6
Yasuɛ d Bab n ssebt
1 Imsar di ssebt aqa Yasuɛ yuyur deg iyyaren n zzariɛet n imendi. Tuɣa imeḥḍaren nnes řeqqḍen tidrin, ttḥekkan tent s ifassen nsen, ttᵉtten tent.
2 Ca n Ifarisiyyen nnan asen: “Mayemmi tᵉtteggem min war iḥeǧřen ad ittwagg di ssebt?”
3 Yarra-dd Yasuɛ, inna asen: “Ma war teɣrim min igga Dawud umi iǧuẓ netta d yinni akides?
4 Mammec yudef ɣar Taddart n AREBBI, iksi aɣrum n wescan i iǧan x tzewḍa n SIDI i war iḥeǧřen macca nnes mɣir i ikehhanen waha, uca icca zzayes u iwca ɛawed i yinni tuɣa iǧan akides?”
5 Xenni inna asen: “Aqa Mmis n bnadem d Bab n ssebt.”
Asgenfi n ijj n weryaz deg wass n ssebt
6 Deg ijj n wass n ssebt nneɣni yudef Yeccu ɣar temzida, ibda issɣara. Tuɣa din ijj n bnadem wenni umi afus nnes iqucceḥ.
7 Ḥḍan t imseřmaden n idlisen d Ifarisiyyen, ma ad issgenfa di ssebt, ḥima ad xas afen ca n ttuhmet.
8 Maca Netta yargeb x ixarriṣen nsen uca inna i bnadem wenni umi iqucceḥ ufus nnes: “Kkar, bedd di řwesṭ n temzida.” Umi ikkar u tuɣa ibedd din,
9 inna asen Yasuɛ: “Ad kenniw sseqsiɣ x min iḥeǧřen ad ittwagg di ssebt. Ma iḥeǧeř i bnadem maḥend ad igg řxar niɣ řɣar, ad issenjem ijj n řeɛmar niɣ ad t yareddeǧ?”
10 Tuɣa ixezzar ɣar marra inni d as dd-innḍen, inna as i bnadem nni: “Swiẓẓeḍ afus nnec!” Isswiẓẓeḍ Netta afus nnes uca idweř ufus nnes iṣeḥḥ am wenneɣni.
11 Maca nitni dewřen ccuren s zzɛaf uca ssiwřen jar asen x min ɣa ggen i Yasuɛ.
Řixḍaret n tenɛac n rrusul
12 Imsar deg wussan nni, aqa iffeɣ Yasuɛ ɣar ijj n wedrar, ḥima ad iẓẓaǧ uca isseɛdu din ǧiřet tekmeř, ittẓaǧa i AREBBI.
13 Umi tuɣa d aziř, iřaɣa-dd i imeḥḍaren nnes, uca ixḍar zzaysen tenɛac, isemma ten rrusul.
14 Cimɛun, wenni ittkennan Buṭrus, ‘aẓru’, d Andrawus umas, d Yaɛqub d Yuḥanna, d Filippus d Bar-Tulumawus
15 d Matta d Tuma d Yaɛqub, mmis n Ḥalfa, d Cimɛun wenni umi ttkennan ‘Amɛessab’,
16 Yahuda, mmis n Yaɛqub, d Yahuda Isxariyuṭi wenni iǧan d aɣeddar.
Yasuɛ isseřmad u issgenfa
17 Ihwa-dd Yasuɛ akidsen uca ibedd di řewḍa. Tuɣa akides ijj n ubarru n imeḥḍaren nnes d ijj n ubarru n iwdan zi marra Yahudiyya d Urcalim u zi tma n řebḥar ɣar Ṣur d Ṣaydun.
18 Nitni usin-dd ḥima ad as sřen u ad ttwassgenfan zi řehřac nsen, tuɣa akidsen uřa d inni ittwaɣezzan zi řaryaḥ imengas, uca ttwassgenfan.
19 Marra řɣaci tuɣa ittexs ad t iḥada, minzi tuɣa itteffeɣ-dd zzayes jjehd nni issgenfan kuřci.
Lbaraka d nneɛřet
20 Issgeɛɛed tiṭṭawin nnes ɣar imeḥḍaren nnes, inna:
“Sseɛd nwem, kenniw, a imezřaḍ,
minzi Tageldit n AREBBI i kenniw.
21 Sseɛd nwem, kenniw, inni iǧuẓen řexxu,
minzi kenniw ad tᵉttwassjiwnem.
Sseɛd nwem, kenniw, inni ittrun řexxu,
minzi kenniw ad tḍeḥcem.
22 Sseɛd nwem, umi kenniw carrhen iwdan,
ttaẓẓřen xawem, ttekkwaren kenniw,
uca ssfeṭṭaḥen zeg yisem nwem
x ssibbet n Mmis n bnadem.
23 Farḥem deg wass nni, negzem s řefraḥet,
minzi, aqa řajar nwem imɣar deg ujenna,
minzi ammu tuɣa tteggen
řejdud nsen deg inabiyyen.
24 Maca uct xawem, kenniw, aytbab n wagřa,
minzi aqa tᵉṭṭfem afewwej nwem.
25 Uct xawem, kenniw, inni ijjiwnen,
minzi ad tǧaẓem.
Uct xawem, kenniw inni iḍeḥḥcen řexxu,
minzi ad tceḍnem, ad trum.
26 Uct xawem umi iwdan ad xawem ssiwřen mliḥ,
minzi ammu tuɣa tteggen řejdud nsen
ak-d inabiyyen issxarriqen.”
Tayri i řɛedyan
27 “Maca Necc ad awem iniɣ, i yinni ittesřan: Xsem řɛedyan nwem, thillam deg inni kenniw icarrhen,
28 barkem i yinni kenniw ineɛɛřen u ẓaǧem x yinni xawem ittɛeddan.
29 I wenni cek iwtin ɣar umeggiz, arr as-dd s wenneɣni, u wenni d ac ɣa ikksen ajeǧab, war t ttᵉṭṭef ad iksi uřa d tcamir nnec.
30 Marra wenni d ac ɣa ittaren, ewc as t, u wenni i ɣa iksin min iǧan nnec, war d as t ttᵉttar.
31 Am mammec texsed ad awem ggen iwdan, ggem uřa d kenniw daysen amenni.
32 Mařa texsem ɣar yinni kenniw ittexsen, man tcuni i ɣarwem. Aqa uřa d imednab ttexsen inni i ten ittexsen.
33 Mařa teggem řxar i yinni d awem itteggen řxar, man tcuni i ɣarwem. Aqa uřa d imednab tteggen amenni.
34 U mařa tarḍřem i iwdan i zi tᵉttrajam ad awem dd-arren, man tcuni i ɣarwem? Aqa uřa d imednab arḍřen i imednab, ḥima ad asen dd-idweř amenni ɛawed.
35 Maca xsem řɛedyan nwem, ggem d asen tcuni, arḍřem, war tqeṭṭɛem řayas i ca n yijjen. Xenni ad yiři řajar nwem imɣar, ad tiřim d tarwa n Umɛuǧi x kuřci, minzi aqa ittegg s ttasiɛ n řxaḍar ak-d iɛeffanen d yinni war t icekkaren.
36 Areḥmem am mammec iǧa Babatwem d arḥim.
37 War ḥekkem, war tᵉttwaḥakamem. War ttḥasabem, war tᵉttwaḥasbem. Ɣfarem, ad awem ittwaɣfar.
38 Wcem, ad awem immewc, ad nḍaren ijj n řmud icna, ideqqes, ittwassenhezz, ifeyyeḍ deg weḥsin nwem. Minzi s řmud i zi ɣa tweznem kenniw, ad zzayes tᵉttwaweznem uřa d kenniw.”
Amedya n uxecciw d teḥnact
39 Netta inna asen ijj n umedya: “Ma izemmar udarɣař ad indeh adarɣař? Ma war weṭṭin s tnayen idsen deg weḥfur?
40 Ameḥḍar war iǧi ca ḥsen zeg umseřmad nnes, maca kuř ameḥḍar nican ad yiři am umseřmad nnes.
41 Mayemmi txezzared ɣar uxecciw, tenni di tiṭṭ n umac, maca taḥnact, tenni di tiṭṭ nnec, war kis teřhid?
42 Mammec tᵉttegged teqqared i umac: ‘Uma, ejj ayi ad ac dd-ssuffɣeɣ axecciw i dayek di tiṭṭ nnec!’, u xzar, cek simant nnec war tᵉttwiřid ca taḥnact i ɣarek di tiṭṭ nnec. Cek, a amnafeq, suffeɣ-dd amezwaru taḥnact nni ɣarek di tiṭṭ nnec, xenni ad tᵉttwařid mliḥ maḥend ad tessuffɣed axecciw zi tiṭṭ n umac.”
Tacejjart d řɣiǧet nnes
43 “War din bu tcejjart taṣebḥant i dd-issɣemmayen řɣiǧet texsar, niɣ tacejjart ixsaren i dd-issɣemmayen řɣiǧet taṣebḥant.
44 Minzi kuř tacejjart tᵉttwassen s řɣiǧet nnes, minzi war yrun zeg isennanen řbacur, u war řeqqḍen aḍiř zi cbarq ak-d isennanen.
45 Bnadem aṣebḥan zi řkenz n wuř nnes d aṣebḥan ad issuffeɣ min iṣebḥen uca bnadem aɛeffan zi řkenz n wuř nnes d aɛeffan ad dd-issuffeɣ tuɛeffna. S min zi iccur wuř, zzayes ssawařen iyencicen.”
Taddart x sseǧaḥ
46 “Mayemmi d ayi tᵉttřaɣam: ‘A Sidi, a Sidi!’ uca war tᵉtteggem ca min qqareɣ?
47 Marra wenni ɣari i dd ɣa yasen, ad iseř i wawařen inu uca ad zzaysen igg, Necc ad awem ssecneɣ min di yarwes netta.
48 Netta yarwes deg ijj n bnadem i ibnan ict n taddart. Netta iɣza, iḥfar uca issars dsas x sseǧaḥ. Umi dd-tusa sseḥřet, tqebbeḍ řḥemřet taddart nni uca war tzemmar ad tt tessenhezz, minzi tuɣa dsas nnes x sseǧaḥ.
49 Maca wenni ittesřan war ittegg, yarwes di bnadem i ibnan taddart nnes x temmurt břa dsas. Umi tt-i-dd-tqebbeḍ řḥemřet, řexdenni tewḍa. Tuɣa afartek n taddart nni d ameqqran.”