52
1 إِ ؤُمقّْرَانْ ن إِمغْنَاجنْ. أَخمِّي ن ذَاوُوذْ.
2 ڒَْامِي د-يُوسَا ذُووَاعْ، زِي إِذُومْ، إِخبَّارْ شَاوُولْ، إِنَّا أَسْ:
”أَقَا ذَاوُوذْ يُوسَا-د غَارْ ثَادَّارْثْ ن أَخِيمَالِيكْ.“
3 مَامّشْ ثْفيّْشذْ زِي ثْعفَّانْثْ، أَ جِّيهڒْ؟
ثَامخْسِيوْثْ إِشوَّارنْ ن أَربِّي
ثتّكّْ أَسّْ إِمُونْ.
4 إِڒسْ نّشْ إِتّْخَارّصْ ذِي ڒْْغَارْ،
أَمْ مَامّشْ ڒْْمُوسْ إِقضْعنْ إِ ؤُحفِّي
يِيوْيِي ذْرُوشْثْ س ڒْْغفْڒثْ.
5 شكْ ثتّخْسذْ ثَاعفَّانْثْ أَطَّاسْ خْ ثْصبْحَانْثْ،
ڒْْهَارْذْ س إِخَارِّيقنْ
كْثَارْ خْ ڒْْهَارْذْ ن ثْسڭْذَا. سِيلَاهْ.
6 شكْ ثتّخْسذْ أَوَاڒنْ إِتَّاكّْوَارنْ،
ؤُڒَا ذ إِڒسْ إِشُّورْ س وشْمَاثْ.
7 مَاشَا أَربِّي أَذْ شكْ يَاردّدْجْ إِ ڒبْذَا،
نتَّا أَذْ شكْ إِطّفْ،
أَذْ شكْ إِكّسْ زِي ثْزذِّيغْثْ.
نتَّا أَذْ شكْ إِقْڒعْ زڭْ إِژوْرَانْ نّشْ
زِي ثمُّورْثْ ن يِينِّي إِدَّارنْ. سِيلَاهْ.
8 إِمْسڭَّاذنْ أَذْ ث ژَترنْ أَذْ ڭّْوذنْ.
أَذْ خَاسْ ضحْشنْ، أَذْ إِنِينْ:
9 ”خْزَارْ أَرْيَازْ إِجهْذنْ
ونِّي ؤُمِي وَارْ إِڭِّي أَربِّي جّهْذْ نّسْ،
مَاشَا ثُوغَا إِتّْشڒْ
خْ وَاڭْڒَا نّسْ أَمقّْرَانْ.
ثُوغَا إِذْوڒْ إِجْهذْ
س طّْبِيعثْ نّسْ إِغشّنْ.“
10 نشّْ أَذْ إِڒِيغْ
أَمْ يِيشْثْ ن ثْزِيثُونْثْ ثَازيْزَاوْثْ
ذِي ثَادَّارْثْ ن أَربِّي.
إِ ڒبْذَا قَاعْ إِ غَا تِّيقّغْ
ذِي ثْمخْسِيوْثْ إِشوَّارنْ ن أَربِّي.
11 نشّْ أَذْ شكْ قَاذِيغْ إِ ڒبْذَا قَاعْ،
مَاغَارْ شكْ ثڭِّيذْ ث.
أَذْ سِّيثِيمغْ ذڭْ يِيسمْ نّشْ،
مَاغَارْ نتَّا ذ أَصبْحَانْ
إِ إِمْثِيقَّانْ نّشْ.