14
أَقْبَاڒْ ن وَايَاوْيَا
1 وِي إِضعْفنْ ذِي لْ-إِيمَانْ، وْشمْ أَسْ أَفُوسْ، وَارْ تّمْسبْضَامْ ذڭْ إِخَارِّيصنْ نْومْ جَارْ أَومْ.
2 أَقَا ذِينْ حذْ يُومنْ إِزمَّارْ أَذْ إِشّْ كُوڒْشِي، مَاشَا ونِّي إِضعْفنْ أَذْ إِشّْ ثِيبِّي وَاهَا.
3 ونِّي إِتّتّنْ، وَارْ إِسّحْقَارِي ونِّي وَارْ إِتّتّنْ، ذ ونِّي وَارْ إِتّتّنْ، وَارْ إِحكّمْ خْ ونِّي إِتّتّنْ، مِينْزِي أَربِّي إِقْبڒْ إِ-ث.
4 مِينْ ثعْنِيذْ شكْ ونِّي إِحكّْمنْ خْ ؤُمْسخَّارْ ن ونّغْنِي؟ مِينْزِي مَاڒَا إِبدّْ، ذ مَانْ أَيَا إِ بَابْ نّسْ، ؤُ مَاڒَا إِوْضَا، ذ مَانْ أَيَا إِ بَابْ نّسْ. سِيذسْ إِزمَّارْ أَذْ ث إِسّْبدّْ ذ أَبذِّي.
5 أَقَا ذِينْ حذْ إِتّْغِيڒْ أَسْ أَقَا ذِينْ أَسّْ سنّجْ إِ وَاسّْ نّغْنِي، ؤُ ونّغْنِي إِتّْغِيڒْ أَسْ أَقَا كُوڒْ أَسّْ كِيفْكِيفْ. أجّْ كُوڒْ إِجّنْ أَذْ إِقْنعْ ذِي ڒْْبَاڒْ نّسْ نِيشَانْ.
6 ونِّي إِوقَّارنْ إِجّْ ن وَاسّْ، إِ سِيذسْ إِ ث غَا إِوقَّارْ. ونِّي وَارْ إِوقَّارنْ أَسّْ، إِ سِيذسْ إِ وَارْ ث إِوقَّارْ. ونِّي إِتّتّنْ، إِتّتّْ إِ سِيذسْ، مِينْزِي أَذْ إِشكَّارْ أَربِّي. ونِّي وَارْ إِتّتّنْ شَا، إِ سِيذسْ وَارْ إِتّتّْ شَا ؤُشَا نتَّا أَذْ إِشكَّارْ أَربِّي عَاوذْ.
7 مِينْزِي ؤُڒَا ذ إِجّْ زَّايْنغْ أَقَا إِدَّارْ إِ يِيخفْ نّسْ، ؤُشَا ؤُڒَا ذ إِجّنْ إِمُّوثْ إِ يِيخفْ نّسْ.
8 مِينْزِي مَاڒَا ندَّارْ، أَذْ ندَّارْ إِ سِيذِيثْنغْ، نِيغْ مَاڒَا نمُّوثْ أَذْ نمّثْ إِ سِيذِيثْنغْ. س ؤُيَا، مَا ندَّارْ نِيغْ نمُّوثْ، أَقَا نشِّينْ إِ سِيذِيثْنغْ.
9 مِينْزِي إِ ؤُيَا إِ إِمُّوثْ لْمَاسِيحْ، ؤُشَا إِذْوڒْ إِدَّارْ عَاوذْ ؤُشَا إِكَّارْ-د، حِيمَا أَذْ يِيڒِي ذ سِيذِي إِ يِينِّي إِمُّوثنْ ؤُڒَا إِ يِينِّي إِدَّارنْ.
10 مَاشَا شكْ، مَايمِّي غَا ثْحكْمذْ خْ ؤُمَاشْ؟ نِيغْ مَايمِّي عَاوذْ شكْ ثسّحْقَارَاذْ ؤُمَاشْ؟ مِينْزِي نشِّينْ مَارَّا أَذْ نْبدّْ قِيبَاتْشْ إِ ڒْْكُورْسِي ن شّْرعْ ن لْمَاسِيحْ.
11 أَمْ مَامّشْ ثُورَا:
”س ثِيذتّْ، أَمْ دَّارغْ نشّْ، إِقَّارْ سِيذِي،
أَذْ أَيِي أَضَارنْ مَارَّا إِفَادّنْ
ؤُ كُوڒْ إِڒسْ أَذْ خَافِي إِشْهذْ.“
12 خنِّي أجّْ كُوڒْ إِجّنْ زَّايْنغْ أَذْ إِڭّْ ڒحْسَابْ خْ يِيخفْ نّسْ قِيبَاتْشْ إِ أَربِّي.
13 زِي ڒخُّو ذ ثْسَاونْثْ وَارْ حكّْممْ إِجّنْ خْ ونّغْنِي، مَاشَا حْسنْ أَذْ ثكْسذْ أَوَاڒْ مَاحنْذْ وَارْ ثسَّارْسذْ شَا إِجّْ ن وژْرُو مَاحنْذْ أَذْ ذَايسْ إِنْقَارْضْ ؤُمَاشْ.
14 مِينْزِي نشّْ سّْنغْ، أَقَا تّْوَاسّْقنْعغْ ذِي سِيذِي يَاسُوع، بلِّي ؤُڒَا ذ إِشْثْ ن ڒْْحَاجّثْ ثخْمجْ إِ نتَّا، مْغِيرْ إِ ونِّي ت إِحسْبنْ ذ ڒخْمجْ، أَقَا إِ نتَّا وَاهَا ؤُمِي ثخْمجْ.
15 مَاڒَا إِخيّقْ ؤُمَاشْ خْ سِّيبّثْ ن مَاشَّا إِ ثشِّيذْ، أَقَا شكْ وَارْ ثُويُورذْ ذِي ثَايْرِي. وَارْ تّحِّي شَا س مَاشَّا نّشْ ونِّي إِ خفْ إِمُّوثْ لْمَاسِيحْ.
16 مِينْ نْحسّبْ ذ ڒْْخَارْ إِ نشِّينْ، وَارْ تّجِّي حذْ أَذْ خَاسْ إِسِّيوڒْ س ڒْْغَارْ.
17 مِينْزِي ثَاڭلْذِيثْ ن أَربِّي وَارْ ثدْجِي ذِي مَاشَّا ذ ثِيسِّيثْ، مَاشَا ذِي ثْسڭْذَا ذ ڒهْنَا ذ ڒفْرَاحثْ س أَرُّوحْ إِقدّْسنْ.
18 مِينْزِي ونِّي إِسخَّارنْ إِ لْمَاسِيحْ ذِي مَانْ أَيَا، أَقَا يَارْضَا أَربِّي ؤُشَا نتَّا ذ أَمقْبُوڒْ غَارْ إِوْذَانْ.
19 أَذْ نضْفَارْ خنِّي مِينْ إِدْجَانْ إِ ڒهْنَا ذ ڒبْنِي ن إِجّنْ إِ ونّغْنِي.
20 وَارْ تَّاردّدْجْ شَا ڒْْخذْمثْ ن أَربِّي خْ سِّيبّثْ ن مَاشَّا. مَارَّا ثِيمسْڒَايِينْ أَقَا أَثنْثْ ذ ثِيمزْذَاڭْ، مَاشَا ؤُشْثْ خْ بْنَاذمْ ونِّي إِ غَا إِڭّْ أَژْرُو إِ ؤُنذْرفْ س مَاشَّا نّسْ.
21 مْلِيحْ ؤُمِي وَارْ نتّتّْ شَا أَيْسُومْ ؤُ وَارْ نْسسّْ شَا بِينُو نِيغْ وَارْ نتّڭّْ ؤُڒَا ذ إِشْثْ ن ڒْْحَاجّثْ إِ ذِي إِ غَا إِنْذرْفْ ؤُمَاشْ.
22 مَا ثتّْوَاسّْقنْعذْ إِ يِيخفْ نّشْ؟ أَذْ أَشْ يِيڒِي مَانْ أَيَا إِ يِيخفْ نّشْ زَّاثْ إِ أَربِّي. سّعْذْ ن ونِّي وَارْ إِتِّيكّْوِيضْ شّْرعْ خْ يِيخفْ نّسْ ذِي مِينْ ذ أَسْ إِتّْغِيڒْ مْلِيحْ.
23 مَاشَا ونِّي إِتّْشكَّانْ خْمِي إِتّتّْ، إِتّْوَاحَاسبْ، مِينْزِي مَانْ أَيَا وَارْ إِدْجِي زِي لْ-إِيمَانْ. قَاعْ مِينْ وَارْ إِدْجِينْ زِي لْ-إِيمَانْ، أَقَا-ث ذ دّنْبْ.