Ikulusiyyen
1
Aseǧem ɣar umezwaru d tẓaǧit ak-d uqadi
1 Bulus, rrasul n Yasuɛ Lmasiḥ s řxaḍar n AREBBI, d tawmat Timutiyu.
2 I inni iǧan di Kulussi, awmaten imqeddasen d yinni yumnen di Yasuɛ Lmasiḥ: řehna d arḍa ad kiwem iřin zi AREBBI, Babatneɣ.
3 Řebda nettqada AREBBI, Babas n Siditneɣ Yasuɛ Lmasiḥ, uca nettẓaǧa xawem.
4 Xzar, nesřa x l’iman nwem di Yasuɛ Lmasiḥ u x tayri nwem i marra imqeddasen,
5 x ssibbet n usitem i d awem isswejden deg ijenwan, i x tizzarem tesřam zeg umezwaru s Wawař n tidett n Řexbar Aṣebḥan.
6 Awař-a ittwabarreḥ awem u i ddunect marra, uca igemma uca ittawi-dd řɣiǧet, am mammec i yegga wawař-a ɛawed jar awem zeg wass umi t tesřim u tessnem arḍa n AREBBI di tidett,
7 am mammec t třemdem zi Ipafras, amsexxar amɛacar nneɣ iɛizzen, wenni d amsexxar d amtiqqi n Lmasiḥ i kenniw.
8 Netta issargeb aneɣ-dd x tayri nwem di Arruḥ.
9 S uyenni, uřa d neccin, zeg wass umi nesřa x man aya, war nessbeddi ca taẓaǧit xawem, nettᵉttar ad tdewřem teccurem s tussna n řxaḍar n AREBBI, di marra tiɣit d řefhamet n Arruḥ,
10 ḥima ad tuyurem am mammec isdaheǧ, ad tarḍam AREBBI di marra řexdayem tiṣebḥanin, u ḥima ad dd-tawyem řɣiǧet uca ad teymam di tussna n AREBBI,
11 ad tᵉttwassjehdem s marra jjehd ɛlaḥsab řemɣaret n uɛuǧi nnes, s marra ṣṣbar d ttasiɛ n řxaḍar d řefraḥet.
12 Qadam AREBBI, Babatneɣ, wenni d aneɣ isswejden ḥima ad nessdaheǧ ad ncarc di řwart n imqeddasen di tfawt.
13 Netta issenjem aneɣ zi ṣṣulṭa n taǧest u issmuṭṭiy aneɣ ɣar tgeldit n Mmis nnes iɛizzen,
14 Wenni dayes ɣarneɣ asenjem d weɣfar n ddnub.
Lmasiḥ d ṣṣifet n Arebbi i war neẓri
15 Wanita d ṣṣifet n AREBBI i war nettwiři ca, Amenzu x marra min dd-ittwaxeřqen,
16 Zzayes dd-ittwaxřeq marra min iǧan deg ijenwan d min iǧan di temmurt, min nettwařa d min war nettwiři ca: řekrasi n ijeǧiden niɣ tiṣeǧaḍin niɣ řeḥkamat uřa d ṣṣulaṭat, marra min iǧan aqa ittwaxřeq-dd s ufus nnes u zzayes Netta.
17 Netta tuɣa-t qbeř marra min iǧan, uca marra min iǧan aqa-t zzayes.
18 Netta d Azeǧif n Arrimet, tenni iǧan d tamesmunt. Netta d Azeǧif d Mmis Amenzu i dd-ittwaxeřqen zi taddart n imettinen, ḥima ad yiři d Amezwar di kuřci.
19 Minzi tusa as-dd i řxaḍar i marra Aɛemmar maḥend ad izdeɣ dayes,
20 maḥend ad zzayes isseṣřeḥ marra min iǧan ak-d Yixef nnes, u maḥend ad igg řehna s Idammen n ṣṣalib nnes, am i yinni iǧan di temmurt am i yinni iǧan deg ijenwan.
21 Uřa i kenniw - inni tuɣa qbeř d ibarraniyyen d řɛedyan deg ixarriṣen nwem zi ssibbet n řexdayem nwem tiɛeffanin - iwca řexxu řehna
22 s arrimet n weysum nnes u n řmewt nnes, ḥima ad kenniw issbedd d imqeddasen qibač nnes, břa ma ad daywem ittwaf řa d ijj n řexmej uřa d ijj n řɛib,
23 mařa teqqimem tuyurem di l’iman nwem, am dsas nwem iqqim imten, war tsemmḥem ca deg usitem n L’Injil i tesřim, wenni zi ittwabarraḥ ɣar marra min dd-ittwaxeřqen nni iǧan sadu ujenna, wenni zi dewřeɣ necc, Bulus, d amsexxar.
Řxedmet n tsexxart n Bulus i Tmesmunt n Yasuɛ Lmasiḥ
24 Aqa ayi farḥeɣ am kessiɣ tamara xawem u ttkemmřeɣ di arrimet inu min iqqimen zi řemḥayem n Lmasiḥ di ṭṭweɛ n Arrimet nnes tenni d tamesmunt,
25 i zi dewřeɣ d amsexxar ɛlaḥsab awekkeř i d ayi immewcen xawem zi AREBBI, ḥima ad ssiwḍeɣ tabarreḥt n Wawař n AREBBI ɣar řekmaret,
26 ssirr i tuɣa innufaren di zzmanat d řjiřat n zic, maca ittwassargeb řexxu i imqeddasen nnes,
27 inni umi ixs AREBBI ad asen isscen igeřwan n uɛuǧi n ssirr-a jar řegnus, wenni iǧan d Lmasiḥ daywem, asitem n uɛuǧi nneɣ.
28 Aqa nettbarreḥ zzayes, u zzayes Netta nesseřmad u nɛeǧem i kuř bnadem s marra tiɣit, ḥima ad nessbedd kuř bnadem nican qibač i Yasuɛ Lmasiḥ.
29 I man aya umi jehhdeɣ u ttmenɣiɣ s ufus n jjehd i d ayi immewcen.