17
خْ ؤُغكّْوِي غَارْ دّنْبْ ؤُ خْ سْمَاحثْ
1 إِنَّا يَاسُوع إِ إِمحْضَارنْ نّسْ: ”وَارْ ثْعدّڒْ إِلَا أَذْ إِڒِينْثْ ثْعنْكْرِيفِينْ، مَاشَا ؤُشْثْ خْ ونِّي زِي إِ د غَا يَاسنْثْ!
2 إِحْڒَا أَسْ أَذْ خَاسْ ثتّْوَاڭّْ إِشْثْ ن ثصْضَارْثْ ن ثْسِيرْثْ ثذْقڒْ غَارْ يِيرِي نّسْ ؤُشَا أَذْ إِمّنْضَارْ ذِي ڒبْحَارْ خْ مِينِّي غَا إِسّنْقَارْضْ إِجّنْ زڭْ إِمژْيَاننْ-أَ.
3 حْضَامْ إِخفْ نْومْ. مَاڒَا إِخْضَا ؤُمَاشْ، وبّخْ إِ-ث، ؤُ مَاڒَا إِثُوبْ، سَامْحْ أَسْ.
4 مَاڒَا إِخْضَا أَكِيذكْ سبْعَا ن ثْوَاڒَاوِينْ ذڭْ إِجّْ ن وَاسّْ ؤُشَا إِذْوڒْ-د غَاركْ سبْعَا ن ثْوَاڒَاوِينْ، إِقَّارْ: ’أَقَا ثُوبغْ!‘، إِتّْخصَّا أَذْ أَسْ ثْسَامْحذْ.“
أَمذْيَا ن ثْحبُّوشْثْ ن زَّارِيعثْ ن ؤُخرْذلْ
5 نَّانْ رُّوسُولْ: ”أَ سِيذِيثْنغْ، أَرْنِي أَنغْ لْ-إِيمَانْ نّغْ!“
6 نتَّا إِنَّا أَسنْ: ”مْڒِي ثُوغَا ذَايْومْ لْ-إِيمَانْ أَمْ يِيشْثْ ن ثْحبُّوشْثْ ن زَّارِيعثْ ن ؤُخرْذلْ ؤُشَا أَذْ ثِينِيمْ إِ ثْشجَّارْثْ-أَ ن ثُوثْ: ’ثْوَاقْڒعْ زڭْ إِژوْرَانْ نّمْ، ثْوَاژُّو ذِي ڒبْحَارْ!‘، خنِّي أَذْ أَومْ ثطَّاعْ.“
أَمذْيَا ن بَابْ ذ ؤُمْسخَّارْ نّسْ
7 مَانْ ونْ زَّايْومْ إِ غَارْ إِدْجَا ؤُمْسخَّارْ إِشَارّزْ نِيغْ يَاركّْوسْ ؤُدْجِي، أَذْ أَسْ يِينِي ذغْيَا مَاڒَا إِعْقبْ-د زڭْ إِيَّارْ ؤُشَا يُوذفْ غَارْ ثَادَّارْثْ: ’قَارّبْ-د، ثقِّيمذْ غَارْ طَّابْڒَا‘؟
8 مَا وَارْ ذ أَسْ إِقَّارْ: ’سوْجذْ مِينْ غَا مُّونسْوغْ، ثْبيْسذْ، ثْسخَّارذْ خَافِي أَڒْ غَا شّغْ، سْوغْ. أَوَارْنِي مَانْ أَيَا أَذْ ثشّذْ، أَذْ ثسْوذْ ؤُڒَا ذ شكْ‘؟
9 مَا أَذْ إِكْسِي ؤُمْسخَّارْ نِّي أَقَاذِي، مِينْزِي نتَّا إِڭَّا مِينْ ذ أَسْ إِتّْوَانَّانْ أَذْ ث يڭّْ؟ إِتّْغِيڒْ أَيِي، لَّا!
10 أَمُّو ؤُڒَا ذ كنِّيوْ، خْمِي ثڭِّيمْ مَارَّا مِينْ ذ أَومْ يُومُورنْ، إِتّْخصَّا أَذْ ثِينِيمْ: ’أَقَا نشِّينْ ذ إِمْسخَّارنْ وَارْ إِنفّْعنْ، مِينْزِي نڭَّا مِينْ ثُوغَا خَانغْ‘.“
أَسْڭنْفِي نعشْرَا إِ ذِي إِدْجَا ڒْْبَارْصْ
11 رَامِي إِرُوحْ يَاسُوع غَارْ ؤُرْشَالِيمْ إِشُوقْ ذِي ڒْْوسْطْ ن ثمُّورْثْ ن إِسَامَارِييّنْ، ثنِّي إِدْجَانْ زَّاثْ ن لْجَالِيلْ.
12 أَڒَامِي ثُوغَا إِتَّاذفْ غَارْ إِجّْ ن ذْشَارْ، ڒْْقَانْ ثعشْرَا ن يرْيَازنْ ذَايْسنْ ڒْْبَارْصْ، قِّيمنْ بدّنْ غَارْ ڒَْاڭّْوَاجْ.
13 سّْڭعّْذنْ ثْمِيجَّا نْسنْ، نَّانْ: ”أَ أَمْسڒْمَاذْ نّغْ، يَاسُوع، أَرْحمْ أَنغْ!‘ “
14 ؤُمِي ذَايْسنْ إِخْزَارْ، إِنَّا أَسنْ: ”رُوحمْ، سشْنمْ إِخفْ نْومْ إِ إِكهَّاننْ!“ خنِّي إِمْسَارْ، أَمْ ڭُّورنْ نِيثْنِي، أَقَا تّْوَاسِّيزذْڭنْ.
15 إِجّنْ زَّايْسنْ إِعْقبْ، ؤُمِي إِژْرَا بلِّي إِڭّنْفَا، ؤُشَا إِسّمْغَارَا ذِي أَربِّي س ثْمِيجَّا ثجْهذْ.
16 إِوْضَا خْ ؤُغمْبُوبْ نّسْ غَارْ إِضَارنْ ن يَاسُوع، إِقَاذَا ث. وَا ثُوغَا ذ إِجّْ ن ورْيَازْ أَسَامِيرِي.
17 إِطّفْ يَاسُوع ذڭْ وَاوَاڒْ، إِنَّا: ”مَا وَارْ تّْوَاسِّيزذْڭنْ مَارَّا سعشْرَا؟ مَانِي قِّيمنْ ثسْعَا؟
18 مَايمِّي جِّينْ نِيثْنِي أَذْ د-أَسنْ حِيمَا أَذْ سّْعُودْجنْ أَربِّي، مْغِيرْ وَانِيثَا وَاهَا، ونِّي إِدْجَانْ زڭْ إِجّْ نْ ڒْڭنْسْ ذ أَبَارَّانِي؟“
19 خنِّي إِنَّا أَسْ: ”كَّارْ، ثْرُوحذْ، أَقَا لْ-إِيمَانْ نّشْ إِسّنْجمْ إِ شكْ!“
ثَاوَاسِيثْ ن ثْڭلْذِيثْ ن أَربِّي
20 ؤُمِي إِفَارِيسِييّنْ سّقْسَانْ يَاسُوع: ”مڒْمِي إِ د غَا ثَاسْ ثْڭلْذِيثْ ن أَربِّي؟“، يَارَّا-د خَاسنْ، إِنَّا: ”وَارْ د-ثتِّيسْ ثْڭلْذِيثْ ن أَربِّي س يِيجّْ ن وُوذمْ إِتّْوَاسّْشَاننْ.
21 وَارْ قَّارنْ: ’أَقَا-ت ذَا!‘، نِيغْ: ’أَقَا-ت ذِيهَا!‘، مِينْزِي ثَاڭلْذِيثْ ن أَربِّي أَقَا-ت ذِي شَا زَّايْومْ.“
22 إِنَّا إِ إِمحْضَارنْ نّسْ: ”أَذْ د-أَوْضنْ وُوسَّانْ إِ ذِي إِ غَا ثخْسمْ أَذْ ثْژَارمْ إِجّْ ن وَاسّْ وَاهَا زڭْ وُوسَّانْ ن مِّيسْ ن بْنَاذمْ، مَاشَا كنِّيوْ وَارْ ث ثْژَارّمْ.
23 مَاڒَا نَّانْ أَومْ: ’أَقَا-ث ذَا!‘ نِيغْ: ’أَقَا-ث ذِيهَا!‘، وَارْ ذِينْ تّْرِيحمْ.
24 مِينْزِي أَمْ مَامّشْ إِشَّاثْ وَاسَّامْ زِي طَّارْفْ سَاذُو ؤُجنَّا غَارْ طَّارْفْ نّغْنِي سَاذُو ؤُجنَّا، أَمُّو عَاوذْ أَذْ يِيڒِي مِّيسْ ن بْنَاذمْ ذڭْ وَاسّْ نّسْ.
25 مَاشَا إِتّْخصَّا أَسْ أَمزْوَارُو أَذْ إِودّبْ أَطَّاسْ ؤُشَا أَذْ إِتّْوَامّنْضَارْ زِي جِّيڒْ-أَ!
26 أَمْ مَامّشْ ثُوغَا ذڭْ وُوسَّانْ ن نُوحْ، أَمُّو إِ غَا يِيڒِي عَاوذْ ذڭْ وُوسَّانْ ن مِّيسْ ن بْنَاذمْ.
27 ثُوغَا تّتّنْ، سسّنْ، تَّاوْينْ ثِيمْغَارِينْ، سْمدْجَاشنْ ثِيمْغَارِينْ إِ يرْيَازنْ أَڒْ أَسّْ إِ ذِي يُوذفْ نُوحْ غَارْ ؤُغَارَّابُو ؤُشَا يُوسَا-د طُّوفَانْ، إِسّْهلّكْ إِ-ثنْ مَارَّا.
28 أَمُّو ثُوغَا إِمْسَارْ عَاوذْ ذڭْ وُوسَّانْ ن لُوثْ. ثُوغَا تّتّنْ، سسّنْ، سَّاغنْ، زّْنُوزَانْ، تّژُّونْ، بنَّانْ.
29 مَاشَا ذڭْ وَاسّْ إِ ذِي د-إِفّغْ لُوثْ زِي سَاذُومْ، إِجَّا سِيذِي أَذْ د-ثوْضَا ثْمسِّي ذ ڒشْبَاريّثْ زڭْ ؤُجنَّا، إِثحَّا ثنْ مَارَّا.
30 أَمُّو إِ غَا يِيڒِي ذڭْ وَاسّْ إِ ذِي إِ غَا إِتّْوَاسَّارْڭبْ مِّيسْ ن بْنَاذمْ.
31 ونِّي إِدْجَانْ خْ ثْزقَّا ذڭْ وَاسّْ نِّي ؤُ ڒْْقشّْ نّسْ أَقَا-ث ذِي ثَادَّارْثْ، وَارْ د-إِهكّْوِي شَا مَاحنْذْ أَذْ ث إِكْسِي. أَمُّو ؤُڒَا ذ ونِّي إِدْجَانْ ذڭْ إِيَّارْ، وَارْ د-إِتّْعِيقِيبْ شَا.
32 عقْڒمْ خْ ثمْغَارْثْ ن لُوثْ!
33 ونِّي يَارزُّونْ أَذْ إِسّنْجمْ ثُوذَارْثْ نّسْ، أَذْ ت إِخْسَارْ، ؤُ ونِّي ت إِ غَا إِخْسَارنْ، أَذْ ت إِسّنْجمْ.
34 أَذْ أَومْ إِنِيغْ، أَقَا ذِي دْجِيڒثْ نِّي أَذْ ذِينْ إِڒِينْ ثْنَاينْ خْ إِشْثْ ن ثَاسُّوثْ: إِجّنْ أَذْ إِتّْوَاكْسِي، ونّغْنِي أَذْ إِتّْوَاجّْ.
35 أَذْ ذِينْ إِڒِينْثْ ثْنَاينْ ن ثمْغَارِينْ حَارّْينْثْ جْمِيعْ، إِشْثْ أَذْ ثتّْوَاكْسِي، ثنّغْنِي أَذْ ثتّْوَاجّْ.
36 أَذْ ذِينْ إِڒِينْ ثْنَاينْ ذڭْ إِيَّارْ: إِجّنْ أَذْ إِتّْوَاكْسِي، ونّغْنِي أَذْ إِتّْوَاجّْ.“
37 أَرِّينْ-ذ، نَّانْ أَسْ: ”مَانِي، أَ سِيذِيثْنغْ؟“ نتَّا إِنَّا أَسنْ: ”مَانِي ثدْجَا أَرِّيمثْ ذِينْ إِتّْمُونَانْ عَاوذْ إِڭِيذَارنْ.“