2
Hawa Deus bo tsimypamykysokonaha ana soho hi piwatahaka.
1 Tapara ahape my:
— Deus bo typamykysonahaktsa! Myzubaha tsyhyryze Deus bo typamykysonahaktsa.
“O Deus tysitsumuẽhĩkĩ tsimaha. O myzo sihumo tsimypokzitsiarẽta tsimaha. Ikia zuba wasani tsimykara” tsimykaranaha — iky.
Iwa ibo tsimypamykysonaha. Kytsa tsyhyryze Deus bo tyzapykykynahaktsa! Amy tisapyrẽna anahi istsyhyryze tsimyzapykykynaha.
2 Mypehatsitsa tsyhyryze Deus bo typamykysonahaktsa. Sihudikhudikwy pehakatsitsa tsizubarẽna tsyhyryze Deus bo typamykysonahaktsa. Iwa hi:
— O Deus mypehatsa myhumo simypokzitsiukrẽtsa hỹ. Iwatsahi mykurẽtsa tsimaha. Ba zikahapebetsaknaha kyzekta tsimykaranaha. Katsa mykurẽtsa zuba tsimoziknaha. Deus harere bo zuba hyỹ tsimykaranaha iwaze wasani tsimykaranaha — tsimaha.
3 Katsa tsimyharape pokzitsikinaha zeka Deus tsakurẽta. Deus mymyoktyrykta my takino myhumo tsakurẽta. Ustsa kytsa kino niwatihi myharape pokzitsikinahaze tsakurẽta hỹ.
4 Myzubaha Deus humo sispirikporẽtsa moziknaha ana hi mozihikik. Iharere wasani my kytsa iharere piwabynaha anahi mozihikik. Iharere bo hyỹ maha zeka sinini ykarawy bo ba zikmypeha. Iwahatu myzubaha iharere bo hyỹ maha mozihikik.
5 Iwatahi Deus babata ikaha tahi zuba. Kytsa simysapybyritsa humo takyriki. Iwaze Sesus Kiristu mytsapuhyripyrywyta mybarawy bo inasikze maku niyzik. Nihyrikosokda kytsa zibezenaha. Nihyrikosokdaze kytsa simysapybyitsa nikaranaha iwatsatu nisiokzo. Atahi mysapyzeky nihyrikosokda ata zuba myhumo.
6 Iwatahi Sesus humo Deus ba ziktakyri. Iwa Sesus humo Deus kytsa ty batu ziktakyriwy. Deus wasaniha nitsaso tsihikikze Sesus nihyrikosokda naha soho nitsasoko. Sesus nihyrikosokda ana humo hi kytsa sihyrinymyrẽtsa. Deus bo mysioktyhyryk hỹ ana humo kino sihyrinymyrẽtsa.
7 Deus zikpeha kakzohota mozik. Iharere motsasoko ana humo hi zikwatawy. Kytsa Sudeutsabyitsa mysihyrinymyryky sibo zikykzohik. Wasi my. Kamyspihikbatabyita mykara. Ata hi:
— “Ikiahatsa Sesus humo ahaspirikporẽtsa tsimoziknaha” ispe tsimy iwa kape niy: “Iharere bo hyỹ tahaktsa kytsa” ispe tsimy: “Iwa kape” — niy. Iwa.
8 Iwaze abo motsasoko. Kytsa hudikhudikwy eze tu Deus bo typamykysonahaktsa. Izumubanahaze Deus bo mopamykysokonaha. Simysapyrẽtsa tahatsipatsa ty jobo bazuzu sisopyk iwa Deus bo mopamykysokonaha. Sibetsakokbyitsa Deus bo mopamykysokonaha. Siakyriukbyitsa kino niwatihi mopamykysokonaha. Izumubanahaze Deus bo mopamykysokonaha.
Wytykyryk Sesus humo sispirikporẽza.
9 Wytykyryk kino niwatihi. Sesus humo sispirikporẽza. Tahasuk ty korobyk mahaze sisapyrẽza moziknaha. Sisuk wasani my zeka kytsa batu sibo iktsaziu zikaha. Siharadi meky watu batu mykaranaha iwatsahi kytsa sibo batu iktsaziu zikaha. Sinaha tisapyrẽna. Sisuk tsipokzitsarẽna ty batu korobyk zikaha. Sisuk tsiziurẽna korobyk maha. Iwatsahi kytsa sihumo batu iktsaziu zikaha. Wytykyryk tahasuk soho bo batu mytsaty zikaha. Hawa sizubarẽtsa mysipokzitsinaha mytsaty maha. Ana bo hi mytsaty maha.
10 Wytykyryk motsasokonaha:
— O katsa za Sesus humo mospirikpoza tsimaha — maha. Asizahi pipokzitsikinaha zeka kytsa sisoho:
— O siza hi simysapyrẽza hỹ — maha.
11 Sesus tuktsa izumubanahaze wytykyryk tahabyri mopykyryknaha. Ahatuk ka soso byitaha:
— O katsaza myhyrinymybyiza iwazahi waby zuba — mykaranaha. Iwa soso byitaha. Asiza mypehatsa harere pinymyrykynaha.
12 Kytsa bo amy batu imysapybara ty ka isty spirikpo spirikpo byitaha! my. Iwa wytykyryk pe my. Asiza kytsa ba ziksipehanaha. Asiza pe my — Ikiahaka ahabyri ahakso byitaha — my.
13 Iwa asiza bo motsasoko. Tapara Deus Adão nizukni. Iwaze Ewa nizukni.
14 Hyrikoso sapybara pehatsa Satanas inarokota Adão bo mybarapetu niy. Wytyk zuba iharere humo yhỹ niy. Barapetu niyze atatsa iharere humo yhỹ niy. Atatsa hi tapara Deus harere bo batu ma niy.
15 Iwazahi simyitsapyrẽza. Ibykyhy mopurukze ky tsapyriwa. Siza Sesus humo mospirikponaha zeka tahahyrytsa tuk sakurẽza moziknaha. Ustsa humo mysipokzitsikinaha zeka sakurẽza moziknaha. Tahasuk ty korobyk maha zeka tisapyrẽna mozurukunaha Deus asiza mysioktyhyryk. Tahamysapybyri pimoewynaha zeka Deus mysiokzo. Iwa hỹ.