭْ إِفْرَانْ، تّْوَاقّْننْ ذِي ڒحْبسْ. نِيثْنِي ذوْڒنْ ذ ثَايْمَارْثْ، أَمْ وَارْ ذِينْ إِدْجِي ؤُمْسنْجمْ، ذوْڒنْ نِيثْنِي إِ ثْكشَّاضْثْ، مَاشَا ؤُڒَا ذ إِجّْ إِقَّارْ: ’أَرّْ إِ-ث-إِ-د!‘
23 مَانْ ونْ زَّايْومْ أَذْ إِوْشْ أَمزُّوغْ إِ مَانْ أَيَا؟ مَانْ ونْ إِ غَا إِحكَّارنْ، مَانْ ونْ إِ غَا إِسڒْ ذِي طّْوعْ ن مِينْ غَا يِيڒِينْ أَوَارْنِي مَانْ أَيَا؟
24 مَانْ ونْ إِسِّيوْضنْ يَاعْقُوبْ أَمْ ثيْمَارْثْ ذ إِسْرَائِيل إِ إِخوَّاننْ؟ مَا وَارْ ت إِڭِّي سِيذِي، ونِّي ذِي نخْضَا؟ مَاغَارْ نِيثْنِي وَارْ خْسنْ أَذْ ؤُيُورنْ خْ إِبْرِيذنْ نّسْ، وَارْ خْسنْ أَذْ سْڒنْ غَارْ شَّارِيعَا نّسْ.
25 س ؤُينِّي إِزدْجعْ خَاسْ أَسْعَارْ ن وغْضَابْ نّسْ ؤُڒَا ذ لْعُونْفْ ن ڭَارَّا. إِقوَّارْ أَسْ س إِشعَّاڒنْ، مَاشَا نتَّا وَارْ ذ أَسْ إِحكَّارْ، إِقّذْ أَسْ ثِيمسِّي، مَاشَا نتَّا وَارْ ت إِكسِّي غَارْ وُوڒْ نّسْ.“