3
ڒبْنِي ن زَّاوشْثْ ثَامقّْرَانْثْ
1 سُولِيمَانْ إِبْذَا ڒبْنِي ن ثَادَّارْثْ ن سِيذِي ذِي ؤُرْشَالِيمْ خْ وذْرَارْ ن مُورِييَا، مَانِي د-إِبَانْ سِيذِي إِ بَابَاسْ ذَاوُوذْ ؤُ مَانِي إِسّوْجذْ ذَاوُوذْ إِجّْ ن ومْشَانْ خْ ؤُنذْرَارْ ن ؤُيابُوسِي ؤُرْنَانْ.
2 نتَّا إِبْذَا ڒبْنِي ذڭْ ؤُيُورْ وِيسّْ ثْنَاينْ، ذڭْ وَاسّْ وِيسّْ ثْنَاينْ ذڭْ ؤُسڭّْوَاسْ وِيسّْ أَربْعَا ن ثْڭلْذَا نّسْ.
3 وَانِيثَا ذ ذْسَاسْ إِ إِسَّارْسْ سُولِيمَانْ إِ ڒبْنِي ن ثَادَّارْثْ ن أَربِّي: ثُوزّڭَّارْثْ نّسْ ذڭْ إِغَادْجنْ عْلَاحْسَابْ ڒقْيَاسْ أَمزْوَارُو ثُوغَا-ت ستِّينْ ن إِغَادْجنْ، ذ ثِيرُو نّسْ ثُوغَا-ث عِيشْرِينْ ن إِغَادْجنْ.
4 أَسْقِيفْ ن وَاذَافْ، نِّي ثُوغَا إِدْجَانْ غَارْ زَّاثْ ن ثُوزّڭَّارْثْ ن ثَادَّارْثْ، ثُوغَا-ث ذَايسْ عِيشْرِينْ ن إِغَادْجنْ ؤُمِي ثعبَّارنْ غَارْ زَّاثْ ن ثِيرُو ن ثَادَّارْثْ، ؤُ ڒُْوعْڒَا نّسْ ثُوغَا-ث ذَايسْ مْيَا ؤُ-عِيشْرِينْ ن إِغَادْجنْ. ثُوغَا إِذْڒَا وسْقِيفْ ن وَاذَافْ غَارْ ذَاخڒْ س وُورغْ إِصْفَانْ.
5 ثَادَّارْثْ ثَامقّْرَانْثْ إِڭَّا أَسْ ثَاژقَّا س ؤُكشُّوضْ ن ثْشجَّارْثْ ن ؤُمرْزِي ؤُشَا يَارْنِي خَاسْ وُورغْ إِصْفَانْ ؤُ إِزوّقْ إِ-ث س ثْشجِّيرَا ن ثِينِي ذ سّْنَاسڒْ إِزوّْقنْ.
6 عَاوذْ إِزوّقْ نتَّا ثَادَّارْثْ س يِيژْرَا إِغْڒَانْ. ؤُرغْ ثُوغَا ذ ؤُرغْ زِي فَارَاوَايِيمْ.
7 أَمُّو إِ إِذْڒَا نتَّا ثَادَّارْثْ، ثِيحنْيَا، ثِينبْذَاثِينْ، ڒحْيُوضْ نّسْ ذ ثوُّورَا نّسْ س وُورغْ، ؤُشَا إِنْقشْ إِكِيرُوبنْ ذِي ڒحْيُوضْ.
8 نتَّا إِڭَّا ؤُڒَا ذ أَخَّامْ ن وقْذَاسْ خْ ؤُقدَّاسْ. ثُوزّڭَّارْثْ نّسْ ذَايسْ عِيشْرِينْ ن إِغَادْجنْ ؤُمِي ثعبَّارنْ غَارْ زَّاثْ ن ثِيرُو ن ثَادَّارْثْ. ؤُڒَا ذ ثِيرُو نّسْ ثُوغَا-ث ذَايسْ عِيشْرِينْ ن إِغَادْجنْ. نتَّا إِذْڒَا ڒحْيُوضْ غَارْ ذَاخڒْ ن وخَّامْ س ستَّا-مْيَا ثَالِينْثْ ن وُورغْ إِصْفَانْ.
9 ڒوْزنْ ن إِمسْمَارنْ إِسكّْوَا خمْسِينْ شِيقْلُو ن وُورغْ. إِذْڒَا ؤُڒَا ذ ثِيغُورْفَاثِينْ ن سنّجْ س وُورغْ.
10 ذڭْ وخَّامْ ن وقْذَاسْ خْ ؤُقدَّاسْ إِڭَّا ثْنَاينْ ن إِكِيرُوبنْ، أَمْ ڒْخذْمثْ ن ونْقَاشْ، ؤُ إِڒحّفْ إِ-ثنْ س وُورغْ.
11 أَفْرِيونْ ن إِكِيرُوبنْ جْمِيعْ عبَّارنْ عِيشْرِينْ ن إِغَادْجنْ ذِي ثُوزّڭَّارْثْ. أَفْرِيوْ أَمزْوَارُو إِعبَّارْ خمْسَا ن إِغَادْجنْ ن ثُوزّڭَّارْثْ، إِتَّاكّْوَاضْ ڒْْحِيضْ ن ثَادَّارْثْ، ؤُشَا أَفْرِيوْ نّغْنِي ن خمْسَا ن إِغَادْجنْ إِتَّاكّْوَاضْ أَفْرِيوْ ن ؤُكِيرُوبْ نّغْنِي.
12 أَفْرِيوْ ن ؤُكِيرُوبْ نّغْنِي إِعبَّارْ ؤُڒَا ذ خمْسَا ن إِغَادْجنْ، إِتَّاكّْوَاضْ ڒْْحِيضْ ن ثَادَّارْثْ. أَفْرِيوْ نّغْنِي ن خمْسَا ن إِغَادْجنْ إِڒقّفْ أَفْرِيوْ ن ؤُكِيرُوبْ نّغْنِي.
13 أَفْرِيونْ ن إِكِيرُوبنْ-أَ تّْوَابزّْعنْ عِيشْرِينْ ن إِغَادْجنْ ؤُ نِيثْنِي بدّنْ خْ إِضَارنْ نْسنْ ذ إِغمْبَابْ نْسنْ سّوْضنْ غَارْ ذَاخڒْ.
14 نتَّا إِڭَّا ؤُڒَا ذ أَڒحَّافْ س ڒقْطنْ أَذحْمِي ذ أَرْجُووَانِي ذ أَزڭّْوَاغْ إِحذْقنْ ؤُ سْ ڒقْطنْ أَزْذَاذْ، ؤُشَا إِڭَّا خَاسْ إِكِيرُوبنْ.
15 غَارْ زَّاثْ ن ثَادَّارْثْ إِڭَّا نتَّا ثْنَاينْ ن إِپِيلَارنْ س إِشْثْ ن ثُوزُوڭَّارْثْ ن خمْسَا ؤُ-ثْڒَاثِينْ ن إِغَادْجنْ. تَّاجّْ خْ ثْقِيشَّاثْ نّسْ ثُوغَا-ث خمْسَا ن إِغَادْجنْ.
16 نتَّا إِڭَّا ؤُڒَا ذ سّْنَاسڒْ إِزوّْقنْ أَمْ ثِينِّي ذڭْ وخَّامْ ن ذَاخڒْ ن زَّاوشْثْ ؤُشَا إِڭَّا إِ-ثنْثْ خْ ثْقِيشَّاثِينْ ن إِپِيلَارنْ. إِڭَّا ؤُڒَا ذ مْيَا ن إِرمَّامنْ ؤُشَا إِشدّْ إِ-ثنْ غَارْ سّْنَاسڒْ إِزوّْقنْ.
17 نتَّا إِسّْبدّْ إِپِيلَارنْ غَارْ زَّاثْ ن زَّاوشْثْ ثَامقّْرَانْثْ، إِجّنْ خْ يفُوسْ ؤُ إِجّنْ خْ ؤُزڒْمَاضْ. ونِّي غَارْ يفُوسْ إِڭَّا أَسْ يَاخِينْ ؤُ ونِّي خْ ؤُزڒْمَاضْ إِڭَّا أَسْ بُوعَازْ.