3
1 Seɛqeř i-ten, maḥend ad ṭṭaɛen i řḥukkam u i ṣṣulaṭat, ad asen ggen array, ad iřin wejden i řxedmet taṣebḥant mammec ma tegga,
2 war ttceqqifen di ḥed, war ttemcubbucen, ad iřin ttebten uca ad ssecnen řeḍrafet i marra iwdan zi marra iɣezdisen.
3 Aqa uřa d neccin zic tuɣa aneɣ d ifɣař, s wuř war imtinen, nweddar, aqa aneɣ d isemɣan n ɛřam kuř nnecwat d ccehwat, tuɣa neddar di tuɛeffna uřa di řeḥsed, dayneɣ acrah uca ncarh ijjen wenneɣni.
4 Maca xmi tban tcuni d tayri n AREBBI, wenni d aneɣ itticen Tudart,
5 aqa iwca aneɣ Tudart, war iǧi ɛlaḥsab řexdayem n tsegda i negga, maca ɛlaḥsab arreḥmet nnes, ɛlaḥsab asird n wexřaq n jdid d tajdidet s Arruḥ Iqeddsen
6 i xaneɣ dd-ifarreɣ s ufeyyeḍ s Yasuɛ Lmasiḥ, wenni d aneɣ itticen Tudart,
7 ḥima ad nettwasegged s arḍa nnes, ad nedweř d iwriten s usitem di Tudart ittduman.
8 Awař-a dayes řmanet, uca necc xseɣ ɛawed ad tekkared ad tbedded s jjehd x man aya, ḥima inni ittecřen x AREBBI, ad meḥḍen maḥend ad cebbaren řebda di řexdayem tiṣebḥanin. Timesřayin-a cnant u daysent nnfaɛ i iwdan.
9 Maca beɛɛed x umḥarweḍ abuhaři, x thuja n taṣiřat, x umenɣi u x imcubbac n imseřmaden n idlisen, minzi di marra man aya war dayes bu nnfaɛ, aqa man aya d řbaṭeř.
10 Mařa din ḥed issbeṭṭa, ittxeṣṣa kenniw ad as tagim awarni řami t twebbxem ict n twařa u ict n twařa nneɣni.
11 Aqa tessnem belli wanita d amfaryaḍ, aqa d amednub, aqa ittwaḥaseb zeg ixef nnes.
Awař d useǧem aneggaru
12 X minni i ɣarek dd ɣa ssqadeɣ Artimas niɣ Ticikus, egg tizemmar maḥend ad ɣari dd-tased deɣya ɣar Nikupulis, minzi aqa ggiɣ ad din sseɛduɣ řmecta.
13 Zenas, amseřmad n idlisen, d Apullus, awyem ten-dd mliḥ deg webrid, ḥima war d asen ittxeṣṣi uřa d ict n tmesřact.
14 Nitni ad sseřmaden inni nneɣ maḥend ad ggen řexdayem tiṣebḥanin mařa din řeḥwej ameqqran, ḥima war ttiřin břa řɣiǧet.
15 Marra wi kidi danita ttseǧamen xak s řehna. Seǧem s řehna ɛawed x yinni d aneɣ ittexsen di l’iman. Arḍa ad kiwem yiři marra idwem! Amin.