15
О барэ мануша э кхангеряки дикхенпэс андэ Иерусалими
1 Андар Иудея андэ Антиохия алэ мануша, савэ лилэ тэ сиклярэн э пхралэн:
— Тумэ тэ на керэна абризания, сар пхэнляс о Маисей, тумэ нащи овэн кутардимэна.
2 Адава андяс ко барэ ирищиматэс тай ко чингара машкарэ лэндэ э Павлэса тай э Варнавеса. Он гиндэ, со о Павел, о Варнава тай набут мануша лэндар кан джян андэ Иерусалими тэ зборизэн адалэстар э апостоленца тай э барэ манушэнца.
3 Э кхангери мукляс лэн, тай он гелэ андар Финикия тай Самария, пхукавэнас отхэ одолэстар, сар наиудея лэн тэ пакян э Дэвлэски. Адава габэри лошаскерэлас алаи э пхралэн.
4 Кана он алэ андэ Иерусалими, он дихлэпэс э кхангеряса, э апостоленца тай э барэ манушэнца тай пхукавдэ лэнги алаестар, со о Дэл кердяс андар лэндэ.
5 Ай о пакялэ, савэ сас андар джемэяти ки фарисеенго, пхэнэнас, о наиудея тэ керэн абризания тай тэ бэшэн, сар пхэнэл о Тхэдипэ э Маисееско.
6 О апостоля тай о барэ мануша кидинэпэс, тэ зборизэн адалэстар.
7 Палко бут зборима о Пётар ущино тай пхэнляс:
— Пхралалэн, сар тумэ джянэн, накхло бут вахыти одолэ десестар, сар о Дэл лиляс андар тумэндэ ман тэ пхукавав э збора э Лошанэ Габэрески э наиудеенги, тай он тэ пакян.
8 О Дэл, Саво джянэл э манушэнги илэ, башлады лэнги о Шужо Духос аякха, сар ли амэнги, тай сикавдяс адалэса, кай мукел лэн Пэстэ.
9 Ов на керэл нисаво палящима машкарэ амэндэ тай лэндэ, ай андар пакяпэ шужардяс ли лэнги илэ!
10 Ай соски тумэ зумавэн э Дэвлэс тай тхэн опэр мэня ки сиклярдэнги хамути, саво нащи гелэнас нэ амарэ дада, нэ амэ?
11 Вай амэ пакяс одолэски, кай диндяс кутардипэ андар мила ки Сагбуски Исусески. Аякха кутардиенпэс ли он.
12 Дэчи алаи тэныкисаилэ тай лилэ тэ шунэн о пхукаипэ э Варнавеско тай э Павлэско катар сикаипэ тай катар чюдэс, савэ о Дэл кердяс андар лэндэ машкарэ ко наиудея.
13 Кана он бытырдылар, о Яков пхэнляс:
— Пхралалэн, шунэн ман.
14 О Симон пхукавдяс амэнги одолэстар, сар о Дэл баштутнэс ало ко наиудея тай лиляс Пэски дюняс.
15 Адалэстар пхэнэн ли о прарокя, сар си яздимэ:
16 «Дэчи Мэ кан авав
тай генэ кан ваздав э пэравди катуна э Давидески.
Мэ кан гортярав лако хурдярипэ
тай доврус кан тхав ла,
17 тай авэра мануша тай алаи о дюнядэс,
савэ сас тхэдэ Мэ навэса,
лилэ тэ родэн э Сагбус.
Аякха пхэнэл о Сагбус,
Саво керэл алаи адава,
18 со Ов джянэл чёктан».
19 Оничин мэ гинав, кай амэ на камэл тэ керас пхарипэ э наиудеенги, савэ авэн ко Дэл.
20 Ами амэ камэл тэ яздияс лэнги письмас, он тэ дурён катар шэя, гарамя э идолэнца, катар кахпэлыки, катар мас ки тасавдэ гайваненго тай катар рат.
21 Вай о Тхэдипэ э Маисееско чёктан пхукавдёл андэ кажни дизатэ тай драпкердёл андэ синагогя кажни суббота.
Письмас э пакялэ наиудеенги
22 О апостоля тай о барэ мануша екхетханэ э кхангеряса гиндэ тэ лэн сарсавэ манушэн андар пумарэндэ тай тэ бичялэн лэн э Павлэса тай э Варнавеса андэ Антиохия. Он лилэ э Иудас, савэски дага пхэнэнас Вар-Савва, тай э Силас. Адала дуй сас барэ машкарэ ко пхрала.
23 Лэнца бичялдэ акасавко письмас:
«Катар пхрала апостоля тай барэ мануша
э пхралэнги андар наиудея, савэ си андэ Антиохия, Сирия тай Киликия:
Сэлями тумэнги!
24 Амэндэ шунлэ одолэстар, кай сарсавэ мануша, кай алэ амэндар, андэ тумэнги пумарэ зборэнца касэвэти тумарэ илэнги. Ай амэ лэнги ништо адава на пхэнлям.
25 Оничин амэ алаи екхетханэ гиндям тэ лас андар амарэндэ сарсавэ манушэн тай тэ бичялас лэн тумэндэ екхетханэ амарэ багалыдэнца э Варнавеса тай э Павлэса,
26 савэ си газыри тэ мэрэн андар нав амарэ Сагбуско ки Исусеско Христоско.
27 Амэ бичялас тумэндэ э Иудас тай э Силас, тай он зборэнца тэ пхукавэн одова, со амэ яздияс.
28 О Шужо Духос тай амэ гиндям тэ на керас тумэнги пхарипэ ништоса, екх одолэса, со камэл:
29 ма хан хапэ, саво андэ курбани аврэ дэвлэнги, мас тасавдэ гайваненго, рат, тай дурён катар кахпэлыки. Тумэ тэ керэн адава, тумэ кан керэн лачипэ.
Ачён Дэвлэса!»
30 О бичялдэ гелэ тай алэ андэ Антиохия. Отхэ он кидинэ э кхангери тай динэ о письмас.
31 О мануша драпкердэ лэс тай лошасаилэ э лаче габэрески.
32 О Иуда тай о Сила, савэ сас прарокя, пумарэ зборэнца зоралякерэнас тай сиклярэнас э пхралэн.
33-34 Он сас отхэ саво-то вахыти, тай о пхрала лачимаса муклэ лэн одолэндэ, кон лэн бичялдяс.
35 О Павел тай о Варнава ачилэ андэ Антиохия, катэ он бутэ аврэ пхралэнца сиклярэнас тай пхукавэнас э збора э Сагбуски.
Ирищима машкарэ ко Павел тай ко Варнава
36 Вахытестар о Павел пхэнляс э Варнавески:
— Эла джяс ко пхрала андэ алаи диза, катэ амэ пхукавасас э збора э Сагбуски, тай кан дикхас, сар лэндэ джял э дила.
37 О Варнава мангляс тэ лэл пэса э Иоаннес, савэски генэ пхэнэнас Марк,
38 ай о Павел на мангелас тэ лэл пэса одолэс, кон ачявдяс лэн андэ Памфилия тай на кердяс ярдыми тэ керэн пумари бути.
39 О ирищима сас асавко, кай он екхаврэстар дурилэ. О Варнава лиляс э Маркес тай гело опрал пани андэ Кипр,
40 ай о Павел лиляс э Силас. О пхрала динэ лэн андэ Сагбуски мила, тай он гелэ ко дром.
41 О Павел накхелас андар Сирия тай Киликия тай зоралякерэлас о кхангеря.