3
ڒْحُوكْمْ خْ ؤُرْشَالِيمْ ذ ڒڭْنُوسْ
1 ؤُشْثْ خَامْ، ثنِّي إِغوّْغنْ
ذ يَارْصُوضنْ،
ثَانْذِينْثْ ن دّدْجْ!
2 نتَّاثْ وَارْ ثتّسْڒِي
غَارْ ؤُڒَا ذ إِشْثْ ن ثْمِيجَّا،
وَارْ ثْقبّڒْ أَودّبْ،
نتَّاثْ وَارْ ثتّْشِيڒْ خْ سِيذِي،
نتَّاثْ وَارْ ثتّْقَارَّابْ شَا
غَارْ أَربِّي نّسْ.
3 ڒْْحُوكَّامْ نّسْ ذِي ڒْْوسْطْ نّسْ
ذ أَيْرَاذنْ إِتَّارُّوجْذُوذنْ،
ڒْْقُوضَاثْ نّسْ ذ ؤُشَّاننْ ن دْجِيڒثْ،
إِنِّي وَارْ إِتّجِّينْ وَالُو أَڒْ ثُوفُّوثْ.
4 إِنَابِييّنْ نّسْ ذَايْسنْ ڒفْشُوشْ،
نِيثْنِي ذ إِرْيَازنْ إِخدَّاعنْ!
إِكهَّاننْ نّسْ سّْفسْذنْ
زَّاوشْثْ إِقدّْسنْ،
نِيثْنِي خَالْفنْ شَّارِيعَا.
5 سِيذِي أَمْسڭّذْ أَقَا-ث ذِي ڒْوسْثْ نّسْ.
نتَّا وَارْ إِتّڭّْ شَا مِينْ وَارْ إِسڭّْذنْ.
كُوڒْ ثُوفُّوثْ إِتَّارَّا ڒْْحقّْ نّسْ غَارْ ثْفَاوْثْ،
عمَّارْصْ وَارْ ثْنقّصْ!
مَاشَا ونِّي إِتّڭّنْ مِينْ وَارْ إِسڭّْذنْ،
وَارْ إِسِّينْ شَا أَسضْحِي.
6 نشّْ قْضِيغْ ڒڭْنُوسْ،
أَردّْدْجغْ صُّومْعَاثْ نْسنْ ن ثْغمُّورَا.
نشّْ خْڒِيغْ إِ ثْبْرِيذِينْ نّسْ،
أَڒَامِي ؤُڒَا ذ إِجّنْ وَارْ إِقِّيمْ عَاذْ
إِتّْسَارَا ذِينِّي.
ثِيندَّامْ نْسنْ تّْوَاردّْدْجنْثْ،
وَارْ إِقِّيمْ حذْ،
ؤُڒَا ذ إِجّْ ن ؤُمزْذُوغْ.
7 نشّْ نِّيغْ: إِتّْخصَّا شمْ
أَذْ أَيِي ثڭّْوذذْ،
أَذْ ثكْسِيذْ أَودّبْ!،
حِيمَا وَارْ ثتّْوَاكّسْ ثْزذِّيغْثْ نّسْ،
س مَارَّا مِينْ ذ أَسْ غَا ڭّغْ.
س ثِيذتّْ، نِيثْنِيغوّْغنْ زِيشْ،
مَاحنْذْ أَذْ سّْفضْحنْ
ثِيمڭَّا نْسنْ أَڒْ طَّارْفْ.
8 س ؤُيَا رَاجَامْ أَيِي، إِقَّارْ سِيذِي،
أَسّْ إِ ذِي د غَا كَّارغْ إِ ثْكشَّاضْثْ.
مِينْزِي أَيَا ذ ڒْْحُوكْمْ إِنُو إِسڭّْذنْ
أَقَا أَذْ جَارْوغْ ڒڭْنُوسْ،
أَذْ سّْمُونغْ ثِيڭلْذِينْ،
حِيمَا أَذْ خَاسنْ سّْفسْيغْ أَسْخضْ إِنُو،
مَارَّا ڒْْحَاذُوقْ ن وغْضَابْ إِنُو،
مَاغَارْ س ثْمسِّي ن ثُوسْمِي إِنُو إِقدّْسنْ
أَذْ ثتّْوَاشّْ مَارَّا ثَامُّورْثْ.
تُّوبثْ ن ڒڭْنُوسْ
9 مِينْزِي خنِّي نشّْ أَذْ بدّْڒغْ
ڒْْحَارْذْ ن ڒڭْنُوسْ
إِينْشِيشنْ إِمزْذَاڭنْ أَذْ ثنْ وْشغْ،
أَڒَامِي إِ غَا ڒَْاغَانْ خْ يِيسمْ ن سِيذِي،
حِيمَا أَذْ ثعبّْذنْ أَمْ س يِيشْثْ ن ثغْرُوضْثْ.
10 زڭْ ؤُجمَّاضْ ن إِغزْرَانْ ن كُوشْ،
إِنِّي خَافِي إِتّْژَادْجَانْ،
يدْجِيسْ ن إِمّْطَارّْشنْ إِنُو،
أَذْ ت أَوْينْ نِيثْنِي أَمشْنَاوْ ثوْهِيبْثْ إِنُو.
11 ذڭْ وَاسّْ نِّي وَارْ ثْسضْحِيذْ شَا عَاذْ،
خْ مَارَّا ثِيمڭَّا إِ زِي خَافِي ثْغوّْغذْ،
مِينْزِي أَذْ كّْسغْ زِي ڒْْوسْطْ نّمْ
إِنِّي إِتّْفيّْشنْ ذِي نّْفَاخثْ،
ؤُ كنِّيوْ وَارْ ثسّْڭعَّاذمْ عَاذْ إِخفْ نْومْ
خْ وذْرَارْ إِنُو إِقدّْسنْ.
12 نشّْ أَذْ جّغْ ذِي ڒْْوسْطْ نّمْ
إِجّْ ن ڒْْڭنْسْ إِتّْوَاحْصَارْ، إِژڒْضْ.
نِيثْنِي أَذْ أَروْڒنْ غَارْ يِيسمْ ن سِيذِي.
13 مِينْ إِقِّيمنْ ن إِسْرَائِيل
وَارْ إِتّڭّْ مِينْ وَارْ إِسڭّْذنْ،
نِيثْنِي وَارْ سّْخَارِّيقنْ شَا،
ؤُ ذڭْ ؤُقمُّومْ نْسنْ
وَارْ إِتّتّْوِيفِي يِيڒسْ إِسّْخَارِّيقنْ،
مَاشَا نِيثْنِي أَذْ هدَّانْ أَذْ زّْڒنْ،
ؤُ ؤُڒَا ذ إِجّنْ أَذْ ثنْ إِسّْنخْڒِيعْ.
ڒفْرَاحثْ ن إِسْرَائِيل ذ وعْذَاڒْ نّسْ
14 غنّجْ، أَ يدْجِيسْ ن صِيهْيُونْ،
سْڒِيوْڒوْ، أَ إِسْرَائِيل.
فَارْحْ ؤُ ثْفَادْجِيذْ س مَارَّا ؤُڒْ نّمْ،
أَ، يدْجِيسْ ن ؤُرْشَالِيمْ!
15 سِيذِي إِكّسْ ڒحْكَامَاثْ نّمْ،
نتَّا أَقَا إِمْحَا ڒعْذُو نّمْ.
أَجدْجِيذْ ن إِسْرَائِيل،
سِيذِي، أَقَا-ث ذِي ڒْْوسْطْ نّمْ!
وَارْ ثْژَارّذْ عَاذْ ڒْْغَارْ.
16 ذڭْ وَاسّْ نِّي أَذْ إِنِينْ إِ ؤُرْشَالِيمْ:
وَارْ تّڭّْوذْ شَا، صِيهْيُونْ!
وَارْ تّجِّي إِفَاسّنْ نّمْ
أَذْ أَرْخُونْعمَّارْصْ عَاذْ!
17 سِيذِي، أَربِّي نّمْ، أَقَا-ث ذِي ڒْوسْثْ نّمْ،
بُو-ثغْرُوضْثْ نِّي إِ د غَا يَاوْينْ أَسنْجمْ
نتَّا أَذْ زَّايمْ إِفَارْحْ س وَاطَّاسْ،
نتَّا أَذْ إِسغْضْ ذِي ثَايْرِي نّسْ،
نتَّا أَذْ خَامْ إِسْڒِيوْڒوْ س ؤُغنّجْ.‘
18 نشّْ أَذْ سّْمُونغْ إِنِّي إِشطّْننْ
ؤُمِي وَارْ زمَّارنْ أَذْ شَارْشنْ
ذِي ثْمسْمُونْثْ إِتّْوَاڭّنْ إِ ڒْْعِيذْ.
أَقَا نِيثْنِي زَّايمْ!
دّْقڒْ ن ڒْْحڭْرَا أَقَا-ث خَاسْ.
19 خْزَارْ، نشّْ أَذْ شغْڒغْ إِخفْ إِنُو
أَكْ-ذ يِينِّي شمْ إِحْصَارنْ.
نشّْ أَذْ سّْنجْمغْ إِقجْذَاحنْ
ؤُ يِينِّي إِتّْوَاسُّوفّْغنْ أَذْ ثنْ سّْمُونغْ.
نشّْ أَذْ أَسنْ وْشغْ ڒْْعزّْ
ذ يِيجّْ ن إِسمْ إِشنّْعنْ،
ذِي مَارَّا دُّونشْثْ
نِّي ثنْ ثُوغَا إِسّْفطّْحنْ.
20 ذِي ڒْْوقْثْ نِّي أَذْ كنِّيوْ د-أَرّغْ،
ؤُ ذِي ڒْْوقْثْ نِّي أَذْ كنِّيوْ سّْمُونغْ،
نشّْ أَذْ أَومْ وْشغْ
إِجّْ ن يِيسمْ إِشنّْعنْ ذ ڒْْعزّْ
جَارْ مَارَّا ڒڭْنُوسْ ن دُّونشْثْ،
خْمِي إِ زَّايْومْ غَا سّنْقڒْبغْ
ثَامحْبَاسْثْ نْومْ
زَّاثْ إِ ثِيطَّاوِينْ نْومْ،
إِنَّا سِيذِي.