5
خْ ؤُذبَّارْ ن ثْمسْمُونْثْ
1 وَارْ ثِيڒِيذْ ثوْعَارذْ إِ ؤُوسَّارْ، مَاشَا نسْحْ إِ-ث أَمْ بَابَاشْ، ؤُشَا إِبْڒِيغنْ أَمْ وَاوْمَاثنْ نّشْ،
2 ثِيوسُّورَا أَمْ ثِييمَّاثِينْ، ؤُشَا ثِيعزْرِييِّينْ أَمْ سُويثْمَاشْ نّشْ، س مَارَّا ڒصْفَايثْ.
3 وقَّارْ ثِيجَّاڒْ، ثِينِّي ذ ثِيذتّْ دْجَانْثْ ذ ثِيجَّاڒْ.
4 مَاڒَا شَا ن ثَاجَّاتْشْ غَارسْ إِحنْجِيرنْ نِيغْ أَيَّاونْ، أجّْ إِ-ثنْ أَذْ ڒمْذنْ ذ أَمزْوَارْ مَاحنْذْ أَذْ ڭّنْ مِينْ إِتّْڒِيقنْ ذِي طّْوعْ ن ڒَْادْجْ نْسنْ، أَذْ د-أَرّنْ إِ لْوَالِيذِينْ مِينْ تُّورْسنْ، مِينْزِي دّڭَّا يُوسَا-د خْ ڒْْخَاضَارْ ن أَربِّي.
5 مَاشَا ثَاجَّاتْشْ نِيشَانْ ذ ثنِّي إِدْجَانْ وحّْذسْ، ثسِّيثِيمْ ذِي أَربِّي ؤُشَا ثْصبَّارْ ذِي ثُوثْرَا ذ ثْژَادْجِيثِينْ، دْجِيڒثْ ذ وَاسّْ.
6 مَاشَا ثنِّي إِوْضَانْ ذِي ثُوذَارْثْ ن نّشْوثْ، أَقَا ثمُّوثْ وَاخَّا ثدَّارْ.
7 وصَّا إِ-ثنْثْ ثِيمسْڒَايِينْ-أَ، حِيمَا أَذْ إِڒِينْثْ بْڒَا ڒْْعِيبْ.
8 مِينْزِي مَاڒَا شَا ن يِيجّْ وَارْ إِتّْهِيلِّي شَا ذِي وِي إِدْجَانْ نّسْ، ذ أَموَارُو ذڭْ يِينِّي إِدْجَانْ ذ أَيْثْبَابْ ن ثَادَّارْثْ ن فَامِيلْيَا ن يِينِّي يُومْننْ، أَقَا وَانِيثَا إِمّنْضَارْ لْ-إِيمَانْ ؤُشَا نتَّا مَاهُو خْ يِينِّي وَارْ يُومِيننْ شَا.
9 إِخْضَارْ خنِّي إِشْثْ ن ثَاجَّاتْشْ إِلَّا مَاڒَا غَارسْ زِي ستِّينْ ن إِسڭّْوُوسَا أَڒْ ثْسَاونْثْ، إِشْثْ ن ثَاجَّاتْشْ نِّي ثُوغَا ذ ثَامْغَارْثْ ن إِجّْ ن ورْيَازْ،
10 ثنِّي غَارْ ثدْجَا شّْهَاذثْ أَقَا ثڭَّا ڒخْذَايمْ ثِيصبْحَانِينْ: نِيغْ ثسّيْمِي إِحنْجِيرنْ نّسْ، نِيغْ ثَارحّبْ س إِبَارَّانِييّنْ، نِيغْ ثسِّيرذْ إِضَارنْ ن إِمْقدَّاسنْ، نِيغْ ثوْشَا فُوسْ إِ يِينِّي إِتّْوَاحْصَارنْ، وَاهْ، أَقَا ثڭَّا مَارَّا ڒْْخذْمثْ ثَاصبْحَانْثْ.
11 مَاشَا وَارْ قبّڒْ ثِيجَّاڒْ ثِيمژْيَانِينْ، مِينْزِي نِيثنْثِي تّخْسنْثْ أَذْ سَّارْخُونْثْ إِ لْمَاسِيحْ س نّشْوَاثْ نْسنْثْ، أَرزُّونْثْ خْ إِجّْ ن ورْيَازْ.
12 أَقَا شّْرعْ نْسنْثْ إِمْثنْ، مِينْزِي سَّارْسنْثْ لْ-إِيمَانْ نْسنْثْ أَمزْوَارْ غَارْ ؤُغزْذِيسْ.
13 مَاغَارْ نِيثنْثِي سّْڒمْذنْثْ إِنّغْنِي ڒعْقزْ أَمْ ڭُّورنْثْ خْ ثُوذْرِينْ، وَارْ إِدْجِي سّْڒمْذنْثْ وَاهَا ڒعْڭزْ، مَاشَا نِيثنْثِي تّْعَاوَاذنْثْ ڒخْبُورَاثْ، تَّاذْفنْثْ ذِي شْغُوڒَاثْ ن مِيدّنْ، قَّارنْثْ مِينْ وَارْ إِشُووَّارنْ.
14 س ؤُينِّي خْسغْ أَذْ مڒْشنْثْ ثِيجَّاڒْ ثِيمژْيَانِينْ، أَذْ د-جّنْثْ إِحنْجِيرنْ، أَذْ سُّويُورنْثْ ثَادَّارْثْ نْسنْ، وَارْ تّجِّينْثْ شَا إِ ڒعْذُو سِّيبّثْ حِيمَا أَذْ إِشقّفْ.
15 مِينْزِي أَقَا شَا زَّايْسنْثْ بْذَانْثْ أَذْ فّْغنْثْ أَبْرِيذْ، ضفَّارنْثْ شِّيطَانْ.
16 مَاڒَا ذِينْ إِرْيَازنْ نِيغْ ثِيمْغَارِينْ يُومْننْ غَارْسنْ ثِيجَّاڒْ، أجّْ إِ-ثنْ أَذْ ذَايْسنْثْ ثْهِيلَّانْ، مَاحنْذْ وَارْ إِتِّيڒِي دّْقڒْ عَاذْ خْ ثْمسْمُونْثْ، حِيمَا ثَامسْمُونْثْ أَذْ غَارسْ يِيڒِي مَاحنْذْ أَذْ ثْعَاونْ ثِينِّي إِدْجَانْ ذ ثِيجَّاڒْ س ثِيذتّْ.
إِمْغَارنْ ن ثْمسْمُونْثْ
17 إِمْغَارنْ نِّي إِتّْضبَّارَانْ مْلِيحْ، سْذَاهْدْجنْ أَوقَّارْ ثْنَاينْ ن إِمُورنْ، أَبعْذَا إِنِّي إِخدّْمنْ ذڭْ وَاوَاڒْ ؤُ ذڭْ ؤُسڒْمذْ.
18 مِينْزِي ثِيرَا إِقدّْسنْ قَّارنْثْ: ”وَارْ تّڭّْ ثَاشْمَانْثْ إِ ؤُينْذُوزْ إِسَّارْوَاثنْ!“، ؤُ: ”أَخدَّامْ إِسْذَاهدْجْ ڒْْمُونثْ نّسْ!“
19 وَارْ قبّڒْ شَا ثَانْفُوتْشْ ضِيدّْ إِ ؤُمْغَارْ، مْغِيرْ خْ ؤُقمُّومْ ن ثْنَاينْ نِيغْ ن ثْڒَاثَا ن ڒشْهُوذْ.
20 إِنِّي إِخْضَانْ،عيّبْ إِ-ثنْ زَّاثْ إِ مَارَّا، حِيمَا إِنّغْنِي أَذْ ڭّْوذنْ عَاوذْ.
21 زِييَّارغْ خَاكْ زَّاثْ إِ أَربِّي ذ سِيذِيثْنغْ يَاسُوع لْمَاسِيحْ ذ لْمَالَاكَاثْ نّسْ إِتّْوَافَارْزنْ، أَذْ ثحْضِيذْ مَانْ أَيَا بْڒَا ڒْْفَارْزْ، وَارْ تّڭّْ ؤُڒَا ذ إِشْثْ ن ثْمسْڒَاشْثْ عْلَاحْسَابْ ؤُذْمَاونْ.
22 وَارْ سّْرُوسَا إِفَاسّنْ نّشْ خْ حذْ س ؤُقدْجقْ، وَارْ شَارّشْ ذِي دّْنُوبْ ن إِنّغْنِي، حْضَا إِخفْ نّشْ ذِي ڒصْفَايثْ.
23 وَارْ سسّْ أَمَانْ وَاهَا، مَاشَا سُو ذْرُوسْ ن بِينُو إِ سْثُومَاغُو نّشْ ؤُ إِ ڒحْڒَاشْ نّشْ أَزِيرَارْ.
24 أَقَا ذِينْ إِوْذَانْ إِ غَارْ إِدْجَا دّْنُوبْ نْسنْ بَاننْ مْلِيحْ ذغْيَا، أَقَا دّْنُوبْ نْسنْ تِّيزَّارنْ أَسنْ غَارْ شّْرعْ، ؤُشَا أَقَا ذِينْ شَا نّغْنِي ضفَّارنْ ثنْ دّْنُوبْ نْسنْ.
25 أَمُّو د-بَاننْثْ ؤُڒَا ذ ڒخْذَايمْ ثِيصبْحَانِينْ، مَاشَا ؤُڒَا ذ ثِينِّي إِ وَارْ إِدْجِينْ أَمُّو، وَارْ زمَّارنْثْ أَذْ قِّيمنْثْ نُّوفَّارنْثْ.