3
Ikiahatsa mytsyhyryze Deus bo tsimypamykysonaha.
1 Abaka katukytsa ikiahatsa Deus bo mytsyhyryze typamykysonahaktsa! Iwa typamykysokonaha:
— O Deus tisapyrẽna ty Sesus soho ty situk typamykysonahaze tysitsumuẽhĩ. Aidy sizubarẽtsa bo typamykysoziukunaha. Kytsa bo mopamykysokonahaze iwaze aharere bo hyỹ mykaranaha.
2 Sakurẽtsa tisapyrẽna humo maha. Ikiahatsa mywatsa my. O Deus sisakimyijanikitsa ba ziksisininiwynaha. Kytsa tisapyrẽna humo sispirikpobyitsa siaknitsitsa mysibakyzykynaha. Asahi simysapybyitsa mykaranaha. Ikia batu hỹ tsimy zeka ba ziksibanaha — tsimaha my.
Iwa Deus bo mytsyhyryze tsimypamykysokonaha.
3 Mypehakatsa kino pahatsumuẽhĩekik. Pahakuwyky. Imysapybyita ba pahasininiwy. Sesus humo ka ba zahabezenaha Sesus ahahumo tsimypokzitsiukrẽta. Iwatahi imysapybyikita pokso ja ba ahapybyhuk.
4 Katsa ahahumo mykurẽtsa Sesus hi mymypokzitsiki ikiahatsa soho humo myspihikrẽtsa. Amy ty tsikahahyrinymyrykynaha ty atsatu tsimyzurukunaha. Myharere bo hyỹ tsimykaranaha.
5 Katsa Deus bo tsimypamykysokonahaze ahatsyhyryze niwatihi:
— O Deus sihumo tsimypokzitsiukrẽta. Ana soho ty hi tysihyrinymyryky. Sihyrizikbarasorykrẽtsa moziknaha. O mypehakatsa tysitsumuẽhĩ Kiristu wata sipunihikrẽtsa moziknaha. Zipehata tsipunihikrẽta ituktsa kino niwatihi iwata sipunihikrẽtsa moziknaha — tsimaha.
Iwa Deus bo ahatsyhyryze tsimypamykysokonaha, de.
Sesus tuktsa tarabaja mahatsa.
6 Kyze mytukytsa usa spirikpowy tsimaha. Mypehakatsa Sesus Kiristu iharere ahabo tsimytsasonaha. Wastuhu kytsa ahatuk zeka batu tarabaja zikaha. Ba ziksitsumuẽhĩnaha. Tarabaja batu hỹ zikaha. Sizikarẽtsa. Myspirikpowy soho humo batu waby zikaha iwatsahi sibo batu tyso.
7 Ikiahatsa botu ahahyrinymyrẽtsa. Katsaktsa ahatukze tsikahatsumuẽhĩkiknaha. Tarabajaziu tsikykaranaha. Iwa zikzurukunaha. Katsaktsa mypasaratsihikrẽtsa. Iwatsahi ikiahatsa astatu namysopykzuku mywatsa ikiahatsa ahapasaratsihikrẽtsa tsimoziknaha.
8 Katsaktsa tarabajaziu tsikykaranaha. Okoroze unata kino niwatihi tarabaja tsikykaranaha. Ahadisahawy ty mybo nyny tsikykaranahaze katsa okyrysaro ty ahabo nyny tsikykaranaha. Ihuak ty okyrysaro nyny tsikykaranaha. Kytsa nimytsumuẽhĩkĩnaha zeka okyrysaro ty sibo nyny tsikykaranaha.
9 Iwa tsimyzurukunaha. Ikiahatsa astatu mysopykzukutsa kytsa. Mywatsa tihi tsimyzurukunahaktsa! Katsaktsa Sesus ykzohotsa disahawy ty mybo nyny tsimaha zeka wasani tsimaha. Katsa mykzohotsa ahawahoro tsarawybyita humo haĩhaĩ tsimaha zeka wasani tsimaha. Katsaktsa batu hỹ tsimaha. Katsa hi tsipahatsumuẽhĩnaha okyrysaro ty ahabo nyny tsikykaranaha. Iwaze myhyriziktsokzawy bo iktsa tsimaha. Iwaze ikiahatsa mywatsa tu tahaktsa!
10 Botu tsiktsasokonaha ahape tsimaha:
— Aty mytuk mytytsumuehi ahabyizeka ba zik tadisaha. Aty mytuk yhỹ habyi zeka iwatahi idisahawy ty batu ibo nyny tsimaha — tsikaha.
11 Wastuhu kytsa ahatukze batu ahaty tsumuẽhĩ. Sizikarẽtsa maha mopamykysoikiknaha zuba. Batu iktsa zuba zikaha. Ana hi tsiwabynaha sizikarẽtsa soho iwatsahi tsinymyryzonaha ihyriziktsokzawy soho tsimaha.
12 Myspirikpowy tsiwabytoktonaha. Wabyziutaha! Sihyriziktsokzahabyitsa pe my:
— Mypehakatsa Sesus Kiristu humo tsipahakzonaha. Ihyriziktsokzawy humo zikbyituhukutu! Iwatsahi atukytsa tsimysidisahawykynaha. Pykyhytutaha humo, wasani tsimykaranaha — tsimaha.
13 Ikiahatsa, mytukytsa hi batu ahaku byrizikzumu tisapybakanahaktsa! Ahamysapyrẽtsa tsimoziknaha.
14 Aty myharere bo ahabyi zeka tsinytoktonaha. Aty myharere papeu humo batu hỹ my zeka ba ituk zikpamykyso. Batu ituk zikparak iwaze hi tisikpybyrẽta mozik.
15 Iwata humo ba zikmykyriwy. Atsy wata ipe tsimy:
— O katsy Deus harere bo wabyty! Iharere bo hyỹ tsimy. Ikia Sesus humo tispirikporẽta tsimykta — tsimaha.
Aba kaharere mopykyk.
16 Katsa Deus humo ahatsyhyryze tsikzapykykynaha. Katsa hi:
— O mypehakatsa ikia tsimymykuwyky. Iwaze batu paikpa mytsaty tsimykaranaha. Ahakurẽtsa tsimynakaranaha hỹ — tsimaha.
17 Abaka uta babata tu, piwataha. Utakta Pauro ahahumo kahyrizikbarẽta my. Iwa piwatahaka. Papeu humo tsizubarẽna iwa piwatahaka.
Deus pahasapywyky.
18 Abaka Deus pe my:
— O mypehakatsa Sesus Kiristu tysipokzitsiki. Sizubarẽtsa humo tsimypokzitsiukrẽta — my. De.
Pauro