28
ڒْهَارْدْ ن أَيُوبْ خْ ثِيغِيثْ
1 س ثِيذتّْ، أَقَا ذِينْ أَمْشَانْ
مَانِي ثتّْوَافْ نُّوقَارْثْ،
ؤُڒَا ذِينْ أَمْشَانْ إِ وُورغْ
مَانِي ث سِّيزْذِيڭنْ.
2 ؤُزَّاڒْ تَّاوْينْ ث-إِ-د زڭْ ؤُشَاڒْ
ؤُ زڭْ وژْرُو سّْفسّْينْ نّْحَاسْ.
3 إِڭَّا بْنَاذمْ قطُّو إِ ثَادْجسْثْ،
نتَّا يَارزُّو ذِي مْكُوڒْ أَمْشَانْ مَانِي مَا،
خْ وژْرُو إِ د-إِتّفّْغنْ
زِي ثُوبَّارْشنْثْ ذ ثِيڒِي ن ڒْْموْثْ.
4 يَارْزمْ إِجّْ ن وخْجِيضْ
بْڒَا إِ غَا يِيڒِي حذْ أَكِيذسْ.
تّْوَاتُّونْ زڭْ إِضَارنْ ن يِينِّي سنّجْ نْسنْ،
ؤُيْڒنْ تّْرَاحنْ ثَاسنْ-د
بْڒَا إِ غَا يَارَّا أَسنْ-د حذْ ڒْْبَاڒْ.
5 إِتّفّغْ-د وغْرُومْ زِي ثمُّورْثْ،
أَمْ سْوَادَّايْ نّسْ مَارَّا
أَخْمِي س ثْمسِّي إِنّقْڒبْ.
6 إِژْرَا نّسْ ذ أَمْشَانْ مَانِي تَّافنْ صَافِّيرْ،
ذَايسْ إِ ثدْجَا ؤُڒَا ذ ثَاعجَّاشْثْ ن وُورغْ.
7 أَجْضِيضْ إِتّْكشَّاضنْ وَارْ إِسِّينْ
أَمسْرُوقْ إِ غَارسْ إِدْجَانْ،
ثِيطّْ ن ؤُجْضِيذْ أَمسّْغُويْ أَمُوقْضِيعْ ن ثِيطَّاوِينْ
عمَّارْصْ وَارْ ث ثحْضِي.
8 إِيْرَاذنْ إِمژْيَاننْ إِنفّْخنْ
وَارْ ذَايسْ ؤُيُورنْ،
ؤُڒَا ذ أَيْرَاذْ إِزهَّارنْ وَارْ ث إِتّْشُوقِي.
9 مَاشَا بْنَاذمْ إِسَارّحْ أَفُوسْ نّسْ
غَارْ سّدْجَاحْ إِقسْحنْ،
إِسّْنقْڒَابْ إِذُورَارْ كُوڒْشِي.
10 ذِي ڒجْرُوفْ إِقَّازْ إِغزْرَانْ،
ثِيطّْ نّسْ ثتّْوَاڒَا مَارَّا مِينْ إِغْڒَانْ.
11 إِحوّقْ إِ إِغزْرَانْ
أَڒَامِي أَمَانْ وَارْ قِّيمنْ تّفّْغنْ-د،
مِينْ ذَايسْ إِنُوفَّارنْ
إِتَّاوْيِي ث-إِ-د غَارْ ثْفَاوْثْ.
12 ثِيغِيثْ مَاشَا، مَانِي ثتّْوَافْ؟
ؤُ مَانِي ثدْجَا ثْزذِّيغْثْ نْ ڒفْهَامثْ؟
13 بْنَاذمْ وَارْ إِسِّينْ ڒْْقِيمثْ نّسْ،
وَارْ ثتّْوِيفْ ثِيغِيثْ
ذِي ثمُّورْثْ ن يِينِّي إِدَّارنْ.
14 أَمَانْ إِهوْڒنْ قَّارنْ:
’ذَايْنغْ وَارْ ثدْجِي شَا!‘،
ڒبْحَارْ إِقَّارْ: ’غَارِي وَارْ ذَا ثدْجِي شَا!‘
15 وَارْ إِزمَّارْ أَذْ إِمّوْشْ
وُورغْ إِقُّورنْ
ذڭْ ومْشَانْ نّسْ،
سُّومْ نّسْ وَارْ زمَّارنْ
أَذْ ث وزْننْ س نُّوقَارْثْ.
16 وَارْ زمَّارنْ أَذْ وزْننْ سُّومْ نّسْ
س وُورغْ إِغْڒَانْ زِي ؤُفِيرْ،
س وژْرُو ن ؤُنِيكْسْ إِغْڒَانْ ذ صَافِّيرْ أَزِيزَا.
17 وَارْ زمَّارنْ
أَذْ مّْقُودَّانْ ڒْْقِيمثْ نّسْ
أَكْ-ذ وُورغْ نِيغْ كْرِيسْثَالْ،
نِيغْ أَذْ ت بدّْڒنْ
س إِشْثْ ن ڒْْقشْعثْ ن وُورغْ إِتّْوَاصفَّانْ.
18 وَارْ تّعْقِيڒنْ عَاذْ خْ ثْيَاقُوثِينْ
ذ وژْرُو ن ؤُكْرِيسْثَالْ،
مَاغَارْ ثْوَافِيثْ ن ثِيغِيثْ ثُوعّْڒَا
خْ ثْوَافِيثْ ن ڒْْمَارْجَانْ.
19 ڒعْقِيقْ أَزڭّْوَاغْ زِي كُوشْ
وَارْ ذَايسْ يَارْوِيسْ،
وَارْ ثْزمَّارْ أَذْ ثتّْوَاوْزنْ ثِيغِيثْ
س وُورغْ إِصْفَانْ إِغْڒَانْ.
20 مَانِيسْ د-ثُوسَا خنِّي ثِيغِيثْ
ؤُ مَانِي ثدْجَا ثْزذِّيغْثْ ن ڒفْهَامثْ؟
21 أَقَا-ت ثْنُوفَّارْ خْ ثِيطَّاوِينْ
ن مَارَّا مِينْ إِدَّارنْ،
ثتّْوَاڒحّفْ خْ إِجْضَاضْ ن ؤُجنَّا.
22 أَهلّكْ ذ ڒْْموْثْ قَّارنْ:
’س إِمزُّوغنْ نّغْ نسْڒَا خَاسْ ڒخْبَارْ!‘
23 أَربِّي إِفهّمْ أَبْرِيذْ نّسْ،
نتَّا إِسّنْ ثَازذِّيغْثْ نّسْ،
24 مَاغَارْ إِتّْوَاڒَا أَڒْ ثِينڭُّورَا ن ثمُّورْثْ،
إِژَارّْ مَارَّا مِينْ إِدْجَانْ سَاذُو إِجنْوَانْ.
25 ؤُمِي إِڭَّا إِ ؤُسمِّيضْ جّهْذْ نّسْ،
ؤُمِي إِعْبَارْ ڒعْبَارْ ن وَامَانْ،
26 ؤُمِي إِڭَّا إِ ونْژَارْ قطُّو،
إِجّْ ن وبْرِيذْ إِ وَاسَّامْ ن وَاجَّاجنْ،
27 خنِّي إِژْرَا إِ-ت، إِسَّارْڭبْ إِ-ت،
ؤُشَا إِسّْبدّْ إِ-ت ذڭْ ومْشَانْ نّسْ
ؤُشَا إِبقّشْ ذَايسْ،
28 ؤُشَا إِنَّا إِ بْنَاذمْ:
’خْزَارْ، ثِيڭّْوُوذِي زِي سِيذِي ذ ثِيغِيثْ
أَبعّذْ خْ مِينْ إِدْجَانْ ذ أَعفَّانْ،
ذ ڒفْهَامثْ.‘