2
O Sveto Duho fuljisto pe apostolurja
1 Kana avilo o prazniko Pedesetnica, o pandžvardešto đes palo prazniko Pasha, sa e apostolurja sas ćidine pe jek than.
2 Katar jekhar andar o nebo ašundili varesavi huka, sago kana phurdel e bari balval, thaj pherdas sasto ćher ande savo bešenas.
3 Thaj dikhline vareso slično sago jagaće čhibja, save podelisajle thaj fuljistine pe svakoneste lendar.
4 Thaj savora pherdile e Sveto Duhosa thaj počnisardine te ćeren svato aver čhibjenca, sar o Duho delas len te ćeren svato.
5 A ande godoja vrjama ando Jerusalim sas e pobožne Židovurja save aviline andar svako krajo e themesko talo nebo.
6 Kana ašundine godova zvuko, o but o them ćida pes okote zbunime. Kaj svako lendar ašundas sar ćeren svato lešće čhibjava.
7 Savora sas zadivime, thaj začudime phučenas: “Dik, naj li akala kaj ćeren svato sa Galilejcurja?
8 Pa sar askal svako amendar ašunas len kaj ćeren svato pe amari čhib.
9 A akate maškar amende si amen Parćanurja, Međanurja, Elamcurja, manuša andar e Mesapotamija, Judeja, Kapadokija, Ponta, Cikni Azija,
10 Frigija, Pamfilija, Egipto thaj andar e libijske krajurja oko e Kirina, thaj okola andar o Rimo
11 – e Židovurja thaj okola save obratisajle pe židovsko paćipe – e Krićanurja thaj e Arapurja. Savora amen ašunas akale manušen sar pe amare čhibja ćeren amenđe svato pale Devlešće bare dela!”
12 Savora sas zadivime, thaj zbunime phučenas jek avres: “So akava značil?”
13 A aver palem marenas muj e alavenca: “Ma, matile von katar e gugli mol!”
O Petar propovedil
14 Askal o Petar inkljisto anglal, zajedno e dešujeće apostolenca thaj glasno phendas lenđe: “Židovurja thaj vi tumen savora save sen ando Jerusalim, čhon kan ke mungre alava. Thaj akava te džanen:
15 Akala manuša naj mate, sago kaj tumen gndin, kaj tek si inja saturja detharinako rano.
16 Nego akava so dićhen si okova pale soste phenelas o proroko Joil:
17 Phenel o Del: ‘Ande poslednje đesa,
izliva mungro Duho pe sa e manuša.
Tumare čhave thaj tumare čheja prorokuina,
thaj tumare terne čhaven avela vizije,
a tumare phure dićhena sune.
18 Ande godola đesa izliva mungro Duho
vi pe mungre sluge thaj pe mungre sluškinje
thaj vi von prorokuina.
19 Ćerava čudurja opre po nebo
thaj e znakurja tele pe phuv:
o rat, e jag thaj e oblakurja katar o thuv.
20 O kham pretvorila pe ando tunjariko,
a o čhon avela lolo sago o rat
majsigo nego so avela o baro thaj o pindžardo đes e Gospodesko.
21 Thaj svako ko akharel ando pomoć o alav e Gospodesko
avela spasime.’
22 Manušalen andar o Izrael, ašunen akala alava: O Isus andar o Nazaret sas manuš saves o Del bičhaldas, thaj godova jasno potvrdisarda e bare delenca, e čudenca thaj e znakonenca, save sar vi korkoro džanen, o Del kroz leste ćerda maškar tumende.
23 Godova manuš, o Isus, sas predaime ande tumare vas e Devlešće odlukava thaj prema e Devlesko plano saves majanglal zamislisardas. A tumen, zajedno e bidevlešće manušenca, prikuisardine les po trušul thaj mudardine les.
24 Ali o Del vazda les andar e mule thaj oslobodisarda les katar e bare smrtne muke. Kaj o smrto našti inćarda les ande piri vlast.
25 O caro David palo Isus phendas:
‘O Gospod si uvek angle mungre jakha.
Pošto si vo pe mungri desno rig,
khanči či uznemirila man.
26 Zato mungro ilo raduil pe,
thaj mungri čhib e bahtatar čhol muj.
Čak vi mungro telo trajila ande nada.
27 Kaj či mućeja mungri duša maškar e mule,
niti deja te ćiro sveco ćernjol.
28 Sikadan manđe e droma e trajošće.
Pherdo bah angle tute avava.’
29 Phralalen mungralen, pouzdano šaj phenav tumenđe pale amaro pradad o David: vo mulo thaj prahome si. Lesko limori si akate maškar amende sa dži ađes.
30 Ali sar o David sas proroko, džanglas kaj o obećanje savo o Del dija les kroz e solah, kaj jek đes čhola pe lesko prestolje jećhe katar lešće potomkurja.
31 Vo godova majanglal dikhla thaj phendas pale Hristosko vaskrsenje:
‘Vo naj muklino maškar e mule
niti lesko telo ćernjilo ando limori.’
32 O Del godole Isuse vazdas andar e mule, a savora sam svedokurja pale godova.
33 Thaj akana si vazdino pe počasno desno rig e Devlešće, vo e Dadestar primisardas o obećanje e Sveto Duhos te izlil les pe amende. Thaj akana godova dićhen thaj ašunen.
34 Kaj o David nas vazdino ando nebo, nego korkoro phenel:
‘Phenel o Gospod mungre Gospodešće:
“Beš pe mungri počasno desno rig
35 dok či čhav ćire dušmajen tale ćire pungre. ” ’
36 Zato neka sa o them andar o Izrael pouzdano džanel kaj godova Isus, saves tumen razapnisardine, o Del ćerda te avel Gospod thaj Hristo!”
37 Kana e manuša godova ašundine, zurale čhinda len ando ilo thaj phučline e Petre thaj e aver apostolen: “Phralalen, so te ćeras?”
38 O Petar phendas lenđe: “Pokajin tumen katar o bezeh thaj neka svako tumendar bolel pe ando alav e Isuse Hristosko te aven jartome tumare bezeha, thaj te primina o daro e Sveto Duhos.
39 Kaj o Del akava obećisarda tumenđe thaj tumare čhavrenđe thaj pale sa okola save si dur, saven amaro Gospod o Del akharel peste.”
40 O Petar još vi aver alavenca strogo opominjilas len thaj molilas len e alavenca: “Spasin tumen katar o sudo savo avel pe akava rumome naraštaj!”
41 Askal okola save prihvatisardine lešći poruka boldine pe, a godova đes pridružisajlo e vernikonenđe varekaj katar trin milje manuša.
Okola save paćajine ćidenas pe zajedno
42 Thaj sa e učenikurja ačhiline paćivale ande apostolsko sikavipe, družinas pe, phađenas o mangro thaj molinas pe.
43 Thaj e dar lija svakone manuše, zato kaj o Gospod kroz e apostolurja ćerelas but čudurja thaj znakurja.
44 A savora okola save paćajine sas zajedno thaj delinas sa so sas len.
45 Bićinenas sa so sas len thaj e love delinas svakonešće kozom kas trubulas.
46 Thaj svako đes zajedno jek dušava ćidenas pe ando Hramo. A pe ćhera ćidenas pe te phađenas o mangro thaj zajedno hanas iskreno thaj e bahtale ileja.
47 Hvalinas e Devles thaj poštuilas len sa o them. A o Gospod svako đes anelas lenđe okolen save spasisajle.