2 Itissalunikiyyen
1
Aseǧem ɣar umezwaru d tẓaǧit n uqadi
1 Bulus d Silwanus d Timutiyu, i tmesmunt n Itissalunikiyyen, tenni iǧan di AREBBI, Babatneɣ, u di Siditneɣ Yasuɛ Lmasiḥ.
2 Arḍa d řehna zi AREBBI, Babatneɣ, u zi Siditneɣ Yasuɛ Lmasiḥ ad kiwem iřin.
3 Icuwwar ad nqada AREBBI i kenniw řebda, a aytma, am mammec ittřiq, minzi l’iman nwem imeqqar aṭṭas, am mammec uřa d tayri n kuř ijjen zzaywem marra i wenni d as yudsen tarenni tmeqqar ktar,
4 ař nettfeyyec xawem di tmesmunin n AREBBI x ssibbet n l’iman nwem d ṣṣbar nwem di marra adarrec nwem d řemḥayem nwem nni teksim.
5 Man aya d lburhan n řḥukm isseggden n AREBBI, aqa tᵉttwaḥasbem tesdaheǧem Tageldit, tenni xef teksim amarret.
6 U mařa xenni d řḥeqq zzat i AREBBI umi ɣa ixeǧeṣ s řmeḥnet i yinni kenniw iḥeṣṣaren,
7 xenni Netta ad kidneɣ isseddar uřa d kenniw inni ittwaḥṣaren, wah ad aneɣ isseddar akidwem ɣar usargeb n Siditneɣ Yasuɛ Lmasiḥ zeg ujenna ak-d řɛeskarat n lmalakat nnes,
8 x minni i ɣa intaqem di tmessi itteḥduduqen x yinni war issinen ca AREBBI u x yinni war xsen ad cehden s Řexbar Aṣebḥan n Siditneɣ Yasuɛ Lmasiḥ.
9 Minzi ina ad ttwaɛaqben di řḥukm s uhellek i řebda am yaggwejen x wudem n Siditneɣ u x uɛuǧi n jjehd nnes,
10 xmi dd ɣa yas Netta ḥima ad ittwaɛuǧi deg wass nni di marra imqeddasen nnes, u ḥima ad isscen řeɛjayeb nnes s yinni dayes yumnen, minzi tumnem zi cchadet nneɣ i kenniw deg wass nni.
11 S uyenni nkessi awem řmeɛruf řebda, ḥima AREBBI nneɣ ad kenniw yegg ad tesdaheǧem tařaɣit nwem, u ḥima ad kenniw iccur s jjehd maḥend ad tiřim twejdem qaɛ i tmegga n tcuni u i řexdayem n l’iman,
12 ḥima ad daywem ittwaɛuǧi Isem n Siditneɣ Yasuɛ, uca uřa d kenniw dayes, ɛlaḥsab arḍa n AREBBI nneɣ d Siditneɣ Yasuɛ Lmasiḥ.