15
عَازَارْيَا، أَجدْجِيذْ ن يَاهُوذَا
1 ذڭْ ؤُسڭّْوَاسْ وِيسّْ سبْعَا ؤُ عِيشْرِينْ ن يَارُوبْعَامْ، أَجدْجِيذْ ن إِسْرَائِيل، إِذْوڒْ عَازَارْيَا، مِّيسْ ن أَمَاصْيَا، أَجدْجِيذْ ن يَاهُوذَا.
2 نتَّا ثُوغَا غَارسْ سطَّاشْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ ثْنَاينْ ؤُ-خمْسِينْ ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ يَاكُولْيَا زِي ؤُرْشَالِيمْ.
3 نتَّا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي، أَمْ مَامّشْ مَارَّا إِ ثُوغَا إِڭَّا بَابَاسْ أَمَاصْيَا.
4 مْغِيرْ وَارْ تّْوَاكّْسنْثْ ڒڭْعُوذِي. يِيوِي ڒْْڭنْسْ عَاذْ ثِيغَارْصَا ذ ثوْهِيبِينْ ن ڒبْخُورْ خْ ڒڭْعُوذِي.
5 مَاشَا سِيذِي إِوْثَا أَجدْجِيذْ أَڒَامِي إِهْڒشْ س ڒْْبَارْصْ أَڒْ أَسّْ ن ڒْْموْثْ نّسْ. نتَّا إِقِّيمْ إِزدّغْ ذڭْ إِشْثْ ن ثَادَّارْثْ ثتّْوَاعْزڒْ، ؤُمِي يُوثَامْ، مِّيسْ ن ؤُجدْجِيذْ، ثُوغَا ذ ڒمْقدّمْ ن ثْزذِّيغْثْ ن ؤُجدْجِيذْ ؤُ إِحكّمْ خْ ڒْْڭنْسْ ن ثمُّورْثْ.
6 إِمزْرُوينْ إِقِّيمنْ ن عَازَارْيَا ذ مَارَّا مِينْ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟
7 عَازَارْيَا إِڭَّا أَذْ يَاريّحْ جَارْ ڒجْذُوذْ نّسْ. نضْڒنْ ث جَارْ ڒجْذُوذْ نّسْ ذِي ثنْذِينْثْ ن ذَاوُوذْ. مِّيسْ يُوثَامْ إِذْوڒْ ذ أَجدْجِيذْ ذڭْ ومْشَانْ نّسْ.
زَاكَارْيَا، أَجدْجِيذْ ن إِسْرَائِيل
8 ذڭْ ؤُسڭّْوَاسْ وِيسّْ ثْمنْيَا ؤُ-ثْڒَاثِينْ ن عَازَارْيَا، أَجدْجِيذْ ن يَاهُوذَا، إِحْكمْ زَاكَارِييَّا، مِّيسْ ن يَارُوبْعَامْ، خْ إِسْرَائِيل ذِي سَامَارْيَا، ڒْْقدّْ ن ستَّا ن إِيُورنْ.
9 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، نِيشَانْ أَمْ مَامّشْ ث ڭِّينْ ڒجْذُوذْ نّسْ. نتَّا وَارْ إِحيّذْ خْ دّْنُوبْ ن يَارُوبْعَامْ، مِّيسْ ن نَابَاطْ، ونِّي يَارِّينْ إِسْرَائِيل أَذْ إِخْضَا.
10 شَالُّومْ، مِّيسْ ن يَابِيشْ، إِڭَّا خَاسْ إِشْثْ ن ثْمعْمُوتْشْ ؤُشَا إِوْثَا إِ-ث زَّاثْ إِ ڒْْڭنْسْ ؤُشَا إِنْغَا إِ-ث. نتَّا إِذْوڒْ ذ أَجدْجِيذْ ذڭْ ومْشَانْ نّسْ.
11 إِمزْرُوينْ إِقِّيمنْ ن زَاكَارِييَّا، خْزَارْ، أَقَا تّْوَازمّمنْ ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل.
12 وَا ذ أَوَاڒْ إِ ثُوغَا إِسِّيوڒْ سِيذِي غَارْ يَاهُو، إِنَّا: ”إِحنْجِيرنْ نّشْ أَذْ قِّيمنْ خْ ڒْْعَارْشْ ن إِسْرَائِيل أَڒْ جِّيڒْ وِيسّْ أَربْعَا!“ ؤُشَا أَمُّو إِ ثمْسَارْ.
شَالُّومْ، أَجدْجِيذْ ن إِسْرَائِيل
13 ذڭْ ؤُسڭّْوَاسْ وِيسّْ ثسْعَا ؤُ-ثْڒَاثِينْ ن عُوزِّييَا، أَجدْجِيذْ ن يَاهُوذَا، إِذْوڒْ شَالُّومْ، مِّيسْ ن يَابِيشْ، ذ أَجدْجِيذْ. نتَّا إِحْكمْ إِجّْ ن ؤُيُورْ إِكْمڒْ ذِي سَامَارْيَا.
14 مَانَاحِيمْ، مِّيسْ ن جَاذِي، إِفّغْ-د غَارسْ زِي ثِيرْصَا ؤُشَا يُوسَا-د غَارْ سَامَارْيَا، إِوْثَا شَالُّومْ، مِّيسْ ن يَابِيشْ، ذِي سَامَارْيَا، ؤُشَا إِنْغَا إِ-ث. نتَّا إِذْوڒْ ذ أَجدْجِيذْ ذڭْ ومْشَانْ نّسْ.
15 إِمزْرُوينْ إِقِّيمنْ ن شَالُّومْ ذ ثْمعْمُوتْشْ إِ إِڭَّا، خْزَارْ، مَانْ أَيَا مَارَّا إِتّْوَازمّمْ ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل.
16 خنِّي إِغْڒبْ مَانَاحِيمْ خْ ثَافْسَاحْ، ذ مَارَّا إِمزْذَاغْ نِّي ذَايسْ، ؤُشَا إِوْثَا ؤُڒَا ذ ثَامُّورْثْ نّسْ زِي ثِيرْصَا، مِينْزِي نِيثْنِي ثُوغَا وَارْ ذ أَسْ أَرْزِيمنْ ثِيوُّورَا. أَقَا إِنْغَا إِ-ثنْ. مَارَّا ثِيمْغَارِينْ س دّيْسثْ إِفتّقْ أَسنْثْ أَعذِّيسْ.
مَانَاحِيمْ، أَجدْجِيذْ ن إِسْرَائِيل
17 ذڭْ ؤُسڭّْوَاسْ وِيسّْ ثسْعَا ؤُ-ثْڒَاثِينْ ن عَازَارْيَا، أَجدْجِيذْ ن يَاهُوذَا، إِذْوڒْ مَانَاحِيمْ، مِّيسْ ن جَاذِي، ذ أَجدْجِيذْ خْ إِسْرَائِيل. نتَّا إِحْكمْعشْرَا ن إِسڭّْوُوسَا ذِي سَامَارْيَا.
18 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي. مَارَّا ؤُسَّانْ ن ثُوذَارْثْ نّسْ وَارْ إِحيّذْ شَا خْ دّْنُوبْ ن يَارُوبْعَامْ، مِّيسْ ن نَابَاطْ، ونِّي يَارِّينْ إِسْرَائِيل أَذْ إِخْضَا.
19 خنِّي يُوسَا-د فُولْ، أَجدْجِيذْ ن أَشُّورْ، إِهْجمْ خْ ثمُّورْثْ. إِوْشَا مَانَاحِيمْ أَڒفْ ثَالِينْثْ ن نُّوقَارْثْ إِ فُولْ، حِيمَا أَذْ إِقِّيمْ أَذْ إِحْكمْ ؤُ حِيمَا أَذْ إِسّمْثنْ ثَاڭلْذِيثْ ذڭْ ؤُفُوسْ نّسْ.
20 مَانَاحِيمْ إِڭَّا إِسْرَائِيل أَذْ غَارسْ د-يِيوِي نُّوقَارْثْ، مَارَّا أَيْثْ ن بُو-وَاڭْڒَا، حِيمَا أَذْ إِسِّيوضْ نُّوقَارْثْ نِّي إِ ؤُجدْجِيذْ ن أَشُّورْ. زِي كُوڒْ أَرْيَازْ إِكْسِي خمْسِينْ شِيقْلُو. خَاسْ ؤُشَا إِعْقبْ ؤُجدْجِيذْ ن أَشُّورْ، وَارْ إِقِّيمْ عَاذْ ذِي ثمُّورْثْ.
21 إِمزْرُوينْ إِقِّيمنْ ن مَانَاحِيمْ ذ مَارَّا مِينْ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل؟
22 مَانَاحِيمْ إِڭَّا أَذْ يَاريّحْ جَارْ ڒجْذُوذْ نّسْ. مِّيسْ فَاقَاحْيَا إِذْوڒْ ذ أَجدْجِيذْ ذڭْ ومْشَانْ نّسْ.
فَاقَاحْيَا، أَجدْجِيذْ ن إِسْرَائِيل
23 ذڭْ ؤُسڭّْوَاسْ وِيسّْ خمْسِينْ ن عَازَارْيَا، أَجدْجِيذْ ن يَاهُوذَا، إِذْوڒْ فَاقَاحْيَا، مِّيسْ ن مَانَاحِيمْ، ذ أَجدْجِيذْ خْ إِسْرَائِيل. نتَّا إِحْكمْ ثْنَاينْ ن إِسڭّْوُوسَا ذِي سَامَارْيَا.
24 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي. نتَّا وَارْ إِحيّذْ خْ دّْنُوبْ ن يَارُوبْعَامْ، مِّيسْ ن نَابَاطْ، ونِّي يَارِّينْ إِسْرَائِيل أَذْ إِخْضَا.
25 فَاقَاحْ، مِّيسْ ن رَامَالْيَاهُو، أَنغْرَافْ ن ڒْْعسْكَارْ، إِڭَّا خَاسْ إِشْثْ ن ثْمعْمُوتْشْ، إِوّثْ إِ-ث ذِي سَامَارْيَا، ذِي لْبُورْجْ ن ثَادَّارْثْ ن ؤُجدْجِيذْ. أَرْجُوبْ ذ أَرْيَاهْ وْشِينْ أَسْ أَفُوسْ ؤُ ثُوغَا أَكِيذسْ عَاوذْ خمْسِينْ ن يرْيَازنْ زِي جِيلْعَاذْ. نتَّا إِنْغَا فَاقَاحْيَا ؤُ إِذْوڒْ ذ أَجدْجِيذْ ذڭْ ومْشَانْ نّسْ.
26 إِمزْرُوينْ إِقِّيمنْ ن فَاقَاحْيَا ذ مَارَّا مِينْ إِڭَّا، خْزَارْ، مَانْ أَيَا مَارَّا إِتّْوَازمّمْ ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل.
فَاقَاحْ، أَجدْجِيذْ ن إِسْرَائِيل
27 ذڭْ ؤُسڭّْوَاسْ وِيسّْ ثْنَاينْ ؤُ-خمْسِينْ ن عَازَارْيَا، إِذْوڒْ فَاقَاحْ، مِّيسْ ن رَامَالْيَاهُو، ذ أَجدْجِيذْ خْ إِسْرَائِيل. نتَّا إِحْكمْ عِيشْرِينْ ن إِسڭّْوُوسَا ذِي سَامَارْيَا.
28 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي. نتَّا وَارْ إِحيّذْ شَا خْ دّْنُوبْ ن يَارُوبْعَامْ، مِّيسْ ن نَابَاطْ نِّي يَارِّينْ إِسْرَائِيل أَذْ إِخْضَا.
29 ذڭْ وُوسَّانْ ن فَاقَاحْ، أَجدْجِيذْ ن إِسْرَائِيل، يُوسَا-د ثِيغْلَاثْ-فِيلَاسِيرْ، أَجدْجِيذْ ن أَشُّورْ. نتَّا إِحوّسْ عَايُونْ ذ أَبِيلْ-بَايْثْ-مَاعْكَا ذ يَانُوحْ ذ قَاذَاشْ ذ حَاصُورْ ذ جِيلْعَاذْ ذ لْجَالِيلْ ذ مَارَّا ثَامُّورْثْ ن نَافْثَالِي. نتَّا إِنْذهْ إِ-ثنْ غَارْ لْمنْفَا غَارْ أَشُّورْ.
30 هُوشِيعَا، مِّيسْ ن إِلَا، إِڭَّا إِشْثْ ن ثْمعْمُوتْشْ خْ فَاقَاحْ، مِّيسْ ن رَامَالْيَاهُو. نتَّا إِوْثَا إِ-ث ؤُشَا إِنْغَا إِ-ث. نتَّا إِذْوڒْ ذ أَجدْجِيذْ ذڭْ ومْشَانْ نّسْ ذڭْ ؤُسڭّْوَاسْ وِيسّْ عِيشْرِينْ ن يُوثَامْ، مِّيسْ ن عُوزِّييَا.
31 إِمزْرُوينْ إِقِّيمنْ ن فَاقَاحْ ذ مَارَّا مِينْ إِڭَّا، خْزَارْ، مَانْ أَيَا مَارَّا إِتّْوَازمّمْ ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل.
يُوثَامْ، أَجدْجِيذْ ن يَاهُوذَا
32 ذڭْ ؤُسڭّْوَاسْ وِيسّْ ثْنَاينْ ن فَاقَاحْ، مِّيسْ ن رَامَالْيَاهُو، أَجدْجِيذْ ن إِسْرَائِيل، إِذْوڒْ يُوثَامْ ذ أَجدْجِيذْ. ثُوغَا نتَّا ذ مِّيسْ ن عُوزِّييَا، أَجدْجِيذْ ن يَاهُوذَا.
33 نتَّا ثُوغَا غَارسْ خمْسَا ؤُ-عِيشْرِينْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ سطَّاشْ ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ يَارُوشَا، يدْجِيسْ ن صَاذُوقْ.
34 نتَّا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي، نِيشَانْ أَمْ مَامّشْ ث إِڭَّا بَابَاسْ عُوزِّييَا.
35 مْغِيرْ وَارْ تّْوَاكّْسنْثْ ڒڭْعُوذِي. ڒْْڭنْسْ يِيوْيِي-د عَاذْ ثِيغَارْصَا ذ ثوْهِيبِينْ ن ڒبْخُورْ خْ ڒڭْعُوذِي. نتَّا إِبْنَا ثوَّارْثْ يُوعْڒَانْ ذِي ثَادَّارْثْ ن سِيذِي.
36 إِمزْرُوينْ إِقِّيمنْ ن يُوثَامْ، ذ مَارَّا مِينْ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟
37 ذڭْ وُوسَّانْ نِّي إِبْذَا سِيذِي أَذْ إِسّكّْ رَاصِينْ، أَجدْجِيذْ ن أَرَامْ، ذ فَاقَاحْ، مِّيسْ ن رَامَالْيَاهُو، غَارْ يَاهُوذَا.
38 يُوثَامْ إِڭَّا أَذْ يَاريّحْ جَارْ ڒجْذُوذْ نّسْ. نتَّا إِتّْوَانْضڒْ جَارْ ڒجْذُوذْ نّسْ ذِي ثنْذِينْثْ ن بَابَاسْ ذَاوُوذْ. مِّيسْ أَحَازْ إِذْوڒْ ذ أَجدْجِيذْ ذڭْ ومْشَانْ نّسْ.