لُوكَا
1
ثَامزْوَارُوثْ
1 ؤُمِي أَطَّاسْ إِذْسنْ ثُوغَا نْوَانْ أَذْ أَرِينْ إِمزْرُوينْ خْ ثْمسْڒَايِينْ إِ زِي نتّْوَاسّقْنعْ
2 - أَمْ مَامّشْ ثنْثْ إِ ذ أَنغْ خبَّارنْ نِيثْنِي، إِنِّي إِژْرِينْ أَوَاڒْ زڭْ ؤُمزْوَارُو ؤُ ثُوغَا أَثنْ ذ إِمْسخَّارنْ نّسْ -
3 إِبَانْ أَيِي-د ؤُڒَا إِ نشّْ، مِينْزِي ضْفَارغْ مَارَّا ثِيمسْڒَايِينْ مْلِيحْ زڭْ ؤُمزْوَارُو، حِيمَا أَذْ أَشْ د-أَرِيغْ كُوڒْشِي س ؤُستّفْ، أَ ثِييُوفِيلِيسْ إِعِيزّنْ،
4 حِيمَا أَذْ ثسّْنذْ مْلِيحْ ثِيذتّْ ن وَاوَاڒنْ نِّي زِي ثتّْوَاسّْڒمْذذْ.
زَاكَارِييَّا ذ إِلِيصَابِيثْ
5 ثُوغَا ذِينْ ذڭْ وُوسَّانْ ن هِيرُوذُوسْ، أَجدْجِيذْ ن يَاهُوذِييَّا، إِجّْ ن ؤُكهَّانْ، قَّارنْ أَسْ زَاكَارِييَّا. نتَّا زِي ثرْبِيعْثْ ن إِكهَّاننْ ن ثَادَّارْثْ ن أَبِييَا ؤُشَا ثَامْغَارْثْ نّسْ ثُوغَا-ت زِي ثَارَّاوْثْ ن هَارُونْ، قَّارنْ أَسْ إِلِيصَابِيثْ.
6 ثُوغَا س ثْنَاينْ إِذْسنْ ذ إِمْسڭَّاذنْ غَارْ أَربِّي، ضْفَارنْ مَارَّا ثِيوصَّا ؤُ ؤُيُورنْ ذِي ڒَْاثَارَاثْ ن ثْسڭْذَا ن سِيذِي بْڒَا ڒْْعِيبْ.
7 وَارْ ثُوغِي غَارْسنْ بُو ؤُحنْجِيرْ مِينْزِي إِلِيصَابِيثْ ثُوغَا وَارْ د-ثتِّيرُووْ شَا ؤُ ثُوغَا س ثْنَاينْ إِذْسنْ مْغَارنْ ذڭْ وُوسَّانْ.
8 أَقَا إِمْسَارْ، ڒَْامِي ثُوغَا زَاكَارِييَّا إِتّڭّْ ڒْْخذْمثْ ن ؤُكهَّانْ قِيبَاتْشْ إِ أَربِّي خْ نُّوبثْ ن ثرْبِيعْثْ نّسْ ن إِكهَّاننْ،
9 أَقَا يُوسَا-د ذَايسْ ؤُكشُّوضْ عْلَاحْسَابْ لْقَاعِيذَا ن ثُوكهَّانْثْ، حِيمَا أَذْ إِقدّمْ ثَاوْهِيبْثْ ن ڒبْخُورْ، ؤُشَا يُوذفْ نتَّا غَارْ زَّاوشْثْ ثَامقّْرَانْثْ ن سِيذِي.
10 ثُوغَا قَاعْ أَبَارُّو ن ڒْْڭنْسْ إِتّْژَادْجْ بَارَّا ذِي ثْسَاعّثْ ن ثوْهِيبْثْ ن ڒبْخُورْ.
11 ڒخْذنِّي إِضْحَارْ أَسْ-د لْمَالَاكْ ن سِيذِي إِ زَاكَارِييَّا نِّي ثُوغَا إِبدّنْ خْ ؤُفُوسِي ن ؤُعَالْطَارْ ن ڒبْخُورْ.
12 ؤُمِي ث إِژْرَا زَاكَارِييَّا، إِنّخْڒعْ ؤُشَا إِڭّْوذْ.
13 إِنَّا أَسْ لْمَالَاكْ: ”وَارْ تّڭّْوذْ شَا، أَ زَاكَارِييَّا، مِينْزِي ثتّْوَاقْبڒْ ثْژَادْجِيثْ نّشْ. أَقَا إِلِيصَابِيثْ، ثَامطُّوثْ نّشْ، أَذْ أَشْ د-ثَارُووْ أَحنْجِيرْ، أَذْ ث ثْسمِّيذْ يُوحَانَّا.
14 أَذْ ثْفَارْحذْ ؤُ أَذْ ثسْڒِيوْڒوذْ ؤُشَا أَطَّاسْ ن إِوْذَانْ أَذْ فَارْحنْ إِ وخْڒَاقْ نّسْ،
15 مِينْزِي أَذْ يِيڒِي ذ أَمقّْرَانْ غَارْ سِيذِي، وَارْ إِسسّْ بِينُو ؤُڒَا ذ شّْرَابْ. أَذْ إِتّْوَاشُّورْ س أَرُّوحْ إِقدّْسنْ ذڭْ ؤُعذِّيسْ ن يمَّاسْ،
16 ؤُشَا أَذْ د-يَارّْ أَطَّاسْ ن إِحنْجِيرنْ ن إِسْرَائِيل غَارْ سِيذِي، أَربِّي نْسنْ.
17 نتَّا أَذْ يُويُورْ زَّاثسْ س أَرُّوحْ ذ جّهْذْ ن ؤُنَابِي إِلِييَا، حِيمَا أَذْ د-يَارّْ ؤُڒَاونْ ن إِبَابَاثنْ غَارْ ثَارَّاوْثْ نْسنْ ؤُ إِنِّي وَارْ يُومِيننْ غَارْ ثُوسّْنَا ن ؤُمْسڭّذْ، حِيمَا أَذْ إِسّوْجذْ إِجّْ ن ڒْْڭنْسْ إِكْمڒْ إِ سِيذِي.“
18 يَارَّا-د زَاكَارِييَّا خْ لْمَالَاكْ: ”مَامّشْ إِ غَا ڭّغْ أَذْ فهْمغْ أَيَا، مِينْزِي نشّْ ذ أَوسَّارْ ؤُڒَا ذ ثَامْغَارْثْ إِنُو ثمْغَارْ أَطَّاسْ!“
19 يَارَّا-د لْمَالَاكْ، إِنَّا أَسْ: ”نشّْ ذ جِيبْرِيلْ، ونِّي إِبدّنْ زَّاثْ إِ أَربِّي، تّْوَاسّكّغْ-د حِيمَا أَذْ كِيكْ سِّيوْڒغْ، أَذْ شكْ خبَّارغْ ڒخْبَارْ-أَ وَانِيثَا أَصبْحَانْ.
20 زِي ڒخُّو أَذْ ثڭْنُوذْ ؤُ وَارْ ثْزمَّارذْ أَذْ ثسِّيوْڒذْ أَڒْ أَسّْ مِينْ ذِي إِ غَا إِمْسَارْ ؤُيَا، مِينْزِي وَارْ ثُومِينذْ شَا س وَاوَاڒنْ إِنُو نِّي إِ غَا إِتّْوَاكمّْڒنْ ذِي ڒْْوقْثْ نْسنْ.“
21 ثُوغَا ڒْْڭنْسْ ذِي بَارَّا إِتّْرَاجَا زَاكَارِييَّا ؤُشَا إِوْذَانْ تّْبهْثنْ ؤُمِي إِعطَّاڒْ ذَاخڒْ ذِي زَّاوشْثْ ثَامقّْرَانْثْ.
22 ؤُمِي د-إِفّغْ زَاكَارِييَّا، ثُوغَا وَارْ إِزمَّارْ أَذْ كِيسنْ إِسِّيوڒْ. خنِّي فهْمنْ بلِّي إِبَانْ أَسْ-د شَا ن ڒوْحِييْ ذِي زَّاوشْثْ ثَامقّْرَانْثْ. ثُوغَا إِتّْشيَّارْ أَسنْ، مَاشَا إِقِّيمْ إِڭْنُو.
23 ؤُمِي كمّْڒنْ وُوسَّانْ ن ڒْْخذْمثْ ن ثُوكهَّانْثْ نّسْ، إِعْقبْ-د غَارْ ثَادَّارْثْ نّسْ.
24 أَوَارْنِي ؤُسَّانْ نِّي ثكْسِي ثَامْغَارْثْ نّسْ إِلِيصَابِيثْ س دّيْسثْ. ثفَّارْ إِخفْ نّسْ خمْسَا ن إِيُورنْ، ؤُشَا ثبْذَا ثقَّارْ:
25 ”أَمُّو إِ زَّايِي إِڭَّا سِيذِي ذڭْ وُوسَّانْ نِّي ؤُمِي غَارِي د-إِخْزَارْ، حِيمَا أَذْ خَافِي إِكّسْ أَسحْقَارْ ن إِوْذَانْ.“
أَضْهَارْ ن لْمَالَاكْ إِ مَارْيَامْ
26 ذڭْ ؤُيُورْ وِيسّْ ستَّا إِسّكّْ-د أَربِّي لْمَالَاكْ جِيبْرِيلْ غَارْ إِشْثْ ن ثنْذِينْثْ ذِي لْجَالِيلْ، قَّارنْ أَسْ نَّاصِيرَا،
27 غَارْ إِشْثْ ن ثعْزَارشْثْ ذ ثَانخْضَابْثْ غَارْ ورْيَازْ زِي ثَادَّارْثْ ن ؤُجدْجِيذْ ذَاوُوذْ، قَّارنْ أَسْ يُوسُوفْ. ثُوغَا إِسمْ ن ثعْزَارشْثْ نِّي مَارْيَامْ.
28 يُوذفْ-د غَارسْ لْمَالَاكْ، إِنَّا أَسْ: ”سْڒَامْ خَامْ، أَ ثَامِيمُونْثْ! سِيذِيثْنغْ أَكِيذمْ! شمْ أَقَا ثتّْوَابَارْكذْ جَارْ ثمْغَارِينْ!“
29 ؤُمِي ث ثژْرَا، ثنّخْڒعْ زڭْ وَاوَاڒْ نّسْ ؤُشَا ثْخَارّصْ مِينْ إِخْسْ أَذْ يِينِي سْڒَامْ-أَ.
30 إِنَّا أَسْ لْمَالَاكْ: ”وَارْ تّڭّْوذْ شَا، أَ مَارْيَامْ، مِينْزِي ثُوفِيذْ أَرْضَا غَارْ أَربِّي.
31 أَذْ ثكْسِيذْ دّيْسثْ ؤُشَا أَذْ ثَارْوذْ أَحنْجِيرْ، أَذْ ث ثْسمِّيذْ ’يشُّو‘.
32 وَانِيثَا أَذْ يِيڒِي ذ أَمقّْرَانْ، أَذْ خَاسْ تّْڒَاغَانْ مِّيسْ ن ؤُمْعُودْجِي خْ كُوڒْشِي، ؤُ أَذْ أَسْ إِوْشْ سِيذِي أَربِّي ڒْْعَارْشْ ن جذِّيسْ ذَاوُوذْ.
33 نتَّا أَذْ إِحْكمْ خْ ثَادَّارْثْ ن يَاعْقُوبْ إِ ڒبْذَا، وَارْ إِتِّيڒِي ؤُنڭَّارْ إِ ثْڭلْذِيثْ نّسْ.“
34 ثنَّا مَارْيَامْ إِ لْمَالَاكْ: ”مَامّشْ إِ غَا يِيڒِي ؤُيَا أَمْ وَارْ مْڒِيشغْ شَا أَكْ-ذ ورْيَازْ؟“
35 يَارَّا-د لْمَالَاكْ، إِنَّا أَسْ: ”أَرُّوحْ إِقدّْسنْ أَذْ د-يَاسْ ؤُشَا جّهْذْ ن ؤُمْعُودْجِي خْ كُوڒْشِي أَذْ خَامْ يَارْسَا. س ؤُينِّي أَذْ يِيڒِي ونِّي إِ د غَا إِخڒْقنْ زَّايمْ ذ أَمْقدَّاسْ ؤُ أَذْ ث سمَّانْ مِّيسْ ن أَربِّي.
36 خْزَارْ، إِلِيصَابِيثْ، ڒَْادْجْ نّمْ، نتَّاثْ عَاوذْ أَقَا-ت س دّيْسثْ ذِي ثوْسَارْ نّسْ. أَقَا ذ أَيُورْ وِيسّْ ستَّا إِ نتَّاثْ ؤُمِي قَّارنْ ’وَارْ ثتِّيرُووْ!‘
37 مِينْزِي وَارْ ذِينْ مِينْ يوْعَارنْ إِ أَربِّي.“
38 ثنَّا مَارْيَامْ: ”خْزَارْ، نشّْ ذ ثَايَّا ن سِيذِي، أَذْ أَيِي إِمْسَارْ عْلَاحْسَابْ أَوَاڒْ نّشْ.“ خَاسْ ؤُشَا يُويُورْ خَاسْ لْمَالَاكْ.
مَارْيَامْ ثْرُوحْ أَذْ ثَارْزفْ إِلِيصَابِيثْ
39 ذڭْ وُوسَّانْ نِّي ثكَّارْ مَارْيَامْ، ثْرُوحْ ذغْيَا غَارْ إِذُورَارْ، غَارْ إِشْثْ ن ثنْذِينْثْ ن يَاهُوذِييَّا.
40 ثُوذفْ غَارْ ثَادَّارْثْ ن زَاكَارِييَّا، ثْسدْجمْ خْ إِلِيصَابِيثْ.
41 ؤُمِي ثسْڒَا إِلِيصَابِيثْ إِ سْڒَامْ ن مَارْيَامْ، إِمْسَارْ أَقَا إِنْهزّْ ؤُسيْمِي ذڭْ ؤُعذِّيسْ نّسْ، ؤُشَا ثذْوڒْ إِلِيصَابِيثْ ثشُّورْ س أَرُّوحْ إِقدّْسنْ.
42 نتَّاثْ ثسْغُويْ س جّهْذْ، ثنَّا إِ مَارْيَامْ: ”شمْ أَقَا ثتّْوَابَارْكذْ جَارْ ثمْغَارِينْ، ثتّْوَابَاركْ ڒْْغِيدْجثْ ن ؤُعذِّيسْ نّمْ!
43 زِي مَانِيسْ غَارِي أَيَا، حِيمَا أَذْ غَارِي د-ثَاسْ يمَّاسْ ن سِيذِي إِنُو؟
44 مَاغَارْ ڒَْامِي د-ثِيوضْ ثْمِيجَّا ن سْڒَامْ نّمْ غَارْ ؤُمزُّوغْ إِنُو، إِنْهزّْ ؤُسيْمِي ذڭْ ؤُعذِّيسْ إِنُو س ڒفْرَاحثْ ثَامقّْرَانْثْ.
45 سّعْذْ ن ثنِّي يُومْننْ أَقَا أَذْ إِتّْوَاكمّڒْ مِينْ ذ أَسْ إِتّْوَانَّا زِي سِيذِي.“
46 ثنَّا مَارْيَامْ:
”ڒعْمَارْ إِنُو إِسّمْغَارَا ذِي سِيذِي،
47 إِفَارْحْ بُوحْبڒْ إِنُو س أَربِّي،
ونِّي ذ أَيِي إِتِّيشنْ ثُوذَارْثْ،
48 س مِينْزِي إِخْزَارْ
غَارْ ؤُمدُّورْ أَوَاضعْ ن ثَايَّا نّسْ.
خْزَارْ، زِي ڒخُّو مَارَّا أَرَّاونْ
أَذْ أَيِي سمَّانْ ’ذ ثَامِيمُونْثْ!‘
49 مِينْزِي ونِّي ذ أَمْزمَّارْ إِڭَّا ذَايِي
ثِيمسْڒَايِينْ مْغَارنْثْ،
أَقَا إِسمْ نّسْ إِقدّسْ.
50 أَرّحْمثْ نّسْ خْ ثَارْوَا ذ جِّيڒَاثْ،
خْ يِينِّي ث إِتّْوقَّارنْ.
51 س ؤُغِيڒْ نّسْ أَقَا يِيوِي-د ڒغْڒبْ.
إِفَارْثكْ إِنِّي إِعفَّارنْ
ذڭْ إِخَارِّيصنْ ن وُوڒَاونْ نْسنْ.
52 إِنِّي غَارْ ثدْجَا صُّولْطَا إِغْضڒْ إِ-ثنْ
زِي ڒكْرَاسِي نْسنْ،
إِمْوَاضْعنْ إِسّْڭعّذْ إِ-ثنْ.
53 إِسّْجِيونْ س ڒْْخَارْ إِنِّي إِدْجُوژنْ،
إِسْقَاذْ أَيْثْبَابْ ن وَاڭْڒَا س إِفَاسّنْ خْوَانْ.
54 أَمْسخَّارْ نّسْ إِسْرَائِيل، إِعَاونْ إِ-ث،
أَقَا إِعْقڒْ خْ أَرّحْمثْ نّسْ،
55 أَمْ مَامّشْ إِسِّيوڒْ أَكْ-ذ ڒجْذُوذْ نّغْ،
أَكْ-ذ إِبْرَاهِيمْ ذ زَّارِيعثْ نّسْ،
إِ ڒبْذَا.“
56 ثكَّا مَارْيَامْ عْڒَاحَاڒْ ثْڒَاثَا ن إِيُورنْ غَارْ إِلِيصَابِيثْ، خنِّي ثعْقبْ غَارْ ثَادَّارْثْ نّسْ.
أَخْڒَاقْ ن يُوحَانَّا أَمْسغْضَاصْ
57 ڒَْامِي د-ثِيوضْ ڒْْوقْثْ ن إِلِيصَابِيثْ، حِيمَا أَذْ د-ثَارُووْ، ثجّْ-د أَحنْجِيرْ.
58 سْڒِينْ جِّيرَانْ ذ ڒَْادْجْ نّسْ بلِّي أَربِّي إِسّْشنْ أَسْ أَرّحْمثْ نّسْ أَطَّاسْ، فَارْحنْ نِيثْنِي أَكِيذسْ.
59 ذڭْ وَاسّْ وِيسّْ ثْمنْيَا ؤُسِينْ-د، حِيمَا أَذْ خثْننْ إِ ؤُحنْجِيرْ ؤُشَا سمَّانْ ث س يِيسمْ ن بَابَاسْ زَاكَارِييَّا.
60 مَاشَا ثطّفْ يمَّاسْ ذڭْ وَاوَاڒْ، ثنَّا: ”لَّ. وَارْ إِتّْوَاسمَّا أَمُّو، مَاشَا أَذْ إِتّْوَاسمَّا يُوحَانَّا.“
61 نَّانْ أَسْ: ”وَارْ إِدْجِي حذْ زِي ڒَْادْجْ نّمْ تّْڒَاغَانْ أَسْ-د س يِيسمْ-أَ.“
62 خنِّي شِييَّارنْ غَارْ بَابَاسْ، مَامّشْ إِخْسْ أَذْ ث إِسمَّا.
63 إِتَّارْ ثَاڒْوِيحْثْ ؤُشَا يُورَا خَاسْ، إِنَّا: ”إِسمْ نّسْ يُوحَانَّا.“ ؤُشَا ثْبهْثنْ إِوْذَانْ مَارَّا.
64 ڒخْذنِّي يَارْزمْ أَقمُّومْ نّسْ ؤُشَا إِتّْوَاضْڒقْ يِيڒسْ نّسْ ؤُشَا إِسِّيوڒْ عَاوذْ، إِبَاركْ أَربِّي.
65 ثهْوَا-د ثِيڭّْوُوذِي خْ مَارَّا جِّيرَانْ نْسنْ، سِّيوْڒنْ أَطَّاسْ خْ مَارَّا مَانْ أَيَا ذِي كُوڒْ إِذُورَارْ ن يَاهُوذِييَّا.
66 مَارَّا إِنِّي إِسْڒِينْ إِ مَانْ أَيَا، خمّْڒنْ ث ذڭْ وُوڒَاونْ نْسنْ، نَّانْ: ”أَقَا مِينْ غَا يِيڒِي ؤُحنْجِيرْ-أَ؟“ ثُوغَا أَفُوسْ ن سِيذِي أَكِيذسْ.
67 إِتّْوَاشُّورْ بَابَاسْ زَاكَارِييَّا س أَرُّوحْ إِقدّْسنْ، إِنبَّا، إِنَّا:
68 ”أَذْ إِتّْوَابَاركْ سِيذِي، أَربِّي ن إِسْرَائِيل،
مِينْزِي إِفكَّارْ ذِي ڒْْڭنْسْ نّسْ
ؤُشَا يِيوِي أَسنْ-د أَسنْجمْ.
69 إِسّْڭعّذْ أَنغْ-د إِجّْ ن يِيشّْ ن ؤُسنْجمْ
ذِي ثَادَّارْثْ ن ذَاوُوذْ، أَمْسخَّارْ نّسْ،
70 - أَمْ مَامّشْ ثُوغَا ذ أَنغْ إِنَّا
س ؤُقمُّومْ ن إِنَابِييّنْ إِقدّْسنْ نّسْ،
إِنِّي ذِينْ ثُوغَا زڭْ وشْحَاڒْ ؤُيَا -
71 حِيمَا أَذْ أَنغْ إِفكّْ زِي ڒْْعذْيَانْ نّغْ،
زڭْ إِفَاسّنْ ن يِينِّي إِ ذ أَنغْ إِشَارّْهنْ.
72 نتَّا إِڭَّا أَرّحْمثْ نّسْ إِ ڒجْذُوذْ نّغْ،
أَقَا إِعْقڒْ خْ ڒْْعُوهُوذْ نّسْ إِقدّْسنْ،
73 خْ ثَاجَادْجِيثْ ثنِّي إِجِّيدْجْ إِ إِبْرَاهِيمْ، جذِّيثْنغْ،
حِيمَا أَذْ ذ أَنغْ إِوْشْ،
74 مَاحنْذْ أَذْ نتّْوَافكّْ
زڭْ إِفَاسّنْ ن ڒْْعذْيَانْ نّغْ،
أَذْ أَسْ نْسخَّارْ بْڒَا ثِيڭّْوُوذِي،
75 س ثْقدَّاسْثْ ذ ثْسڭْذَا،
مَارَّا ؤُسَّانْ ن ثُوذَارْثْ نّغْ.
76 إِ شكْ، أَ أَحنْجِيرْ، أَذْ أَشْ تّْڒَاغَانْ
أَنَابِي ن ؤُمْعُودْجِي خْ كُوڒْشِي،
مِينْزِي أَذْ ثْرَاحذْ زَّاثْ إِ ؤُغمْبُوبْ ن سِيذِي،
حِيمَا أَذْ ثسّْوجْذذْ أَبْرِيذْ نّسْ،
77 حِيمَا أَذْ إِوْشْ إِ ڒْْڭنْسْ نّسْ ثُوسّْنَا ن ثُوذَارْثْ،
إِ إِدْجَانْ س وغْفَارْ ن دّْنُوبْ نْسنْ،
78 س ڒَْادْجَاغْ ن أَرّحْمثْ ن أَربِّي نّغْ،
إِ زِي خَانغْ إِ غَا إِحِينّْ ڒفْجَارْ زِي ڒُْوعْڒَا،
79 حِيمَا أَذْ إِسِّيرْغْ ثْفَاوْثْ إِ يِينِّي إِقِّيمنْ
ذِي ثَادْجسْثْ ذ ثِيڒِي ن ڒْْموْثْ،
حِيمَا أَذْ إِڭوّذْ إِضَارنْ نّغْ
ذڭْ وبْرِيذْ ن ڒهْنَا.“
80 أَمْ إِڭَّامْ ؤُحنْجِيرْ، يَارنِّي ذَايسْ أَرُّوحْ ؤُ ثُوغَا-ث ذِي ڒخْڒَا أَڒْ أَسّْ إِ ذِي د-إِضْهَارْ إِ إِسْرَائِيل.