108
1 إِزْڒِي. أَزهّذْ ن ذَاوُوذْ.
2 أَ أَربِّي، ؤُڒْ إِنُو إِعوّڒْ،
أَذْغنّْجغْ أَذْ زهّْذغْ،
وَاهْ ؤُڒَا ذ أَعُودْجِي إِنُو.
3 فَاقْ، لهَارْبَا ذ ڒْْڭَامْبْرِي!
نشّْ خْسغْ أَذْ سّْفَاقغْ ثَافَاوْثْ ن ڒفْجَارْ.
4 نشّْ أَذْ شكْ قَاذِيغْ جَارْ ڒڭْنُوسْ، أَ سِيذِي،
أَذْ أَكْ زهّْذغْ جَارْ شُّوعُوبْ.
5 مَاغَارْ ثَامخْسِيوْثْ نّشْ إِشوَّارنْ
ثتَّاكّْوَاضْ ثِيوَا إِ إِجنْوَانْ،
ڒَْامَانْ نّشْ أَڒْ إِسيْنُوثنْ.
6 أَ أَربِّي، سْڭعّذْ إِخفْ نّشْ
ثِيوَا إِ إِجنْوَانْ،
أَرّْ أَعُودْجِي نّشْ خْ مَارَّا ثَامُّورْثْ،
7 حِيمَا إِمْعِيزّنْ نّشْ أَذْ تّْوَانجْمنْ،
أَوِي أَسنْجمْ س ؤُفُوسْ أَفُوسِي نّشْ
ؤُ أَرّْ-د خَانغْ أَوَاڒْ.
8 أَربِّي ثُوغَا إِسَّاوَاڒْ
ذِي زَّاوشْثْ نّسْ إِقدّْسنْ،
س ؤُينِّي إِ غَا نڭْزغْ س ڒفْرَاحثْ.
نشّْ أَذْ بْضِيغْ شَاكِيمْ،
أَذْعبَّارغْ ثَايْسَارْثْ ن سُوكُّوثْ.
9 جِيلْعَاذْ إِنُو، مَانَاسَّا إِنُو،
إِفْرَايِيمْ ذ أَسڒْقِي إِجهْذنْ ن ؤُزدْجِيفْ إِنُو،
يَاهُوذَا ذ أَمْڭوّذْ إِنُو.
10 مَاشَا مُوآبَ ذ سَّارِيجْ إِنُو ن ؤُسِيرْذْ،
خْ إِذُومْ أَذْ نْضَارغْ سَانْذَالِييَاثْ إِنُو،
خْ ثمُّورْثْ ن فِيلِيشِيثْ
أَذْ ذُوقّْزغْ س ؤُسْڒِيوْڒوْ.
11 وِي ذ أَيِي غَا إِنذْهنْ
غَارْ ثنْذِينْثْ إِفَارْينْ؟
وِي ذ أَيِي غَا إِڭوّْذنْ غَارْ إِذُومْ؟
12 مَا وَارْ ذ أَنغْ ثنْضَارذْ، أَ أَربِّي،
ؤُ أَكْ-ذ ڒْْعسْكَارَاثْ نّغْ مَا زعْمَا
وَارْ د-ثفِّيغذْ عَاذْ أَكِيذْسنْ،
أَ أَربِّي؟
13 أوْشْ أَنغْ أَفُوسْ
حِيمَا أَذْ أَنغْ ثسّْنجْمذْ زِي ڒحْصَارثْ،
مَاغَارْ أَسنْجمْ س ؤُفُوسْ ن يِيجّْ ن بْنَاذمْ
أَقَا إِبْضڒْ.
14 أَكْ-ذ أَربِّي أَذْ نڭّْ س ومْحَاضْ
ؤُ نتَّا أَذْ إِعْفسْ خْ يِينِّي ذ أَنغْ إِحصَّارنْ.