6
ⴰⵛⴻⵜⵛⵉ ⵏ ⵙⵉⴷⵉ ⵅ ⵍⴳⴻⵏⵙ ⵏⵏⴻⵙ ⵓ ⵅ ⵓⵔⵛⴰⵍⵉⵎ
1 “ⵙⵍⴻⵎ ⵅⴻⵏⵏⵉ ⵎⵉⵏ ⵉⵇⵇⴰⵔ ⵙⵉⴷⵉ:
ⴽⴽⴰⵔ, ⵛⴰⵔⵔⴻⵄ ⵣⵣⴰⵜ ⵉ ⵡⵓⴷⴻⵎ ⵏ ⵉⴷⵓⵔⴰⵔ,
ⵓ ⴻⵊⵊ ⵜⵉⵡⵔⵉⵔⵉⵏ ⴰⴷ ⵙⵍⴻⵏⵜ ⵉ ⵜⵎⵉⵊⵊⴰ ⵏⵏⴻⵛ!
2 ⵙⵍⴻⵎ, ⴰ ⵉⴷⵓⵔⴰⵔ, ⵉ ⴷⴷⴻⵄⵡⴻⵜ ⵏ ⵙⵉⴷⵉ,
ⵓⵍⴰ ⴷ ⴽⴻⵏⵏⵉⵡ, ⴷⵙⵓⵙⴰ ⵉⵎⴻⵜⵏⴻⵏ ⵏ ⵜⴻⵎⵎⵓⵔⵜ,
ⵎⵉⵏⵣⵉ ⵙⵉⴷⵉ ⵖⴰⵔⴻⵙ ⵉⵛⵜ ⵏ ⴷⴷⴻⵄⵡⴻⵜ
ⴰⴽ-ⴷ ⵍⴳⴻⵏⵙ ⵏⵏⴻⵙ
ⵏⴻⵜⵜⴰ ⵉⴳⴳⵓⵔ ⵖⴰⵔ ⵜⴰⴷⴷⴰⵔⵜ ⵏ ⵛⵛⵔⴻⵄ
ⴰⴽ-ⴷ ⵉⵙⵔⴰⵉⵍ.”
3 “ⴰ ⵍⴳⴻⵏⵙ ⵉⵏⵓ, ⵎⵉⵏ ⴷ ⴰⵛ ⴳⴳⵉⵖ,
ⵓ ⵙ ⵎⴰⵏⵜⴻⵏ ⵉ ⵣⵉ ⵛⴻⴽ ⵙⵙⵉⵃⵍⴻⵖ?
ⵛⴻⵀⵀⴻⴷ ⴹⵉⴷⴷ ⵉⵏⵓ!
4 ⵏⴻⵛⵛ ⵏⴻⴷⵀⴻⵖ ⵛⴻⴽ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ,
ⵣⵉ ⵜⴰⴷⴷⴰⵔⵜ ⵏ ⵜⴻⵙⵎⵓⵖⵉ.
ⵏⴻⵛⵛ ⵙⵙⴻⴽⴽⴻⵖ-ⴷⴷ ⵎⵓⵙⴰ
ⴷ ⵀⴰⵔⵓⵏ ⴷ ⵎⴰⵔⵢⴰⵎ
ⵣⵣⴰⵜ ⵉ ⵓⵖⴻⵎⴱⵓⴱ ⵏⵏⴻⵛ.
5 ⴰ ⵍⴳⴻⵏⵙ ⵉⵏⵓ, ⴼⴻⴽⴽⴰⵔ ⵎⵍⵉⵃ ⴷⵉ ⵍⵖⴰⵔ
ⵉ ⵜⵓⵖⴰ ⵉⵏⴻⴽⴽⵯⴰ ⴰⴷ ⵢⴻⴳⴳ ⴱⴰⵍⴰⴽ,
ⴰⵊⴻⴵⵉⴷ ⵏ ⵎⵓ’ⴰⴱ,
ⵓ ⴷⵉ ⵎⵉⵏ ⵅⴰⵙ ⴷⴷ-ⵢⴰⵔⵔⴰ ⴱⵉⵍⵄⴰⵎ,
ⵎⵎⵉⵙ ⵏ ⴱⴰⵄⵓⵔ
ⵓ ⴷⵉ ⵎⵉⵏ ⵉⵎⵙⴰⵔⴻⵏ ⵣⵉ ⵛⵉⵟⵟⵉⵎ ⴰⵍ ⵊⵉⵍⵊⴰⵍ,
ⵃⵉⵎⴰ ⴰⴷ ⵜⴻⵙⵙⵏⴻⴷ
ⵜⵉⵎⴻⴳⴳⴰ ⵉⵙⴻⴳⴳⴷⴻⵏ ⵏ ⵙⵉⴷⵉ.”
ⵎⵉⵏ ⵉⵅⵙ ⵙⵉⴷⵉ ⵣⵉ ⵍⴳⴻⵏⵙ ⵏⵏⴻⵙ?
6 “ⵙ ⵎⵉⵏ ⵣⵉ ⵖⴰ ⵔⴰⵃⴻⵖ
ⴰⴷ ⵎⵎⴻⵍⵇⵉⵖ ⴰⴽ-ⴷ ⵙⵉⴷⵉ,
ⴰⴷ ⴰⴹⴰⵔⴻⵖ ⵣⵣⴰⵜ ⵉ ⴰⵔⴻⴱⴱⵉ ⵢⵓⵄⵍⴰⵏ?
ⵎⴰ ⴰⴷ ⵔⴰⵃⴻⵖ ⴰⴷ ⵜ ⵎⵎⴻⵍⵇⵉⵖ
ⵙ ⵜⵖⴰⵔⵚⴰ ⵏ ⵡⴻⵛⵎⴰⴹ,
ⵏⵉⵖ ⵙ ⵉⵄⴻⵊⵎⵉⵢⵢⴻⵏ ⵏ ⵉⵊⵊ ⵏ ⵓⵙⴻⴳⴳⵯⴰⵙ?
7 ⵎⴰ ⴰⴷ ⵢⴰⵔⴹⴰ ⵙⵉⴷⵉ
ⵙ ⵍⵓⵍⵓⴼ ⵏ ⵉⵛⴰⵔⵔⵉⵢⵢⴻⵏ,
ⵙ ⵄⴻⵛⵔⴰ ⵏ ⵍⵓⵍⵓⴼ ⵏ ⵜⵖⴻⵣⵔⴰⵜⵉⵏ ⵏ ⵣⵣⴻⵛⵜ?
ⵎⴰ ⴰⴷ ⵡⵛⴻⵖ ⴰⵎⴻⵏⵣⵓ ⵉⵏⵓ ⵉ ⵓⵅⴻⵟⵟⵓ ⵉⵏⵓ,
ⵍⵖⵉⴵⴻⵜ ⵏ ⵓⵄⴻⴷⴷⵉⵙ ⵉⵏⵓ
ⵉ ⴷⴷⵏⵓⴱ ⵏ ⵍⴻⵄⵎⴰⵔ ⵉⵏⵓ?
8 ⵏⴻⵜⵜⴰ ⵉⵙⵙⴰⵔⴳⴻⴱ ⵉ ⵛⴻⴽ, ⴰ ⴱⵏⴰⴷⴻⵎ,
ⵎⵉⵏ ⵉⵛⵏⴰⵏ,
ⵓ ⵎⵉⵏ ⵣⵣⴰⵢⴻⴽ ⵉⵜⵜⴻⵜⵜⴰⵔ ⵙⵉⴷⵉ,
ⴰⵇⴰ ⴰⴷ ⵜⴻⴳⴳⴻⴷ ⵍⵅⴰⵔ,
ⴰⴷ ⵜⴻⵅⵙⴻⴷ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ,
ⵓ ⴰⴷ ⵜⵓⵢⵓⵔⴻⴷ ⴰⴽ-ⴷ ⴰⵔⴻⴱⴱⵉ ⵏⵏⴻⵛ
ⵙ ⵓⵡⴰⴹⴻⵄ!”
ⴰⵔⴻⴷⴷⴻⴵ ⵏ ⵉⵄⴻⴼⴼⴰⵏⴻⵏ
9 “ⵜⵎⵉⵊⵊⴰ ⵏ ⵙⵉⴷⵉ ⵜᵉⵜⵜⵍⴰⵖⴰ ⵉ ⵜⴻⵏⴷⵉⵏⵜ.
ⵉⵙⴻⵎ ⵏⵏⴻⵛ ⵉⵜⵜⴰⵡⵉ-ⴷⴷ ⵓⴼⴻⴽⴽⵉ.
ⵙⵍⴻⵎ ⵉ ⵡⴻⵄⵎⵓⴷ
ⵓ ⵖⴰⵔ ⵡⴻⵏⵏⵉ ⵜ-ⵉ-ⴷⴷ ⵉⵙⵙⴻⴽⴽⴻⵏ!
10 ⵎⴰ ⴷⵉⵏ ⵄⴰⴷ ⵍⴻⵅⵣⵉⵏ ⵛⵛⵓⵔⴻⵏ ⵙ ⵍⵖⴰⵔ
ⴷⵉ ⵜⴰⴷⴷⴰⵔⵜ ⵏ ⵓⵄⴻⴼⴼⴰⵏ
ⵓⵍⴰ ⴷ ⵉⵊⵊ ⵏ ⵏⵏⵄⵉ ⵏ ⵍⵎⵓⴷ ⵏ ⵉⴼⴰ ⵉⵏⵇⴻⵚ?
11 ⵎⴰ ⵉⵣⴻⵎⵎⴰⵔ ⴰⴷ ⵉⵍⵉⵖ ⴷ ⴰⵎⴻⵣⴷⴰⴳ
ⵙ ⵍⵎⵉⵣⴰⵏⴰⵜ ⵏ ⵍⵖⴰⵔ,
ⵓ ⵙ ⵢⵉⵛⵜ ⵏ ⵜⴻⵛⵢⴰⵔⵜ ⵜⴻⵛⵛⵓⵔ
ⵙ ⵍⴻⵡⵣⵏⴰⵜ ⵉⵖⴻⵛⵛⴻⵏ?
12 ⴰⵢⵜ ⴱⵓ-ⵡⴰⴳⵍⴰ ⵏⵏⴻⵙ ⴰⵇⴰ ⵛⵛⵓⵔⴻⵏ ⵙ ⵍⵄⵓⵏⴼ,
ⵓⵍⴰ ⴷ ⵉⵎⴻⵣⴷⴰⵖ ⵏⵏⴻⵙ ⵇⵇⴰⵔⴻⵏ ⵉⵅⴰⵔⵔⵉⵇⴻⵏ
ⵓ ⵉⵍⴻⵙ ⵏⵙⴻⵏ ⴰⵇⴰ ⵉⵜⵜⵖⴻⵛⵛⴰ
ⴷⴻⴳ ⵓⵇⴻⵎⵎⵓⵎ ⵏⵙⴻⵏ.”
13 “ⵅⴻⵏⵏⵉ ⵏⴻⵛⵛ ⴰⵇⴰ ⵊⴰⵔⵃⴻⵖ ⵛⴻⵎ ⵙ ⵜⴻⵢⵢⵉⵜⴰ,
ⴰⵇⴰ ⵜᵉⵜⵜⵡⴰⵔⴻⴷⴷⴵⴻⴷ
ⵣⵉ ⵙⵙⵉⴱⴱⴻⵜ ⵏ ⴷⴷⵏⵓⴱ ⵏⵏⴻⵎ.
14 ⴰⴷ ⵜⴻⵛⵛⴻⴷ, ⵎⴰⵛⴰ ⵡⴰⵔ ⵜᵉⵜⵜⵊⵉⵡⵉⵏⴻⴷ,
ⵓ ⴰⴷ ⴷⴰⵢⴻⵎ ⵢⵉⵍⵉ ⵍⴰⵥ ⴷⵉ ⴷⴰⵅⴻⵍ ⵏⵏⴻⵎ.
ⴰⴷ ⵜⴻⴼⴼⵖⴻⴷ,
ⵎⴰⵛⴰ ⵡⴰⵔ ⵜⵏⴻⵊⵊⵎⴻⴷ,
ⵓ ⵎⵉⵏ ⵉⵏⴻⵊⵎⴻⵏ,
ⴰⴷ ⵜ ⵙⵙⴻⵄⴷⵓⵖ ⵉ ⵙⵙⵉⴼ.
15 ⴳⴳⵓⵔ ⴰⴷ ⵜⵣⴰⵔⵄⴻⴷ, ⵎⴰⵛⴰ ⵡⴰⵔ ⵜⵎⴻⵊⵊⴰⵔⴻⴷ,
ⴰⴷ ⵜⴻⴷⴷⵣⴻⴷ ⴰⵥⴻⵎⵎⵓⵔ,
ⵎⴰⵛⴰ ⵡⴰⵔ ⵜⴷⴻⵀⵀⵏⴻⴷ ⵉⵅⴻⴼ ⵏⵏⴻⵎ ⵙ ⵣⵣⴻⵛⵜ
ⴰⴷ ⵜⵥⴻⵎⵎⴻⴷ ⵓⵍⴰ ⴷ ⴱⵉⵏⵓ ⵏ ⵊⴷⵉⴷ ⵣⴻⴳ ⵓⴹⵉⵍ,
ⵎⴰⵛⴰ ⵡⴰⵔ ⵜᵉⵙⵙⴻⵙⵙⴻⴷ ⴱⵉⵏⵓ.
16 ⵎⴰⵖⴰⵔ ⵍⴳⴻⵏⵙ ⵉⵃⴻⵟⵟⴰⵏ ⵜⵉⵡⴻⵚⵚⴰ ⵏ ⵄⵓⵎⵔⵉ
ⵓ ⵎⴰⵔⵔⴰ ⵜⵉⵎⴻⴳⴳⴰ ⵜⵉⵄⴻⴼⴼⴰⵏⵉⵏ
ⵏ ⵜⴰⴷⴷⴰⵔⵜ ⵏ ⴰⵅⴰⴱ,
ⵓ ⴽⴻⵏⵏⵉⵡ ⵜⴹⴻⴼⴼⴰⵔⴻⵎ ⵍⴻⵛⵡⴰⵔ ⵏⵙⴻⵏ,
ⴰⵍⴰⵎⵉ ⵛⴻⵎ ⵉ ⵖⴰ ⵢⴰⵔⵔⴻⵖ
ⴷ ⵉⵛⵜ ⵏ ⵍⵇⴻⵛⵄⴻⵜ ⵏ ⵓⵏⴻⵅⵍⵉⵄ
ⵓⵍⴰ ⴷ ⵉⵎⴻⵣⴷⴰⵖ ⵏⵏⴻⵙ ⵉ ⵓⵙⴻⵎⵥⵉ.
ⴰⵎⵎⵓ ⵉ ⵖⴰ ⵜⴰⵔⴱⵓⵎ ⵍⵃⴻⴳⵔⴰ ⵏ ⵍⴳⴻⵏⵙ ⵉⵏⵓ.”