28
1 ن ذَاوُوذْ.
إِ شكْ ؤُمِي ڒَْاغِيغْ،
أَ سِيذِي، أَقَا شكْ ذ ثَاصْضَارْثْ إِنُو.
وَارْ تّڭّْ شَا إِخفْ نّشْ
وَارْ غَارِي ثتّسْڒِيذْ،
أَڒَامِي، س وسْقَارْ نّشْ زَّاثِي،
وَارْ تَّاركّْوِيسغْ
أَكْ-ذ يِينِّي د-إِهكّْوَانْ ذڭْ ونْضڒْ.
2 سڒْ إِ ثْمِيجَّا ن ثُوثْرَا إِنُو،
خْمِي خَاكْ تّْڒَاغِيغْ،
خْمِي كسِّيغْ إِفَاسّنْ إِنُو
غَارْ وخَّامْ ن ذَاخڒْ
ن زَّاوشْثْ نّشْ إِقدّْسنْ.
3 وَارْ ذ أَيِي تّْجَارِّي أَكْ-ذ إِعفَّاننْ،
أَكْ-ذ يِينِّي إِتّڭّنْ ڒْْمُوعْصِييّثْ،
إِنِّي إِسَّاوَاڒنْ خْ ڒهْنَا
أَكْ-ذ جِّيرَانْ نْسنْ،
أَمْ غَارْسنْ إِدْجَا ڒْْغَارْ ذڭْ وُوڒْ نْسنْ.
4 خدْجصْ أَسنْ عْلَاحْسَابْ مِينْ تّڭّنْ،
عْلَاحْسَابْ ثُوعفّْنَا ن ثْمڭَّا نْسنْ.
خدْجصْ أَسنْ
عْلَاحْسَابْ ڒْْخذْمثْ ن إِفَاسّنْ نْسنْ،
أوْشْ أَسنْ ڒْْمُونثْ نْسنْ إِ إِسْذَاهدْجنْ،
5 مِينْزِي نِيثْنِي وَارْ خزَّارنْ
غَارْ ڒفْعَايڒْ ن سِيذِي،
ؤُڒَا غَارْ ڒْْخذْمثْ ن إِفَاسّنْ نّسْ.
نتَّا أَذْ ثنْ إِغْضڒْ، وَارْ ثنْ إِبنِّي شَا.
6 أَذْ إِتّْوَابَاركْ سِيذِي،
مَاغَارْ نتَّا إِسْڒَا إِ ثْمِيجَّا ن ثُوثْرَا إِنُو.
7 سِيذِي ذ ڒْْعزّْ إِنُو
ذ ثَاسدَّارْثْ إِنُو ن ؤُسڒْقِي،
ؤُڒْ إِنُو إِتّْشڒْ خَاسْ ؤُشَا تّْوَاعَاوْنغْ.
ؤُڒْ إِنُو إِنڭّزْ س ڒفْرَاحثْ،
س يزْڒِي إِنُو أَذْ ث قَاذِيغْ.
8 سِيذِي ذ جّهْذْ نْسنْ،
نتَّا ذ لْبُورْجْ إِجهْذنْ ن إِسنْجِيمنْ
إِ ؤُمذْهُونْ نّسْ.
9 سنْجمْ ڒْْڭنْسْ نّشْ، بَاركْ ثَاسْغَارْثْ نّشْ،
أَرْوسْ إِ-ثنْ ؤُ أَرْبُو ثنْ إِ ڒبْذَا قَاعْ.