27
ⵍⵀⴰⵔⴷ ⵏ ⴰⵢⵓⴱ ⵅ ⵉⵄⴻⴼⴼⴰⵏⴻⵏ
1 ⵢⴰⵔⵏⵉ ⵉⵙⵙⴳⴻⵄⵄⴻⴷ ⴰⵢⵓⴱ ⵍⵀⴰⵔⴷ ⵏ ⵍⵎⴰⵜⴰⵍ ⵏⵏⴻⵙ, ⵉⵏⵏⴰ:
2 ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⴰⵔⴻⴱⴱⵉ
ⵏⵏⵉ ⵉ ⴷ ⴰⵢⵉ ⵉⴽⴽⵙⴻⵏ ⵜⴰⵙⵖⴰⵔⵜ ⵉⵏⵓ,
ⴰⵎⵣⴻⵎⵎⴰⵔ ⵅ ⴽⵓⵍⵛⵉ
ⵏⵏⵉ ⵉⵙⵙⴰⵔⵣⴰⴳⴻⵏ ⵍⴻⵄⵎⴰⵔ ⵉⵏⵓ,
3 ⵎⵉⵏ ⵖⴰ ⵢⴻⴽⴽ ⵏⵏⴻⴼⵙ ⵄⴰⴷ ⴷⴰⵢⵉ
ⵓ ⴰⵔⵔⵓⵃ ⵏ ⴰⵔⴻⴱⴱⵉ ⵄⴰⴷ ⴷⴻⴳ ⵡⴻⵏⵣⴰⵔⴻⵏ ⵉⵏⵓ,
4 ⵡⴰⵔ ⵇⵇⴰⵔⴻⵏ ⵉⵢⴻⵏⵛⵉⵛⴻⵏ ⵉⵏⵓ ⵍⵖⴻⵛⵛ
ⵓ ⵉⵍⴻⵙ ⵉⵏⵓ ⵡⴰⵔ ⵉⵇⵇⴰⵔ ⵉⵅⴰⵔⵔⵉⵇⴻⵏ!
5 ⵉⴳⴳⵯⴻⵊ ⵅⴰⴼⵉ ⴰⴷ ⴳⴳⴻⵖ ⴽⴻⵏⵏⵉⵡ
ⴷⵉ ⵜⵙⴻⵢⵢⴰⵔⴻⵙⵜ ⵏ ⵜⵉⴷⴻⵜⵜ.
ⴰⵍ ⵖⴰ ⵙⵙⵓⴼⴼⵖⴻⵖ ⴱⵓⵃⴱⴻⵍ ⵉⵏⵓ,
ⵡⴰⵔ ⵜⵜⴻⵊⵊⵉⵖ ⴰⴷ ⵅⴰⴼⵉ ⴽⴽⵙⴻⵏ ⴰⵙⴻⴳⴳⴻⴷ ⵉⵏⵓ.
6 ⴰⴷ ⵟⵟⴼⴻⵖ ⴷⵉ ⵜⵙⴻⴳⴷⴰ ⵉⵏⵓ,
ⵡⴰⵔ ⵣⵣⴰⵢⴻⵙ ⴰⵔⴻⵅⵅⵓⵖ ⵛⴰ.
ⵓⵍ ⵉⵏⵓ ⵡⴰⵔ ⴷ ⴰⵙ ⵢⴰⵔⴻⵅⵅⵓ
ⵓⵍⴰ ⵅ ⵉⵊⵊⴻⵏ ⵣⴻⴳ ⵡⵓⵙⵙⴰⵏ ⵉⵏⵓ.
7 ⵎⵍⵉ ⴷⴷ-ⵉⴱⴰⵏ ⵍⴻⵄⴷⵓ ⵉⵏⵓ ⴷ ⴰⵄⴻⴼⴼⴰⵏ,
ⵡⴻⵏⵏⵉ ⴰⴽⵉⴷⵉ ⵉⵜⵜⵎⴻⵏⵖⴰⵏ
ⴷ ⵎⵎⵉⵙ ⵏ ⵍⵎⵓⵄⵚⵉⵢⵢⴻⵜ.
8 ⵎⴰⵖⴰⵔ ⵎⴰⵏ ⵍⴰⵢⴰⵙ ⵏ ⵓⵎⵏⴰⴼⴻⵇ,
ⵅⵎⵉ ⵖⴰ ⵜᵉⵜⵜⵡⴰⵇⴹⴻⵄ ⵜⵓⴷⴰⵔⵜ ⵏⵏⴻⵙ,
ⵅⵎⵉ ⵣⵣⴰⵢⴻⵙ ⵉ ⵖⴰ ⵉⵇⵍⴻⵄ ⴰⵔⴻⴱⴱⵉ ⵍⴻⵄⵎⴰⵔ ⵏⵏⴻⵙ?
9 ⵎⴰ ⴰⴷ ⵉⵙⴻⵍ ⴰⵔⴻⴱⴱⵉ ⵉ ⵉⵖⵓⵢⵢⴰⵏ ⵏⵏⴻⵙ,
ⵅⵎⵉ ⵅⴰⵙ ⴷⴷ ⵖⴰ ⵉⵡⴹⴰ ⵍⵃⴻⵚⵔⴰⵏ?
10 ⵎⴰ ⴰⴷ ⵉⴼⴰⵔⵃ ⵖⴰⵔ ⵓⵎⵣⴻⵎⵎⴰⵔ ⵅ ⴽⵓⵍⵛⵉ?
ⵎⴰ ⴰⴷ ⵉⵍⴰⵖⴰ ⵅ ⴰⵔⴻⴱⴱⵉ ⵎⴻⵍⵎⵉ ⵎⴰ?
11 ⵏⴻⵛⵛ ⴰⴷ ⴰⵡⴻⵎ ⵙⵙⵍⴻⵎⴷⴻⵖ ⵅ ⵓⴼⵓⵙ ⵏ ⴰⵔⴻⴱⴱⵉ,
ⵎⵉⵏ ⵉⵄⴻⵡⵡⴻⵍ ⵓⵎⵣⴻⵎⵎⴰⵔ ⵅ ⴽⵓⵍⵛⵉ,
ⵡⴰⵔ ⵜ ⵙⵙⵏⵓⴼⴼⴰⵔⴻⵖ.
12 ⵅⵣⴰⵔ, ⴽⴻⵏⵏⵉⵡ ⵎⴰⵔⵔⴰ ⵉⴷⵡⴻⵎ ⵜⴻⵥⵔⵉⵎ ⵜ.
ⵎⴰⵢⴻⵎⵎⵉ ⵜⴰⵔⴻⵏⵏⵢⴻⵎ
ⵜⴻⵙⵙⵓⴼⴼⵓⵖⴻⵎ ⵎⵉⵏ ⵉⴱⴻⵟⵟⵍⴻⵏ ⵜⴻⵇⵇⴰⵔⴻⵎ:
13 “ⵜⴰ ⴷ ⵜⴰⵙⵖⴰⵔⵜ ⵏ ⴱⵏⴰⴷⴻⵎ ⴰⵄⴻⴼⴼⴰⵏ ⵖⴰⵔ ⵙⵉⴷⵉ,
ⵜⴰⵙⵖⴰⵔⵜ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ
ⵏⵏⵉ ⵉ ⵖⴰ ⵟⵟⴼⴻⵏ ⵣⴻⴳ ⵓⵎⵣⴻⵎⵎⴰⵔ ⵅ ⴽⵓⵍⵛⵉ:
14 ⵅⵎⵉ ⵖⴰ ⵎⵎⴰⵔⴻⵏⵢⴻⵏ ⵉⵃⴻⵏⵊⵉⵔⴻⵏ ⵏⵏⴻⵙ,
ⵉ ⵙⵙⵉⴼ ⵓⵎⵉ ⵓⵔⵉⵏ.
ⵉⵖⴻⴷⴷⵓⵜⴻⵏ ⵏⵏⴻⵙ ⵡⴰⵔ ⵜⵜⵢⴰⵡⴰⵏⴻⵏ ⴰⵖⵔⵓⵎ,
15 ⵡⵉ ⵣⵣⴰⵢⴻⵙ ⵉ ⵖⴰ ⵢⴰⵔⴻⵡⵍⴻⵏ
ⴰⴷ ⵜⵜⵡⴰⵏⴻⴹⵍⴻⵏ ⵙ ⵟⵟⴰⵄⵓⵏ,
ⵜⵉⵊⵊⴰⵍ ⵏⵏⴻⵙ ⵡⴰⵔ ⵜⵜⵔⵓⵏⵜ ⵛⴰ.
16 ⵡⴰⵅⵅⴰ ⵉⵊⴰⵔⵔⵓⵡ ⵏⵏⵓⵇⴰⵔⵜ ⴰⵏⴻⵛⵜ ⵏ ⵓⵛⴰⵍ,
ⵓ ⵉⵙⵙⴻⵡⵊⴰⴷ ⴰⵔⵔⵓⴹ ⴰⵏⴻⵛⵜ ⵏ ⵓⵛⴰⵍ,
17 ⵉⵡⴰ, ⵡⴰⵅⵅⴰ ⴰⴷ ⵜ ⵉⵙⵙⴻⵡⵊⴻⴷ,
ⴰⵎⵙⴻⴳⴳⴻⴷ ⴰⴷ ⵣⵣⴰⵢⴻⵙ ⵢⴰⵔⴹ
ⵓⵛⴰ ⴰⵎⴻⵣⴷⴰⴳ ⴰⴷ ⵉⴱⴹⴰ ⵏⵏⵓⵇⴰⵔⵜ.
18 ⴰⴷ ⵉⴱⵏⴰ ⵜⴰⴷⴷⴰⵔⵜ ⵏⵏⴻⵙ ⴰⵎ ⵜⵛⵉⵏⴷⴰ,
ⴰⵎⴻⵛⵏⴰⵡ ⵜⴰⵏⵡⴰⵍⵜ
ⵉ ⵉⵙⵙⴱⴻⴷⴷⴰ ⵓⵄⴻⵙⵙⴰⵙ ⵉ ⵢⵉⵅⴻⴼ ⵏⵏⴻⵙ.
19 ⴰⴷ ⴷⴰⵢⴻⵙ ⵉⵟⵟⴻⵚ ⴷ ⴱⵓ-ⵡⴰⴳⵍⴰ,
ⵎⴰⵛⴰ ⵡⴰⵔ ⵢⴰⵔⴻⵏⵏⵉ ⴷⴻⴳ ⵡⴰⴳⵍⴰ ⵏⵏⴻⵙ.
ⵎⴰⵍⴰ ⵢⴰⵔⵣⴻⵎ ⵜⵉⵟⵟⴰⵡⵉⵏ ⵏⵏⴻⵙ,
ⵡⴰⵔ ⴷⵉⵏ ⵉⵜⵜⵖⵉⵎⵉ ⵄⴰⴷ ⵡⴰⵍⵓ.
20 ⵉⵏⴻⵅⵍⵉⵄⴻⵏ ⴰⴷ ⵅⴰⵙ ⴰⵔⴻⵏⵢⴻⵏ
ⴰⵎ ⵉⵖⴻⵣⵔⴰⵏ ⵏ ⵡⴰⵎⴰⵏ,
ⵜⴰⵃⴰⵔⵢⴰⴹⵜ ⴰⴷ ⵜ-ⵉ-ⴷⴷ-ⵜⴻⵇⴹⴻⵄ ⵙ ⴵⵉⵍⴻⵜ.
21 ⴰⵙⴻⵎⵎⵉⴹ ⵣⵉ ⵛⵛⴰⵔⵇ ⴰⴷ ⵜ ⵉⴽⵙⵉ,
ⵉⵡⴰ ⴷⵉⵏⵏⵉ ⵉⵜⵜⵔⴰⵃ,
ⴰⴷ ⵜ-ⵉ-ⴷⴷ-ⵉⵇⵍⴻⵄ ⵣⴻⴳ ⵡⴻⵎⵛⴰⵏ ⵏⵏⴻⵙ.
22 ⴰⵔⴻⴱⴱⵉ ⴰⴷ ⵉⵙⵙⵉⵡⴻⴹ ⵎⴰⵔⵔⴰ ⴰⵢⴰ
ⵅ ⵓⵣⴻⴵⵉⴼ ⵏⵏⴻⵙ, ⵡⴰⵔ ⵅⴰⵙ ⵉⵙⵙⵄⵉⵣⵣⵉ ⵛⴰ.
ⴰⴷ ⵢⴰⵔⵡⴻⵍ ⴷⴻⵖⵢⴰ ⵣⵉ ⵜⴻⵛⵜⵉ ⵏ ⵓⴼⵓⵙ ⵏⵏⴻⵙ.
23 ⵉⵡⴷⴰⵏ ⴰⴷ ⵅⴰⵙ ⵡⵡⵜⴻⵏ ⴷⴻⴳ ⵉⴼⴰⵙⵙⴻⵏ ⵏⵙⴻⵏ
ⴰⵎ ⵣⵣⴰⵢⴻⵙ ⵙⵜⵀⴻⵣⵣⴰⵏ
ⵓⵛⴰ ⴰⴷ ⵅⴰⵙ ⵚⴻⴼⴼⴰⵔⴻⵏ
ⵣⴻⴳ ⵡⴻⵎⵛⴰⵏ ⵏ ⵜⵣⴻⴷⴷⵉⵖⵜ ⵏⵏⴻⵙ.”