3
ڒْحُوكَّامْ ذ إِنَابِييّنْ ن إِسْرَائِيل تّْفشْڒنْ
1 ”خنِّي نِّيغْ نشّْ:
’سْڒمْ، أَ كنِّيوْ، إِزدْجِيفنْ ن يَاعْقُوبْ،
ؤُ كنِّيوْ، ڒْْحُوكَّامْ ن ثَادَّارْثْ ن إِسْرَائِيل!
مَا وَارْ إِتّْخصِّي إِ كنِّيوْ
أَذْ ثسّْنمْ ثَاسْغَارْثْ؟
2 نِيثْنِي شَارّْهنْ مِينْ إِشْنَانْ
ؤُ تّخْسنْ مِينْ إِدْجَانْ ذ أَعفَّانْ!
نِيثْنِي كّْسنْ أَسنْ ثِيڒْمشْثْ
ؤُڒَا ذ أَيْسُومْ خْ إِغْسَانْ نْسنْ.
3 وَاهْ، أَقَا أَثنْ ذ يِينِّي إِتّتّنْ
أَيْسُومْ ن ڒْْڭنْسْ إِنُو
ؤُشَا كّْسنْ أَسنْ ثِيڒْمشْثْ
ؤُشَا تَّارژَّانْ إِغْسَانْ نْسنْ.
نِيثْنِي تّْبزَّاعنْ ثنْ أَمْ ذِي مَارْمِيثَا،
أَمْ ويْسُومْ ذڭْ ؤُطنْجِيرْ.“
4 ”ڒخْذنِّي أَذْ سْغُوينْ غَارْ سِيذِي،
مَاشَا وَارْ خَاسنْ د-إِتَّارِّي.
أَذْ خَاسنْ إِفَّارْ ؤُذمْ نّسْ ذِي ڒْْوقْثْ نِّي،
زِي سِّيبّثْ ن ڒْْغَارْ إِ إِڭِّينْ.“
5 ”أَمُّو إِ إِقَّارْ سِيذِي إِ إِنَابِييّنْ
إِنِّي إِتّْغَارَّانْ ڒْْڭنْسْ إِنُو،
إِنِّي ؤُمِي غَارْسنْ عَاذْ مِينْ ذِي
إِ غَا إِزعْفنْ س ثغْمَاسْ نْسنْ،
أَذْ ڒَْاغَانْ ’ڒهْنَا!‘،
مَاشَا ضِيدّْ ن ونِّي وَارْ ذ أَسنْ إِتّڭّْ
وَالُو ذڭْ ؤُقمُّومْ نْسنْ،
أَذْ خَاسْ قدّْسنْ إِجّْ ن ؤُمنْغِي.
6 س ؤُيَا أَذْ خَاومْ د-ثوْضَا دْجِيڒثْ،
بْڒَا ڒوْحِييْ،
ؤُ أَذْ خَاومْ د-إِوْضَا ثَادْجسْثْ
بْڒَا ثَاڭزَّانْثْ.
أَذْ ثغْڒِي ثْفُوشْثْ خْ إِنَابِييّنْ
ؤُ أَذْ إِبَّارْشنْ وَاسّْ ثِيوَا نْسنْ.
7 إِمْوَاڒَاونْ أَذْ سضْحَانْ،
ؤُ إِڭزَّاننْ أَذْ ذوْڒنْ
زوْغْونْ س ڒحْيَا،
ؤُ نِيثْنِي مَارَّا أَذْ ڒحّْفنْ أَشْڒَاغمْ
غَارْ ؤُينْشِيشْ،
مِينْزِي ثْوَارِّيثْ ن أَربِّي
وَارْ د-ثتِّيسْ شَا.
8 مَاشَا نشّْ شُّورغْ س جّهْذْ
ن أَرُّوحْ ن سِيذِي،
ؤُ س ڒْْحقّْ ذ ثرْيَاسْثْ،
حِيمَا أَذْ بَارّْحغْ إِ يَاعْقُوبْ
خْ ؤُخطُّو نّسْ
ؤُ إِ إِسْرَائِيل خْ دّنْبْ نّسْ.“
9 ”سْڒمْ خنِّي غَارْ مَانْ أَيَا،
أَ إِزدْجِيفنْ ن ثَادَّارْثْ ن يَاعْقُوبْ
ؤُ كنِّيوْ إِمقّْرَاننْ
ن ثَادَّارْثْ ن إِسْرَائِيل،
إِنِّي إِشَارّْهنْ ڒْْحقّْ،
ؤُ سّْفَارَّاغنْ مَارَّا مِينْ إِدْجَانْ إِسڭّمْ،
10 إِنِّي إِبنَّانْ صِيهْيُونْ س إِذَامّنْ،
ؤُ ؤُرْشَالِيمْ س ڒْْغشّْ.
11 إِزدْجِيفنْ نّسْ تّْضبَّارَانْ
دّْعَاوِي إِ أَرّشْوثْ،
إِكهَّاننْ نّسْ سّڒْمَاذنْ س ڒْْمُونثْ،
ؤُ إِكهَّاننْ نّسْ
تّْڭزَّاننْ س ثْمنْيَاثْ.
أَقَا نِيثْنِي تّْشَاڒنْ خْ سِيذِي خْمِي قَّارنْ:
’مَا وَارْ إِدْجِي سِيذِي ذِي ڒْوسْثْ نّغْ؟
وَارْ ذ أَنغْ إِڒقّفْ ڒْْغَارْ.‘
12 س ؤُيَا، أَقَا-ت زَّايْومْ،
أَقَا أَذْ شَارْزنْ صِيهْيُونْ أَمْ يِيجّْ ن ييَّارْ،
أَذْ ثذْوڒْ ثنْذِينْثْ ن ؤُرْشَالِيمْ
ذ إِشْثْ نْ ڒْخَارْبثْ،
ؤُ أَذْرَارْ ن ثَادَّارْثْ ذ ڒڭْعُوذِي ن وزْغَارْ.“