3
Hau blanga jidan wekinmen blanga God
1-2 Wal main braja en sista olabat, wen aibin deya garram yumob, nomeda yumob bin bilib langa Jisas Krais, bat stil ai nomo bin tok langa yumob seimwei laik mi oldei tok langa ola najalot pipul hu garram det Holi Spirit. Mi oldei tok langa olabat garram det wed weya jidan jis laiga strongwan daga. Bat ai nomo bin tok langa yumob lagijat, dumaji yumob bin jidan jis laiga beibi weya nomo sabi enijing, en aibin lafta tok langa yumob seimwei laik mi oldei tok langa detlot pipul hu stil bulurrumbat olabat ronwei. Mi oldei tok langa olabat garram det wed weya jidan jis laik milk. En aibin lafta tok langa yumob lagijat du, dumaji yumob bin jidan jis laiga beibi weya im oldei dringgimbat milk.
3 En stil tudei ai kaan tok langa yumob garram det strongwan wed, dumaji yumob stil jidanbat jis laik detlot pipul hu bulurrumbat olabat ronwei.
Dijan weya mi tok im trubala, dumaji yumob oldei jelas miselp en agamin gija jis laik detlot pipul hu nomo bulurrum God. Yumob jidan jis laiga odinri pipul hu oldei bulurrumbat olabat ronwei.
4 Yumob sabi wanim mi tok? Sambala pipul brom yumob tok, “Melabat bulurrum Pol.” En najalot pipul tok, “Melabat bulurrum Apalas.” En wen yumob tok lagijat, wal ai sabi yumob bulurrumbat det wei blanga ola odinri pipul.
5 Wal yumob dalim mi na. Hu dijan Apalas? En hu dijan Pol? Nomeda minbala bin dalim yumob det gudnyus weya bin meigim yumob bilib, bat stil minbala nomo enijing. Minbala oni wekinmen blanga God, en minbala bin oni dumbat det wek weya God bin gibit langa minbala.
6 Aibin dalim yumob det gudnyus basdam jis laik det fama weya im plentimbat det sid, en afta Apalas bin kipgon titjimbat yumob jis laik det fama weya im kaman biyain en wodarimbat det gadin. Bat minbala nomo bin meigim det gudnyus wek langa yumob laif. God bin meigim det gudnyus wek langa yumob laif.
7 Yu si? Det sambodi hu dalimbat det gudnyus, im nomo enijing. En det sambodi hu kaman biyain en titjimbat det gudnyus, im nomo enijing du. Oni God na im haibala, dumaji im na meigim det gudnyus wek langa yumob laif.
8 En det dubala hu dalimbat en titjimbat det gudnyus, wal dubala seim, en God garra peiyim dubala blanga det wek weya dubala dumbat.
9 Yumob sabi na? Minbala Apalas wek mijamet blanga God jis laik dubala fama weya dubala wek mijamet, en yumob na jis laik det gadin blanga God weya minbala oldei wek.
En yumob jis laiga haus blanga God du.
10 God bin gibit mi speshalwan wek blanga bildimap det haus. Imbin meigim mi sabi hau blanga dum det wek brabliwei, en aibin bildimap det bodampat blanga det haus brabli strongbala, en brom deya det najawan men bin kaman en bildimap det hauspat.
11 Wal ai dalim yumob. Ebribodi garra jinggabat weya im bildimap det haus, dumaji God bin meigim Jisas Krais na det bodampat blanga det haus blanga im, en nobodi kaan meigim najawan bodampat blanga bildimap haus.
12-13 En ebribodi garra jinggabat hau im bildimap det haus ontop langa det bodampat, dumaji ebribodi wek garra kamat langa det dei weya Jisas Krais garra kambek, en God garra luk det wek weya ebribodi bin dum, en im garra testimbat ebribodi wek garram faiya, en det wek blanga detlot pipul hubin bildimap det haus garram gol en silba en purdiwan ston kaan barnap. Bat det wek blanga detlot pipul hubin bildimap det haus garram olkain wud en gras garra barnap.
14 Wal if det wek blanga enibodi nomo barnap, wal God garra gibit im prais.
15 Bat if det wek blanga im barnap, wal God kaan preisim im. Bat God garra stil seibum im. Im jis laik det faiya bin gulijap binijimap im.
16 Maitbi yumob nomo sabi. Ol yumob Kristjan pipul, yumob na det serramoni pleis blanga God, en det Holi Spirit im jidanbat langa yumob.
17 En if enibodi meigim nogud det serramoni pleis blanga God, wal God garra panishim im, dumaji det serramoni pleis blanga God im brabli seikridwan. En wanim det serramoni pleis? Yumob Kristjan pipul na jis laik det serramoni pleis.
18-19 Yumob sabi na? Yumob nomo wandi jinggabat nogudbalawei en bulurrum yumob ronwei. Pipul oldei jinggabat olkainwei blanga dijan wel, en dei reken miselp dei sabi ebrijing. Bat detkain ting weya dei oldei jinggabat nomo enijing langa God.
Yu si? If enibodi wandi sabi det wei blanga God, en if im reken miselp klebabala langa det wei blanga dijan wel, wal im garra libum det klebabalawei en jidan jis laik im nomo sabi enijing en lisin langa God. Wi sabi tharran, dumaji langa oltestaman im tok, “God garra blokim detlot pipul hu reken dei sabi ebrijing, en im garra blokim olabat garram olabat ronwan klebabala plen.”
20 En langa oltestaman im tok lagijat igin. Im tok, “God sabi ebrijing weya detlot pipul jinggabat, en im sabi detlot ting nomo garram eni pawa.”
21 Yumob sabi na? Yumob kaan laigim wanbala men en tok praudbalawei blanga det wanbala men blanga ola wed weya im dalimbat yumob, dumaji God bin gibit yumob ol detlot men blanga dalimbat yumob ebrijing.
Yu si? God bin gibit yumob ebrijing.
22 Imbin gibit yumob Apalas en Pida, en imbin gibit mi langa yumob du. En imbin gibit yumob dijan wel en dijan laif en det greibyad du. En imbin gibit yumob tudei en tumorro du. Ol dislot ebrijing iya blanga yumob.
23 En imbin gibit yumob langa Jisas Krais. En Jisas Krais im blanga God.