4
O Beng iskušil e Isuse
(Mk 1,12–13; Lk 4,1–13)
1 Askal o Sveto Duho inđardas e Isuse ande pustinja te iskušil les o beng.
2 O Isus postilas štarvardeš đesa thaj štarvardeš raća, a pale godova bokhajlo.
3 Askal avilo leste o beng thaj iskušisarda les gajda kaj phendas lešće: “Ako san Čhavo e Devlesko, phen te akala bara aven mangre.”
4 A o Isus phendas: “Ando Sveto lil ačhel ramome:
‘Či trajil o manuš samo katar o mangro,
nego katar svako alav savo inkljel andar e Devlesko muj.’ ”
5 Askal o beng inđarda e Isuse ando Sveto gav Jerusalim thaj čhuta les po vrho e Hramosko,
6 thaj phendas lešće: “Ako san tu Čhavo e Devlesko, čhude tut katar tele. Kaj ando Sveto lil ramol:
‘Pire anđelenđe zapovedila pale tute’
thaj: ‘von pe vas inđarena tut
te či pećes e pungresa ando bar.’ ”
7 A o Isus phendas lešće: “Ramome si vi akava: ‘Na iskušisar e Gospode ćire Devle.’ ”
8 Askal o beng inđarda les po vrho pe vuči gora, thaj sikadas lešće sa e carstvurja akale themešće thaj e slava lenđi.
9 Thaj phendas lešće: “Sa akava dava tut ako peres pe koča angle mande thaj slavis man.”
10 Askal o Isus phendas lešće: “Džatar mandar, Sotono, kaj ando Sveto lil si ramome: ‘De koča samo anglo Gospod ćiro Del, thaj jedino les slavisar.’ ”
11 Askal o beng đelotar lestar, a e anđelurja odma aviline thaj služisardine lešće.
O Isus počnisarda te propovedil
(1,14–15; Lk 4,14–15)
12 Kana o Isus ašundas kaj phangline e Jovano savo bolelas, bolda pe ande galilejsko regija.
13 Avilo prvo ando Nazaret thaj okotar đelotar thaj nastanisajlo ando Kafarnaum, gav pašo galilejsko jezero, pe Zavulonešći thaj e Neftalimešći phuv.
14 Gajda pherdilo so phendas o proroko Isaija:
15 “Ande phuv e Zavulonešći thaj e Neftalimešći,
pašo more, pe okoja rig e jordanošći,
ande Galileja, e phuv savi nas e židovenđi,
16 e manuša save trajinas ando tunjariko,
dikhline o baro svetlo
thaj okolenđe save trajinas ande mračno phuv,
ande sena e smrtošći
zasjaisardas o svetlo.”
17 Katar askal o Isus počnisarda te propovedil: “Pokajin tumen pale tumare bezeha thaj obratin tumen kaj si paše o Carstvo nebesko!”
O Isus akharel e prve učenikonen
(Mk 1,16–20; Lk 5,1–11)
18 Kana o Isus naćhelas pašo Galilejsko jezero, dikhla e duj phralen e Simone saves akharenas Petar, thaj lešće phrale e Andrija, sar čhuden e mreža ando jezero, kaj von sas ribarja.
19 Thaj o Isus phendas lenđe: “Aven pale mande thaj me ćerava tumen te aven ribarja save astarena e manušen sago e mačhen.”
20 Von odma mukline e mreže thaj teljardine pale leste.
21 Kana o Isus đelo majdur okotar dikhla e aver duj phralen, e Jakove thaj e Jovane e Zevedejevešće čhaven, sar bešen ando čamco pire dadeja thaj lačharenas pire mreže, askal akhardas vi len.
22 A von odma mukline o čamco thaj pire dades thaj teljardine pale leste.
E Isusešći služba ande Galileja
(Lk 6,17–19)
23 O Isus džalas pe sasti Galileja thaj sikavelas e manušen ande lenđe sinagoge, propovedilas lenđe e Bahtali nevimata pale Devlesko carstvo thaj sastarelas katar o nasvalipe thaj svako nemoć andar o them.
24 O glaso pale leste buljilo pe sasti sirisko regija, thaj anenas lešće sa okolen save sas nasvale katar o razno nasvalipe savo mučilas len, okolen ande save sas e bilačhe duhurja, mesečaren thaj e linen thaj vo sastarelas len.
25 Pale leste teljardas o but o them andar e Galileja, Dekapolja, Jerusalim thaj andar e sasti Judeja, pa vi katar okoja rig e jordanošći.