2
Iẓra iddaren
1 S uyenni beɛɛdem x marra min iǧan d aɛeffan, x ɛřam kuř taḥraymect d nnifaq d řeḥsed u x uceqqef.
2 Iřim am iseyman itteṭṭḍen, weḥḥcem Awař am uɣi izdigen d arruḥani, ḥima ad zzayes tegmam i Tudart,
3 mařa aqa kenniw tᵉqqasem u tᵉttwařam aqa SIDI iṣbeḥ.
4 Netta d Wenni ɣar dd-tᵉttakkwaḍem, Aẓru Iddaren, wenni mmenḍaren iwdan, maca ɣar AREBBI aqa-t ittwafarz iɣřa.
5 Ammu kenniw ɛawed, am yiẓra iddaren, jjem ad zzaywem tᵉttwabnant tizawiyyin n Arruḥ, ad tiřim d ikehhanen iqeddsen, ḥima ad tewcem tiɣarṣin n Arruḥ i arḍa n AREBBI s Yasuɛ Lmasiḥ.
6 S uyenni ittwanna di Tira Iqeddsen:
“Aqa da, ad ssarseɣ di Ṣihyun
ijj n weẓru iɣřa am uzeǧif n teɣmart,
uca wenni i zzayes ɣa yamnen,
war dayes ittidef useḍḥi ɛemmarṣ.”
7 I kenniw, inni ittamnen, aqa temmewc ccenɛet-a, maca i yinni war yuminen, aqa-tt d Taṣḍart n uneqraḍ d Aẓru n unedref.
8 Uca nitni ttneqraḍen dayes, minzi war ttimnen deg Wawař, am mammec d asen yura.
9 Maca kenniw teǧam d ijj n jjiř ittwafarzen, tᵉttsexxarem am ikehhanen i Tgeldit, kenniw d ijj n řgens iqeddsen, ijj n umuni ittwafdin, maḥend ad tbarrḥem asemɣar n Wenni d aneɣ dd-iřaɣan zi taǧest ɣar ufeyyeḍ n Tfawt nnes.
10 Kenniw war tᵉttwiḥsibem am řgens, maca řexxu aqa kenniw d řgens n AREBBI. Ɛawed tuɣa arreḥmet war kenniw třeḥḥef, maca řexxu tᵉttwafarreɣ-dd xawem arreḥmet nnes.
11 A imɛizzen inu, aqa kenniw d ibarraniyyen d imeɛzab, x uyenni ziyyareɣ xawem, war ḍeffarem ca nnecwat n arrimet nni ittmenɣan ak-d řeɛmar nwem.
12 Uyurem nican zzat i marra tarwa n bnadem inni xawem ittɛawaden řexburat tiɛeffanin, ařami ɣa ẓaren řexdayem nwem tiṣebḥanin, ad ssemɣaren di AREBBI deg wass n uqeǧeb.
13 Ṭṭaɛem i marra bnadem di ṭṭweɛ n AREBBI: i ijeǧiden zi ssibbet n ṣṣulṭa i ɣarsen teǧa,
14 u i řquḍat, minzi nitni ttwassekken zzayes, ḥima ad ɛaqben iɛeffanen, u ḥima ad ssemɣaren inni itteggen taṣebḥant.
15 Minzi man aya ittexs i-t AREBBI, ḥima, xmi ɣa teggem min iṣebḥen, ad tesseɣdem aqemmum n iwdan ifɣař i war issinen AREBBI,
16 am tarwa n bnadem nni iddaren nican di tiřelli, war iǧi am yinni iggin tiřelli nsen am yijj n uřeḥḥaf x tuɛeffna nsen, maca am imsexxaren n AREBBI.
17 Weqqarem marra iwdan, sɛizzem tawmat, ggʷedem AREBBI, cennɛem ijeǧiden.
18 Jjem inni d imsexxaren jar awem ad ṭṭaɛen i aytbab nsen s tiggʷudi, war iǧi i yinni iṣebḥen iḍarfen waha, maca ɛawed i yinni iqesḥen d yewɛaren.
19 Minzi imsexxaren am ina ad dd-asen i AREBBI ɣar řxaḍar nnes, minzi nitni ksin tamara nni war tt isdihiǧen, di ṭṭweɛ n tnefsect tecna.
20 Man ccan i din i yinni iksin tamara zi ssibbet n iɛeddiyen nsen? Maca mařa kenniw teggim tcuni, am daywem tteggen tuɛeffna, aqa man aya issemɣar ccan nwem ɣar AREBBI.
21 Minzi kenniw tᵉttwařaɣam-dd i man aya umi immut Lmasiḥ di ṭṭweɛ nneɣ uca ijja aneɣ-dd lmital-a, ḥima ad nuyur di jjurret n iḍaren nnes:
22 Netta war iggi ca ddnub u war ittwif deg uqemmum nnes ca n řɣecc,
23 Wenni, mařa zawaren t, war dd-ittarri awař, u mařa iweddeb, war dd-ittarri ca ddenf, maca ittarra ddeɛwet nnes ɣar Řqaḍi n tsegda,
24 Wenni iksin ddnub nneɣ s Yixef nnes uca issgeɛɛed i-ten di arrimet nnes x ṣṣalib. Maɣar mařa nemmut i ddnub, ad neddar di tsegda nnes, minzi kenniw aqa tᵉttwassgenfam s iyezzimen nnes.
25 Minzi kenniw tuɣa tweddarem am yiḥuřiyyen, řexxu maca tdewřem-dd ɣar Umeksaw d Umeḥḍay n řeɛmur nwem.