1 يَاشُووَا إِسّْمُونْ مَارَّا ثِيقبَّاڒْ ن إِسْرَائِيل ذِي شَاكِيمْ ؤُشَا إِڒَاغَا إِ إِمْغَارنْ ن إِسْرَائِيل ذ إِزدْجِيفنْ نْسنْ ذ ڒْْقُوضَاثْ نْسنْ ذ إِمحْضَاينْ نْسنْ ؤُشَا نِيثْنِي سّْبدّنْ إِخفْ نْسنْ زَّاثْ إِ وُوذمْ ن أَربِّي. 2 خنِّي إِنَّا يَاشُووَا إِ مَارَّا ڒْْڭنْسْ: ”أَمُّو إِ إِقَّارْ سِيذِي، أَربِّي ن إِسْرَائِيل: ’ڒجْذُوذْ نْومْ زدّْغنْ زِي شْحَاڒْ ؤُيَا خْ ؤُجمَّاضْ ن يغْژَارْ ن لْفُورَاطْ، ثَارَاحْ، بَابَاسْ ن إِبْرَاهِيمْ ذ بَابَاسْ ن نَاحُورْ، ؤُ نِيثْنِي ثُوغَا تّْسخَّارنْ إِ إِربِّيثنْ نّغْنِي. ◘ 3 خنِّي إِوْيغْ-د جذِّيثْومْ إِبْرَاهِيمْ زڭْ ؤُغِيرِينْ إِ إِغْزَارْ ن لْفُورَاطْ ؤُ جِّيغْ ث يُويُورْ ذِي مَارَّا ثَامُّورْثْ ن كنْعَانْ. نشّْ أَرْنِيغْ إِ زَّارِيعثْ نّسْ ؤُ وْشِيغْ أَسْ إِسْحَاقْ. ◘ 4 إِ إِسْحَاقْ وْشِيغْ يَاعْقُوبْ ذ عِيسُو، ؤُ إِ عِيسُو وْشِيغْ ثَامُّورْثْ ن إِذُورَارْ ن سَاعِيرْ ذ ثَاسْغَارْثْ، مَاشَا يَاعْقُوبْ ذ إِحنْجِيرنْ نّسْ هْوَانْ غَارْ مِيصْرَا. ◘ 5 خنِّي سّكّغْ مُوسَا ذ هَارُونْ ؤُشَا وْثِيغْ مِيصْرَا أَمْ مَامّشْ ث ڭِّيغْ ذِي ڒْْوسْطْ نّسْ ؤُ أَوَارْنِي أَسْ سُّوفّْغغْ-د كنِّيوْ. ◘ 6 نشّْ سُّوفّْغغْ-د ڒجْذُوذْ نْومْ زِي مِيصْرَا ؤُ كنِّيوْ ثِيوْضمْ-د غَارْ ڒبْحَارْ ؤُ إِمِيصْرِييّنْ ضْفَارنْ إِبَابَاثنْ نْومْ س إِكَارُّوثنْ ذ إِمْنَاينْ أَڒْ ڒبْحَارْ ن ثلْڭَا. ◘ 7 ؤُشَا سْغُوينْ غَارْ سِيذِي ؤُ نتَّا إِڭَّا ثَادْجسْثْ جَارْ أَومْ ذ إِمِيصْرِييّنْ ؤُشَا إِجَّا ڒبْحَارْ إِسّْفيّضْ خَاسنْ أَڒَامِي ثنْ إِذْڒَا. س ثِيطَّاوِينْ نْومْ ثژْرِيمْ مِينْ ڭِّيغْ ذِي مِيصْرَا. أَوَارْنِي أَيَا ثُوغَا ثْزدّْغمْ أَطَّاسْ ن وُوسَّانْ ذِي ڒخْڒَا. 8 نشّْ إِوْيغْ-د كنِّيوْ غَارْ ثمُّورْثْ ن إِمُورِييّنْ إِ ثُوغَا إِزدّْغنْ أَغِيرِينْ إِ لْ-ؤُرْذُونْ. نِيثْنِي مّنْغنْ أَكِيذْومْ، مَاشَا نشّْ ڭِّيغْ ثنْ ذڭْ ؤُفُوسْ نْومْ ؤُ كنِّيوْ ثطّْفمْ ثَامُّورْثْ نْسنْ ؤُ نشّْ قْضِيغْ خَاسنْ زَّاثْ إِ وُوذمْ نْومْ. ◘ 9 خنِّي إِكَّارْ بَالَاكْ، مِّيسْ ن سَافُّورْ، أَجدْجِيذْ ن مُوآبَ، ؤُشَا إِمّْنغْ أَكْ-ذ إِسْرَائِيل. نتَّا إِسّكّْ حِيمَا أَذْ ڒَْاغَانْ إِ بِيلْعَامْ، مِّيسْ ن بَاعُورْ، مَاحنْذْ أَذْ كنِّيوْ إِنْعڒْ. 10 مَاشَا نشّْ وَارْ خْسغْ أَذْ سْڒغْ إِ بَالْعَامْ. س ؤُيَا إِبَاركْ نتَّا إِ كنِّيوْ أَطَّاسْ ؤُ نشّْ فكّغْ-د كنِّيوْ زڭْ ؤُفُوسْ نّسْ. 11 خنِّي ثژْوَامْ لْ-ؤُرْذُونْ، ثُوسِيمْ-د غَارْ أَرِيحَا. إِمزْذَاغْ ن أَرِيحَا، مّنْغنْ أَكِيذْومْ، إِمُورِييّنْ ذ إِفِيرِيزِييّنْ ذ أَيْثْ ن كنْعَانْ ذ إِحِيتِّييّنْ ذ إِجِيرْجَاسِييّنْ ذ إِحِيوِييّنْ ذ إِيابُوسِييّنْ ؤُشَا وْشِيغْ أَومْ ثنْ ذڭْ ؤُفُوسْ نْومْ. ◘ 12 نشّْ سّكّغْ إِرزَّانْ إِضَارْغَاڒنْ ؤُشَا ؤُژّْڒنْ خَاسنْ زَّاثْومْ، أَمْ مَامّشْ تّْوَاژّْڒنْ ثْنَاينْ ن إِجدْجِيذنْ نِّي زَّاثْ إِ وُوذمْ نْومْ. ذ مَانْ أَيَا وَارْ إِدْجِي س سِّيفْ نْومْ ؤُڒَا س ڒْْقوْسْ نْومْ. ◘ 13 نشّْ وْشِيغْ أَومْ ثَامُّورْثْ إِ خْ وَارْ ثَاربْرمْ ؤُ ثِيندَّامْ نِّي وَارْ ثبْنِيمْ، حِيمَا أَذْ ثْزدّْغمْ ذَايْسنْثْ. ؤُشَا ثشِّيمْ عَاوذْ زِي ثْزَايَارِينْ ذ إِزمُّورنْ إِ ثُوغَا وَارْ ثژُّومْ.‘◘ 14 خنِّي ڒخُّو، ڭّْوذمْ سِيذِي ؤُشَا سخَّارمْ أَسْ س ڒكْمَارثْ ذ ڒَْامَانْ. نْضَارمْ إِربِّيثنْ نِّي ؤُمِي سخَّارنْ ڒجْذُوذْ نْومْ أَغِيرِينْ إِ إِغْزَارْ ن لْفُورَاطْ ؤُ ذِي مِيصْرَا ؤُشَا سخَّارمْ إِ سِيذِي. 15 مَاشَا مَاڒَا وَارْ د-ثُوسِي خْ ثِيطَّاوِينْ نْومْ مَاحنْذْ أَذْ ثْسخَّارمْ إِ سِيذِي، خنِّي إِخْضَارمْ أَسّْ-أَ إِ مَانْ ونْ ؤُمِي إِ غَا ثْسخَّارمْ، إِ إِربِّيثنْ نِّي ؤُمِي سخَّارنْ ڒجْذُوذْ نْومْ أَغِيرِينْ إِ إِغْزَارْ ن لْفُورَاطْ، نِيغْ إِ إِربِّيثنْ ن إِمُورِييّنْ نِّي ذِي ثمُّورْثْ نْسنْ ثْزدّْغمْ. نشّْ مَاشَا ذ ثَادَّارْثْ إِنُو، نشِّينْ أَذْ نْسخَّارْ إِ سِيذِي!“ 16 خنِّي يَارَّا-د ڒْْڭنْسْ: ”مَانْ أَيَا إِڭّْوجْ أَنغْ، أَقَا نشِّينْ أَذْ نجّْ سِيذِي أَذْ نخْذمْ إِربِّيثنْ نّغْنِي. 17 مَاغَارْ سِيذِي ذ أَربِّي نّغْ ذ نتَّا إِ ذ أَنغْ-د إِسّْڭعّْذنْ زِي ثمُّورْثْ ن مِيصْرَا، نشِّينْ ذ ڒجْذُوذْ نّغْ، زِي ثَادَّارْثْ ن ثسْمُوغِي ؤُ نتَّا ذ ونِّي إِڭِّينْ ڒعْڒَامَاثْ ثِيمقّْرَانِينْ زَّاثْ إِ ثِيطَّاوِينْ نّغْ ؤُ نتَّا إِسّْڒقَّا خَانغْ ذِي مَارَّا أَبْرِيذْ إِ نُويُورْ ؤُ جَارْ مَارَّا ڒڭْنُوسْ إِ ؤُمِي نْشُوقْ ثَامُّورْثْ نْسنْ. 18 سِيذِي يُوژّڒْ خْ مَارَّا ڒڭْنُوسْ زَّاثْ إِ وُوذمْ نّغْ، ؤُڒَا خْ إِمُورِييّنْ، إِمزْذَاغْ ن ثمُّورْثْ. ؤُڒَا ذ نشِّينْ أَذْ نْسخَّارْ إِ سِيذِي، مَاغَارْ نتَّا ذ أَربِّي نّغْ.“ 19 خنِّي إِنَّا يَاشُووَا إِ ڒْْڭنْسْ: ”كنِّيوْ وَارْ ثْزمَّارمْ أَذْ ثْسخَّارمْ إِ سِيذِي، مَاغَارْ نتَّا ذ أَربِّي أَمْقدّسْ أَطَّاسْ ؤُ نتَّا ذ إِجّْ ن أَربِّي إِتَّاسْمنْ. نتَّا وَارْ ذ أَومْ إِغفَّارْ إِخطَّانْ نْومْ ذ دّْنُوبْ نْومْ. 20 مَاڒَا كنِّيوْ ثجِّيمْ سِيذِي، أَذْ ثْسخَّارمْ إِ إِربِّيثنْ نّغْنِي، خنِّي نتَّا أَذْ خَاومْ إِنّقْڒبْ، أَذْ ذ أَومْ إِڭّْ ڒْْغَارْ ؤُشَا أَذْ كنِّيوْ إِقْضَا، أَوَارْنِي ڒَْامِي نتَّا إِڭَّا أَكِيذْومْ قْبڒْ ثَاصبْحَانْثْ.“ ◘ 21 خنِّي إِنَّا ڒْْڭنْسْ إِ يَاشُووَا: ”لَّ، مِينْزِي نشِّينْ أَذْ نْسخَّارْ إِ سِيذِي.“ 22 إِنَّا يَاشُووَا إِ ڒْْڭنْسْ: ”كنِّيوْ ذ ڒشْهُوذْ خْ إِخفْ نْومْ، أَقَا كنِّيوْ ثْفَارْزمْ سِيذِي، حِيمَا أَذْ أَسْ ثْسخَّارمْ.“ نِيثْنِي نَّانْ ”نشِّينْ ذ ڒشْهُوذْ!“ 23 ”خنِّي ڒخُّو، نْضَارمْ إِربِّيثنْ إِغْرِيبنْ نِّي إِدْجَانْ ذِي ڒْْوسْطْ نْومْ ؤُ ثَارّمْ ؤُڒَاونْ نْومْ غَارْ سِيذِي، أَربِّي ن إِسْرَائِيل!“ 24 إِنَّا ڒْْڭنْسْ إِ يَاشُووَا: ”نشِّينْ أَذْ نْسخَّارْ إِ سِيذِي، أَربِّي نّغْ، ؤُشَا أَذْ نْسڒْ إِ ثْمِيجَّا نّسْ.“ 25 ذڭْ وَاسّْ نِّي إِڭَّا يَاشُووَا إِجّْ ن ڒْْعَاهْذْ أَكْ-ذ ڒْْڭنْسْ ؤُشَا إِڭَّا أَسنْ ذِي شَاكِيمْ ثَاوْصيّثْ ذ لْفَارِيضَا. ◘ 26 يُورَا يَاشُووَا أَوَاڒنْ-أَ ذڭْ وذْلِيسْ إِتّْوَانّْضنْ ن شَّارِيعَا ن سِيذِي ؤُشَا نتَّا إِكْسِي إِجّْ ن وژْرُو ذ أَمقّْرَانْ ؤُشَا إِسّْبدّْ إِ-ث ذِي شَاكِيمْ سَاذُو إِشْثْ ن ثْشجَّارْثْ ن يِيڭّْ نِّي إِبدّنْ غَارْ زَّاوشْثْ إِقدّْسنْ ن سِيذِي. 27 إِنَّا يَاشُووَا إِ مَارَّا ڒْْڭنْسْ: ”خْزَارمْ، أَژْرُو-يَا أَذْ خَانغْ يِيڒِي ذ أَشهَّاذْ، مِينْزِي نتَّا إِسْڒَا مَارَّا أَوَاڒنْ ن سِيذِي نِّي كِيذْنغْ إِسِّيوڒْ ؤُ نتَّا أَذْ يِيڒِي ذ أَشهَّاذْ إِ كنِّيوْ حِيمَا وَارْ تّْغشَّامْ أَربِّي نْومْ.“ 28 خنِّي يَارْخُو يَاشُووَا إِ ڒْْڭنْسْ، كُوڒْ أَرْيَازْ إِرُوحْ غَارْ ثسْغَارْثْ نّسْ.

29 أَوَارْنِي إِ ثْمسْڒَايِينْ-أَ إِمْسَارْ، بلِّي يَاشُووَا، مِّيسْ ن نُونْ، أَمْسخَّارْ ن سِيذِي، إِمُّوثْ، نتَّا ذ إِجّْ ن مِّيسْ ن بْنَاذمْ غَارسْ مْيَا ؤُ -عشْرَا ن إِسڭّْوُوسَا. 30 نضْڒنْ ث ذِي ثمُّورْثْ ن ثسْغَارْثْ نّسْ ذِي ثِيمْنَاثْ-سَارَاحْ نِّي إِدْجَانْ خْ إِذُورَارْ ن إِفْرَايِيمْ، غَارْ شَّامَالْ ن وذْرَارْ ن جَاعَاشْ. ◘ 31 إِسْرَائِيل إِسخَّارْ إِ سِيذِي مَارَّا ؤُسَّانْ ن يَاشُووَا ذ مَارَّا ؤُسَّانْ ن إِمْغَارنْ نِّي إِقِّيمنْ دَّارنْ إِشْثْ ن ڒْْوقْثْ ذ أَزِيرَارْ أَوَارْنِي إِ يَاشُووَا ؤُ سّْننْ مَارَّا مِينْ إِڭَّا سِيذِي ذِي طّْوعْ ن إِسْرَائِيل. 32 إِخْسَانْ ن يُوسُوفْ إِ ثُوغَا د-إِوْينْ أَكِيذْسنْ أَيْثْ ن إِسْرَائِيل زِي مِيصْرَا، نضْڒنْ ثنْ ذِي شَاكِيمْ ذِي ثْكِيرَاثْ ن ييَّارْ إِ ثُوغَا إِسْغَا يَاعْقُوبْ خْ أَيْثْ ن حَامُورْ، بَابَاسْ ن شَاكِيمْ، س مْيَا ن إِزِييْنَاثْ ن نُّوقَارْثْ إِوزْننْ ؤُشَا ثذْوڒْ ذ ثَاسْغَارْثْ ن أَيْثْ ن يُوسُوفْ. ◘ 33 ؤُڒَا ذ أَلِيعَازَارْ، مِّيسْ ن هَارُونْ، إِمُّوثْ ؤُشَا نضْڒنْ ث ذِي ثوْرِيرْثْ ن مِّيسْ ن فِينَاحَاسْ، ثَاوْرِيرْثْ إِ ذ أَسْ إِمّوْشنْ إِ فِينَاحَاسْ ذڭْ إِذُورَارْ ن إِفْرَايِيمْ.