23
أَڒقّحْ س ؤُفُوسْ ن يُوشِييَا
1 خنِّي إِسّكّْ ؤُجدْجِيذْ إِرقَّاسنْ ؤُشَا مَارَّا إِمْغَارنْ ن يَاهُوذَا ذ ؤُرْشَالِيمْ مُوننْ غَارسْ.
2 أَجدْجِيذْ إِڭعّذْ غَارْ ثَادَّارْثْ ن سِيذِي أَكْ-ذ مَارَّا إِرْيَازنْ ن يَاهُوذَا ذ مَارَّا إِمزْذَاغْ ن ؤُرْشَالِيمْ، ؤُڒَا ذ إِكهَّاننْ ذ إِنَابِييّنْ ذ مَارَّا ڒْْڭنْسْ، زڭْ ؤُمژْيَانْ أَڒْ ؤُمقّْرَانْ، ؤُ نتَّا إِغْرَا خَاسنْ ذڭْ إِمزُّوغنْ نْسنْ مَارَّا أَوَاڒنْ ن وذْلِيسْ ن ڒْْعَاهْذْ نِّي ثُوغَا ؤُفِينْ ذِي ثَادَّارْثْ ن سِيذِي.
3 أَجدْجِيذْ ثُوغَا إِبدّْ غَارْ إِجّْ ن ؤُپِيلَارْ ؤُشَا نتَّا إِقّنْ ڒْْعَاهْذْ زَّاثْ إِ سِيذِي، حِيمَا أَذْ إِضْفَارْ سِيذِي، أَذْ إِحْضَا ڒُْومُورَاثْ نّسْ ذ شّْهَاذَاثْ نّسْ ذ ثْوصَّا نّسْ س مَارَّا ؤُڒْ نّسْ ؤُ س مَارَّا ڒعْمَارْ نّسْ، مَاحنْذْ أَذْ إِسّمْثنْ أَوَاڒنْ ن ڒْْعَاهْذْ-أَ نِّي يُورِينْ ذڭْ وذْلِيسْ-أَ. ؤُشَا يُوذفْ ڒْْڭنْسْ مَارَّا ذِي ڒْْعَاهْذْ.
4 أَجدْجِيذْ يُومُورْ إِ حِيلْقِييَا، أَرَّايْسْ ن إِكهَّاننْ، ؤُ إِ إِكهَّاننْ ن ؤُستّفْ وِيسّْ ثْنَاينْ ؤُ إِ إِعسَّاسنْ ن ثوَّارْثْ، أَقَا نِيثْنِي أَذْ سُّوفّْغنْ مَارَّا ڒقْشُوعْ نِّي ثُوغَا إِتّْوَاڭّنْ إِ بَاعَالْ ؤُ إِ ثْربِّيثْ ن شْوَارْثِي ؤُڒَا إِ مَارَّا ڒْْعسْكَارْ ن ؤُجنَّا زِي زَّاوشْثْ ثَامقّْرَانْثْ ن سِيذِي غَارْ بَارَّا، ؤُ إِسّشْمضْ مَانْ أَيَا مَارَّا بَارَّا إِ ؤُرْشَالِيمْ ذڭْ إِيَّارنْ ن قِيذْرُونْ ؤُ إِجَّا أَذْ أَرْبُونْ إِغّضْ نّسْ غَارْ بَايْثْ-إِلْ.
5 نتَّا إِكّسْ عَاوذْ إِكهَّاننْ ن لْ-أَصْنَامْ نِّي ثُوغَا ڒقّْمنْ إِجدْجِيذنْ ن يَاهُوذَا، حِيمَا أَذْ قدّْمنْ ثِيوْهِيبِينْ ن ڒبْخُورْ ذِي ڒڭْعُوذِي، ذِي ثْندَّامْ ن يَاهُوذَا ؤُ ذِي جّْوَايهْ إِ د إِنّْضنْ إِ ؤُرْشَالِيمْ، ؤُڒَا ذ يِينِّي إِ إِقدّْمنْ ثِيوْهِيبِينْ نْ ڒبْخُورْ إِ بَاعَالْ، ذ ثْفُوشْثْ، ذ ثْزِيرِي، ذ ثمُّورَا ن ؤُجنَّا ؤُ إِ مَارَّا ڒْْعسْكَارْ ن ؤُجنَّا.
6 إِسُّوفّغْ ؤُڒَا ذ ثَاربِّيثْ ن شْوَارْثِي زِي ثَادَّارْثْ ن سِيذِي، إِڭَّا إِ-ت بَارَّا إِ ؤُرْشَالِيمْ غَارْ ثغْزَارْثْ ن قِيذْرُونْ. نتَّا إِسّشْمضْ إِ-ت غَارْ ثغْزَارْثْ ن قِيذْرُونْ ؤُ إِدّزْ إِ-ت ذ ثَاعجَّاجْثْ ؤُ يَاريّشْ إِ-ت خْ إِمضْڒَانْ ن أَيْثْ ن ڒْْڭنْسْ.
7 نتَّا إِهْذمْ إِخَّامنْ ن إِمثْليِّينْ نِّي ثُوغَا غَارْ ثَادَّارْثْ ن سِيذِي، مَانِي تّْخيَّاضنْثْ ثمْغَارِينْ إِقِيضَانْ نِّي ڭِّينْثْ أَمْ ثِيزَّايِيوِينْ إِ ثْربِّيثْ ن شْوَارْثِي.
8 نتَّا إِجَّا أَذْ سُّوفّْغنْ مَارَّا إِكهَّاننْ زِي ثْندَّامْ ن يَاهُوذَا ؤُشَا إِسّخْمجْ ڒڭْعُوذِي مَانِي قدّْمنْ إِكهَّاننْ ثِيوْهِيبِينْ ن ڒبْخُورْ، زِي جَابْعَا أَڒْ بِئرْ-سبْعَا. نتَّا إِهْذمْ ڒڭْعُوذِي غَارْ ثوُّورَا ن ثنْذِينْثْ، ؤُڒَا ذ ثِينِّي إِدْجَانْ غَارْ وَاذَافْ ن ثوَّارْثْ ن يَاشُووَا، أَزدْجِيفْ أَمقّْرَانْ ن ثنْذِينْثْ، غَارْ ؤُزڒْمَاضْ ن ونِّي إِ ثُوغَا إِتَّاذفْ ثَاوَّارْثْ ن ثنْذِينْثْ.
9 مَاشَا إِكهَّاننْ ن ڒڭْعُوذِي وَارْ زمَّارنْ أَذْ ڭعّْذنْ غَارْ ؤُعَالْطَارْ ن سِيذِي ذِي ؤُرْشَالِيمْ، مَاشَا نِيثْنِي شِّينْ أَغْرُومْ بْڒَا أَنْثُونْ ذِي ڒْوسْثْ ن أَيْثْمَاثْسنْ.
10 نتَّا إِسّخْمجْ ؤُڒَا ذ ثُوفَاثْ نِّي إِدْجَانْ ذِي ثغْزُورْثْ ن أَيْثْ ن هِينُّومْ، حِيمَا ؤُڒَا ذ إِجّْ وَارْ إِسّْعدُّو مِّيسْ نِيغْ يدْجِيسْ خْ ثْمسِّي إِ مُولَاكْ.
11 نتَّا إِكّسْ إِيْسَانْ إِ ثُوغَا ڭِّينْ إِجدْجِيذنْ ن يَاهُوذَا إِ ڒوْقَارْ ن ثْفُوشْثْ غَارْ وَاذَافْ ن ثَادَّارْثْ ن سِيذِي، غَارْ ثخَّامْثْ ن نَاثَانْ-مَالَاكْ، أَمْسخَّارْ أَشنّعْ، ونِّي إِدْجَانْ ذِي ڒبْنِييَّاثْ بَارَّا إِ زَّاوشْثْ ثَامقّْرَانْثْ. نتَّا إِقدّْ إِ إِكَارُّوثنْ ن ثْفُوشْثْ س ثْمسِّي.
12 ؤُڒَا ذ إِعَالْطَارنْ نِّي ثُوغَا إِبدّنْ خْ ثْزقَّا ن ثْغُورْفثْ ن أَحَازْ نِّي ڭِّينْ إِجدْجِيذنْ ن يَاهُوذَا، ؤُڒَا ذ إِعَالْطَارنْ إِ إِڭَّا مَانَاسَّا ذِي ثْنَاينْ ن ڒمْرَاحَاثْ ن ثَادَّارْثْ ن سِيذِي، إِهْذمْ إِ-ثنْ ؤُجدْجِيذْ. نتَّا إِڒْبزْ إِ-ثنْ، إِسِّيڭّْوجْ إِ-ثنْ سّنِّي ؤُشَا إِنْضَارْ ثَاعجَّاجْثْ نْسنْ ذِي ثغْزَارْثْ ن قِيذْرُونْ.
13 ؤُشَا إِسّخْمجْ ؤُجدْجِيذْ ڒڭْعُوذِي نِّي ذِينْ إِدْجَانْ زَّاثْ إِ ؤُرْشَالِيمْ، غَارْ يفُوسْ ن وذْرَارْ ن ؤُضيّعْ، ڒڭْعُوذِي إِ إِبْنَا سُولِيمَانْ، أَجدْجِيذْ ن إِسْرَائِيل، إِ أَشْثُورِيثْ، نّْعِي ن لْ-أَصْنَامْ ن أَيْثْ ن صِيذُونْ، ؤُ إِ كَامُوشْ، نّْعِي ن لْ-أَصْنَامْ ن أَيْثْ ن مُوآبَ، ؤُ إِ مِيلْكُومْ، جّْعِيفشْثْ ن لْ-أَصْنَامْ ن أَيْثْ ن عَامُّونْ.
14 نتَّا يَارْژَا إِمَايْضُوثنْ إِقدّْسنْ ذ إِوثْوِيثنْ ؤُشَا إِهْذمْ ثِيربِّينْ ن شْوَارْثِي ؤُشَا إِشُّورْ أَمْشَانْ نْسنْ س يغْسَانْ ن يوْذَانْ.
15 ؤُڒَا ذ أَعَالْطَارْ نِّي إِدْجَانْ ذِي بَايْثْ-إِلْ، ڒْْڭعّْذثْ إِ إِڭِّينْ يَارُوبْعَامْ، مِّيسْ ن نَابَاطْ، ذ ونِّي يَارِّينْ إِسْرَائِيل أَذْ إِخْضَا، أَقَا أَعَالْطَارْ نِّي ذ ڒْْڭعّْذثْ نِّي، إِهْذمْ إِ-ثنْ س ثْنَاينْ إِذْسنْ. نتَّا إِسّشْمضْ ڒْْڭعّْذثْ، إِدّزْ إِ-ت أَڒَامِي ثذْوڒْ ذ ثَاعجَّاجْثْ ؤُشَا إِسّشْمضْ ثَاربِّيثْ ن شْوَارْثِي.
16 ؤُمِي د-إِنّقْڒبْ يُوشِييَا، إِژْرَا إِمضْڒَانْ إِ ثُوغَا ذِينِّي خْ وذْرَارْ، ؤُشَا إِسّكّْ ذِينْ شَا ن يرْيَازنْ، إِكْسِي-د إِغْسَانْ زڭْ إِمضْڒَانْ ؤُشَا إِسّشْمضْ إِ-ثنْ خْ ؤُعَالْطَارْ. أَمُّو إِ إِسّخْمجْ إِ-ث عْلَاحْسَابْ أَوَاڒْ ن سِيذِي إِ زِي إِبَارّحْ ورْيَازْ ن أَربِّي ونِّي إِبَارّْحنْ أَوَاڒنْ-أَ.
17 يَارْنِي إِنَّا: ”مَانَا وژْرُو نِّي إِ وَارْ ژْرِيغْعمَّارْسْ إِ ذِينْ ثْوَاڒِيغْ؟“ نَّانْ أَسْ يرْيَازنْ ن ثنْذِينْثْ: ”وَا ذ أَنْضڒْ ن ورْيَازْ ن أَربِّي ونِّي ثُوغَا د-يُوسِينْ زِي يَاهُوذَا، ذ ونِّي إِبَارّْحنْ س ثْمسْڒَايِينْ-أَ نِّي ثڭِّيذْ أَكْ-ذ ؤُعَالْطَارْ-أَ ن بَايْثْ-إِلْ.“
18 نتَّا إِنَّا: ”جّمْ ث ذِينْ! ؤُڒَا ذ إِجّنْ وَارْ إِتّْحِيذِي إِغْسَانْ نّسْ!“ أَمُّو إِ جِّينْ نِيثْنِي إِغْسَانْ نّسْ جْمِيعْ أَكْ-ذ يغْسَانْ ن ؤُنَابِي ونِّي د-يُوسِينْ زِي سَامَارْيَا.
19 إِكّسْ يُوشِييَا مَارَّا ثُوذْرِينْ ن ثْزَاوِييِّينْ ن ڒڭْعُوذِي نِّي إِدْجَانْ ذِي ثْندَّامْ ن سَامَارْيَا إِ ثُوغَا سّْبدّنْ إِجدْجِيذنْ ن إِسْرَائِيل، مَاحنْذْ أَذْ سْعَارنْ سِيذِي. نتَّا إِڭَّا زَّايْسنْ أَمْ مَامّشْ إِڭَّا ذِي بَايْثْ-إِلْ.
20 مَارَّا إِكهَّاننْ ن ڒڭْعُوذِي إِنِّي ثُوغَا إِدْجَانْ ذِينْ، إِغَارْصْ أَسنْ خْ إِعَالْطَارنْ ؤُشَا إِسّشْمضْ إِغْسَانْ ن إِوْذَانْ. أَوَارْنِي أَسْ إِعْقبْ غَارْ ؤُرْشَالِيمْ.
ڒْعِيذْ ن ثْغَارْصْثْ ن ؤُسعْذُو
21 أَجدْجِيذْ يُومُورْ إِ مَارَّا ڒْْڭنْسْ: ”سْوجْذمْ ڒْْعِيذْ ن ثْغَارْصْثْ ن ؤُسعْذُو إِ سِيذِي، أَربِّي نْومْ، أَمْ مَامّشْ إِتّْوَارِي ذڭْ وذْلِيسْ-أَ ن ڒْْعَاهْذْ.“
22 إِشْثْ ن ڒْْعِيذْ ن ثْغَارْصْثْ ن ؤُسعْذُو أَمْ وَا وَارْ إِتّْوَاڭّْ عمَّارْصْ زڭْ وُوسَّانْ ن ڒْْقُوضَاثْ نِّي ثُوغَا إِحكّْمنْ إِسْرَائِيل، ؤُڒَا ذِي مَارَّا ؤُسَّانْ ن إِجدْجِيذنْ ن إِسْرَائِيل ذ إِجدْجِيذنْ ن يَاهُوذَا.
23 مَاشَا ذڭْ ؤُسڭّْوَاسْ وِيسّْ ثْمنْطَاشْ ن ؤُجدْجِيذْ يُوشِييَا سّْوجْذنْ نِيثْنِي ڒْْعِيذْ ن ثْغَارْصْثْ ن ؤُسعْذُو وَانِيثَا إِ سِيذِي ذِي ؤُرْشَالِيمْ.
24 يُوشِييَا إِكّسْ ؤُڒَا ذ يِينِّي إِسَّاوَاڒنْ أَكْ-ذ إِمتَّانْ، ذ إِڭزَّاننْ، ذ ڒخْيَاڒَاثْ ثِيمژْيَانِينْ ن لْ-أَصْنَامْ، ذ إِميْضَا ن لْ-أَصْنَامْ، ذ مَارَّا نّْعَاوَاثْ ن لْ-أَصْنَامْ إِ إِتّْوَاڒَانْ ذِي ثمُّورْثْ ن يَاهُوذَا ؤُ ذِي ؤُرْشَالِيمْ، حِيمَا أَذْ إِڭّْ أَوَاڒنْ ن شَّارِيعَا إِ إِتّْوَارِينْ ذڭْ وذْلِيسْ إِتّْوَانّْضنْ إِ ثُوغَا يُوفَا ؤُكهَّانْ حِيلْقِييَا ذِي ثَادَّارْثْ ن سِيذِي.
25 قْبڒْ نّسْ وَارْ ذِينْ ثُوغِي ؤُڒَا ذ إِجّْ ن ؤُجدْجِيذْ أَمْ نتَّا، إِذْوڒْ-د غَارْ سِيذِي س مَارَّا ؤُڒْ نّسْ ؤُ س مَارَّا ڒعْمَارْ نّسْ ذ س مَارَّا جّهْذْ نّسْ، عْلَاحْسَابْ شَّارِيعَا ن مُوسَا، ؤُ أَوَارْنِي أَسْ وَارْ ذِينْ ثُوغِي ؤُڒَا ذ إِجّنْ أَمْ نتَّا.
26 مَاشَا سِيذِي وَارْ إِجِّي زِي ڒْْحَاذُوقْ ن وغْضَابْ نّسْ أَمقّْرَانْ إِ زِي ثُوغَا يَارْغَا وغْضَابْ نّسْ خْ يَاهُوذَا زِي سِّيبّثْ ن مَارَّا أَسْعَارْ إِ ذ أَسْ إِڭَّا مَانَاسَّا.
27 سِيذِي إِنَّا: ”أَذْ سِّيڭّْوْجغْ ؤُڒَا ذ يَاهُوذَا خْ وُوذمْ إِنُو، أَمْ مَامّشْ سِّيڭّْوجغْ نشّْ إِسْرَائِيل، ؤُ نشّْ أَذْ نْضَارغْ ثَانْذِينْثْ-أَ ؤُرْشَالِيمْ إِ فَارْزغْ، ؤُڒَا ذ ثَادَّارْثْ إِ خفْ نِّيغْ: ’أَذْ يِيڒِي إِسمْ إِنُو ذِيهَا!‘ “
28 إِمزْرُوينْ إِقِّيمنْ ن يُوشِييَا ذ مَارَّا مِينْ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟
29 ذڭْ وُوسَّانْ نّسْ إِڭعّذْ فِيرْعُونْ نِيخُو، أَجدْجِيذْ ن مِيصْرَا، ضِيدّْ إِ ؤُجدْجِيذْ ن أَشُّورْ غَارْ يغْزَارْ ن لْفُورَاطْ. أَجدْجِيذْ يُوشِييَا إِفّغْ، مَاحنْذْ أَذْ ث إِڒْقَا، مَاشَا فِيرْعُونْ نِيخُو إِنْغَا إِ-ث غَارْ مَاجِيدُّو ڒَْامِي ث يژْرَا.
30 إِمْسخَّارنْ نّسْ إِوْينْ ث ذ أَمتِّينْ خْ إِجّْ ن ؤُكَارُّو زِي مَاجِيدُّو غَارْ ؤُرْشَالِيمْ، سِّيوْضنْ ث غَارْ ؤُرْشَالِيمْ ؤُشَا نضْڒنْ ث ذڭْ ونْضڒْ نّسْ. ڒْْڭنْسْ ن ثمُّورْثْ إِكْسِي يَاهُويَاحَازْ، مِّيسْ ن يُوشِييَا، ؤُشَا ذهْننْ ث، ڭِّينْ ث ذ أَجدْجِيذْ ذڭْ ومْشَانْ ن بَابَاسْ.
يَاهُويَاحَازْ، أَجدْجِيذْ ن يَاهُوذَا
31 يَاهُويَاحَازْ ثُوغَا غَارسْ ثْڒَاثَا ؤُ-عِيشْرِينْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ ثْڒَاثَا ن إِيُورنْ ذِي ؤُرْشَالِيمْ. يمَّاسْ قَّارنْ أَسْ حَامُوثَالْ، يدْجِيسْ ن إِرْمِييَا زِي لِيبْنَا.
32 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، نِيشَانْ أَمْ مَامّشْ ث ڭِّينْ ڒجْذُوذْ نّسْ.
33 فِيرْعُونْ نِيخُو إِجَّا أَذْ ث إِبلّعْ ذِي رِيبْلَا ذِي ثمُّورْثْ ن حَامَاثْ، حِيمَا وَارْ إِحكّمْ عَاذْ ذِي ؤُرْشَالِيمْ. نتَّا إِڭَّا إِ ثمُّورْثْ إِجّْ ن مُولْثَا ن مْيَا ثَالِينْثْ ن نُّوقَارْثْ ذ إِشْثْ ن ثَالِينْثْ ن وُورغْ.
34 خنِّي إِڭَّا فِيرْعُونْ أَلْيَاقِيمْ، مِّيسْ ن يُوشِييَا ذ أَجدْجِيذْ ذڭْ ومْشَانْ ن بَابَاسْ ؤُشَا إِبدّڒْ إِسمْ نّسْ غَارْ يَاهُويَاقِيمْ. مَاشَا يَاهُويَاحَازْ يِيوْيِي إِ-ث ؤُشَا يُوسَا-د غَارْ مِيصْرَا ؤُشَا إِمُّوثْ ذِينِّي.
يَاهُويَاقِيمْ، أَجدْجِيذْ ن يَاهُوذَا
35 يَاهُويَاقِيمْ إِوْشَا نُّوقَارْثْ ذ وُورغْ إِ فِيرْعُونْ، مَاشَا نتَّا ثُوغَا إِقدَّارْ ثَامُّورْثْ، حِيمَا إِزمَّارْ أَذْ إِسلّمْ نُّوقَارْثْ نِّي عْلَاحْسَابْ ڒُْومُورْ ن فِيرْعُونْ. إِقدَّارْ كُوڒْ إِجّْ ن ورْيَازْ عْلَاحْسَابْ ڒقْذَارْ نّسْ، أَمُّو إِ إِتَّارْ نُّوقَارْثْ ذ وُورغْ ن ڒْْڭنْسْ ن ثمُّورْثْ، حِيمَا أَذْ ث إِوْشْ إِ فِيرْعُونْ نِيخُو.
36 يَاهُويَاقِيمْ ثُوغَا غَارسْ خمْسَا ؤُ-عِيشْرِينْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ حِيطَاشْ ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ زَابِيذَا، يدْجِيسْ ن فِيذَايَا زِي رُومَاثْ.
37 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، نِيشَانْ أَمْ مَامّشْ ث ڭِّينْ ڒجْذُوذْ نّسْ.