7
ڒقْصَارْ ن سُولِيمَانْ
1 ذِي ثَادَّارْثْ نّسْ إِبْنَا سُولِيمَانْ ثْڒطَّاشْ ن إِسڭّْوُوسَا، ؤُشَا إِكمّڒْ مَارَّا ثَادَّارْثْ نّسْ.
2 نتَّا إِبْنَا ثَادَّارْثْ ن وزْغَارْ ن لُوبْنَانْ. ثُوغَا-ت ذِي مْيَا ن إِغَادْجنْ ن ثُوزّڭَّارْثْ ؤُ خمْسِينْ ن إِغَادْجنْ ن ثِيرُو ؤُ ثْڒَاثِينْ ن إِغَادْجنْ ن ڒُْوعْڒَا، ثتّْوَاڭّْ خْ أَربْعَا ن إِسذِّييّنْ ن إِپِيلَارنْ ن ؤُكشُّوضْ ن ثْشجَّارْثْ ن ثنْڭلْثْ ؤُ تّْوَاسَّارْسنْثْ ثْحنْيَا ن ؤُكشُّوضْ ن ثْشجَّارْثْ ن ثنْڭلْثْ ثِيوَا إِ إِپِيلَارنْ.
3 ثُوغَا س إِشْثْ ن ثْزقَّا زڭْ ؤُكشُّوضْ ن ثْشجَّارْثْ ن ثنْڭلْثْ ثِيوَا إِ ثْحنْيَا ن ؤُعَارّضْ نِّي إِدْجَانْ خْ خمْسَا ؤُ-ربْعِينْ ن إِپِيلَارنْ نِّي، أَقَا خمّسْطَاشْ ن ثْحنْيَا خْ إِجّْ ن ؤُسذِّي ن إِپِيلَارنْ.
4 ثُوغَا ثِيوُّورَا ن ڒكْوَازِي ذِي ثْڒَاثَا ن إِسذِّييّنْ، إِشْثْ ن ثْبُورْجثْ أَجمَّاضْ إِ ثْبُورْجثْ نّغْنِي، ثْڒَاثَا ن ثْوَاڒَاوِينْ.
5 مَارَّا ثِيوُّورَا ذ ڒضْرُوفْ نْسنْثْ غَارْ إِغزْذِيسنْ ثُوغَا أَثنْ ذ أَكْوَاذْرُونْ، ؤُشَا أَرْزَامْ ن إِشْثْ ن ثوَّارْثْ ثُوغَا-ت أَجمَّاضْ ن وَارْزَامْ ن إِشْثْ ن ثوَّارْثْ نّغْنِي، ثْڒَاثَا ن ثْوَاڒَاوِينْ.
6 أَسْقِيفْ إِڭَّا إِ-ث س إِپِيلَارنْ غَارْ زَّاثْ ن ثَادَّارْثْ، خمْسِينْ ن إِغَادْجنْ ن ثُوزّڭَّارْثْ ؤُ ثْڒَاثِينْ ن إِغَادْجنْ ن ثِيرُو. غَارْ وُوذمْ ن إِپِيلَارنْ نِّي ثُوغَا إِشْثْ ن ثسْقِيفْثْ نّغْنِي أَكْ-ذ إِپِيلَارنْ، ؤُشَا عَاوذْ ؤُڒَا ذ إِجّْ ن ؤُسقّفْ غَارْ وُوذمْ ن إِپِيلَارنْ نِّي.
7 نتَّا إِڭَّا عَاوذْ أَخَّامْ إِ ڒْْعَارْشْ مَانِي ثُوغَا إِشَارّعْ، أَخَّامْ ن ثَادَّارْثْ ن شّْرَاعْ، ؤُشَا إِسّْذُورِييْ إِ-ث زِي ثِيسِي سْوَادَّايْ أَڒْ ثِيسِي نّغْنِي سنّجْ س ؤُكشُّوضْ ن ثْشجَّارْثْ ن ثنْڭلْثْ.
8 ثَادَّارْثْ نّسْ، مَانِي ثُوغَا إِزدّغْ، ذِي ڒمْرَاحْ نّغْنِي نِّي إِدْجَانْ كْثَارْ غَارْ ذَاخڒْ زڭْ وخَّامْ ن ثَادَّارْثْ ن شّْرَاعْ، أَقَا ثتّْوَاڭّْ أَمنِّي. نتَّا إِڭَّا عَاوذْ إِشْثْ ن ثَادَّارْثْ إِ يدْجِيسْ ن فِيرْعُونْ، ثنِّي يِيوِي سُولِيمَانْ ذ ثَامْغَارْثْ، أَمْ وخَّامْ-أَ وَانِيثَا. *
9 مَانْ أَيَا مَارَّا ثُوغَا-ث زِي ثْصُوضَارْ إِغْڒَانْ، تّْوَاسُّويْذَانْثْ عْلَاحْسَابْ ڒقْيَاسْ، زِي ذَاخڒْ ؤُ زِي بَارَّا تّْوَانْشَارنْ س ڒْْمنْشَارْ، ؤُ مَانْ أَيَا زِي ذْسَاسْ أَڒْ إِژْرَا ن سنّجْ قَاعْ ؤُ زِي بَارَّا أَڒْ ڒمْرَاحْ أَمقّْرَانْ.
10 ذْسَاسْ إِتّْوَاڭّْ س ثْصُوضَارْ إِغْڒَانْ، إِژْرَا إِمقّْرَاننْ، إِژْرَا نعشْرَا ن إِغَادْجنْ ؤُ إِژْرَا ن ثْمنْيَا ن إِغَادْجنْ،
11 ؤُ ثِيوَا نْسنْ ثِيصُوضَارْ إِغْڒَانْ، تّْوَاسُّويْذَانْثْ عْلَاحْسَابْ ڒقْيَاسْ، ؤُڒَا ذ أَكشُّوضْ ن ثْشجَّارْثْ ن ثنْڭلْثْ.
12 ڒمْرَاحْ أَمقّْرَانْ إِ ذ أَسْ د-إِنّْضنْ ثُوغَا-ث عَاوذْ زِي ثْڒَاثَا ن إِسذِّييّنْ ن ثْصُوضَارْ إِتّْوَاسُّويْذَانْ ذ إِجّْ ن ؤُسذِّي ن ؤُكشُّوضْ ن ثْشجَّارْثْ ن ثنْڭلْثْ، أَمْ مَامّشْ إِ ڒمْرَاحْ ن ذَاخڒْ إِ ثَادَّارْثْ ن سِيذِي أَمْ إِ وسْقِيفْ ن وَاذَافْ ن ثَادَّارْثْ.
ڒْخذْمثْ ن حِيرَامْ إِ زَّاوشْثْ ثَامقّْرَانْثْ
13 أَجدْجِيذْ سُولِيمَانْ إِسّكّْ غَارْ حِيرَامْ زِي صُورْ، حِيمَا أَذْ د-يَاسْ.
14 وَانِيثَا ثُوغَا ذ مِّيسْ ن إِشْثْ ن ثَاجَّاتْشْ زِي ثقْبِيتْشْ ن نَافْثَالِي ؤُ بَابَاسْ ثُوغَا-ث ذ إِجّْ ن ورْيَازْ زِي صُورْ، إِجّْ ن ومْزِيڒْ ن نّْحَاسْ. نتَّا ثُوغَا إِشُّورْ س ڒفْهَامثْ ذ ڒعْقڒْ ذ ثُوسّْنَا حِيمَا أَذْ إِسُّوفّغْ قَاعْ ڒْْخذْمثْ ن نّْحَاسْ. نتَّا يُوسَا-د غَارْ ؤُجدْجِيذْ سُولِيمَانْ ؤُ مَارَّا مِينْ إِڭَّا، إِڭَّا إِ-ث ن نّْحَاسْ.
15 نتَّا إِڭَّا ثْنَاينْ ن إِپِيلَارنْ ن نّْحَاسْ. ڒُْوعْڒَا ن إِجّْ ن ؤُپِيلَارْ ثُوغَا-ت ثْمنْطَاشْ ن إِغَادْجنْ ؤُشَا س يِيجّْ ن ؤُفِيڒُو ن ثنْعَاشْ ن إِغَادْجنْ إِزمَّارْ أَذْ إِنّضْ إِ ؤُپِيلَارْ نّغْنِي.
16 نتَّا إِڭَّا ثْنَاينْ ن تِّيجَانْ ن نّْحَاسْ إِفسْينْ حِيمَا أَذْ ثنْ سَّارْسنْ خْ إِزدْجِيفنْ ن إِپِيلَارنْ. ڒُْوعْڒَا ن إِجّْ ن تَّاجْ ثُوغَا-ث خمْسَا ن إِغَادْجنْ ؤُ ڒُْوعْڒَا ن تَّاجْ نّغْنِي ثُوغَا-ث ؤُڒَا ذ خمْسَا ن إِغَادْجنْ.
17 ؤُڒَا ذ ثِيجطَّايِينْ تّْوَاڭّنْثْ س إِشْثْ ن ڒْْخذْمثْ ن ؤُمُوذِي، أَمْ إِفِيڒَانْ ڭِّينْ ثنْثْ س سّْنَاسڒْ إِ تِّيجَانْ إِ إِدْجَانْ خْ إِزدْجِيفنْ ن إِپِيلَارنْ. سبْعَا إِ يِيجّْ ن تَّاجْ ؤُ سبْعَا إِ تَّاجْ نّغْنِي.
18 إِڭَّا إِپِيلَارنْ ذ ثْنَاينْ ن إِسذِّييّنْ ن إِرمَّامنْ إِ ذ أَسْ د-إِنّْضنْ إِ د-يُوسِينْ أَكْ-ذ ڒْْخذْمثْ ن ؤُمُوذِي إِ إِتّْوَاڭّنْ مَاحنْذْ أَذْ زَّايسْ إِسّْذُورِييْ تِّيجَانْ إِ إِدْجَانْ ثِيوَا إِ إِسذِّييّنْ ن إِرمَّامنْ. أَمُّو إِ إِڭَّا ؤُڒَا إِ تَّاجْ نّغْنِي.
19 تِّيجَانْ خْ ؤُزدْجِيفْ ن إِپِيلَارنْ نِّي إِدْجَانْ غَارْ وسْقِيفْ ن وَاذَافْ تّْوَاڭّنْ أَمْ ثْلِيلِّيشِينْ، س إِجّْ ن ڒُْوعْڒَا ن أَربْعَا ن إِغَادْجنْ.
20 تِّيجَانْ إِ إِدْجَانْ خْ ثْنَاينْ ن إِپِيلَارنْ ذوْڒنْ سنّجْ أَكْ-ذ وُوذمْ ن ؤُقُورَارْ نِّي ثُوغَا إِ-د-إِتَّاسنْ أَكْ-ذ ڒْْخذْمثْ إِمُوذنْ. ؤُشَا مِيثَاينْ ن إِرمَّامنْ قُووَّارنْ أَسنْ-د س ثْنَاينْ ن إِسذِّييّنْ، ؤُڒَا خْ تَّاجْ نّغْنِي.
21 خنِّي إِسّْبدّْ نتَّا إِپِيلَارنْ غَارْ وسْقِيفْ ن وَاذَافْ ن زَّاوشْثْ ثَامقّْرَانْثْ. إِسّْبدّْ أَپِيلَارْ أَفُوسِي، إِڭَّا أَسْ يَاخِينْ، ؤُشَا إِسّْبدّْ ؤُڒَا ذ أَپِيلَارْ أَزڒْمَاضْ، إِڭَّا أَسْ بُوعَازْ.
22 خْ ؤُزدْجِيفْ ن إِپِيلَارنْ ثُوغَا ذِينْ إِشْثْ ن ڒْْخذْمثْ إِزوّْقنْ ذِي فُورْمَا ن إِجّْ ن ڒْْكَاسْ أَمْ إِشْثْ ن ثْلِيلّشْثْ. أَمُّو ثتّْوَاكمّڒْ ڒْْخذْمثْ ن إِپِيلَارنْ.
23 نتَّا إِڭَّا ثَارِيمَانْثْ إِفسْينْ إِ وَامَانْ. ثُوغَا-ث ڒعْبَارْ نّسْ زِي طَّارْفْ أَڒْ طَّارْفْ نّسْ نّغْنِيعشْرَا ن إِغَادْجنْ، ذ أَقُورَارْ قَاعْ، ؤُشَا ثِيذِّي نّسْ ثُوغَا-ث ذِي خمْسَا ن إِغَادْجنْ ؤُ ثْزمَّارذْ أَذْ أَسْ ثنّْضذْ س إِشْثْ ن ؤُفِيڒُو ن ڒعْبَارْ ن ثْڒَاثِينْ ن إِغَادْجنْ.
24 سْوَادَّايْ إِ ثْمَا نّسْ إِ ذ أَسْ د-إِنّْضنْ قَاعْ، ثُوغَا ذِينْ ثِيعبُّوزِينْ أَكْ-ذ نُّووَّارَاثْ يَارزْمنْ.عشْرَا ذِي كُوڒْ إِجّْ ن ؤُغِيڒْ نّْضنْثْ إِ ثْرِيمَانْثْ. ثْنَاينْ ن إِسذِّييّنْ نِّي ن ثْعبُّوزِينْ أَكْ-ذ نُّووَّارَاثْ يَارزْمنْ ثُوغَا تّْوَافسْينْ أَكِيذسْ.
25 ثَارِيمَانْثْ ثْبدّْ خْ ثنْعَاشْ ن إِفُونَاسنْ. ثْڒَاثَا زَّايْسنْ أَرِّينْ س وُوذمْ نْسنْ غَارْ شَّامَالْ، ثْڒَاثَا زَّايْسنْ أَرِّينْ س وُوذمْ نْسنْ غَارْ ڒْْغَارْبْ، ثْڒَاثَا زَّايْسنْ أَرِّينْ س وُوذمْ نْسنْ غَارْ لْجَانُوبْ ؤُ ثْڒَاثَا زَّايْسنْ أَرِّينْ س وُوذمْ نْسنْ غَارْ شَّارْقْ. ثَارِيمَانْثْ ثَارْسَا خَاسنْ ؤُ مَارَّا زّْعنْقُوقَاثْ نْسنْ ثُوغَا ذوْڒنْثْ خزَّارنْثْ غَارْ ذَاخڒْ.
26 ثڭْذَارْ ن ثْرِيمَانْثْ ذ إِجّْ ن ڒعْبَارْ ن ؤُفُوسْ ؤُ ثْمَا نّسْ ثُوغَا أَمْ ڒْْخذْمثْ إِزوّْقنْ ن ثْمَا ن إِجّْ ن ؤُفنْجَاڒْ، أَمْ ثْنوَّاشْثْ ن ثْلِيلّشْثْ. ثْوَاوِيثْ نّسْ ثُوغَا أَڒْفَاينْ إِبَاثُوثنْ.
27 نتَّا إِڭَّا عشْرَا ن ثْكَارُّوثِينْ ن نّْحَاسْ. ثُوغَا ثُوزّڭَّارْثْ ن إِشْثْ ن ثْكَارُّوثْ أَربْعَا ن إِغَادْجنْ ؤُ ثِيرُو نّسْ أَربْعَا ن إِغَادْجنْ ؤُ ڒُْوعْڒَا نّسْ ثْڒَاثَا ن إِغَادْجنْ.
28 أَمُّو إِ تّْوَاڭّنْثْ ثْكَارُّوثِينْ. نِيثنْثِي ثُوغَا غَارْسنْثْ ثِيڒْوِيحِينْ عَارّْضنْثْ ؤُ ثڒْوِيحِينْ عَارّْضنْثْ ثُوغَا أَثنْثْ جَارْ شَّافُوذْ.
29 خْ ثڒْوِيحِينْ عَارّْضنْثْ جَارْ شَّافُوذْ، ثُوغَا ذِينْ أَرْشَامنْ ن ويْرَاذنْ، إِفُونَاسنْ ذ إِكِيرُوبنْ. غَارْ سنّجْ خْ شَّافُوذْ ثُوغَا ذِينْ إِجّْ ن ؤُسنَّاذْ. سَاذُو ويْرَاذنْ ذ إِفُونَاسنْ تّْوَاڭّنْثْ ثِيسذِّييِينْ ن ثفْرَايْ نِّي يُويْڒنْ غَارْ وَادَّايْ .
30 إِشْثْ ن ثْكَارُّوثْ ثُوغَا غَارسْ أَربْعَا ن ثْجَارَّارِينْ ن نّْحَاسْ ذ ڒحْزَامَاثْ ن نّْحَاسْ. أَربْعَا ن إِضَارنْ ثُوغَا غَارْسنْ ثِيغَارْضِينْ. ثِيغَارْضِينْ إِفسْينْ نِّي ثُوغَا أَثنْثْ سَاذُو إِ ثْبَانْيُوثْ إِ ؤُسِيرْذْ، زَّاثْ إِ كُوڒْ ثَاغَارْضْثْ ثُوغَا ذِينْ ثِيسذِّييِينْ ن ثفْرَايْ.
31 أَقمُّومْ نّسْ ثُوغَا-ث غَارْ ذَاخڒْ ن تَّاجْ ن ثْكَارُّوثْ، إِجّْ ن ؤُغِيڒْ غَارْ سنّجْ. أَقمُّومْ نّسْ ثُوغَا-ث ذ أَقُورَارْ، إِجّْ ن ؤُغِيڒْ ذ وزْينْ، أَمُّو إِ إِتّْوَاڭّْ. خْ ؤُقمُّومْ ثُوغَا ذِينْ عَاوذْ ثِينْقَاشِينْ، ؤُ ثِيڒْوِيحِينْ نْسنْ عَارّْضنْثْ ثُوغَا أَثنْثْ س أَربْعَا ن ثْغمُّورَا، وَارْ دْجِينْثْ ذ ثِيقُورَارِينْ.
32 أَربْعَا ن ثْجَارَّارِينْ ثُوغَا أَثنْثْ سَاذُو ثڒْوِيحِينْ عَارّْضنْثْ ؤُ ڒحْزَامَاثْ ن ثْجَارَّارِينْ ثُوغَا أَثنْثْ شدّْننْثْ غَارْ ثْكَارُّوثْ. ڒُْوعْڒَا ن إِشْثْ ن ثْجَارَّارْثْ ثُوغَا-ث إِجّْ ن ؤُغِيڒْ ذ وزْينْ.
33 ثِيجَارَّارِينْ تّْوَاڭّنْثْ أَمْ تّْوَاڭّنْثْ ثْجَارَّارِينْ ن إِجّْ ن ؤُكَارُّو. ڒحْزَامَاثْ نْسنْثْ، يَانْثَاثْ نْسنْثْ، أَرَّاذْيَاوَاثْ نْسنْثْ ذ إِغُوڒَافْ ن ڒحْزَامَاثْ نْسنْثْ تّْوَافسْينْثْ مَارَّا.
34 ثُوغَا ذِينْ أَربْعَا ن ثْغَارْضِينْ غَارْ أَربْعَا ن ثْغمُّورَا ن إِشْثْ ن ثْكَارُّوثْ. ثِيغَارْضِينْ نّسْ فّْغنْثْ زِي ثْكَارُّوثْ.
35 سنّجْ إِ ثْكَارُّوثْ ثُوغَا ذِينْ إِجّْ ن طَّارْفْ ن وزْينْ ن ؤُغِيڒْ إِبدّْ إِقُووَّارْ أَسْ-د زِي مَارَّا إِغزْذِيسنْ نّسْ. سنّجْ إِ ثْكَارُّوثْ ثُوغَا ذِينْ عَاوذْ إِفَاسّنْ غَارْ ثڒْوِيحِينْ نّسْ.
36 خْ ثڒْوِيحِينْ أَكْ-ذ إِفَاسّنْ نْسنْثْ ؤُ خْ ثڒْوِيحِينْ ثِيقبَّارِينْ نْسنْثْ إِنْقشْ إِكِيرُوبنْ، إِيْرَاذنْ ذ ثْشجِّيرَا ن ثِينِي، خْ كُوڒْ إِجّْ ن ومْشَانْ إِخْڒَا، ؤُڒَا ذ ثِيسذِّييِينْ ن ثفْرَايْ غَارْ مَارَّا إِغزْذِيسنْ.
37 أَمُّو إِ إِڭَّا نتَّاعشْرَا ن ثْكَارُّوثِينْ، مَارَّا س يِيجّْ ن وبْرِيذْ ن ؤُفسْيِي، س يِيجّْ ن ڒقْيَاسْ، س يِيجّْ ن وَادُّوذْ.
38 إِڭَّا عَاوذْ عشْرَا ن ثْبَانْيُوثِينْ ن نّْحَاسْ. إِشْثْ ن ثْبَانْيُوثْ إِكْسِي أَربْعِينْ إِبَاثُوثنْ. إِشْثْ ن ثْبَانْيُوثْ ثُوغَا-ت ذَايسْ أَربْعَا ن إِغَادْجنْ. خْ قَاعْ إِشْثْ زِيعشْرَا ن ثْكَارُّوثِينْ نِّي ثُوغَا ثكَّارْ أَسْ-د إِشْثْ ن ثْبَانْيُوثْ.
39 إِڭَّا خمْسَا ن ثْكَارُّوثِينْ غَارْ ؤُغزْذِيسْ ن زَّاثْ أَفُوسِي ن ثَادَّارْثْ ؤُ خمْسَا غَارْ ؤُغزْذِيسْ ن زَّاثْ أَزڒْمَاضْ ن ثَادَّارْثْ، مَاشَا ثَارِيمَانْثْ ثَامقّْرَانْثْ إِ وَامَانْ إِڭَّا إِ-ث غَارْ ؤُغزْذِيسْ ن زَّاثْ أَفُوسِي ن ثَادَّارْثْ، غَارْ ؤُغزْذِيسْ ن شَّارْقْ، غَارْ لْجَانُوبْ نّسْ.
40 إِڭَّا حِيرَامْ عَاوذْ ثِيبَانْيُوثِينْ إِ ؤُسِيرْذْ، إِغنْجَاينْ ذ طَّاوْيَاثْ إِ ؤُرُوشِّي. إِكمّڒْ حِيرَامْ مَارَّا ڒْْخذْمثْ نِّي إِڭَّا إِ ؤُجدْجِيذْ سُولِيمَانْ إِ ثَادَّارْثْ ن سِيذِي:
41 ثْنَاينْ ن إِپِيلَارنْ ذ ثْنَاينْ ن إِقُورَارنْ ن تِّيجَانْ نِّي إِدْجَانْ خْ إِزدْجِيفنْ ن ثْنَاينْ ن إِپِيلَارنْ نِّي، ؤُڒَا ذ ثْنَاينْ ن ڒخْذَايمْ ن ؤُمُوذِّي إِ ذ أَسنْثْ-إِ-د-إِنّْضنْ إِ ثْنَاينْ ن إِقُورَارنْ ن تِّيجَانْ إِنِّي إِدْجَانْ خْ إِزدْجِيفنْ ن ثْنَاينْ ن إِپِيلَارنْ،
42 أَربْعَا-مْيَا ن إِرمَّامنْ إِ ثْنَاينْ ن ڒخْذَايمْ ن ؤُمُوذِّي تّْوَامّْسبْضَانْ خْ ثْنَاينْ ن إِسذِّييّنْ ن إِرمَّامنْ إِ كُوڒْ ڒْْخذْمثْ ن ؤُمُوذِّي إِ زِي ذْڒِينْ نِيثْنِي ثْنَاينْ ن إِقُورَارنْ ن تِّيجَانْ إِنِّي خْ وُوذمْ سنّجْ ن إِپِيلَارنْ،
43 ذعشْرَا ن ثْكَارُّوثِينْ ذعشْرَا ن ثْبَانْيُوثِينْ نِّي إِدْجَانْ خْ ثْكَارُّوثِينْ نِّي،
44 ذ ثَارِيمَانْثْ ذ ثنْعَاشْ ن إِفُونَاسنْ سَاذُو إِ ثْرِيمَانْثْ،
45 ذ ثيْذُورِينْ ذ إِغنْجَاجنْ ذ طَّاوْيَاثْ إِ ؤُرُوشِّي.
مَارَّا ڒقْشُوعْ-أَ إِ إِڭَّا حِيرَامْ إِ ؤُجدْجِيذْ سُولِيمَانْ إِ ثَادَّارْثْ ن سِيذِي، ثُوغَا أَثنْ زِي نّْحَاسْ إِتّْوَاسُّويْذَانْ.
46 أَجدْجِيذْ إِكبّْ إِ-ثنْ ذڭْ ؤُذوَّارْ ن لْ-ؤُرْذُونْ ذِي ثْڒَاخْثْ إِڭْذَارنْ جَارْ سُوكُّوثْ ذ صَارْثَانْ.
47 سُولِيمَانْ إِسّْعِيزّْ خْ ووْزَانْ ن مَارَّا ڒقْشُوعْ-أَ ذِي سِّيبّثْ ن ڒْْقدّْ نْسنْ ذ أَمقّْرَانْ أَطَّاسْ. وَارْ بقّْشنْ ذِي ڒوْزنْ ن نّْحَاسْ.
48 سُولِيمَانْ إِڭَّا مَارَّا ڒقْشُوعْ إِ ثَادَّارْثْ ن سِيذِي:
أَعَالْطَارْ ن وُورغْ، ثَازوْضَا ن وُورغْ مِينْ خفْ إِتّْوَاسَّارْسْ وغْرُومْ ن وسْشَانْ،
49 ڒَْا ذ ڒقْنَاذڒْ، خمْسَا غَارْ يفُوسْ ذ خمْسَا غَارْ ؤُزڒْمَاضْ، زَّاثْ إِ وخَّامْ ن ذَاخڒْ ن زَّاوشْثْ زڭْ وُورغْ إِزذْڭنْ، ڒَْا ذ نُّووَارَاثْ يَارزْمنْ ذ ڒفْنَارَاثْ ذ ثْجقَّاضِينْ ن ثفْثِيتْشْ ن وُورغْ،
50 ؤُڒَا ذ طَّاوْيَاثْ ذ ثْجقَّاضِينْ ذ طَّاوْيَاثْ إِ ؤُرُوشِّي ذ ثْغنْجَايِينْ ذ ثْمجْمَارِينْ ن وُورغْ إِزذْڭنْ. خنِّي إِڭَّا عَاوذْ ڒمْفَاسڒْ إِ ثوُّورَا ن ثَادَّارْثْ ن ذَاخڒْ، إِ وقْذَاسْ خْ ؤُقدَّاسْ، ؤُڒَا ڒمْفَاسڒْ إِ ثوُّورَا ن وخَّامْ ن زَّاوشْثْ ثَامقّْرَانْثْ ن ثَادَّارْثْ زڭْ وُورغْ.
51 أَمُّو إِ ثتّْوَاكمّڒْ مَارَّا ڒْْخذْمثْ إِ إِڭَّا ؤُجدْجِيذْ سُولِيمَانْ إِ ثَادَّارْثْ ن سِيذِي. ؤُشَا سُولِيمَانْ إِسِّيذفْ ثِيوْهِيبِينْ إِقدّْسنْ ن بَابَاسْ. إِسَّارْسْ نُّوقَارْثْ ذ وُورغْ ذ ڒقْشُوعْ ذڭْ إِخَّامنْ ن ثْخُوبَايْ ن ثَادَّارْثْ ن سِيذِي.