Лил лэ Ионастар
Тэ авэн бахталэ!
Тумэндэ ритярэна андэ васта лил пала пророко Иона. Иона сас екх колэндар манушэндар, черэз кастэ о Дэл отпхандавэлас манушэнди пэстери воля, акхарэнас лэн тэ ашавэл лэндерэ бэзэха тай тэ жувэн вужэ жувимаса.
Иона жувэлас андо VIII вико англа амари эра андо Израилё. Андэ кадыя время паша Израилё сас Ассирийско империя, савяса Израилё бари время сас маримос. О Дэл пхэндя лэ Ионасти тэ жал андо Ниневия, майпхуро форо андо Ассирийско империя, и тэ приакхарэл лэ манушэн, савэ котэ жувэнас, тэ ашавэн захало тай прахаримаско жувимос. Иона ганэлас, сар бут холи ассириянуря терэнас лэ израильтянонэнди, и черэз када вов на закамля тэ прилэл кода, со лэсти припхэндя о Дэл, и камля тэ нашэлтар, соп тэ на терэл кода, со Вов припхэндя. Чи выжыля лэстэ када, чи най, тумэ уганэна, кала продинэна вся кадыва лил.
Кадыва роспхэнимос лино андай Библия, сави исин пэ бут люматерэ шыба, ай екхатар вой пэрэандярэлпэ и пэ романи влахицко шыб. Кажно пэрэводо — када пхари бути, соб тэ аракхэл тай тэ стхол алава, соб тэ пэрэдэл чячюно гыдно, саво запистросардо андо оригинально лил пэ пхуро евреёско шыб. Мэк катэ и авэна койсавэ найбарэ различия, майбаро гыдно на парудэлпэ.
Амэ наисарас колэнди, ко пэрэандярэлас и терэнас редакция колэсти лилэсти, ай кадя всаворэнди, ко поможысарэлас тэ гэтон лэс важ э публикация.
1
О Иона нашэл Дэвлэстар
1 Карик о Иона, лэ Амитаёско шаво, сас о алав лэ РАЕСТАР:
2 — Ущи, жа андо баро форо Ниневия тай роспхэн котэ о алав. Мандэ дожыля дума пала лэндерэ холятерэ дилэ.
3 Ай о Иона тидяпэ тэ нашэлтар лэ РАЕСТАР андо Таршышо. Вов авиля андэ Яфа, тай аракхля э барка, сави жаластар андо Таршышо. Вов потиндя важ о дром, вазгляпэ пэ барка и лаглятар лэнца па паи, соп тэ нашэлтар лэ РАЕСТАР андо Таршышо.
4 Тунче о РАЙ бишалдя холяти балвал по баро паи. Вагляпэ кацаво зорало штормо, со э барка сас гата тэ розмардёлпэ.
5 Саворэ морякуря пэрэдарайлэ, вонэ линэ тэ мангэнпэ кажно пэстерэ дэвлэсти. Вонэ пошутэ пай барка ся о паримос андо баро паи, соп тэ авэл майвушэро.
Ай англа када о Иона упрал змэкляпэ тэлэ, пэля и састэс засутя.
6 О барэдэр ла баркако авиля каринг о Иона и пхэндя:
— Со ж ту совэс? Ущи, акхар терэ Дэвлэс! Сар Вов шола пэр амэндэ само тай на дэла амэнди тэ хасайвас.
7 Тунче э морякуря пхэндэ екх екхэсти:
— Шам э врэжа, кай тэ ганас, пала кастэ пар амэндэ авиля кадыя бида.
Вонэ шутэ э врэжа, и вой пэля по Иона.
8 Тунче э морякуря пхэндэ лэсти:
— Пхэн, пала кастэ пар амэндэ авиля кадыя бида? Соза залэспэ? Катар ту авилян? Савя пхувятар? Тай савэ манушэндар?
9 О Иона пхэндя:
— Мэ сым евреё, тэлював лэ РАЕСТИ, о Дэл лэ нэбоско, Саво стердя о баро паи тай э пхув.
10 О Иона роспхэндя лэнди, кай вов нашэлтар лэ РАЕСТАР. Калэ алавэндар вонэ фартэ пэрэдарайлэ и пхэндэ лэсти:
— Со ж ту када тердян?
11 Ай о баро паи ся ваздэласпэ майфартэ и майфартэ. Тунче вонэ пушлэ лэстар:
— Со амэ тэ терас туса, кай о баро паи тэ улэлпэ?
Вов пхэндя лэнди:
12 — Ваздэн ман и шон андо баро паи, тунче вов улэлапэ. Мэ ганав, со када баро штормо авиля пэр тумэндэ черэз мандэ.
13 Э морякуря линэ анда ся зор тэ примардён каринг э риг ла пхувяти. Ай пэ када на хутилэлас лэндэ зор, пала кода со о штормо фартэ ваздэласпэ.
14 Тунче вонэ линэ тэ мангэнпэ лэ РАЕСТИ:
— РАЙ, на мар амэн пала кода, со амэ умараса калэ манушэс. На стов пар амэндэ э дош, кай умарас найдошалэ манушэс. Ту РАЙ, тай Ту терэс кода, со Ту камэс.
15 Вонэ линэ тай шон лэ Ионас пай барка, и о холяко баро паи уляпэ.
16 Бари дар авиля лэндэ англа РАЙ, вонэ андэ жэртва и динэ РАЕСТИ алав.