13
Awařen iwezznen n Suliman - tasɣart 1b
1 Ijj n mmis d amiɣis
d ṣṣifet n uwebbex n babas,
maca amestehziy
war ittesři ɣar utextix.
2 Zi řɣiǧet n wawařen nnes
ad yecc bnadem řxar,
maca řeɛmar n iɣeddaren
ad yecc lɛunf.
3 Wenni yessaren aqemmum nnes,
iḥeṭṭa řeɛmar nnes,
maca wenni yarezzmen
iyencicen nnes aṭṭas,
ittraja t uhellek.
4 Řeɛmar n umeɛguz yarjef,
waxxa aya war ineffeɛ di walu,
maca řeɛmar n yinni ittceṭṭaren
ad ittwassjiwnen.
5 Awařen n ixarriqen
icarreh i-ten umsegged,
maca aɛeffan issarzag ixef nnes
u issfeṭṭaḥ inneɣni.
6 Tasegda tḥeṭṭa
wenni igguren abrid nnes nican,
maca tuɛeffna ad t isshellek amednub.
7 Aqa din inni ittarran ixef nsen
d bu-wagřa, waxxa war ɣarsen walu,
u aqa din inni ittarran ixef nsen
d imezřaḍ, waxxa ɣarsen aṭṭas.
8 Ddeyyet i řeɛmar n ca n yijjen
d agřa nnes,
maca amezřuḍ war ittesři ca
uřa d ijj n uhuddi.
9 Tafawt n imseggaden ad tarɣ s řefraḥet,
maca řefnar n iɛeffanen ad ixsi.
10 Zi tnefsect ittas-dd mɣir umenɣi,
maca inni ikessin acawar, ɣarsen tiɣit.
11 Agřa n deɣya, ad yiři drus,
maca wenni iyarrwen s ufus,
ad yarbeḥ.
12 Řayas yuyřen issɛiǧa uř,
maca twarrit n meẓri iccuren,
aqa tt d tacejjart n tudart.
13 Wenni isseḥqaran awař,
ad zzayes ittwaqqen,
maca wenni itteggʷeden tawṣeyyet,
ad ittwaxeǧeṣ.
14 Taɣuri n umiɣis d řɛunṣar n tudart,
maḥend ad yařweř bnadem
i texcifin n řmewt.
15 Řeɛqeř iṣebḥen ittawi-dd arḍa,
maca abrid n iɣeddaren
aqa iqseḥ aṭṭas.
16 Kuř ijjen wenni ifettnen,
ixeddem s tussna,
maca abuhaři ittbezzaɛ taɣyuři nnes.
17 Amsexxar aɛeffan iweṭṭa di řɣar,
maca amsexxar d amtiqqi
ittawi-dd agenfu.
18 Zzřeḍ d řefḍiḥet aqa aten
i wenni yugin ttarbiyyet,
maca wenni iksin awebbex
ɣar wuř nnes, ad ittwaweqqar.
19 Ijj n usitem iccuren d amiẓid i řeɛmar,
maca i ibuhařiyyen d nnɛi
maḥend ad ḥeyyden x řɣar.
20 Wenni igguren ak-d imiɣisen,
ad idweř d amiɣis,
maca wenni ittemṣurrufen
ak-d ibuhařiyyen, ad t iřqef ddeǧ.
21 Řɣar ad iḍfar imednab,
maca amsegged ad t xeǧḍen s řxar.
22 Wenni iṣebḥen ittejja tasɣart
i wayyawen nnes,
maca agřa n ayt-bu-ddnub
ittwaxemmeř i umsegged.
23 Arber n imezřaḍ
ittawi-dd macca s waṭṭas,
maca aqa din inni ittwahellken
řami din anqas n řḥeqq.
24 Wenni imennɛen aɛmud nnes,
icarh mmis,
maca wenni t ittexsen,
ittekkar akides ittwebbex i-t di řweqt.
25 Amsegged ad icc
ař ɣa ijjawen řeɛmar nnes,
maca aɛeddis n iɛeffanen
ad iqqim itteḥwaja řebda.