9
1 ڒْْحُوكْمْ إِسَّاڭّْوَاذنْ ن وَاوَاڒْ ن سِيذِي خْ ثمُّورْثْ ن حَاذْرَاخْ،
ڒْْحُوكْمْ نِّي يَارْسَانْ خْ ذِيمَاشْقْ.
”مَاغَارْ سِيذِي إِحطَّا خْ بْنَاذمْ
ؤُ خْ مَارَّا ثِيقبَّاڒْ ن إِسْرَائِيل،
2 ؤُڒَا خْ حَامَاثْ إِ-ت-د-إِڒسْقنْ،
خْ صُورْ ذ صِيذُونْ،
وَاخَّا نِيثنْثِي ذ ثِيمِيغِيسِينْ أَطَّاسْ.
3 ثبْنَا صُورْ إِجّْ ن لْبَارَاجْ إِ يِيخفْ نّسْ
ؤُ ثيْرُو نُّوقَارْثْ أَمْ ثْعجَّاجْثْ
ذ وُورغْ إِقُّورنْ أَمْ ؤُبدْجَاعْ ن إِمسْرَاقْ.
4 خْزَارْ، سِيذِي إِنُو أَذْ ت إِطّفْ،
أَذْ إِوّثْ لْبَارَاجْ نّسْ غَارْ ڒبْحَارْ،
ؤُشَا أَذْ ت ثشّْ ثْمسِّي.“
5 ”أَشْكلُونْ أَذْ ت ثْژَارْ، أَذْ ثذْوڒْ ثڭّْوذْ،
أَمُّو ؤُڒَا ذ غَازَّا، أَذْ ثَارْجِيجْ أَطَّاسْ،
ؤُڒَا ذ عَاقْرُونْ، مَاغَارْ أَذْ إِفْشڒْ ؤُرَاجِي نّسْ.
أَذْ إِتّْوَاثحَّا ؤُجدْجِيذْ زِي غَازَّا
ؤُ ذِي ثَانْذِينْثْ ن أَشْقَالُونْ
وَارْ ذَايسْ ثْزدّغْ عَاذْ ؤُڒَا ذ إِجّنْ.
6 مِّيسْ ن ڒحْرَامْ أَذْ إِزْذغْ ذِي أَشْذُوذْ
ؤُ نشّْ أَذْ ثحِّيغْ نّْفَاخثْ ن إِفِيلِيسْطِينِييّنْ.
7 نشّْ أَذْ كْسِيغْ إِذَامّنْ زڭْ ؤُقمُّومْ نّسْ
ؤُڒَا ذ نّْعَاوَاثْ زِي جَارْ ثِيغْمَاسْ نّسْ
ؤُ أَمُّو إِ غَا إِقِّيمْ ؤُڒَا ذ نتَّا
إِ أَربِّي نّغْ.
نتَّا أَذْ يِيڒِي أَمْ يِيجّْ ن ومْغَارْ ذِي يَاهُوذَا
ؤُ عَاقْرُونْ أَمْ يِيجّْ ن ؤُيابُوسِي.
8 نشّْ أَذْ ڭّغْ ڒْْمَارْڭحْ إِنُو
ذڭْ ونّضْ ن ثَادَّارْثْ إِنُو،
ضِيدّْ ن ونِّي إِ غَا إِژْوَانْ
ؤُ ضِيدّْ ن ونِّي د غَا إِذوْڒنْ،
حِيمَا ونِّي إِحصَّارنْ
وَارْ خَاسْ إِعدُّو شَا عَاذْ،
مَاغَارْ ڒخُّو ژْڒِيغْ ث س ثِيطَّاوِينْ إِنُو.“
أَجدْجِيذْ إِ د غَا يَاسنْ ن سِيحْيُونْ
9 ”فَارْحْ، أَ يدْجِيسْ ن صِيهْيُونْ،
سْڒِيوْڒوْ، أَ يدْجِيسْ ن ؤُرْشَالِيمْ!
خْزَارْ، أَجدْجِيذْ نّمْ يُوسَا-د غَارمْ،
نتَّا ذ أَمْسڭّذْ
ؤُ أَقَا يَارْضْ أَرُّوضْ ن ؤُسنْجمْ،
نتَّا ذ أَمْوَاضعْ،
إِنْيَا خْ إِجّْ ن وغْيُوڒْ،
خْ إِجّْ ن وزْعُوقْ، أَسْنُوسْ ن إِشْثْ ن ثغْيُوتْشْ.
10 نشّْ أَذْ قْضِيغْ إِكَارُّوثنْ ن ؤُمنْغِي
زِي إِفْرَايِيمْ
ؤُڒَا ذ إِيْسَانْ زِي ؤُرْشَالِيمْ.
أَذْ إِتّْوَاقْڒعْ ؤُڒَا ذ ڒْْقوْسْ ن ؤُمنْغِي.
نتَّا أَذْ إِبَارّحْ س ڒهْنَا إِ رڭْنُوسْ
ؤُ صُّولْطَا نّسْ أَذْ ثِيڒِي
زِي ڒبْحَارْ أَڒْ ڒبْحَارْ،
زڭْ إِغْزَارْ ن لْفُورَاطْ
أَڒْ إِنڭُّورَا ن ثمُّورْثْ.“
11 ”وَاهْ ؤُڒَا ذ شمْ، أَ يدْجِيسْ ن صِيهْيُونْ،
زِي سِّيبّثْ ن إِذَامّنْ ن ڒْْعَاهْذْ نّمْ
فكّغْ-د إِمحْبَاسْ نّمْ
زڭْ وَانُو يُوژْغنْ إِ وَارْ ذِي دْجِينْ وَامَانْ.
12 عقْبمْ غَارْ لْبُورْجْ نْومْ،
كنِّيوْ إِمحْبَاسْ إِنِّي غَارْ إِدْجَا ڒَْايَاسْ.
ؤُڒَا ذ أَسّْ-أَ نشّْ تّْبَارّْحغْ:
أَقَا نشّْ أَذْ غَارمْ د-أَرّغْ
ثْنَاينْ ن ثْسقَّارْ،
13 مَاغَارْ نشّْ أَذْ محْضغْ يَاهُوذَا
أَمْ إِجّْ ن ڒْْقوْسْ
ؤُ أَذْ ڭّغْ إِفْرَايِيمْ خْ ڒْْقوْسْ.
نشّْ أَذْ سّكَّارغْ
إِحنْجِيرنْ نّمْ، أَ صِيهْيُونْ،
ضِيدّْ إِ إِحنْجِيرنْ نّشْ، أَ يَاوَانْ،
ؤُ نشّْ أَذْ شكْ أَرّغْ
أَمْ سِّيفْ ن إِجّْ ن بُو-ثغْرُوضْثْ.“
14 ”سِيذِي أَذْ إِبَانْ سنّجْ نْسنْ
ؤُ فْڒِيثْشَاثْ نّسْ أَذْ إِڒِينْثْ
تّْوسّْڭنْثْ أَمْ وَاسَّامْ
ؤُ سِيذِي إِنُو، سِيذِي،ْ
أَذْ إِسُوضْ ذڭْ ؤُيِيشّْ ن إِشَارِّي،
أَذْ يُويُورْ أَكْ-ذ ثْحَارْيَاضِينْ
ن ؤُسمِّيضْ ن لْجَانُوبْ.
15 سِيذِي ن ڒْْعسْكَارَاثْ أَذْ ثنْ إِسّْذُورِييْ.
نِيثْنِي أَذْ شّنْ،
أَذْ دّْزنْ إِژْرَا ن إِدْجِييْ ؤُشَا أَذْ سْونْ،
أَذْ ڭّنْ دّْرِيزْ أَمْ غَارْ بِينُو
ؤُ أَذْ ذوْڒنْ شُّورنْ
أَمْ طَّاوْيَا ن ؤُرُوشِّي،
أَمْ ثْغمَّارْ ن ؤُعَالْطَارْ.
16 سِيذِي، أَربِّي نْومْ
أَذْ ثنْ إِسّنْجمْ ذڭْ وَاسّْ نِّي
أَمْ وُودْجِي ن ڒْْڭنْسْ نّسْ،
مَاغَارْ نِيثْنِي أَمشْنَاوْ إِژْرَا إِغْڒَانْ
خْ إِجّْ ن تَّاجْ إِڭلّْذنْ
إِتِّيسِّيقنْ خْ ثمُّورْثْ نّسْ.
17 مَاغَارْ مشْهَاڒْ إِمْغَارْ أَذْ يِيڒِي ڒْْخَارْ نّسْ
ؤُ مشْهَاڒْ إِمْغَارْ أَذْ يِيڒِي وَاژْڒِي نّسْ!
إِمنْذِي أَذْ إِسّغْمِي إِحُوذْرِييّنْ
ؤُڒَا بِينُو ن جْذِيذْ ثِيعْزَارِييِّينْ.“