6
ثَانڭَّارُوثْ ن إِزْڒِي ن ثسْڒِيثْ
1 ”مَانِي يُويُورْ لِّيفْ نّمْ،
أَ شمْ إِشْنَانْ قَاعْ خْ ثمْغَارِينْ؟
مَانِي يَارَّا س ؤُزدْجِيفْ لِّيفْ نّمْ؟
نشِّينْ نخْسْ أَذْ خَاسْ نَارْزُو أَكِيذمْ!“
2 ”لِّيفْ إِنُو إِهْوَا غَارْ ؤُحْوِيشْ نّسْ،
غَارْ ثْبُوذَا س ڒعْطُورْ،
حِيمَا أَذْ يَارْوسْ ذڭْ إِحْوِيشنْ،
حِيمَا أَذْ إِسّْمُونْ ثِيلِيلِّيشِينْ.
3 نشّْ زڭْ لِّيفْ إِنُو،
ؤُ لِّيفْ إِنُو أَقَا-ث إِنُو،
نتَّا ذ ونِّي يَاركّْوْسنْ جَارْ ثْلِيلِّيشِينْ.“
أَسْڒِي إِغنّجْ خْ وژْرِي ن ثسْڒِيثْ
4 ”شمْ ثْصبْحذْ، أَ ثَامدُّوكّتْشْ إِنُو،
أَمشْنَاوْ ثِيرْصَا،
ثشْنِيذْ أَمْ ؤُرْشَالِيمْ،
ثسَّاڭّْوَاذذْ أَمْ يِيسذِّييّنْ ن ڒْْعسْكَارْ
س إِبَانْذُوثنْ نْسنْ.
5 كّسْ ثِيطَّاوِينْ زَّايِي،
مَاغَارْ نِيثنْثِيغضْڒنْثْ أَيِي إِفَادّنْ أَطَّاسْ.
أَشُوَّافْ نّمْ أَمْ ثْحِيمَارْثْ ن إِغَايْضنْ
إِ د-إِهكّْوَانْ زڭْ إِذُورَارْ ن جِيلْعَاذْ.
6 ثِيغْمَاسْ نّمْ ڭِّينْثْ أَمْ ثْحِيمَارْثْ ن وُودْجِي،
إِ د-إِتّْڭعَّاذنْ زڭْ ومْشَانْ ن ؤُصبّنْ.
مَارَّا ثِيخسْوِينْ ؤُرْونْثْ ثَاشْنِيوْثْ،
وَارْ ثقِّيمْ إِشْثْ نْبْڒَا إِحنْجِيرنْ.
7 لْحنْكَاثْ نّمْ أَمْ ثْرمَّانْثْ إِبْضَانْ
أَوَارْنِي إِ لّْثَامْ نّمْ.
8 أَقَا ذِينْ ستِّينْ ن ثْجدْجِيذِينْ
ذ ثْمنْيِينْ ن ثِييَّا،
ؤُڒَا ذ ثِيعْزَارِييِّينْ بْڒَا ڒحْسَابْ.
9 وحّْذسْ نتَّاثْ، ثَاذْبِيرْثْ إِنُو،
ثنِّي إِكمّْڒنْ إِنُو،
أَينِّي ن يسِّيسْ ن يمَّاسْ،
نتَّاثْ ذ ثنِّي إِفَارْزنْ
غَارْ ثنِّي إِ ذ أَسْ د-يُورْونْ.
مَاڒَا زْڒِينْثْ ت ثْيسِّيثْ، أَذْ ت سّْعُودْجَانْثْ،
ثِيجدْجِيذِينْ ذ ثِييَّا أَذْ ت سّمْغَارنْثْ.“
10 ”مِينْ ثعْنَا ثنِّي د-إِسِّيجّنْ
أَمْ ثْفَاوْثْ ن ڒفْجَارْ،
ثشْنَا أَمْ ثْزِيرِي إِقفْڒنْ،
ثصْفَا أَمْ ثْفُوشْثْ يَارقّنْ،
ثسَّاڭّْوَاذْ أَمْ يِيسذِّييّنْ ن ڒْْعسْكَارْ
س إِبَانْذُوثنْ؟“
ثْسضْحِي ثسْڒِيثْ
11 ”نشّْ حْوِيغْ غَارْ ثحْوِيشْثْ
ن ثْشجِّيرَا ن ثغْيَاشْثْ
حِيمَا أَذْ ژَترغْ
أَغمُّويْ إِبدّنْ ذِي ثغْزُورْثْ،
حِيمَا أَذْ ژَترغْ مَا ثَازَايَارْثْ ثسُّوفّغْ-د،
مَا ثِيشجِّيرَا ن أَرمَّانْ تّْنوَّارنْثْ.
12 ثُوغَا وَارْ د-أَرِّيغْ ثَايْنِيثْ
أَقَا ڭِّيغْ إِخفْ إِنُو
ذڭْ إِكَارُّوثنْ ن ڒْْڭنْسْ إِنُو إِڭلّْذنْ.“