4
ڒْحَارْضْ أَمزْوَارُو ن إِلِيفَازْ: كْسِي أَوبّخْ ن أَربِّي!
1 خنِّي يَارَّا-د إِلِيفَازْ، ونِّي د-يُوسِينْ زِي ثَايْمَانْ، إِنَّا:
2 مَاڒَا حذْ يَارْزُو
مَاحنْذْ أَذْ كِيكْ إِسِّيوڒْ،
مَا وَارْ ثتّْوَاشضْنذْ قَاعْ س مَانْ أَيَا؟
مَاشَا مَانْ ونْ إِزمَّارنْ
أَذْ إِسّْبدّْ ڒْْهَارْذْ نّسْ؟
3 خْزَارْ، ثسّْغَارذْ أَطَّاسْ ن إِوْذَانْ
ؤُ إِفَاسّنْ يَارْخُونْ ثسّْمحْضذْ إِ-ثنْ.
4 ونِّي إِنْقَارْضنْ،
ثسّْبدّذْ إِ-ث س وَاوَاڒْ نّشْ،
ؤُ إِفَادّنْ إِفشْڒنْ
ثوْشِيذْ أَسنْ جّهْذْ عَاوذْ.
5 مَاشَا ڒخُّو إِمْسَارْ أَيَا إِ شكْ،
ثتّْوَاشضْنذْ قَاعْ،
ڒخُّو إِڒْقفْ إِ شكْ أَيَا ؤُشَا ثَارجْفذْ.
6 مَا وَارْ ثدْجِي ثِيڭّْوُوذِي زِي أَربِّي
ذ ڒَْامَانْ نّشْ
ؤُ ڒصْفَايثْ ن إِبْرِيذنْ نّشْ ذ ڒَْايَاسْ نّشْ؟
7 خمّْ مَاشَا!
مَانْ ونْ إِتّْوَاهلّْكنْ أَمْ إِدْجَا ذ أَمزْذَاڭْ
ؤُ مَانِي تّْوَاثحَّانْ إِنِّي إِڭُّورنْ نِيشَانْ؟
8 ژْرِيغْ أَقَا إِنِّي إِشَارّْزنْ دّدْجْ
ذ يِينِّي إِزَارّْعنْ ڒغْبنْ،
أَذْ ث مْجَارنْ عَاوذْ.
9 أَذْ هلّْكنْ زڭْ ؤُسُوضِي ن نّفْسْ ن أَربِّي،
أَذْ فْنَانْ س ؤُسُوضِي زڭْ ونْزَارنْ نّسْ.
10 زّْهِيرْ ن ويْرَاذْ
ذ ثْمِيجَّا ن يِيزمْ أَمژْيَانْ أَذْ تّْوَاسّْبدّنْ
ؤُ ثِيغْمَاسْ ن وَايْرَاذنْ إِمژْيَاننْ
أَذْ تّْوَارْژَانْثْ.
11 أَذْ إِهلّكْ وَايْرَاذْ،
مِينْزِي وَارْ يُوفِي زَّارْذثْ،
ثَارْوَا ن ثَايْرَاذْثْ أَذْ تّْوَابزّْعنْ.
12 ذِي ثْنُوفّْرَا يِيوضْ أَيِي-د إِجّْ ن وَاوَاڒْ،
أَمزُّوغْ إِنُو إِطّفْ زَّايسْ ڒحْمِيسْ،
13 أَمْ ثُوغَا غَارّْقغْ
ذڭْ إِخَارِّيصنْ إِسِّيڭّْوِيذنْ
زڭْ إِوحَّانْ ن دْجِيڒثْ،
ڒَْامِي د-إِوْضَا يِيضصْ يُودْجْغنْ خْ إِوْذَانْ.
14 ثڒْقفْ أَيِي ثِيڭّْوُوذِي ذ ثَارْجِيجِيثْ،
مَارَّا إِغْسَانْ إِنُو نّْخڒْعنْ.
15 إِجّْ ن بُوحْبڒْ إِحْرَارَا خْ ؤُغمْبُوبْ إِنُو،
إِسّْبدّْ أَشُوَّافْ ذِي أَرِّيمثْ إِنُو.
16 نتَّا إِبدّْ،
مَاشَا وَارْ عْقِيڒغْ خْ ثفْرَاسْ نّسْ.
إِجّْ ن وَادُّوذْ إِبدّْ زَّاثْ إِ ثِيطَّاوِينْ إِنُو.
خنِّي سْڒِيغْ إِ ثْمِيجَّا ثتّمْثِيمْ، ثقَّارْ:
17 ’مَا إِزمَّارْ إِجّْ ن بْنَاذمْ
أَذْ يِيڒِي إِسڭّذْ خْ أَربِّي؟
مَا إِزمَّارْ إِجّْ ن ورْيَازْ
أَذْ يِيڒِي إِصْفَا خْ ونِّي ث إِڭِّينْ؟‘
18 خْزَارْ، وَارْ إِتّْشِيڒِي
ؤُڒَا خْ إِمْسخَّارنْ نّسْ،
إِڭَّا ڒْْعِيبْ عَاذْ أَكْ-ذ لْمَالَاكَاثْ نّسْ
ؤُمِي ودَّارنْثْ.
19 مَاهُو إِنِّي إِزدّْغنْ ذِي ثُوذْرِينْ ن ؤُشَاڒْ،
إِنِّي غَارْ ثدْجَا ثْعجَّاجْثْ ذ ذْسَاسْ نْسنْ.
أَقَا أَذْ تّْوَاڒبْزنْ أَمزْوَارْ خْ ثْشِينْذَا.
20 زِي ثُوفُّوثْ ن صّْبحْ أَڒْ ثَامذِّيثْ
أَذْ تّْوَافَارْثْكنْ.
بْڒَا إِ إِوْشَا بْنَاذمْ ثَايْنِيثْ إِ مَانْ أَيَا،
أَذْ فْنَانْ إِ ڒبْذَا.
21 مَا وَارْ د-ثتّْوَاقْڒعْ غَارْسنْ
ثسْغُونْثْ ن ؤُقِيضُونْ نْسنْ ن أَرِّيمثْ؟
أَذْ مّْثنْ، مَاشَا وَارْ إِدْجِي ذِي ثِيغِيثْ.