135
Dijan preis song
1 Preisim YAWEI det trubala God!
Preisim im neim, ol yumob hu wek blanga YAWEI.
2 Yumob hu wek deya insaid langa det haus blanga YAWEI wi God,
3 preisim im dumaji im gudwan.
Sing song blanga preisim im neim dumaji im jidan kainbala.
4 Imbin pikimat Jeikob en ola Isreil pipul blanga im ronselp.
5 YAWEI im God blanga wi,
en ai sabi im det brabli haibalawan God.
Im mowa haibala langa najalot drimin.
6 Im dum wanim im wandim langa hebin en langa dijan kantri en insaid langa solwoda raitdan langa bodam.
7 Im bringimap rein klaud brom olaran langa ebri kantri.
Im meigim laitining blanga ola bigwan rein,
en im bringimap win brom det pleis weya im jidan.
8 Langa det kantri Ijip imbin binijimap ola men en ola enimul hubin bon fes.
9 Deya na imbin dum ola klebabala ting blanga panishim det king en ol im brabli haibala wekinmen olabat.
10 Imbin binijimap detmatj pipul brom najalot kantri,
en ola brabli strongbala king,
11 det King Saihan blanga det Emarait traib,
en King Og brom Beishan,
en ola king langa det kantri gulum Keinan.
12 Imbin gibit ola kantri blanga olabat langa ola Isreil pipul,
detlot pipul blanga im na.
13 YAWEI, pipul garra oldei tok yu jidan God.
Brom ola femili tudei raidap langa ola femili hu garra jidan bambai, dei garra oldei jinggabat blanga yu.
14 YAWEI garra oldei lukaftumbat im pipul olabat.
Im garra oldei jidan kainbala langa im wekinmen olabat.
15 Ola pipul brom najalot kantri bin meigim ola drimin sheip garram gol en silba.
Deibin meigim garram olabat ronwan bingga.
16 Detlot drimin sheip garram mawus bat dei kaan tok,
en dei garram ai bat dei kaan luk.
17 Detlot drimin sheip garram irriwol bat dei kaan irrim,
en dei nomo blowin.
18 Larram ol detlot pipul hubin meigimbat olabat en hu trastimbat olabat,
jidan nomo garram eni pawa wulijim detlot drimin sheip.
19 Ola Isreil pipul, preisim YAWEI!
Ola wekinmen blanga God, preisim im.
20 Ol yumob Libai klen, preisim YAWEI.
Ol yumob hu weship im, preisim im du.
21 Preisim YAWEI langa Saiyan deya langa Jerusalem weya im jidan.
Preisim YAWEI det trubala God!