7
ڒْوَاعْذْ زِي جِّيهثْ ن زَّاوشْثْ ثَامقّْرَانْثْ إِ غَا ثتّْوَابْنَا زِي سُولِيمَانْ
1 ؤُمِي إِقِّيمْ ؤُجدْجِيذْ ذِي ثَادَّارْثْ نّسْ ؤُ سِيذِي ثُوغَا إِڭَّا أَسْ ڒهْنَا زِي مَارَّا ڒْْعذْيَانْ نّسْ إِ ذ أَسْ د-إِنّْضنْ، إِمْسَارْ،
2 أَقَا إِنَّا ؤُجدْجِيذْ إِ ؤُنَابِي نَاثَانْ: ”خْزَارْ، نشّْ زدّْغغْ ذڭْ إِشْثْ ن ثَادَّارْثْ ن ؤُكشُّوضْ ن ثْشجَّارْثْ ن ثنْڭلْثْ، مَاشَا تَّابُوثْ ن أَربِّي ثْڒحّفْ سَاذُو ثَاجَارْثِيڒْثْ ن ؤُقِيضُونْ.“
3 نَاثَانْ إِنَّا إِ ؤُجدْجِيذْ: ”ؤُيُورْ وَاهَا، أڭّْ مَارَّا مِينْ غَاركْ ذڭْ وُوڒْ نّشْ، مَاغَارْ سِيذِي أَكِيذكْ.“
4 ذِي دْجِيڒثْ نِّي إِمْسَارْ أَقَا إِفّغْ وَاوَاڒْ ن سِيذِي غَارْ نَاثَانْ، إِنَّا:
5 ”ؤُيُورْ، إِنِي إِ ؤُمْسخَّارْ إِنُو، إِ ذَاوُوذْ: ’أَمُّو إِ إِقَّارْ سِيذِي: مَا ثخْسذْ أَذْ أَيِي ثبْنِيذْ إِشْثْ ن ثَادَّارْثْ، مَاحنْذْ أَذْ ذَايسْ زذْغغْ؟
6 عمَّارْصْ وَارْ زْذِيغغْ ذڭْ إِشْثْ ن ثَادَّارْثْ زڭْ وَاسّْ ؤُمِي د-سّْڭعّْذغْ أَيْثْ ن إِسْرَائِيل زِي مِيصْرَا أَڒْ أَسّْ-أَ، مَاشَا ذُورّْيغْ ذڭْ إِجّْ ن ؤُقِيضُونْ، ذڭْ إِشْثْ ن ثْزذِّيغْثْ.
7 مَانِي مَا ؤُيُورغْ أَكْ-ذ أَيْثْ ن إِسْرَائِيل، مَا نشّْ سِّيوْڒغْعمَّارْصْ ؤُڒَا س يِيجّْ ن وَاوَاڒْ إِ يِيشْثْ زِي ثْقبَّاڒْ ن إِسْرَائِيل ثِينِّي إِ ؤُمُورغْ أَذْ أَرْوسنْ ڒْْڭنْسْ إِنُو إِسْرَائِيل، ؤُ نِّيغْ: مَايمِّي وَارْ ذ أَيِي ثبْنِيمْ إِشْثْ ن ثَادَّارْثْ ن ؤُكشُّوضْ ن ثْشجَّارْثْ ن ثنْڭلْثْ؟
8 خنِّي ڒخُّو، أَمُّو إِ إِتّْخصَّا أَذْ ثِينِيذْ إِ ؤُمْسخَّارْ إِنُو، إِ ذَاوُوذْ: أَمُّو إِ إِقَّارْ سِيذِي ن ڒْْعسْكَارَاثْ: نشّْ إِوْيغْ-د شكْ زِي ڒْْكُورِي، زِي ضفَّارْ ن وُودْجِي، مَاحنْذْ أَذْ ثِيڒِيذْ ذ ڒْْحَاكمْ خْ ڒْْڭنْسْ إِنُو، خْ إِسْرَائِيل.
9 مَانِي مَا ثُويُورذْ، دْجِيغْ نشّْ أَكِيذكْ ؤُ قْضِيغْ خْ مَارَّا ڒْْعذْيَانْ نّشْ زَّاثْ إِ وُوذمْ نّشْ. نشّْ ڭِّيغْ أَشْ إِجّْ ن إِسمْ ذ أَمقّْرَانْ أَمْ يِيسْمَاونْ ن إِمقّْرَاننْ نِّي إِدْجَانْ خْ ثمُّورْثْ.
10 نشّْ نيّْشغْ إِجّْ ن ومْشَانْ إِ ڒْْڭنْسْ إِنُو، إِ إِسْرَائِيل، ؤُشَا ژُّوغْ ث ذِينْ، مَاحنْذْ أَذْ إِزْذغْ ذڭْ ومْشَانْ نّسْ، وَارْ إِتّْوَانْهزِّي عَاذْ ؤُ وَارْ ث حصَّارنْ عَاذْ أَيْثْ ن ڒْْمُوعْصِييّثْ أَمْ ذڭْ ؤُمزْوَارُو،
11 زڭْ وَاسّْ نِّي ڭِّيغْ نشّْ ڒْْقُوضَاثْ خْ ڒْْڭنْسْ إِنُو إِسْرَائِيل. نشّْ وْشِيغْ أَشْ ڒهْنَا زِي مَارَّا ڒْْعذْيَانْ نّشْ ؤُشَا ڒخُّو أَذْ أَشْ إِسّْشنْ سِيذِي، أَقَا سِيذِي أَذْ أَشْ إِڭّْ إِشْثْ ن ثَادَّارْثْ.
12 ڒَْامِي تّْوَاكمّْڒنْ وُوسَّانْ نّشْ ؤُشَا أَذْ ثڭّذْ أَذْ ثَاريّْحذْ جَارْ ڒجْذُوذْ نّشْ، أَذْ د-سّكَّارغْ زَّارِيعثْ نّشْ إِ د-إِتّفّْغنْ زِي ذَاخڒْ نّشْ ؤُ نشّْ أَذْ سّْمثْنغْ ثَاڭلْذَا نّسْ.
13 نتَّا أَذْ إِبْنَا إِشْثْ ن ثَادَّارْثْ إِ يِيسمْ إِنُو ؤُ نشّْ أَذْ سّْمثْنغْ ڒْْعَارْشْ ن ثَاڭلْذَا نّسْ إِ ڒبْذَا.
14 نشّْ أَذْ إِڒِيغْ ذ بَابَاسْ إِ نتَّا ؤُ نتَّا أَذْ يِيڒِي إِ نشّْ ذ مِّي. مَاڒَا نتَّا إِفَّارْيضْ، أَذْ ث أَربِّيغْ س وعْمُوذْ ذ ثيِّيثَا ن ثَارْوَا ن بْنَاذمْ.
15 ثَامخْسِيوْثْ إِنُو إِشوَّارنْ وَارْ زَّايسْ ثتّْخنّسْ أَمْ مَامّشْ تّسّْخنْسغْ ت خْ شَاوُولْ إِ خْ ت كّْسغْ زَّاثْ إِ ثِيطَّاوِينْ نّشْ.
16 ثَادَّارْثْ نّشْ ذ ثْڭلْذَا نّشْ أَذْ تّْوَاسّْمثْننْثْ زَّاثْ إِ وُوذمْ نّشْ إِ ڒبْذَا، ڒْْعَارْشْ نّشْ أَذْ إِقِّيمْ إِبدّْ إِ ڒبْذَا.‘ “
17 نَاثَانْ إِسِّيوڒْ غَارْ ذَاوُوذْ نِيشَانْ عْلَاحْسَابْ أَوَاڒنْ-أَ ؤُ عْلَاحْسَابْ مَارَّا ڒوْحِييْ-أَ.
18 خنِّي يُوذفْ ؤُجدْجِيذْ ذَاوُوذْ ؤُشَا إِقِّيمْ زَّاثْ إِ وُوذمْ ن سِيذِي، إِنَّا: ”مِينْ عْنِيغْ نشّْ، سِيذِي إِنُو، سِيذِي، ؤُ مِينْ ثعْنَا ثَادَّارْثْ إِنُو أَقَا شكْ ثْنذْهذْ أَيِي-د أَڒْ ذَانِيثَا؟
19 ذِي ثِيطَّاوِينْ نّشْ ذ مَانْ أَيَا مَارَّا عَاذْ ذْرُوسْ، أَ سِيذِي إِنُو سِيذِي، مَاشَا ڒخُّو ثسِّيوْڒذْ عَاذْ خْ ثَادَّارْثْ ن ؤُمْسخَّارْ نّشْ ذڭْ وُوسَّانْ إِڭّْوجنْ إِ د إِتَّاسنْ. ذ مَانْ أَيَا ذ ثَاغُورِي ذ ثِيذتّْ إِ بْنَاذمْ، أَ سِيذِي إِنُو، سِيذِي!
20 مِينْ ذ أَشْ إِ غَا يِينِي ذَاوُوذْ عَاذْ كْثَارْ؟ شكْ ثسّْنذْ أَمْسخَّارْ نّشْ، أَ سِيذِي إِنُو، سِيذِي!
21 ذِي طّْوعْ ن وَاوَاڒْ نّشْ ؤُ عْلَاحْسَابْ ؤُڒْ نّشْ أَقَا ثڭِّيذْ مَارَّا بْلَانُو إِمْغَارنْ وَانِيثَا، حِيمَا أَذْ ثسَّارْڭْبذْ أَمْسخَّارْ نّشْ.
22 خْ ؤُيَا شكْ ذ أَمقّْرَانْ، أَ سِيذِي إِنُو سِيذِي، مَاغَارْ وَارْ ذِينْ إِدْجِي ؤُڒَا ذ إِجّْ أَمْ شكْ ؤُ وَارْ ذِينْ إِدْجِي ؤُڒَا ذ إِجّْ ن أَربِّي مْغِيرْ شكْ عْلَاحْسَابْ مَارَّا مِينْ نسْڒَا س إِمزُّوغنْ نّغْ.
23 مَانْ ونْ إِ إِدْجَانْ أَمْ ڒْْڭنْسْ نّشْ، أَمْ إِسْرَائِيل، أَينِّي ن ڒْْڭنْسْ خْ ثمُّورْثْ إِ غَارْ إِرَاحْ أَربِّي حِيمَا أَذْ ث إِفْذِي إِ يِيخفْ نّسْ ذ ڒْْڭنْسْ، ؤُ حِيمَا أَذْ إِڭّْ إِ يِيخفْ نّسْ إِجّْ ن يِيسمْ، ؤُ حِيمَا أَذْ أَومْ إِڭّْ إِشْثْ ن ڒْْخذْمثْ ذ ثَامقّْرَانْثْ ؤُڒَا ذ ثْمڭَّا ذ ثِيمقّْرَانِينْ إِ ثمُّورْثْ نّشْ زَّاثْ إِ وُوذمْ ن ڒْْڭنْسْ نّشْ نِّي ثفْذِيذْ إِ يِيخفْ نّشْ زِي مِيصْرَا، زِي ڒڭْنُوسْ ؤُ زڭْ إِربِّيثنْ نْسنْ.
24 شكْ ثڭِّيذْ ڒْْڭنْسْ نّشْ إِسْرَائِيل ذ إِجّْ ن ڒْْڭنْسْ إِ يِيخفْ نّشْ إِ ڒبْذَا. شكْ، أَ سِيذِي، أَقَا شكْ ثْذوْڒذْ ذ أَربِّي إِ نِيثْنِي.
25 خنِّي ڒخُّو، سِيذِي أَربِّي، أجّْ أَوَاڒْ نِّي ثسِّيوْڒذْ خْ ؤُمْسخَّارْ نّشْ ؤُ خْ ثَادَّارْثْ نّسْ أَذْ إِبدّْ إِ ڒبْذَا ؤُ أڭّْ أَمْ مَامّشْ ثسِّيوْڒذْ.
26 أجّْ إِسمْ نّشْ أَذْ إِتّْوَاسّمْغَارْ إِ ڒبْذَا، أَذْ إِنِينْ: ’سِيذِي ن ڒْْعسْكَارَاثْ إِجهْذنْ أَقَا-ث ذ أَربِّي خْ إِسْرَائِيل!‘، ؤُشَا إِڒِي أَذْ ثتّْوَاسّمْثنْ ثَادَّارْثْ ن ؤُمْسخَّارْ نّشْ ذَاوُوذْ زَّاثْ إِ وُوذمْ نّشْ.
27 مَاغَارْ شكْ، أَ سِيذِي ن ڒْْعسْكَارَاثْ، أَربِّي ن إِسْرَائِيل، أَقَا ثسَّارْڭْبذْ ذڭْ إِمزُّوغنْ ن ؤُمْسخَّارْ نّشْ، ثنِّيذْ: ’نشّْ أَذْ أَشْ سّْبدّغْ إِشْثْ ن ثَادَّارْثْ!‘ خْ ؤُيَا ثُوسَا-د ذڭْ وُوڒْ ن ؤُمْسخَّارْ نّشْ مَاحنْذْ أَذْ إِژَّادْجْ ثَاژَادْجِيثْ-أَ غَاركْ.
28 خنِّي ڒخُّو، أَ سِيذِي إِنُو، سِيذِي، شكْ ذ أَربِّي نِّي ؤُشَا أَوَاڒنْ نّشْ ذ ثِيذتّْ ؤُ شكْ ثسِّيوْڒذْ س مَارَّا ثْشُونِي-يَا غَارْ ؤُمْسخَّارْ نّشْ.
29 خنِّي ڒخُّو، مَاڒَا ثُوسَا أَشْ-د خْ ڒْْخَاضَارْ، بَاركْ ثَادَّارْثْ ن ؤُمْسخَّارْ نّشْ، حِيمَا أَذْ ثِيڒِي زَّاثْ إِ وُوذمْ نّشْ إِ ڒبْذَا، مِينْزِي شكْ، أَ سِيذِي إِنُو، سِيذِي، ثسِّيوْڒذْ أَيَا ؤُ س لْبَارَاكَا نّشْ أَذْ ثتّْوَابَاركْ ثَادَّارْثْ ن ؤُمْسخَّارْ نّشْ إِ ڒبْذَا.‘ “