3
Hebakak bin prei
1 Wal mi na Hebakak, det speshalwan mesinja blanga God en dijan na main preya langa YAWEI det trubala God.
2 “YAWEI, aibin irrim wanim yubin dum.
Aibin brabli hatjamp en yubin meigim mi brabli gudbinji detmatj blanga ebrijing yubin dum.
Mi wandim yu blanga dum diskain ting igin tudei,
detlot gudbala ting yubin oldei dumbat bifo.
En ai askimbat yu blanga kain langa melabat nomeda yu gitwail.
3 “Yu na det brabli holiwan God hubin kaman brom det deset kantri wen olabat grengrenfatha bin jidan langa det hil gulum Sainai.
Det shainiwan lait blanga yu gaburrumap det skai,
en pipul tok brabli gudbalawei blanga yu ebriweya iya langa dijan wel.
4 Det shainiwan lait blanga yu shain laik det san,
en det lait spredat ebriweya brom yu bingga weya yu oldei blandimbat det strongwan pawa blanga yu.
5 Yubin jandim olkain siknis blanga go lida,
en yubin gibit oda langa najakain siknis blanga binijimap pipul.
6 Wen yubin stap wokwokbat dijan wel bin sheik,
en wen yubin luk, pipul langa ebri kantri bin jidan brabli bradinwan.
En wen yu wokwokbat langa det roud blanga yu weya bin jidan longtaim,
ol detlot bigwan hil en lilwan hil buldan.
7 Aibin luk detlot pipul deya langa det kantri neim Kushan deibin bradin,
en detlot pipul brom det kantri neim Midiyan, olabat bin sheiksheik detmatj.
8 “Wal wanim bin meigim yu gitwail YAWEI?
Maitbi detlot riba,
o maitbi det solwoda bin meigim yu brabli wail, bat najing.
Imbin jis laik yubin jidan ontop langa detlot klaud,
en detlot rein klaud bin blanga yu hos en bagi,
en yubin bidim ol detlot enamimob blanga yu pipul olabat.
9 Yubin gitredi blanga yusum yu bo en erro,
en det jigiwan laitining blanga yu bin opinimap dijan graun en meigim ola riba kamat.
10 Wen detlot bigwan haiwan hil bin luk yu, deibin sheik nomo lilbit,
en rein bin buldan brom skai.
Det woda bin boilap brom andanith det graun,
en det solwoda bin gidap haibala.
11 Det san en mun bin jidan wan pleis,
en yu erro en spiya bin flai wulijim laitining.
12 “Wen yubin brabli gitwail,
wal yubin wokwok ontop langa ola traib.
13 Yubin go blanga seibum yu pipul,
en yubin seibum det king hu yubin pikimat.
Yubin binijimap det najawan bos blanga nogudbalawei,
en ol im wekinmen du.
14 Detlot solja blanga im bin kaman laiga bigbala rein klaud.
Deibin trai blanga meigim melabat ranawei,
en deibin hepi blanga binijimap melabat,
bat melabat bin haidim miselp.
En afta, yubin kilim ded olabat garram olabat ronwan spiya.
15 Detlot hos en bagi blanga yu bin go kwikbala en sterrimap det solwoda.”
Lagijat na aibin prei.
16 Wal wen aibin jinggabat ol dislot ting aibin fil brabli wik en bradin,
en main mawus bin sheiksheik.
Main boun bin gulijap barn en aibin wokwok laiga drangginbala.
Bat ai garra jidan kwaitbalawei en weidabat blanga det dei bambai wen YAWEI det trubala God garra panishim melabat enami.
Trastim YAWEI langa det taim wen yu abum trabul
17-18 Wal mi na Hebakak, en mi tok dijan,
“Ai garra preisim YAWEI brabli gudbinjiwei nomeda detlot figtri nomo abum daga,
en ola greiptri, dei nomo abum daga.
Nomeda detlot olibtri nomo abum eni daga
en nomo eni sid daga gro langa detlot pedik.
Nomeda ola ship dai,
en det pleis weya detlot buligi jidan, im emtiwan,
bat trubala, ai garra stil preisim YAWEI,
dumaji im na bin seibum mi.
19 YAWEI, yu na det boswan God, en yu meigim mi strongbala.
Yu meigim main fut seifwan wulijim det enimul gulum diya,
en yu oldei lukaftumbat mi ontop langa detlot bigbala hil.”
Binij na.