3
أَسْفَارّغْ ن أَرُّوحْ ن أَربِّي ذ ڒعْڒَامَاثْ ن وَاسّْ ن سِيذِي
1 ”أَوَارْنِي ؤُيَا أَذْ إِمْسَارْ، أَقَا نشّْ أَذْ زدْجْعغْ أَرُّوحْ إِنُو خْ مَارَّا بْنَاذمْ ؤُ إِحنْجِيرنْ نْومْ ذ يسِّيثْومْ أَذْ نبَّانْ، إِوسُّورَا نْومْ أَذْ ؤُرْجَانْ ثِيرْجَا ؤُ إِحُوذْرِييّنْ نْومْ أَذْ ژَترنْ إِوحَّانْ.
2 ذڭْ وُوسَّانْ نِّي نشّْ أَذْ فَارّْغغْ أَرُّوحْ إِنُو ؤُڒَا خْ إِسمْغَانْ ؤُ خْ ثِييَّا.
3 نشّْ أَذْ ڭّغْ لْمُوعْجِيزَاثْ ذڭْ إِجنْوَانْ ؤُ خْ ثمُّورْثْ: إِذَامّنْ ذ ثْمسِّي ذ إِقلِّيجنْ ن دّخَّانْ.
4 ثَافُوشْثْ أَذْ ثذْوڒْ ذ ثَادْجسْثْ، ؤُ ثَازِيرِي أَذْ ثذْوڒْ ذ إِذَامّنْ قْبڒْ مَا إِ د غَا يَاسْ وَاسّْ أَمقّْرَانْ ذ إِسِّيڭّْوِيذنْ ن سِيذِي.
5 أَذْ إِمْسَارْ أَقَا كُوڒْ إِجّْ ونِّي إِ غَا إِڒَاغَانْ إِسمْ ن سِيذِي أَذْ إِنْجمْ، مَاغَارْ خْ وذْرَارْ ن صِيهْيُونْ ؤُ ذِي ؤُرْشَالِيمْ أَذْ يِيڒِي ؤُسنْجمْ أَمْ مَامّشْ إِنَّا سِيذِي، ؤُ غَارْ إِنِّي يَاروْڒنْ إِ خفْ غَا إِڒَاغَا سِيذِي.“