11
ⴰⵔⵢⴰⵣ ⴷ ⵜⴻⵎⵖⴰⵔⵜ ⴷⵉ ⵜⵎⴻⵙⵎⵓⵏⵜ ⵏ ⵢⴰⵙⵓⵄ ⵍⵎⴰⵙⵉⵃ
1 ⴹⴼⴰⵔⴻⵎ ⴰⵢⵉ-ⴷⴷ ⴰⵎ ⵎⴰⵎⵎⴻⵛ ⴹⴼⴰⵔⴻⵖ ⵍⵎⴰⵙⵉⵃ.
2 ⵙⵙⴻⵎⵖⴰⵔⴻⵖ ⴽⴻⵏⵏⵉⵡ, ⴰ ⴰⵢⵜⵎⴰ ⵉⵏⵓ, ⵎⵉⵏⵣⵉ ⵜᵉⵜⵜⴼⴻⴽⴽⴰⵔⴻⵎ ⴷⴰⵢⵉ ⴷⵉ ⵎⴰⵔⵔⴰ ⵓⵛⴰ ⵜᵉⵜⵜⴻⵟⵟⴼⴻⵎ ⴷⵉ ⵜⴻⵡⵚⴻⵢⵢⴰⵜ, ⴰⵎ ⵎⴰⵎⵎⴻⵛ ⴷ ⴰⵡⴻⵎ ⵜⴻⵏⵜ ⵡⵛⵉⵖ.
3 ⵎⴰⵛⴰ ⵅⵙⴻⵖ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵍⵎⴰⵙⵉⵃ ⴷ ⴰⵣⴻⴵⵉⴼ ⵏ ⴽⵓⵍ ⴰⵔⵢⴰⵣ ⵓⵛⴰ ⴰⵔⵢⴰⵣ ⴷ ⴰⵣⴻⴵⵉⴼ ⵏ ⵜⴻⵎⵖⴰⵔⵜ, ⵓⵛⴰ ⴰⵔⴻⴱⴱⵉ ⴷ ⴰⵣⴻⴵⵉⴼ ⵏ ⵍⵎⴰⵙⵉⵃ.
4 ⴽⵓⵍ ⴰⵔⵢⴰⵣ ⵡⴻⵏⵏⵉ ⵉⵜⵜⵥⴰⴵⴰⵏ ⵏⵉⵖ ⵉⵜⵜⵏⴰⴱⴱⴻⵏ ⴰⵎ ⵉⵍⴻⵃⵃⴻⴼ ⵅ ⵓⵣⴻⴵⵉⴼ ⵏⵏⴻⵙ, ⵉⴼⴻⵟⵟⴻⵃ ⴰⵣⴻⴵⵉⴼ ⵏⵏⴻⵙ.
5 ⵎⴰⵛⴰ ⴽⵓⵍ ⵜⴰⵎⵖⴰⵔⵜ ⵜⴻⵏⵏⵉ ⵉⵜⵜⵥⴰⴵⴰⵏ ⵏⵉⵖ ⵉⵜⵜⵏⴰⴱⴱⴻⵏ ⴰⵎ ⵜⴻⵙⵙⵄⴰⵔⵔⴰ ⵓⵣⴻⴵⵉⴼ ⵏⵏⴻⵙ, ⵜⴼⴻⵟⵟⴻⵃ ⴰⵣⴻⴵⵉⴼ ⵏⵏⴻⵙ, ⵎⵉⵏⵣⵉ ⵏⴻⵜⵜⴰⵜ ⴰⵎ ⵜⴻⵏⵏⵉ ⵉⵃⴻⴼⴼⴻⵏ ⴰⵣⴻⴵⵉⴼ ⵏⵏⴻⵙ.
6 ⵎⵉⵏⵣⵉ ⵎⴰⵍⴰ ⵜⴰⵎⵖⴰⵔⵜ ⵡⴰⵔ ⵜⵍⴻⵃⵃⵉⴼ, ⴻⵊⵊ ⵉ-ⵜⵜ ⴰⴷ ⵜⵃⴻⴼⴼ ⵄⴰⵡⴻⴷ. ⵎⴰⵛⴰ ⵎⴰⵍⴰ ⴷ ⵍⴻⴼⴹⵉⵃⴻⵜ ⵉ ⵜⴻⵎⵖⴰⵔⵜ ⵎⴰⵍⴰ ⵜⵇⴻⵙⵙ ⴰⵛⵓⵡⵡⴰⴼ ⵏⵉⵖ ⵜⵃⴻⴼⴼ, ⵃⵙⴻⵏ ⵎⴰⵍⴰ ⵜⵍⴻⵃⵃⴻⴼ.
7 ⵎⵉⵏⵣⵉ ⴰⵔⵢⴰⵣ ⵡⴰⵔ ⵉⵜⵜⴻⵃⵡⵉⵊⵉ ⵛⴰ ⴰⴷ ⵉⵍⴻⵃⵃⴻⴼ ⴰⵣⴻⴵⵉⴼ ⵏⵏⴻⵙ, ⵎⵉⵏⵣⵉ ⵏⴻⵜⵜⴰ ⴷ ⵚⵚⵉⴼⴻⵜ ⴷ ⴰⵄⵓⴵⵉ ⵏ ⴰⵔⴻⴱⴱⵉ, ⵎⴰⵛⴰ ⵜⴰⵎⵖⴰⵔⵜ ⵜⴻⴵⴰ ⴷ ⴰⵄⵓⴵⵉ ⵏ ⵡⴻⵔⵢⴰⵣ.
8 ⵎⵉⵏⵣⵉ ⴰⵔⵢⴰⵣ ⵡⴰⵔ ⵉⴵⵉ ⵛⴰ ⵣⵉ ⵜⴻⵎⵖⴰⵔⵜ, ⵎⴰⵛⴰ ⵜⴰⵎⵖⴰⵔⵜ ⵣⴻⴳ ⵡⴻⵔⵢⴰⵣ.
9 ⴰⵔⵢⴰⵣ ⵄⴰⵡⴻⴷ ⵡⴰⵔ ⴷⴷ-ⵉⵅⵍⵉⵇ ⵛⴰ ⵉ ⵜⴻⵎⵖⴰⵔⵜ, ⵎⴰⵛⴰ ⵜⴰⵎⵖⴰⵔⵜ ⵉ ⵡⴻⵔⵢⴰⵣ.
10 ⵙ ⵓⵢⴻⵏⵏⵉ ⵉⵜⵜⵅⴻⵚⵚⴰ ⴰⵙ ⵉ ⵜⴻⵎⵖⴰⵔⵜ ⴰⴷ ⵖⴰⵔⴻⵙ ⵜⵉⵍⵉ ⵚⵚⵓⵍⵟⴰ ⵅ ⵓⵣⴻⴵⵉⴼ ⵏⵏⴻⵙ ⵅ ⵙⵙⵉⴱⴱⴻⵜ ⵏ ⵍⵎⴰⵍⴰⴽⴰⵜ.
11 ⵎⴰⵛⴰ ⴷⵉ ⵙⵉⴷⵉⵜⵏⴻⵖ ⴰⵔⵢⴰⵣ ⵡⴰⵔ ⵉⴵⵉ ⴱⵍⴰ ⵜⴰⵎⵖⴰⵔⵜ, ⵓⵍⴰ ⴷ ⵜⴰⵎⵖⴰⵔⵜ ⵡⴰⵔ ⵜⴻⴵⵉ ⴱⵍⴰ ⴰⵔⵢⴰⵣ.
12 ⵎⵉⵏⵣⵉ ⴰⵎ ⵎⴰⵎⵎⴻⵛ ⵜⴰⵎⵖⴰⵔⵜ ⵜⵓⵙⴰ-ⴷⴷ ⵣⴻⴳ ⵡⴻⵔⵢⴰⵣ, ⴰⵎⴻⵏⵏⵉ ⵄⴰⵡⴻⴷ ⵉⴵⴰ ⵡⴻⵔⵢⴰⵣ ⵙ ⵜⴻⵎⵖⴰⵔⵜ, ⵎⴰⵛⴰ ⵎⴰⵔⵔⴰ ⵎⵉⵏ ⵉⴵⴰⵏ ⴰⵇⴰ-ⵜ ⵣⵉ ⴰⵔⴻⴱⴱⵉ.
13 ⵃⴻⴽⵎⴻⵎ ⴽⴻⵏⵏⵉⵡ ⵙⵉⵎⴰⵏⵜ ⵏⵡⴻⵎ: ⵎⴰ ⵜⵓⵙⴰ-ⴷⴷ ⵅ ⵜⴻⵎⵖⴰⵔⵜ ⴰⴷ ⵜⴻⵥⵥⴰⴵ ⵉ ⴰⵔⴻⴱⴱⵉ ⴰⵎ ⵜⴻⵙⵙⵄⴰⵔⵔⴰ ⵉ ⵓⵣⴻⴵⵉⴼ ⵏⵏⴻⵙ?
14 ⵎⴰ ⵜⵓⴱⴱⴰⵔⵜ ⵙⵉⵎⴰⵏⵜ ⵏⵏⴻⵙ ⵡⴰⵔ ⴷ ⴰⵡⴻⵎ ⵜⴻⵙⵙⵛⴰⵏ ⴱⴻⵍⵍⵉ ⴰⵛⵓⵡⵡⴰⴼ ⴷ ⴰⵣⵉⵔⴰⵔ ⴷ ⵍⴻⴼⴹⵉⵃⴻⵜ ⵉ ⵡⴻⵔⵢⴰⵣ?
15 ⵎⴰⵛⴰ ⵉ ⵜⴻⵎⵖⴰⵔⵜ ⴷ ⴰⵄⵓⴵⵉ ⵎⴰⵍⴰ ⵖⴰⵔⴻⵙ ⵢⵉⵍⵉ ⵓⵛⵓⵡⵡⴰⴼ ⴷ ⴰⵣⵉⵔⴰⵔ, ⵎⵉⵏⵣⵉ ⵉⵎⵎⴻⵡⵛ ⴰⵙ ⵓⵛⵓⵡⵡⴰⴼ ⴰⵎ ⵓⵍⴻⵃⵃⴰⴼ.
16 ⵎⴰⵛⴰ ⵎⴰⵍⴰ ⵉⵅⵙ ⵃⴻⴷ ⴰⴷ ⵉⵅⴰⵔⵡⴻⴹ ⵎⴰⵏ ⴰⵢⴰ, ⵏⴻⵛⵛⵉⵏ ⵡⴰⵔ ⵖⴰⵔⵏⴻⵖ ⴱⵓ ⵜⵏⴰⵎⵉⵜ ⵏⵏⵉ ⵓⵍⴰ ⴷ ⵜⵉⵎⴻⵙⵎⵓⵏⵉⵏ ⵏ ⴰⵔⴻⴱⴱⵉ.
ⴰⵎⴻⵏⵙⵉ ⵉⵇⴻⴷⴷⵙⴻⵏ
17 ⵡⴻⵚⵚⵉⵖ ⴽⴻⵏⵏⵉⵡ ⵅ ⵜⵎⴻⵙⵍⴰⵢⵉⵏ-ⴰ ⵍⴻⵅⵅⵓ, ⴰⵇⴰ ⵡⴰⵔ ⴷ ⴰⵡⴻⵎ ⵜⵜⴻⴳⴳⴻⵖ ⵛⵛⴰⵏ, ⵎⵉⵏⵣⵉ ⵡⴰⵔ ⵜⵓⵢⵓⵔⴻⵎ ⵖⴰⵔ ⵣⵣⴰⵜ, ⵎⴰⵛⴰ ⵜⵓⵢⵓⵔⴻⵎ ⵖⴰⵔ ⴹⴻⴼⴼⴰⵔ.
18 ⵖⴰⵔ ⵓⵎⴻⵣⵡⴰⵔ, ⵎⴰⵍⴰ ⵜⵎⵓⵏⴻⵎ ⴰⵎ ⵜⵎⴻⵙⵎⵓⵏⵜ, ⵙⵍⵉⵖ ⴰⵇⴰ ⴷⵉⵏ ⵊⴰⵔ ⴰⵡⴻⵎ ⴰⵎⵙⴻⴱⴹⵉ, ⵓ ⵎⴰⵏ ⴰⵢⴰ ⵣⴻⵎⵎⴰⵔⴻⵖ ⴰⴷ ⵜ ⴰⵎⵏⴻⵖ ⵉ ⵉⵊⵊ ⵏ ⵡⴻⵣⵢⴻⵏ,
19 ⵙ ⵎⵉⵏⵣⵉ ⵉⵜⵜⵅⴻⵚⵚⴰ ⴰⴷ ⴷⵉⵏ ⵉⵍⵉⵏ ⵊⴰⵔ ⴰⵡⴻⵎ ⵉⵎⵛⵓⴱⴱⵛⴻⵏ, ⵃⵉⵎⴰ ⴰⴷ ⵉⴱⴰⵏ ⵎⴰⵏ ⵡⴻⵏ ⵣⵣⴰⵢⵡⴻⵎ ⵉ ⵉⴵⴰⵏ ⴷ ⴰⵎⵇⴻⴵⴻⴱ.
20 ⵅⵎⵉ ⵜⵜⵎⵓⵏⴰⵎ, ⵡⴰⵔ ⵜᵉⵜⵜⴻⵜⵜⴻⵎ ⴷ ⵜⵙⴻⵙⵙⴻⵎ ⴰⵎ ⵎⴰⵎⵎⴻⵛ ⵉⵛⵓⵡⵡⴰⵔ ⴷⴻⴳ ⵡⴰⵙⵙ ⵏ ⵙⵉⴷⵉⵜⵏⴻⵖ,
21 ⵎⴰⵛⴰ ⴽⵓⵍ ⵉⵊⵊⴻⵏ ⵉⵜⵜⴻⵜⵜ ⴰⵎⴻⵏⵙⵉ ⵏⵏⴻⵙ ⵉ ⵢⵉⵅⴻⴼ ⵏⵏⴻⵙ, ⵓⵛⴰ ⵅⴻⵏⵏⵉ ⵉⵊⵊⴻⵏ ⵏⵏⴻⵖⵏⵉ ⴷⴰⵢⴻⵙ ⵍⴰⵥ ⵓⵛⴰ ⵏⵏⴻⵖⵏⵉ ⵉⵙⵛⴰⵔⴰ.
22 ⵎⴰ ⵡⴰⵔ ⵖⴰⵔⵡⴻⵎ ⵜⵓⴷⵔⵉⵏ ⵎⴰⵏⵉ ⵖⴰ ⵜⴻⵛⵛⴻⵎ ⵓ ⵎⴰⵏⵉ ⵖⴰ ⵜⴻⵙⵡⴻⵎ? ⵏⵉⵖ ⵜⴻⵙⵙⴻⵃⵇⴰⵔⴰⵎ ⵜⴰⵎⴻⵙⵎⵓⵏⵜ ⵏ ⴰⵔⴻⴱⴱⵉ ⵓⵛⴰ ⵜⴻⵙⵙⵃⴻⵛⵛⴰⵎⴻⵎ ⵉⵏⵏⵉ ⵡⴰⵔ ⵖⴰⵔ ⵉⴵⵉ ⵛⴰ? ⵎⵉⵏ ⴷ ⴰⵡⴻⵎ ⵉ ⵖⴰ ⵉⵏⵉⵖ? ⵎⴰ ⴰⴷ ⴰⵡⴻⵎ ⴳⴳⴻⵖ ⵛⵛⴰⵏ? ⵍⵍⴰ, ⵡⴰⵔ ⴷ ⴰⵡⴻⵎ ⵜⵜⴻⴳⴳⴻⵖ ⵛⵛⴰⵏ!
23 ⵎⵉⵏⵣⵉ ⵎⵉⵏ ⵟⵟⴼⴻⵖ ⵣⵉ ⵙⵉⴷⵉⵜⵏⴻⵖ, ⵙⵙⵉⵡⴹⴻⵖ ⴰⵡⴻⵎ ⵜ-ⵉ-ⴷⴷ, ⴰⵇⴰ ⵙⵉⴷⵉⵜⵏⴻⵖ ⵢⴰⵙⵓⵄ ⴷⵉ ⴵⵉⵍⴻⵜ ⵉ ⴷⵉ ⵉⵜⵜⵡⴰⵖⴷⴰⵔ, ⵉⴽⵙⵉ ⴰⵖⵔⵓⵎ,
24 ⵉⴱⴰⵔⴻⴽ, ⵢⴰⵔⵥⴰ ⵉ-ⵜ, ⵉⵏⵏⴰ: “ⴽⵙⵉⵎ, ⵜⴰ ⴷ ⴰⵔⵔⵉⵎⴻⵜ ⵉⵏⵓ ⵉ ⵅⴰⵡⴻⵎ ⵉⵜⵜⵡⴰⵔⵥⴻⵏ, ⴳⴳⴻⵎ ⴰⵢⴰ ⴰⵎⵎⵓ ⵉ ⵍⵉⴷⴰⵔⴻⵜ ⵅⴰⴼⵉ!”
25 ⵓⵛⴰ ⴰⵎⵎⵓ ⴰⵡⴰⵔⵏⵉ ⴰⵎⴻⵏⵙⵉ ⵉⵡⵛⴰ ⵍⴽⴰⵙ, ⵉⵏⵏⴰ:
“ⵍⴽⴰⵙ-ⴰ ⴷ ⵍⵄⴰⵀⴷ ⵏ ⵊⴷⵉⴷ
ⴷⴻⴳ ⵉⴷⴰⵎⵎⴻⵏ ⵉⵏⵓ.
ⴳⴳⴻⵎ ⴰⵢⴰ,
ⵎⴻⵛⵃⴰⵍ ⵎⴰ ⵣⵣⴰⵢⴻⵙ ⵜⴻⵙⵡⵉⵎ,
ⵉ ⵍⵉⴹⴰⵔⴻⵜ ⵅⴰⴼⵉ.”
26 ⵙ ⵎⵉⵏⵣⵉ ⵎⴻⵛⵃⴰⵍ ⵎⴰ ⵉ ⵖⴰ ⵜⴻⵛⵛⴻⵎ ⴰⵖⵔⵓⵎ-ⴰ ⵓ ⴰⴷ ⵜⴻⵙⵡⴻⵎ ⵣⵉ ⵍⴽⴰⵙ-ⴰ, ⴰⵇⴰ ⵜᵉⵜⵜⵉⴷⴰⵔⴻⵎ ⵍⵎⴻⵡⵜ ⵏ ⵙⵉⴷⵉⵜⵏⴻⵖ ⴰⵍ ⴷⴷ ⵖⴰ ⵢⴰⵙ.
27 ⵙ ⵓⵢⴻⵏⵏⵉ ⵎⴰⵏ ⵡⴻⵏ ⵉ ⵖⴰ ⵉⵛⵛⴻⵏ ⴰⵖⵔⵓⵎ ⵏ ⵙⵉⴷⵉ ⵓⵛⴰ ⴰⴷ ⵉⵙⵓ ⵣⵉ ⵍⴽⴰⵙ ⵏⵏⴻⵙ, ⴰⵎ ⵡⴰⵔ ⵉⵜⵜⵉⵍⵉ ⵙ ⵓⵙⴷⴰⵀⴻⴵⵉ ⵉ ⵎⴰⵏ ⴰⵢⴰ, ⴰⴷ ⵢⵉⵍⵉ ⵙ ⵓⵎⴰⵔⵡⴰⵙ ⵉ ⵉⴷⴰⵎⵎⴻⵏ ⵏ ⵙⵉⴷⵉ ⵓ ⵉ ⴰⵔⵔⵉⵎⴻⵜ ⵏⵏⴻⵙ.
28 ⵙ ⵓⵢⴻⵏⵏⵉ ⴻⵊⵊ ⴽⵓⵍ ⵉⵊⵊ ⴰⴷ ⵉⵇⴻⴵⴻⴱ ⵉⵅⴻⴼ ⵏⵏⴻⵙ, ⵓⵛⴰ ⴻⵊⵊ ⵉ-ⵜ ⴰⴷ ⵉⵛⵛ ⵅⴻⵏⵏⵉ ⵣⴻⴳ ⵡⴻⵖⵔⵓⵎ ⵓ ⴰⴷ ⵉⵙⵓ ⵣⵉ ⵍⴽⴰⵙ.
29 ⵎⵉⵏⵣⵉ ⵡⵉ ⵖⴰ ⵉⵛⵛⴻⵏ ⴷ ⵡⵉ ⵖⴰ ⵉⵙⵡⴻⵏ ⴰⵎ ⵡⴰⵔ ⵉⵙⴷⵉⵀⴻⴵ, ⴰⵇⴰ ⵏⴻⵜⵜⴰ ⴰⴷ ⵉⵙⵙⵉⵡⴻⴹ ⵍⵃⵓⴽⵎ ⵖⴰⵔ ⵉⵅⴻⴼ ⵏⵏⴻⵙ ⴰⵎ ⵉⵜⵜⴻⵜⵜ ⵓ ⴰⵎ ⵉⵙⴻⵙⵙ, ⵎⵉⵏⵣⵉ ⵏⴻⵜⵜⴰ ⵡⴰⵔ ⵉⴼⴰⵔⵔⴻⵣ ⵛⴰ ⴰⵔⵔⵉⵎⴻⵜ ⵏ ⵙⵉⴷⵉ.
30 ⵙ ⵓⵢⴻⵏⵏⵉ ⴰⵇⴰ ⴷⵉⵏ ⴰⵟⵟⴰⵙ ⵏ ⵢⵉⵏⵏⵉ ⵉⴹⴻⵄⴼⴻⵏ ⴷ ⵢⵉⵏⵏⵉ ⵉⵀⴻⵍⵛⴻⵏ ⵊⴰⵔ ⴰⵡⴻⵎ ⵓⵛⴰ ⴰⵟⵟⴰⵙ ⴷⴻⵡⵍⴻⵏ ⵜⵜᵉⵟⵟⵚⴻⵏ ⵉⴹⴻⵚ ⵏ ⵍⵎⴻⵡⵜ.
31 ⵎⴰⵛⴰ ⵎⴰⵍⴰ ⵏⴻⵃⴽⴻⵎ ⵅ ⵉⵅⴻⴼ ⵏⵏⴻⵖ, ⵅⴻⵏⵏⵉ ⵡⴰⵔ ⵏⴻⵜⵜⵡⴰⵃⴰⴽⴻⵎ.
32 ⵎⴰⵛⴰ ⵎⴰⵍⴰ ⵏⴻⵜⵜⵡⴰⵃⴽⴻⵎ ⵣⵉ ⵙⵉⴷⵉⵜⵏⴻⵖ, ⴰⵇⴰ ⵏⴻⵜⵜⵡⴰⵔⴻⴱⴱⴰ, ⵃⵉⵎⴰ ⵡⴰⵔ ⵏⴻⵜⵜⵡⴰⵃⴰⴽⴻⵎ ⵛⴰ ⴰⴽ-ⴷ ⴷⴷⵓⵏⴻⵛⵜ.
33 ⵣⵉ ⵍⴻⵅⵅⵓ, ⴰ ⴰⵢⵜⵎⴰ, ⵅⵎⵉ ⵖⴰ ⵜⵎⵓⵏⴻⵎ ⵃⵉⵎⴰ ⴰⴷ ⵜⴻⵛⵛⴻⵎ, ⵔⴰⵊⴰⵎ ⵉⵊⵊⴻⵏ ⵡⴻⵏⵏⴻⵖⵏⵉ.
34 ⵎⴰⵍⴰ ⵃⴻⴷ ⴷⴰⵢⴻⵙ ⵍⴰⵥ, ⴻⵊⵊ ⵉ-ⵜ ⴰⴷ ⵉⵛⵛ ⴷⵉ ⵜⴰⴷⴷⴰⵔⵜ ⵏⵏⴻⵙ, ⵃⵉⵎⴰ ⵡⴰⵔ ⵜᵉⵜⵜⵎⵓⵏⴻⵎ ⵉ ⵛⵛⵔⴻⵄ. ⵎⵉⵏ ⵉⵇⵇⵉⵎⴻⵏ, ⴰⴷ ⵜ ⵄⴻⴷⵍⴻⵖ ⵅⵎⵉ ⴷⴷ ⵖⴰ ⵢⴰⵙⴻⵖ.